Read Nocte Naga Mathiu 4 Bible Online

Mathiu 4 - Nocte Naga bible

Mathiu 4

¹Erediko Juma Jisu lindong lakdong nâng juchhihma hungtôanrãng sietchhoan wah.

²Ngih roakbelii pen roakbelii lephhek lechhah thangma tôngdiko Jisu rêmritwah.

³Ephumma Jisu tânâng juchhih pa hûlahma ngatwah, “Nanga Joban Chha medang oko, are longheh nâng phhekchhah rãng litjârãng chien o.”

⁴Phumma Jisu ma dânthâng wah, “Joban nyapraangma aroh ngaeka, ‘Mihnyan pa phhekchhah junma lolo hîn dangmah, Joban thunwah chentô loatjab eka jabkhab heh junmaba hineki.’ ”

⁵Erediko juchhihma Jisu Asâthôan Hahdaang, Jeroselem hahko sietkat lahma, Rangsoamhum khokowah achoang thôanko sietwênwah,

⁶ngale Atenâng ngatwah, “Nanga Joban Chha medang oko, nangdede arekowah jârii katan, chenrãngma ngako Joban nyapraangma ngaeka, ‘Joban ma ate ngintatte hehnâng nangrãngma echien a; thindekma nang etãnglo wak ho, Ephumma nangda min longko lebuhrii thangma edango.’ ”

⁷Jisu ma dânthâng wah, “Rohkomin Joban nyapraangma arohmin ngaeka, ‘Teso nang Joban nâng hung nektoan.’ ”

⁸Erediko juchhihma Jisu nyahrãng hahkongchoang khonâng sietwên lahma hahtokkhoh wah hahsông hahdaang asen chentôpa Atenâng khesokwah.

⁹Juchhih ma ngatwah, “Nangma nganâng dakuhtho lohma rangmesoam hangko,” “are chentôpa ngama nangnâng koh e.”

¹⁰Eko Jisu ma dânthâng wah, “joak, chhoan o!, Joban nyapraangma ngaeka, ‘Nang Joban Teso nâng soam o, ngale atelolo soangraango!’ ”

¹¹Ephumma juchhih ma Jisu thînphêwah; ngale Joban ngintatte kalahma Jisu nâng chohsok katwah.

¹²Chenthu Jisu ma Jon phâtek nâng loatsekpa tatphumma, ate Galili nâng katwah.

¹³Ate Nazarat nâng letong thangma, Jubulon ngale Napthali jaawah Galili josi kahwah Kaparnam hahnâng sôngkatwah.

¹⁴Arepa Mõng Isaia ma jabtah nginpa toangtang dângkat rãngma hôanwah:

¹⁵“Jubulon ngale Napthali jaa, josi nâng katlem kêmko, jordanjo ranka nâng, Galili, Jews ledangte heh hah!

¹⁶Rangnyek khennâng sôngte mihnyan hehma nyahrãng wenphiak dong echohkhe wak a. Arit amahthin rangnyek hahnâng sôngte mihnyan heh khohnâng wenma ephiakkat a.”

¹⁷Ere sanpoat pumma Jisu ma Joban nginkong bengphoang thôwah: “Ne papwah hunglit en, chenrãngma ngako rangkhethung Hahsông pa lânam hûtha!”

¹⁸Jisu Galili josikem jêngjêngma khoampoatko, Atema ngahloatte pho anaa wanii khewah, Simon piter ngale ate naa Andru, josiko chaakma ngahhat dângwah.

¹⁹Jisu ma thinnâng ngatwah, “Ngadijun ha, ngama mihnyan loatrãng hethôa.”

²⁰Lemlienma thinchaak pa thinphe lahma Jisu dijun wakwah.

²¹Noangthe wângko pho anaa wanii, Jems ngale Jon, Jibidi chha wîenkhe wah. Thin a khôankhoko thinwa demko chaak senphin lahma dângwah. Eko Jisu ma thinnâng roowah,

²²Lemlienma khôankho ngale thinwa phethien lahma Jisu dijun wakwah.

²³Jisu ma Galili jaatang nâng phoangkhoam lahma Sanagog hehnâng hethô, Joban Hahsông Nginkongsen pa phoangthôkoh, ngale jatrup khoanchet, khun atamte heh mesiet rewah.

²⁴Ate nginpa Siria diak phangtangma chohtat wah, ephumma mihnyan hehma jatrup khoanchette, khunte: juchhih lupte mihnyan heh, wobuh, kôasôte heh - ate tânâng siethû kolahma atema mesietwah.

²⁵Jahmõang mihnyan heh atediko Galili ngale Dekapoli, Jeroselem, Judia, ngale jordanjo rankawah jahmõang mihnyan hehma ate dijun wah.