Read Nocte Naga Mathiu 6 Bible Online

Mathiu 6 - Nocte Naga bible

Mathiu 6

¹“Nema mihnâng chohsok moatlem memo enko mihhehma chenkhehi ngama thonghun letma nok atang chhangko nekmo en. Nema ere moatlempa mihmathah ko memo enko, nema rangkhethung wah newa Joban wah chenjô lechohmin.

²“Erohwah chenthu nema tangchhih hehnâng chenni komin mechohsû enko, ahuhkhoanglep hehma rangsoamhum ngale noknyu lemdong hehnâng phoang khesok lahma moat rãngrãng rângthôrii letma nekmo en. Thinma arepa mihhehma rângthô chenrehi ngama moeka. Ngama linlin thôkoh eka, thinma chohthinpa phangtang râchohtah.

³Rohkomin nema tangchhih hehnâng mechohsû enko, ne lemruchha asenthôan pummemin lejetli mo en.

⁴Nema chohsû eken pa henmejô lejetli mo en. Eroh koba nema ahuh chhama, moeken pa ne Wama, khelahma erethã nenâng rang ekohhèn.

⁵“Chenthu ne rangsoamko, ahuhkhoanglep heh rãngrãng neksoam en! thinma anga ngama chenkhêm khehi ngama, rangsoamhum nâng toanchep lahma soamhun eka, ngale noknyu lemdong hehnâng soamhun eka. Ngama linlin thôkoh eka thinma chohthinpa phangtang râchohtah.

⁶Chenthu nema rangsoamko, humkhen nâng wãngletma kâsek sekletma mitma lekhe ne Wa Joban nâng soam en, ngale ne Wa Joban ma ahuh chhama moatpa khelahma nenâng rang ekohhèn.

⁷“Chenthu nema rangsoamko, Joban lejette heh rãngrãng, sekhota jabkhab heh nekmenjab en, thinma ranglo soamdi Joban ma echohtat hi ngama thonghun eka.

⁸Thin rãngrãng nekdangen. Ne Wa Joban wah nema thâmama nema chennilem eken a ereheh atema râjettah.

⁹Nema, rangsoampa, aroh soamen: ‘Rangkhethung wah nikhu Wa: Nangmîn pa Asâthôan;

¹⁰Nang Hahsông karo; Rangkhethung wah rãngrãng hahkho komin Nanghung junko chendanga.

¹¹Thejâ nima lem eki phhekchhah pa chohkohhi.

¹²Nirãngma kaamchhih moatte hehnâng nima mapkoh eki rãngrãng, Nipap heh map kohhi.

¹³Achhih nâng hung nektoanthuk hi, Juchhih wah pânghi.’

¹⁴“Nerãngma kaamchhih moatte hehnâng, nema map mekoh enko, rangkhethung wah ne Wa Joban memin nenâng map ekohhèn.

¹⁵Nema mihnâng map lekoh kenko, rangkhethung wah ne Wa Joban memin nepap heh map lekohmin.

¹⁶“Chenthu nema lejok lechhah thangma rangsoamko, ahuhkhoanglep heh rãngrãng thhen khukhu nekdangen. Mihnyan hehma lejok lechhah thangma rangsoam pa chenkhehi ngama thinma thhenphãng litsiet wakeka. Ngama nginlinlin thôkoh eka, thinma chohthin pa phangtang râchohtah.

¹⁷Chenthu ne lejok lechhah thangma rangsoamko, thhenmut ngale khopa khit re en,

¹⁸Eroh koba nema lejok lechhah thangma rangsoam pa mihma lejetmin - mitma lekhe, ne Wa Joban, meloloba ejet a. Ngale nema ahuh chhama moeken pa ne Wa Joban ma khelahma, nenâng rang ekohhèn.

¹⁹“Hahtokkhoh ko techhu dângrãng nekkhôanjôan en, dõng ngale chhinma ethôan chhihphhek a, ngale ahuhte ma chhihsiet lahma ehuh a.

²⁰Ere noma rangkhethung nâng techhu dângrãng khôanjôan en, enâng dõng ngale chhin memin tachhihsiet mah, ngale ahuhte memin chhihsiet lahma tahuhmah.

²¹Erohwah chenko ne ngun akem heh thien eken a, ereko nehung nerin min edanga.

²²“Mitpa phoang rãngma wentit rãngrãng. Ne mitpa asen medang ako, ne phoang phangtang aphiak dângmin;

²³Rohkomin nemit pa achhih medang ako, ne phoangmin rangnyek dângmin. Phumma newah phiak pa aho medang ako, arepa chentô cheili nyek dângmin a!

²⁴“Henjô tângte wanii haa tadang mah; atema watheko chhihchoh erea, ngale watheko sênchoh erea; wathe nginpa senthemthem ekep a, ngale wathe nginpa lekep edanga. Nema Joban ngale ngun akem wanniinii taroam khoakhem met.

²⁵“Erohwah ngama thôkoh eka, chenni jokphhek chhah lihma hîn ajômin a ngama neksekmah en, erediko ne phoangko poh athok khet akhurãng memin neksekmah en. Jokphhek chhah noma phoangpa adong ledangne? ngale khet akhu noma phoangpa adong ledangne?

²⁶Wo hehnâng sûtan en: Thinma chenmin khiet alimah, ngale pum nângmin khôankhen thienmah; rohkomin rangkhethung wah ne Wa Joban ma sûare wakeka! Nea wo heh noma ajahthem thãchaan ledangne?

²⁷Nekhu chhangwah henkomin patrii sekmah letma roandông chuthe tabâm leknyan en a?

²⁸“Ngale khet akhurãng chenrãngma sekmah eken a? Sûtan en, wunwah chongpô heh chenroh dongeka: Thinma moatlemmin momah, ngale khet akhumin hôanmah.

²⁹Rohkomin ngama thôkoh eka, Solomon Lowang tumin chhu alu ngale khetsen khusen tonglahma ere chongpô wanthe sêntô dangho.

³⁰Joban ma wunwah hin hehnâng khet akhu kepkoh eka - hinpa thejâ metong akomin, nènep ko wennâng rokthhekmin. Atema nenâng jãtanga erenoma ajah khet akhu lekep kohminne? Ne dâlempa atôrînne!

³¹“Erohwah neksekmah en: ‘Chenwah ngama jokphhek chhah thin chohmin a, ngale khet akhu chohmin a ngama?’

³²(Are sêmmak hehrãngma Joban lejette mihnyan heh roantang sekmah eka.) Rangkhethung wah tôngte ne Wa Joban ma ajet, nema areheh lemeken ngama.

³³Ere noma khebeng thôanko Joban Hahsông pa benglem mêngen, ngale atema newah hun ehèn moatlem heh momêngen, erediko nema lemeken chentôpa atema ekohhèn.

³⁴Erohwah nèneprãng neksekmah en; nènep rangwopa atedede nènep ko esekmah a. Thejâ rãngma sekmah en, rangwo roakweih mâmâ sekmah demnâng ehûra.