Read Nocte Naga Mathiu 9 Bible Online

Mathiu 9 - Nocte Naga bible

Mathiu 9

¹Jisu khôankhoko chhang lahma, josi ranka wah thin hahnâng ngakwâng wah,

²Chuthe diko mihnyan khuthema Atenâng kôasôte mihnyan wathe jupthin ko jupthuk lahma pêhok kohwah. Jisu ma thinnâng dâlem pa ajah chohkhe lahma, kôasôte mihnyan ko ngatwah, “Hung dongsiet o, ngachha! nangpap heh map lâkohtih.”

³Erediko niemarang jette heh thindede tungko thômîn wah, “Are mihnyan pumma Joban thãse eka!”

⁴Jisu ma thinhung khennâng chenni thonghun eka arepa jetlo lahma, thinnâng ngatwah, “Nema arerãngrãng achhih heh chenrãngma thonghun eken a?

⁵Chenroh ngat pa ala a, ‘nangpap heh map lâkohtih’ ngama ngatpa ala ale, ‘toanchep lohma khoam o’ ngama ngatpa ala a?

⁶Nenâng ngama are hahtokkhoh ko, Mihnyan Chha nâng pap mapkoh rãng chaanwin, ngama ekhesok a.” Ephumma atema kôasôte mihnyanko ngatwah, “toanchep o, ngale nang jupthin pa toanpe lohma humnâng wãngo!”

⁷Mihnyan pa toanchep lahma humnâng wãngwah.

⁸Mihnyan hehma erepa khelahma chei rewah, ngale mihnyan nâng atô chaan kohdi Joban nâng dangkoh a, ngatwak wah.

⁹Jisu erethe kowah loatkhoam chhoan thuko, thãkho thâte mînpa Mathiu ate Ofic ko tonglahma khewah. Phumma, Jisu ma Atenâng ngatwah, “ngadijun hang.” Mathiu toanchep lahma ate dijun wah.

¹⁰Mathiu humko Jisu phhekchhah chhahthuko, thãkho thâte ngale papi mihnyan heh jahmõang hûlahma Jisu le ate dijunte heh demnâng johphhek chhahhok wah.

¹¹Erepa Farasi hehma khelahma Jisu dijunte hehnâng chhienwah, “Ne hethôte pa arerãngrãng mihnyan chinheh demnâng chenrãngma roam phhekchhah eka?”

¹²Jisu ma erepa leptat lahma dânthâng wah, “Khoanchet hote mihnyan hehma doktor lemmah, khoanchette mihnyan hehma loloba doktor lemeka.

¹³Choan en, ngale jet en, Joban nyapraangma arepa chenni ngaeka: ‘ngama mînchen ba hun ekang, ngem angah ma soamroak hunmek.’ Ngama mihnyansen heh roorãng katdangmek, papi mihnyan heh roorangba kaerâng.”

¹⁴Erediko Jon baptis dijunte heh Jisu tâko hûlahma chhienwah, “Chenrãngma ni ngale Farasi hehma roantang lephhek lechhah thangma rangsoam ekia, nang dijunte hehma lephhek lechhah thangma soamwak mah?”

¹⁵Jisu ma dânthâng wah, “Nemnyan wapa thin demnâng dângpoatko nemnyansiet thinnâng hokte heh hungchhih rekmah etonga ngama thonghun eken a? eroh tongmah! rohkomin nemnyan wapa thintâwah sietchhoan rangwo ehûra, ere diphumma ba thinma lephhek lechhah thangma etonga.

¹⁶“Henmejô khetpã khohko khetnyan chhuppa petphin mah, chenrãngma ngako khetnyan pumma khasiet lahma khetpã pa lodong elojâa.

