Read Nocte Naga Mak 10 Bible Online

Mak 10 - Nocte Naga bible

Mak 10

¹Erediko Jisu erethe kowah loatchhoan lahma Jordan Jo rãnkawah Judia diak ngenâng katwah. Enângmin mihnyan heh ate tânâng jahmõang hokwah, ngale jâhanwah rãngrãng atema thinnângmin hethô wah.

²Farasi khuthe hûlahma Jisu bukritthuk hunwah. Thinma ngatwah, “Ninâng thôkoh tanhi, nãng Niem junko dela ma ate tangnyupa tachiakphe ale?”

³Jisu ma thinnâng chhien nungma dânthâng wah, “Mosa ma nenâng chenrãngrãng Niem kohthen a?”

⁴Thinma dânthâng wah, “Dela ma ate tangnyuko chiakphe nyapraang raangko lahma ate tangnyupa tachiakphea ngama Mosa ma ngatwah.”

⁵Jisu ma thinnâng ngatwah, “Nenâng hethôpa nyahrãng alat dângkowah, Mosa ma ere Niempa nerãngma raangwah.

⁶Rohkomin, rang ahah benghôan thuko, ‘Joban ma dihiak le dela hôanwah,’ Joban nyapraangma aroh ngaeka

⁷‘ngale erejunko dela ma ate nyong awa tâwah chhoan lahma ate tangnyu demko roamsôngmin,

⁸ngale wanii pa phoangtherãng dângmin.’ Erohwah thin a wanii dangtumah, wathe lâdangtah.

⁹Erohwah chenpa Joban ma roapsiet eka arepa mihnyan nyuchha henmemin lephan sietmin.”

¹⁰Chenthu thinkhu humkhen nâng ngakwâng diko dijunte hehma Jisu nâng nginpa thôngphâ wah.

¹¹Jisu ma thinnâng ngatwah, “Dela ma ate tangnyupa chiakphe lahma dihiak han mekep ako ate tangnyu demko kaamchhih lâmotah.

¹²Ererãngrãng dihiak memin ate tangwa pa chiakphe lahma dela hannâng methe wãngako ate tangwa demko kaamchhih lâmotah.”

¹³Mihnyan hehma Jisu tânâng letachha heh ate dekma sahloatrãng siethok kohwah, phumma mihnyan hehnâng dijunte hehma ritngatwah.

¹⁴Jisu ma erepa khelahma rinkhah wah, ngale ate dijunte hehnâng ngatwah, “Letachha heh ngatânâng chenwãngra, nekjektangen, chenrãngma ngako, Joban Hahsôngpa are letachha rãngrãng heh thiak.

¹⁵Ngama linlin thôkoh eka, henhenma Joban Hahsôngpa are letachha heh rãngrãng danglahma lekep dangeka, ereheh chenthumin rangkhethung nâng leta wãngmin.”

¹⁶Erediko atema letachha heh ate dekko khitwah, ngale chentô nâng sahlo lahma thinnâng rangkoh wah.

¹⁷Erethe kowah Jisu loatchhoan rãng ngatko, mihwa wathe chhoanhû lahma atemako khupjup hokwah, ngale atenâng ngatwah, “Hethôte Sen, ngama roantang roanjêng roandông chohrãng chenni moatmin a?”

¹⁸Jisu ma atenâng chhienwah, “Nangma nganâng asen ngama chenrãngroo ehanga?” “Asen henjô aho, Joban loloba asen etonga.

¹⁹Nangma are hôkum heh ajet: ‘Mih nekritphe; mihdihiak dela tungko kaamchhih nekmo; ahuh nekre; mihnâng ledangli nâng neksekhãm; mih nekdiap chhah; ngale nang nyong awa nginkepkep dango.’ ”

²⁰Mihwa pumma dânthâng wah, “Hethôte,” “Are chentô hôkum heh ngama letachha thuma kepwah.”

²¹Jisu ma atenâng mînchen nungma thongthong sûlahma ngatwah, “Nang rãngma wanthe loloba lemeka. Wãnglohma nangnâng chhahkhem chentô tongho heh phangtang sengwãng lohma ngunpa tangchhih hehnâng koh o, ngale nanga rangkhethung nâng techhu thôan edango; erediko kalohma nga demnâng johchhoan hang.”

²²Mihwa pumma are nginpa tatlahma, ate thhenpa khûjâwah, ngale hung keke ngakchhoanwah, chenrãngma ngako, atea nyahrãng techhu dângwah.

²³Jisu ma ate dijunte hehnâng tûmlit phoangsû lahma thinnâng ngatwah, “Techhu hehrãngma Joban Hahsông thenâng wângpa chentolat a!”

²⁴Dijunte heh ere nginko patrit rewah, rohkomin Jisu ma thinnâng ngatwah, “Ngachha heh Joban Hahsông thenâng wângpa chentolat a!

²⁵Techhu heh Joban Hahsông thenâng tâwâng noma ut peba metku polo pumma eta lienlup a.”

²⁶Are nginko dijunte heh nyahrãng barii lahma wathema wathe nâng chhienmînwah, “Eroh medang ako henkho tâpemin a?”

²⁷Jisu ma thinnâng thongthong sûlahma dânthâng wah, “Mihnyan nyuchha rãngma arepa letadangli, rohkomin Joban rãngma chenjô letadangthin aho.”

²⁸Erediko Piter ma loatjabwah, “Sûtan, nima chentôpa thinphe lihma nang dijun eki.”

