Read Nocte Naga Mak 14 Bible Online

Mak 14 - Nocte Naga bible

Mak 14

¹Arepa Adankhoam ngale wichhi lesak bankên phhek lokuh rãng jânii mako dângwah. Soam aroakte adong ngale Niemarang hethôte hehma Jisu huhlokhhek lahma ritphe rãng phungwah.

²Thinma ngatwah, “Nãngma arepa lokuh poatko lemomin,” “chenrãngma ngako mihnyan heh rin môangkhah a.”

³Jisu Bathani wah angêm khoanchette simon humko dângwah. Jisu phhekchhah chhah thuko, dihiaknyu wathema longwah hôanwah thòko nard bãng wah hôanwah thãchaanjat tientumli mênchong pehokwah. Phumma dihiaknyu pumma thòbohpa thahwat lahma tienpa Jisu khoko lokkohwah.

⁴Erekowah mihnyan hehma rinkhah lahma thindede tungko jabmînwah, “Are tienpa chenrãngma mahto nâng hôaneka?

⁵Arepa chârem ngun noma ajahnâng chenta chohsãngtih ngale ngunpa tangchhih hehnâng kohminwah!” ngale thinma dihiaknyuko nyahrãng ritngatwah.

⁶Phumma Jisu ma ngatwah, “Nekchhihsû en ate hungsiko thien en! nema atenâng chenrãngma sekham eken a? Atema arepa ngarãngma asenli moeka.

⁷Nedemnâng tangchhih heh roantang echoh en, ngale chenpoatnâng hun eken a erepoatko nema thinnâng eta chohsû en. Phumma nema nga roantangma chohmahha.

⁸Atema chentô taeka eretô lâmotah; Atema nga phoangko tienma lokkoh ehangpa ngarit mama nga mangbinrãng khoakhem eka.

⁹Ngama nenâng nginlinlin thôkoh eka, rangkhenko chenriang nângmin are nginkongsen pa phoangthô eka, ereko atema chenni moeka erepemin ate thônghunrãng thômin.”

¹⁰Erediko Juda Iskarot echhi wanii dijunte kowah wathe, Soam aroakte adong heh tânâng Jisu chên asângrãng hokwah.

¹¹Thinma ate ngin tatlahma nyahrãng khuhahwah, ngale atenâng ngun kohrãng toamsêm wah. Ere diphumma Juda Iskarot ma thinnâng Jisu loatthukrãng sanpoat senpa lemsokwah.

¹²Wichhi lesak bankên phhek lokuh khebeng rangwojâ, ngale erejâpa Adankhoam lokuh rãng Saak joatjâ rangwo dângwah, phumma dijunte hehma Jisu nâng thôngphâ wah, “Nima nangrãng Adankhoam lokuh phhekchhah pa chenriang nâng khoakhemkoh ea?”

¹³Erediko Jisu ma thinkhu chhangwah wanii are ngin heh thôko lahma chienwênwah: “Hahdaangko wãngen, ngale nemako johèn lahma mihwa echohmîn en. Phumma ate wãngeka

¹⁴humko junlup wãngen, ngale hum tângtewa ko thôkoh en: ‘Tângte ma ngaeka, nga ngale ngadijunte heh Adankhoam lokuh phhekchhah chhahthin thepa chenkoa?’

¹⁵erediko atema lemtok dângko nyahrãng khoakhem lahma the wanthe ekhesok hèn, eretheko nãngkhurãng chentôpa khoakhem en.”

¹⁶Dijunte heh hahdaangko wãng lahma Jisu ma thinnâng chenroh thôkotah a ererãngrãng chentôpa chohkhe wah; phumma thinma Adankhoam lokuh phhekchhah pa ereko khoakhêm wah.

¹⁷Sanhêmthah ko, Jisu ma ate dijunte echhi waniipa sietlahma hokwah.

¹⁸Thin-khu khoangko tonglahma phhekchhah chhah thuko, Jisu ma ngatwah, “Ngama nenâng thôkoh eka, nekhuwah wathema nga echen esengha - nga demwah roam chhahte pumma echen eseng hang.”

¹⁹Dijunte heh nyahrãng hungke lahma wathe diko wathema atenâng thôngphâ wah, “Teso, nangma nganâng nga ehanga?”

²⁰Jisu ma dânthâng wah, “Are nekhu echhi wanii kowah wathe dângmin, nga demko ate bankên johrûm phhekkat tepa dângmin.

²¹Joban nyapraang nâng chenroh raangeka eroh Mihnyan Chhapa eriia, rohkomin henma Mihnyan Chhapa chen aseng eka ererãngma chentô chhih dângmin a! Ere mihnyan rãngma ate lechêm hongchha peba asen dângmin wah!”