¹⁷Ngale henmejô angurti anyan pa angurti pã khohko petkien mah, chenrãngma ngako angurti thòpa apoak erea, ephumma angurti pa jenchhoan ngale thòpa chhihjâ erea. Ere noma angurti anyan pa thònyan nâng kienmin, erohkoba thòniinii asen edanga”

¹⁸Jisu ma arepa thôthuko, Jews sahhabwa wathe kalahma ate mako dakuh thoka lahma ngatwah, “ngachha dihiaknya pa arohroh riieka; Wãnglohma nangdekma Atenâng sahlo wãngmêngro, eko ate engakhin a.”

¹⁹Ephumma Jisu toanchep lahma sahhabwa demnâng johwângwah, ngale ate dijunte hehmin thin demnâng johwâng wah.

²⁰Dihiaknyu wathe echhi pânii heichhoan khoanchetma chêmte Jisu tokdiko hûlahma Jisu khetsako sahloatwah.

²¹Dihiaknyu pumma atedede ngatritwah, “ngama Jisu khetko mesahlo tekkojô, khoanchetpa esen ang.”

²²Jisu litphong lahma dihiaknyu pa chohkhe wah, eko Atenâng ngatwah, “Ngachha, hungdongsiet o! nang dâlem pumma nang khoanchet pa lâmetho.” Ere sanpoat poatko dihiaknyu khoanchet pa mewah.

²³Ephumma, Jisu sahhabwa humko wângwah. Chenthu atema jãmtêmte ngale asebte heh kheko,

²⁴Atema ngatwah, “Anga nga chhoan en! are dihiakchha pa rit dangmah - atea jup reka!” Ephumma Jisu nâng anga ngama angit rewah.

²⁵Mihnyan heh tâjunloat rienrien, dihiakchha tâko Jisu wãng lahma ate dekko sietwah, eko dihiakchha pa tôansat wah.

²⁶Are nginpa erediak phangtang nâng khêmtatwah.

²⁷Jisu erethe kowah khôamchhoan thuko, mitdoak wanii atediko junkhôam wah. Thinma raksep wah, “Devit Chha! ninâng mammîn chenhi”.

²⁸Jisu humkhen nâng lupwâng phumma, mitdoak wanii pa ate tânâng hokwah, eko Jisu ma atenii nâng ngatwah, “Ngama nechhe tasensiet a, ngama putedâlem eken a?” Thinma dânthâng wah, “Teso putedâlem eki.”

²⁹Ephumma Jisu ma thinnâng mitko sahlo lahma ngatwah, “nema chenroh putedâlem eken a, eroh chendanga!”-

³⁰Ephumma thinmit pa kanlahma jienkhe wah. Ngale Jisu ma thinnâng ngatwah, “Arepa hennâng min nekthôkoh en!”

³¹Rohkomin thinma chhoanwak lahma Jisu nginpa diaktang nâng phoangthô kohwah.

³²Mihnyan heh loatchhoan poatko, mihhan khuthema Jisu tânâng juchhih luplahma aba jabmuh wathe siethok wah.

³³Juchhih pa junloatkoh rienrien mihnyan pumma jienjab wah, eko anga nga bârit rewah. Thinma ngatwah, “nima arerãngrãng Isrial diakko chenthujô mathatkhe eki!”

³⁴Phumma Farasi hehma ngatwah, “Arepa juchhih lowang ma Atenâng juchhih junloat rãng chaankoh eka.”

³⁵Jisu chentô diak ajaa ngale hahdaang rupnâng phoangkhôam wah, atema Joban Hahsông nginkongsen pa chentô Sanagog hehnâng phôangthôkoh wah, ngale jatrup khoanchet, khun atamte hehmin sênsietwah.

³⁶Jisu ma mihnyan heh khelahma thinnâng mînchenma ate hung nyahrãng chhihwah. Chenrãngma ngako, abemte aho saak rãngrãng sekmah patrit ngale mînchenli khewah.

³⁷Ephumma Jisu ma ate dijunte hehnâng ngatwah, “Chhah munchoan pa jahmõang, rohkomin ere chhahmun eka heh khôankhente pa amãnchha.

³⁸Erohwah munchoan chhah tângte wako, ate chhahthong munchoan heh khôankhente chienkatrãng rangsoam en.”