Read Nocte Naga Mak 2 Bible Online

Mak 2 - Nocte Naga bible

Mak 2

¹Jâthe jânii diko Jisu kaparnam nâng ngakhok wah, ngale Jisu ngakhok nginpa chohtat wakwah.

²Ephumma mihnyan heh jahmõang khôanhû lahma humko thechaakjô ahotu dângwah, rangsâ wah kâsek lemthong komin thechaak ahotu dângwah. Eko Jisu ma thinnâng Joban ngin thôkoh wah

³Wabelii mihnyan ma Jisu tânâng kôasôte delawa wathe pehok wah.

⁴Mihnyan heh jahmõang dâng phumma, kôasôte pa Jisu tânâng humkhen nâng lejien sietwên dângwah. Ephumma thinma Jisu tongeka punko supkho rapdoak wah. Chenthu thinma suptok khopa rapdoak diko, kôasôte mihnyan pa ate hemko jupthuk lahma waangphe katwah.

⁵Jisu ma thin putedâlem pa adong khelahma, kôasôte mihnyan ko ngatwah, “Echha, nangpap heh map lâkohtih.”

⁶Erethe kowah tôngte Niemarang hethôte hehma thônghun wah,

⁷“Aroh atema chenroh chinjab eka? Arepa Joban thãse eka! Joban loloba pap map tâkoh tepa!”

⁸Thin hungnâng chenni thonghun eka arepa Jisu ma lemlienma jetlo lahma thinnâng ngatwah, “Nema aroh chenrãngma thonghun eken a?

⁹Are kôasôte mihnyanko, ‘nangpap heh map lâkohtih ngatpa chenjô latmah dangmahne,’ ngale, ‘Toanchep o, nang hempa toanpeo, ngale khoam o, ngamemin tanga ang’?

¹⁰Ngama Mihnyan Chha nâng are hahtokkhoh ko pap mapkoh rãng chaanwin, ngama nenâng ekhesok a.” Ephumma atema kôasôte mihnyanko ngatwah,

¹¹“Ngama nangnâng chien eki, toanchep o, nang hempa toanpeo, ngale humnâng wãngo!”

¹²Thin phangtangma sokpoatko, mihwapa ate hempa pelahma tôanchep wah, ngale lemlienma khôamchhoan wah. Thin phangtang nyahrãng bâritwah, ngale Joban nâng rôwakwah, thinma ngatwah, “Nima arerãngrãng chenthumin mathat chohkhe eki!”

¹³Galili jophanâng Jisu wîenngak katwah. Phumma ate tânâng mihnyan heh hokwah, ngale thinnâng Jisu ma hethô wah.

¹⁴Jisu khôam jenjenko, Alphias chha thãkho thâte Livi ate Ofic ko tonglahma chohkhe wah. Jisu ma atenâng ngatwah, “ngadijun hang.” Phumma Livi toanchep lahma Jisu dijunwah.

¹⁵Ere chuthe diko Jisu ma Livi humko phhekchhah chhahwah. Thãkho thâte ngale papi mihnyan heh Jisu diko jahmõang junkhôam wah, ngale Jisu le ate dijunte heh demnâng phhekchhah jahmõang ma johchhah wah.

¹⁶Niemarang hethôte ngale Farasi hehma Jisu papi mihnyan ngale thãkho thâte heh demnâng phhekchhah roamchhah lahma khewah, ephumma thinma Jisu dijunte hehnâng thôngphâ wah, “Arerãngrãng mihnyan heh demnâng ate chenrãngma roam phhekchhah eka?”

¹⁷Jisu ma erepa tatlahma thinnâng dânthâng wah, “Khoanchet hote mihnyan hehma doktor lemmah, khoanchette mihnyan hehma loloba doktor lemeka. Nga a dong aleng dângte mihnyan heh roorãngkat dangmahrâng, papi mihnyan heh roorãng kaerâng.”

¹⁸Jon baptis dijunte ngale Farasi heh chenjô lephhek lechhah thangma rangsoam wah. Phumma mihnyan khuthe hûlahma Jisu nâng thôngphâ wah, “Jon baptis dijunte ngale Farasi heh dijunte hehma chenrãngma lephhek lechhah thangma rangsoam eka, nang dijunte hehma eroh soammah?”

¹⁹Jisu ma dânthâng wah, “Nemnyansiet kuhhôan thinnâng hûera heh lephhek lechhah thangma engakchhoan a ngama thonghun eken a? eroh chenthujô ngakchhoan mah! Nemnyanwa pa thin demnâng tôngpoatko, thin eroh letongmin.

²⁰Phumma thintâwah nemnyanwa pa sietchhoan rangwô ehûra, eredikoba thinma lephhek lechhah thangma etonga.

²¹“Henmemin khetnyan chhuppa khetpã khohko petphinmah, chenrãngma ngako khetnyan chhup pumma tinsiet lahma khetpã pa khajâ lahma lodong elojâa.

²²Ngale henmajô angurti nyanpa angurti pã thòko petkienmah, chenrãngma ngako angurti pumma thòpa epoakthuk a, phumma angurti ngale angurti thò wanniinii echhihjâa. Erohwah, angurti nyanpa thònyan nâng kienmin.”

²³Pientông jâko Jisu chhahthongma dânkhôam wah. Ate dijunte hehmin ate demnâng johdan khôamwah, eko dijunte hehma chhahri pûnphhek wah.

²⁴Ephumma Farasi hehma Jisu nâng ngatwah, “Sûtan, nãng Niem junko Pientông jâko lemolipa nang dijunte hehma moeka!”

²⁵Jisu ma thinnâng dânthâng wah, “Chenthu Devit rêmrii lahma chenni komin phhekchhah hun poatko Atema chenni retah a erepa nema mathatweih ekenne? Ate ngale ate mihnyan heh rêmrit dângwah,

²⁶Ephumma Joban humko wãng lahma Joban nâng kohtah phhekchhah pa chhahwâng wah. Arepa Abiathar pa soam aroakte adong dângpoatko dângwah. Nãng Niem junko soam aroakte ma loloba ere phhekchhah pa tâphhek chhahwah - phumma arepa Devit ma chhahwah, ngale ate demwah mihnyan hehnângmin chhahthuk wah.”

²⁷Ngale athôanko Jisu ma ngatwah, “Pientông rangwopa mihnyan rãngma asenrãng hôanwah; mihnyan pa Pientông rangwojâ rãng hôan dangmah.

²⁸Erohwah Mihnyan Chhapa Pientông rangwo rãngmemin Teso.”