²²Thin phhekchhah chhahthuko, Jisu ma bankên chhupthe toanlahma Joban nâng dangkoh a ngat rangsoam lahma chhupsiet lahma ate dijunte hehnâng kohwah. Atema ngatwah; “Thaha ngale phhek en,” “arepa ngaphoang.”

²³Erediko atema bâti toanlahma Joban nâng dangkoh a ngat rangsoam lahma thinnâng kohwah; ngale thinkhu chentôma erekowah jokwah.

²⁴Jisu ma ngatwah, “Arepa ngahei, ajahthem mihnyan hehrãng hongeka, are ngahei demko Joban toamsem pa tonga.

²⁵Ngama nenâng thôkoh eka, Ewa Hahsông theko nedemnâng angurti anyan maroam roamjokko, ngama arepa lethejok tumin”.

²⁶Erediko thinma rangsoamsê selahma Oliv hahho nâng wângwah.

²⁷Jisu ma thinnâng ngatwah, “Nekhu phangtang huhchhoan letma ngalolo ephethien ha, chenrãngma ngako, Joban nyapraangma ngaeka, ‘Joban ma saaksoktepa eritphea, ngale saak heh mâmâ phânchhoan ephan chhoan a.’

²⁸Rohkomin nga ngakhîn diko, nemako Galili nâng ewãngla ang.”

²⁹Piter ma dânthâng wah, “Ahan hehma phangtang mejô mephethien hokomin, ngama chenthumin phethienmih!”

³⁰Jisu ma piter nâng ngatwah, “Ngama nangnâng thôkoh eki, thejâ rangpen wo khapnii wênmako, nangma nga jetmahhang ngama ditrem enga hang.”

³¹Piter ma dânthâng wah, “Nga nangdemnâng ritjô mejohrii ekomin eroh chenthumin jabmek!” Ngale dijunte ahan hehmemin manthe ngatwah.

³²Thin Gathemani theko hokwah, ngale Jisu ma ate dijunte hehnâng, “Nga rangsoam poatko ne ako tongla en” ngama ngatwah.

³³Atema piter, Jems, ngale Jon johsietwên wah. Ereko Jisu nâng hungchhih chêmchoh hokwah,

³⁴Ngale atema thinnâng ngatwah, “Ngahung khenwah hungchhihpa atôdông, ngajô lankha sietroh hûera. Areko tongla en ngale nga demnâng met hinhin johdangha.”

³⁵Ate roanche taangwãng lahma, hahko khupjup lahma, rangsoam wah, meta dangako, atema are chêmchei sanpoat pa lechohrãng soamwah.

³⁶Atema soamwah, “Wa,” “Ewa! nangma chentôpa tamo o. Are ngawah chêmchei hûera pa rephe kohhang. Rohkomin ngama hun ekang junko dangmah, nangma chenroh hun eko junko chendanga.”

³⁷Erediko atema ngakka lahma dijunte warempa juplek lahma khehokwah. Phumma atema piter nâng ngatwah, “Simon nanga jupre ekoa? Koantathe rãng met tajohhin mahhangne?”

³⁸Ngale atema thinnâng ngatwah, “Met hin dangen ngale rangsoam letma tongen, nemin achhihma hungtôanko nekchen jârii eken. Juma huneka, rohkomin hei angem pa aboan.”

³⁹Eredikomin ate ngakchhoan lahma mãnthethin jabkhab pa jablahma rang ngaksoam wah.

⁴⁰Erediko Jisu dijunte heh tânâng ngakhokko juplek lahma khehokwah; thin mitkan lahma tatongho.

⁴¹Chenthu ate lôremrãng ngakhok demphumma, thinnâng ngatwah, “Nea athângheh min bôanjup bôantông thune? Sanpoat pa lâhûtha! Sûtan en! Mihnyan Chhapa papi mihnyan heh deknângkoh lâthângtah.

⁴²Chapen, chhoan eki. Sûtan en, ngachên asângte mihnyan pa anã!”

⁴³Jisu ma nginthô thuko echhi wanii dijunte kowah wathe ate mînpa Juda hokkhoam hokwah. Ate demko soam aroakte adong, Niemarang hethôte, ngale khhepho phannang hehma mihnyan jahmõang dãng apah demnâng chienhokwah.

⁴⁴Jisu chên asângte pumma mihnyan hehnâng ngatwah: “Ngama hennâng chup ekanga ere mihnyan pa nema lem ekenpa. Nema ate lokhhek en!”

⁴⁵Juda hokkhôam rienrien Jisu tâko wãng lahma, “Hethôte!” ngama roowah, ngale atenâng chupwah.

⁴⁶Ephumma thinma Jisu lolahma kitkit khhekwah.

⁴⁷Phumma thin demwah chepte wathema ate dãng toanlahma soam aroakte adonghaa wathe nâng doak lahma nâ jâdoakwah.

