Read Nocte Naga Mathiu 7 Bible Online

Mathiu 7 - Nocte Naga bible

Mathiu 7

¹“Mihnâng athe neklo en, erohkoba Joban memin nenâng athe lomahhèn,

²Nema mihnâng chenroh athe loeken a, ererãngrãng Joban memin nenâng athe elohèn. Ngale nema mihnâng chenroh hôanjôan eken a, ererãngrãng Joban memin nenâng ehôan ejôan hèn.

³Nedede mit wah janchhup lebeng kherii thangma, nepho anaa mitwah mitchhup pa chenrãngma lepkhe eken a?

⁴Nedede mitwah janchhup pa thienletma nepho anaa nâng, ‘nangmit wah mitchhup pa rephekoh e’ ngama chenroh jiennga eken a?

⁵Ahuhkhoanglep heh! khebengko nemit wah janchhup pa bengre pherii mêngen, erediko ba nema nepho anaa mitwah mitchhup pa senthemthem kheletma eta rephekoh en.

⁶“Asâthôan sêmmak pa hu hehnâng nekkoh - thinma ngakkek ba ere hèn. Ngale wak mathahko kem nekphekoh - thinma dakhenko ewoatnek a.

⁷“Tha en, eko nema echoh en, lem en, eko nema echohkhe en; kâsekko rahkõngen, eko nenâng kâsek pa elaang kohhèn.

⁸Henhen ma thaeka, erehehma echoh a, alemte hehma echoh khea, ngale henhenma kâsekko rahkõng eka hehnâng kâsekpa elaangkoh a?

⁹Ne-khuwah henma komin, mâmâ chhama phhekchhah thâko longkohte tongen a?

¹⁰Roh akole atema ngah thâko pû ekoh en a?

¹¹Mihnyan chhih nema tumin mâmâ chhako asenli kohpa jet eken. Rangkhethung wah tôngte ne Wa Joban mejã tanga atewah thâte hehnâng asenlipa kohrãng chentô bâmjet eka!

¹²“Mihnâng nerãng chenroh moatthuk hun eken a, ererãngrãng nememin mihrãng eroh mokoh en: Arepa Mosa Niemarang ngale Mõng hehma hethô wah ngin.

¹³“Lemkit pumma khoam en, chenrãngma ngako khomah lemnâng katlem pa lemdong, ngale ere lempa khoamrãng ala, ngale eko khôamte pa ajah.

¹⁴Roh-komin khopô chohthin lemkhôpa lemkit, ngale ereko khôampa alat, ngale eko khôamte mihnyan pa mãnchha.

¹⁵“Mongmõang hehwah jetletma dangen; thin a ne tânâng tokkhoh pa saak rãngrãng, rohkomin thin rinkhen pa wunwah soanchhih rãngrãng ehûra.

¹⁶Nema thin moatlem junma ejetlo waken. Suhche bukwah anguri jienhong rimah, ngale suhbukwah phukri jienhong rimah.

¹⁷Bãngsen pumma risen ehongria, ngale bãngchhih pumma richhih ehongria.

¹⁸Bãngsen pumma richhih jienhong rimah, ngale bãngchhih pumma risen jienhong rimah.

¹⁹Penri risen lehongri bãngpa joatphe lahma wennâng thhekmin..

²⁰Mongmõang heh thin moatlem junko ejetlo waken.

²¹“Teso, Teso, ngama nganâng roote chentôpa rangkhethung nâng leta wãngmin, rangkhethung wah tôngte Joban ma huneka moatlem moatte heh loloba tâwâng min.

²²Chenthu metloatjâ rangwo mehû theko, ajahthem mihnyan ma nganâng aroh enga hang, Teso, Teso, nangmînko nima Joban ngin phoangthôtih, ngale nangmînko nima juchhihmin junlotih, patritli moatlemmin motih!

²³Ephumma ngama thinnâng edânthang ang, ‘ngama ne jetmah, nea mihnyan chhih, ngatâwah taangchhoan en!’

²⁴“Erohwah henhenma nga nginpa tatlahma kepeka, ere mihnyan pa chhin achhiak, ate humpa longrã khohnâng hôante rãngrãng.

²⁵Pôngdong patdong ngale jodông thunma ere humko ethin a, rohkomin ere humpa tarunjâ mah, chenrãngma ngako ere humpa longrã khohnâng hoaneka.

²⁶“Rohkomin henhenma nga nginpa tatlahma lekep dangeka, ere mihnyan pa aba, ate humpa phihchha khohnâng hôante rãngrãng.

²⁷Pôngdong patdong ma thinko ngale jodôngma lûmhokko ere humpa runjâ erea. Phumma ere hum runjâpa chentô cheili dângmin a.”

²⁸Chenthu Jisu ma erengin heh thôkoh diko, mihnyan hehma atema hethôeka nginpa tatlahma bârit rewah.

²⁹Atea niemarang hethôte heh rãngrãng ledang; chaan demnâng hethô wah.