²⁹Jisu ma thinnâng ngatwah, “Danga,” “Ngale ngama nenâng linlin thôkoh eka, nekhu henhenma mâmâ humte tangkâ, pho anya, nyong awa, chhuchha, pit ajo heh ngarãng ngale Nginkongsen rãngma thinphe thien eken a,

³⁰erehehma are rôanko ajah echohwak a. Châthethiak nomemin ajah hum ahah, pho anya, nyong awa, chhuchha, ngale pit ajo echohwak a, ngale mihma chêmchei thukmin echohwak a; ngale khediwah hokmin rôanko roantang roanjêng roandông echohwak a.

³¹Rohkomin, athângheh ajahthem khebeng thôan dangeka heh khedinâng elitdanga, ngale athângheh ajahthem khedi dangeka heh khekho elitdanga.”

³²Jisu le ate dijunte heh Jeroselem nâng wãng lahma lemnâng dângwah. Jisu ma dijunte heh mamako lemsên danglahma khôamwah, phumma dijunte heh bârit rewah; ngale thin diwah junkhôamte mihnyan heh achei rewah. Eredikomin rekthe Jisu ma ate dijunte heh sietchhoan lahma Jeroselem hahnâng ate khohnâng chenni hokmin a ereheh thôkoh wah.

³³Atema thinnâng thôkoh wah, “Tattan en,” “Nãnga Jeroselem nâng wãngeki, enâng Mihnyan Chhapa soam aroakte adong ngale Niemarang hethôte heh deknâng ekoh a. Thinma ritphe rêmin ngama nginpat lahma Jews ledangte heh deknâng ekoh a,

³⁴erehehma atenâng thãjô lembe ehôan ejôan a, ngale thoakkahma thoak erea, erediko wat rewak lahma ritphe erea; rohkomin jârem diko ate ngakhin erea.”

³⁵Zibidi chha Jems ngale Jon Jisu tânâng hokwah. Thinma ngatwah, “Hethôte,” “Nangma nirãng chenni komin momêng kohhi.”

³⁶Jisu ma thinnâng, “Erepa chennia?” ngama thôngphâ wah.

³⁷Thinma dânthâng wah, “Chenthu nang Hahsông phiak kowah Lowang Tongthinko metong tohko, nang demko dekhit wathe ngale dekchah wathe johtong thuk hi.”

³⁸Jisu ma thinnâng ngatwah, “Nema chenni thaeken a arepa jetmet. Ngama chêmchei chohmin pa nema tatha en a? ngale Nga chenroh baptijem kepmin a eroh nema takep en a?”

³⁹“Nima tae,” ngama thinma dânthâng wah. Jisu ma thinnâng ngatwah, “Linlin nema nga chêm rãngrãng etachêm en, ngale chenroh ngama baptijem kepmin a eroh eta kepen.

⁴⁰Rohkomin nga dekhit dekchah ko hentôngmin a arepa ngama tarenmek. Joban ma henrãng khoakhem kotah a erehehnâng atema ekoh a.”

⁴¹Chenthu ahan waechhi dijunte hehma erepa tatlahma Jems ngale Jon demnâng rinkhah wah.

⁴²Ephumma Jisu ma phangtang roamroo lahma ngatwah, “nemajet Jews ledangte jat mihnyan heh khoko thin pênte heh leng achaanrii lahma pên eka, ngale thin lemsente khhepho phannang heh thinkhoko leng achaanrii eka.

⁴³Phumma ererãngrãng pa nekhu nâng ledangmin. Nekhuwah wathe adongdâng mehun enko, nanga ahan heh haarãng dango;

⁴⁴ngale nekhuwah wathe khekhodâng mehun enko, nanga anga nga haarãng dango.

⁴⁵Chenrãngma ngako, Mihnyan Chha tumin mihma khoakhêmrãng katwah dangmah; atema mih khoakhêmrãng katwah ngale ate roandôngpa ajahthem mihnyan pesietrãng koheka.”

⁴⁶Thin Jeriko nâng hokwah, phumma Jisu ate dijunte ngale loangchhang demko erehah kowah loatchhoan poatko, chutphhek chhahte mînpa Timaias chha Bartimias lemko tônglâwah.

⁴⁷Chenthu atema Nazarat wah Jisu dankhoam eka ngama tatphumma, ate hôngrakwah, “Jisu! Devit Chha! nganâng mammînchen hang!”

⁴⁸Ajahthem mihnyan hehma atenâng ritnga lahma kihchepchep tongo ngatwah. Rohkomin ate jêngjah jahchaanrak rakwah, “Devit Chha, nganâng mammînchen hang!”

⁴⁹Jisu ma cheplahma ngatwah, “Ateroo en.” Ephumma thinma mitdoak wapa roowah. Thinma ngatwah, “Khuhah nâhah dango,” ngale “Toanchep o, atema nangroo eho.”

⁵⁰Ephumma atema khet heh koakphethien lahma, toaklahma Jisu tâko katwah.

⁵¹Jisu ma atenâng chhienwah, “Ngama nangrãng chenni moatkoh hun eko?” Mitdoakwa pumma dânthâng wah, “Hethôte,” “Nga mitma khehun ekang.”

⁵²Jisu ma atenâng ngatwah, “Choan o,” “Nangwah putedâlem pumma lâsensiettho.” Phumma lemlienma jienkhe lahma Jisu diko lemko junkhôam chhoanwah.