⁴⁸Erediko Jisu ma thinnâng ngatwah, “Nga mihngoan rãngrãng nga loatrãng dãng apah kepletma hûeren a?

⁴⁹Rangwo roakweih ngama rangsoam humko tonglekma hethôtek poatko lokhhek mahtha. Rohkomin Joban nyapraang pa toangtang dângmin.”

⁵⁰Erediko dijunte heh phangtang huhchhoan lahma atelolo phethien wah.

⁵¹Delawa wathe khet chinthechha thoklahma Jisu diko junkhôamwah. Phumma thinma ate khhekrãng phungwah.

⁵²Phumma atema khetchinchha thoktahpa jâphethien lahma boangloang huhchhoanwah.

⁵³Erediko Jisu soam aroakte adongthôan humnâng sietwênwah, ereko soam aroakte adong, khhepho phannang, Niemarang hethôte heh khôanhû lahma dângwah.

⁵⁴Piter taangtaangma junkhoam lahma soam aroakte adongthôan humthakho tôko junhokwah. Ereko abemte sipâhi heh demko wenko johlemtong lahma dângwah.

⁵⁵Soam aroakte adong ngale Jews khhepho phannang hehma Jisu jienritphe rãng atenâng athe chohloat hunwah, rohkomin thinma chenjô athe chohlo ho.

⁵⁶Ajahthem mihnyan hehma hâkhi hong lahma Jisu lelatnâng jabwah, rohkomin thin ngin peminkep ho.

⁵⁷Erediko mihnyan khuthe toanchep lahma Jisu lelatnâng are mothô pa thôwah:

⁵⁸“Nima aroh jablahma tattih, ‘Mihnyan dekma hôanwah Rangsoamhum pa runsiet lekma, jârem diko mihnyan dekma hôanwah ledang ahan wanthe engak hoan ang.’”

⁵⁹Phumma mihnyan hehma erengin peminkep ho.

⁶⁰Soam aroakte adongthôan pa thinmako toanchep lahma Jisu nâng thôngphâ wah, “Are nang lelatnâng jab ekako nangma chenjô dânthângthin ahone?”

⁶¹Rohkomin Jisu ma khapthejô ledânjabma kihchepchep tôngwah. Eredikomin soam aroakte adongthôan ma Jisu nâng wîenthe ngatwah, “Nanga Asâthôan Joban Chha, Misaia ne?”

⁶²Jisu ma dânthâng wah, “Dengang,” “ngale nema Mihnyan Chhapa Achaanthôan Joban dekchahko tonglahma rangkhethung wah phoam demnâng kalahma ekhe en!”

⁶³Soam aroakte adongthôan pumma ate khetpa khasiet lahma ngatwah, “Nãngma ahan hâkhi lemtumih!

⁶⁴Atema Joban thãsêpa nema lâtattet. Nema chenroh rerãng thonghun eken a?” Thinkhu phangtang Jisu lelatnâng jabwah: Ate lâthetah ngale ritphe rêmin, ngama ngatwah.

⁶⁵Khaka hehma Jisu nâng thoakkahma thoakwah, ngale ate mitpa doapkhhek lahma wat rewakwah. Thinma ngatwah, “Jetlotan henmawat ehoa!” Ngale erediko sipâhi hehma sietchhoan lahma thhenkowat rewakwah.

⁶⁶Piter thakhoko tôngthuko soam aroakte adongthôan haa dihiaknyu ate tâko katwah.

⁶⁷Dihiaknyu pumma piter wenko lemtong lahma khewah, phumma piter nâng thongthongsû lahma ngatwah, “Nangmin Nazarat wah Jisu demwahni.”

⁶⁸Phumma Piter ma dangmek ngama dakwah. “Ngama jetmek...Nangma chenjab eko arepa ngama jetlomek,” eroh Piter ma dânthang lahma thakho kowah panlienko katwah. Ere rienrienko wowênwah.

⁶⁹Dihiaknyu haa pumma eretheko khelahma ere kêkowah chepte mihnyan hehnâng thôkoh wah, “Atemin Jisu demwah mihnyan!”

⁷⁰Phumma erekomin Piter ma dangmek ngama dakwah. Ere chuthe diko ate kêkowah chepte hehma piter nâng sekhâmwah, “Nanga Jisu demwah dangmek ngama tasâmoh, chenrãngma ngako, nangmin Galili wah mihnyan.”

⁷¹Erediko Piter ma ngatwah, “Ngama toamsem lekma toangtang jabekang! mothô methô angko Joban ma chenchêmsiet hang! Nema ngaeken mihnyan pa ngama jetmek!”

⁷²Ere rienrienko wo khapnii wênwah, ngale Jisu ma atenâng chenroh ngatah a ereheh Piter ma thônghun wah, “Wo khapnii wênmako, nangma nga jetmek ngama lôrem enga hang.” Ngale piter hung nyahrãng chhih lahma sepwah.