Read Nocte Naga Mak 1 Bible Online

Mak 1 - Nocte Naga bible

Mak 1

¹Arepa Joban Chha, Jisu Krista Nginkongsen.

²Arepa Isaia mõngma raangtah rãngrãng bengdâng wah: “Joban ma ngatwah, ‘ngama nangmako nga nginmatte nanglem laangkoh rãng echienkat ang.’

³Sehah khonâng wathe phoangrak lahma tonga, ‘Teso rãngma lem khoakhem koh en; ate khôamrãng lemtin hôankoh en!’ ”

⁴Jon baptis sehahkho nâng hong lahma baptijem phoangkoh wah ngale Joban nginpa phoangthôkoh rewah. “Ne papwah hungngaklit letma baptijem kepen,” ngama atema mihnyan hehnâng thôkoh wah, erohkoba “Joban ma nepap heh map ekohhèn.”

⁵Judia diak ngale Jeroselem hahwah ajahthem mihnyan heh Jon ngin chohtatrãng chhoanwak wah. Thinma pap hehrãngma mappa thâwah, ngale Jordan joko thinnâng Jon ma baptijem kohwah.

⁶Jon ma ut banwah hôanwah khetpa kepwah, ngale ate roamko ngemkhoan roamdit pa dit rewah. Ate phhekchhah pa wunwah kupchhang phanphe ngale nyahti heh dângwah.

⁷Atema mihnyan hehnâng thôkoh wah, “Nga diwah katte mihnyan pa nga noma abâmbâm adong. Ngama kunjup lekma ate dapheng putkoh rãngjô punmek.

⁸Ngama nenâng joma baptijem koheka, rohkomin atema Asâthôanju ma baptijem ekohhèn.”

⁹Chentô letaang thangma Jisu Nazarat wah Galili nâng katwah, ngale Jon ma Jordan joko atenâng baptijem kohwah.

¹⁰Jisu joko wah loatwâng rienrien, atema rangkhethung pa laanglahma khewênwah, ngale Ju ate khohko phariwo rãngrãng kalahma khewah.

¹¹Ngale rangkhethung wah jabkhab hôngjab katwah, “Nanga ngama nyahrãng ahun Chha. Nga nangdemnâng nyahrãng rinme ekang.”

¹²Lemlienma Juma atea sehahkho nâng chhoanthuk wah,

¹³Enâng joakma hungtoan lahma jâroak belii tôngwah. Eretheko wunngem hehmin dângwah, rohkomin rangkhethung wah Joban ngintatte heh kalahma atenâng chohsok katwah.

¹⁴Jon pa phâtek nâng sekdiko, Galili nâng Jisu kalahma Joban wah Nginkongsen pa phoangthô katwah.

¹⁵Atema ngatwah, “Sanpoat pa lâthângtah,” “ngale Joban Hahsông pa lânam hutha! nepapwah hungngaklit letma Nginkongsen ko putedâlem en!”

¹⁶Galili josi kêmma Jisu lienkhoam poatko, atema ngahloatte wanii khewah, Simon ngale ate naa Andru chaakma ngahhat dângwah.

¹⁷Jisu ma thinnâng ngatwah, “Ngadijun ha, ngama mihnyan loatrãng hethôa.”

¹⁸Lemlienma thin chaakpa phethien lahma johchhoan wah.

¹⁹Ate nôangthe khôamdiko ahan pho anaa wanii wîenchoh khewah, Zibidi chha Jems ngale Jon dângwah. Khôankhoko tonglahma chaak sênphîn dângwah.

²⁰Jisu ma thin lepkhe rienrien lemlienma roowah; ephumma thinma thinwa Zibidi khôankhoko dekbi bite siettah mihnyan heh demnâng phethien lahma Jisu demnâng johchhoan wah.

²¹Jisu le ate dijunte heh Kaparnam hahnâng hokwah, ngale eredijâ wah Pientông jâko Sanagog nâng hûlahma hethô wah.

²²Ate ngin chohtatte mihnyan heh atema hethô junko bârit rewah, chenrãngma ngako, atea Niemarang hethôte heh rãngrãng ledang; atema chaan demnâng hethô wah.

²³Ere sanpoatko juchhih lupte mihnyan Sanagog nâng hûlahma rak hokwah,

²⁴“Nazarat wah Jisu, nangma ninâng chennire hun ehia? nanga ako nichhih sietrãng hûeroa? Ngama nanga hen a erepa jet e - nanga Joban wah Asâthôan nginmatte!”

²⁵Jisu ma juchhihko ngatwah, “kihtongo, ngale mihnyan kowah loatchhoan o!”

²⁶Juchhih pumma mihnyan pa cheili tiithukwah, ngale chaanmõang raklahma mihnyan kowah loatchhoan wah.

²⁷Mihnyan heh phangtang nyahrãng barii lahma wathema watheko jabmînwah, “arepa chenni dangeka? arepa chenni anyan wien hethôeka? are mihnyanko juchhih heh junloat chaanmin win, ngale juchhih hehma ate ngin kepeka!”

²⁸Ngale Galilijaa chentô nâng Jisu nginpa lemlienma chohtat wah.

²⁹Jisu le ate dijunte heh, erediko thindem ko Jems ngale Jon, Sanagog wah loatchhoan lahma Simon ngale Andru humnâng tintin katwah.

³⁰Simon tangnyu nyongpa chetloat khoanchetma jupthinko juplahma dângwah, phumma Jisu hokkhôamhok rienrien lemlienma ate ngin pa thôkoh wah.

³¹Jisu ate tânâng wãng lahma ate dekkosiet lahma satsietwah. Phumma khoanchetpa senlahma atema thinnâng khoakhêm wah.

³²Sannyupdi rangjâthahko, mihnyan hehma Jisu tâko chentô khun atamte ngale juchhih lupte heh siethokwah.

³³Erehah kowah mihnyan heh phangtang hum thakhoko khôanhok wah.

³⁴Jisu ma jatrup khoanchetma chêmte heh jahmõang mesiet wah, ngale juchhih min jahmõang junloat kohwah. Atema juchhih hehnâng chennimin jab aja thuk ho, chenrãngma ngako, ate hen a erepa thinma jetwah.

³⁵Eredijâ wowen khoko, rangwo mabâng thângma, jisu satlahma humwah loatchhoan wah. Ate hahdaang kowah chhoan lahma mihnyan lesongthe nâng chhoan lahma rangsoam wah.

³⁶Phumma Simon ngale ate lemru heh Jisu lemrãng chhoanwah,

³⁷ngale thinma Jisu chohlem lahma atenâng ngatwah, “Anga ngama nang lem eho.”

³⁸Phumma Jisu ma dânthâng wah, “Nãnga are nãng kêanâ wah hahdaang hehnângmin chhoanmin. Ngama thinnângmin Joban nginpa thôkoh min, are rãngma jôba nga katwah.”

³⁹Ephumma Galilijaa phangtang nâng phoangkhoam lahma Sanagog hehnâng Joban ngin phoangthô kohwah, ngale juchhih hehmin junloat kohwah.

⁴⁰Angêm khoanchette delawa wathe Jisu tâko hûlahma dakuh thohû lahma atenâng roatsep wah. Atema ngatwah, “Nangma mehun oko, nga tasensiet hang.”

⁴¹Jisu ma mihwako nyahrãng mînchenwah, ngale ate dek loatsiet lahma sahloatwah. Atema ngatwah. “Ngama sênsiet huneki,” “sen o!”

⁴²Lemlienma mihwa kowah khoanchet pa chhoanwah, ngale sênwah.

⁴³Erediko Jisu ma atenâng senthemthem thôko lahma lemlienma chienchhoan wah,

⁴⁴Atenâng ngatwah, “Tattan, arepa hennâng min nekthôkoh. Rohkomin soam aroakte tânâng tintin wãngo atema chenthatsû tanho; erediko chentôma nanga sentoh ngama jetrãng, Mosa ma chienwah soam aroak thinpa wênkoh.”

⁴⁵Rohkomin ere mihwa pa chhoan lahma nginpa chentô nâng phoangthô kohwah. Ere hahko Jisu mihnyan heh mitkhesok ko lejien hongkhoam lândangroh atema phoangthô wah. Erohwah, Jisu mihnyan henjô lesongthe nâng tôngchhoan wah, ngale eretheko mihnyan heh chentô thewah ate tânâng hokwah.