Read Nocte Naga Mak 4 Bible Online

Mak 4 - Nocte Naga bible

Mak 4

¹Eredikomin Jisu ma Galili josi kênâng wien hethô wah. Ate tûmlit wah khôan eka mihnyan heh jahmõang dâng phumma atea khôankhoko chhangkat wah. Khôankhopa joko dângwah ngale mihnyan heh jokahko chepwah.

²Atema nginthakthô demnâng mihnyan hehnâng ajahthem ngin thôkoh wah, ngale thinnâng ngatwah:

³“Tattan en! rekthenâng mihnyan wathema chhahli wênchhoan wah.

⁴Atema pitnâng chhahli wênpoatko, wanwanthe pa lemdongko chatjâeka, phumma wo heh hûlahma thôantu eka.

⁵Wanwanthe pa longrã khohnâng chatjâeka. Phumma hah aho dângjunko chhah pa sitsiak koateka.

⁶Phumma chenthu sanchaan hông phumma koatnyan chhahpa choaksah eka; chenrãngma ngako rinpa alunâng lesutka dângjunko sitsiak choakjâeka.

⁷Wanwanthe pa suhbuk nâng chatjâeka, phumma suhheh donglahma chhahpa tahbuk eka, erohwah chhahri hongrimah.

⁸Rohkomin, khakapa hahsen nâng chatjâeka, phumma chhahpa koatlahma, donglahma chhahri hongrieka: Wanwanthe ma roakrem chhahri hongrieka, wanwanthe ma roak erok, ngale wanwanthe ma châthe hongrieka.”

⁹Ngale Jisu ma athôanko ngatwah, “Tattan en, nenâng nâ metong hènko!”

¹⁰Jisu ate lanlan dângpoatko, ate dijunte echhi wanii demko mihhan atewah ngin chohtatte heh khuthe hûlahma atenâng nginthakthô pa ngaksen thôkohhi ngama ngatwah.

¹¹Jisu ma dânthâng wah. “Nenâng Joban Hahsông nginpa loatjetthuk eka,” “Phumma, ahan hehma, erepa nginthakthô rãng tateka,

¹²erohwah, ‘Thinma mesû akomin, jetkhe mah; Thinma mejetat akomin, jetlo mah. Thinma jetloat ngako, Joban tânâng chenngak hûwaktha, ngale atema thinnâng map chenkohtah.’ ”

¹³Erediko Jisu ma thinnâng chhienwah, “Nema are nginthakthô pa jetlo metne? eroh medang ako ahan nginthakthô hehjã chenroh ejien jetlo en a?

¹⁴Chhah wênte pumma Joban ngin wên eka.

¹⁵Wawathe mihnyan pa lemdongnâng chatjâte chhah rãngrãng; thinma Joban nginpa chohtat rienrien, joak hûlahma thinwah nyenchhoan eka.

¹⁶Ahan mihnyan heh longrã khohnâng chatjâte chhah rãngrãng. Thinma Joban ngin chohtat rienrien khuhah nâhah kepeka.

¹⁷Rohkomin erepa thinhung khennâng lupmah, erohwah thinhungnâng lekroi tongmah. Erohwah chenthu Joban ngin junma chêmchei ba mihma chêmsietko thinma lemlienma thinphe eka.

¹⁸Ahan mihnyan heh suhbuk nâng chatjâwah chhah rãngrãng. Ere hehma Joban nginchohtat eka,

¹⁹Phumma mâmâ roandông rãng sekmah patrit, techhu dânghun, ngale lihân jatrup hungwah phôangthônghun pumma Joban nginpa tanghep eka, phumma thinma chhahri hongri mah.

²⁰Rohkomin ahan mihnyan heh hahsen nâng chatjâte chhah rãngrãng. Thinma Joban nginpa chohtat lahma keplahma chhahri hoangri eka: Wawathe ma roakrem hongrieka, wawathe ma roak erok, ngale khaka ma châthe hongrieka.”

²¹Eredikomin Jisu ma thinnâng thôkoh wah, “Henma komin wentit keplahma khokkhen nâng ba jupthin khennâng etoak a? erepa wentit toakthinko letoak minne?

²²Chentô huhriem re eka heh phangtang loatsiet rêmin, ngale chentô huhthien reka heh phangtang laangphê rêmin.

²³Tat en, nenâng nâ metong hènko!”

²⁴Atema thinnâng ngatwah, “Nema chennitat eken a erepa senthemthem thongtat en! Nema mihnâng chenroh hôanjôan eken a erejunko Joban memin nenâng ehôan ejôan hèn - ere nomemin chhih ehôan ejôan hèn.

²⁵Hennâng roanchhe tongeka ereko lêkoh rêmin, ngale hennâng chenjô aho dangeka, thinma amãnchha cheieka pemin toanchhoan rêmin.”

²⁶Jisu ma thinnâng choatthôkoh wah, “Joban Hahsông thepa arerãngrãng. Mihnyan wathema ate pitnâng chhahli wênkat eka.

²⁷Rangwo rangnyek, ate ajup dangkolah, asat dangkolah, erepoatko chhahpa koatlahma rangwo roakweih dongeka. Erepa chenroh dongeka epa atema jetmah.

²⁸Hah pumma chhahpa dongthuk lahma chhahri rieka; khebengko chhongnoap bengchhong eka, erediko apô, ngale khedithôan ko ari rieka.

²⁹Chenthu chhahpa memun tahko, mihnyan pumma ate mitchha pumma ekhen a, chenrãngma ngako, chhahkhen sanpoat pa hûera.”

³⁰Jisu ma chhien wah, “Joban Hahsôngpa chenni nâng thakmîn ea?” “Chennâng thakthô lihma arepa thôkohmin a?

³¹Erepa arerãngrãng. Mihnyan wathema rangkhen kowah chentô nomemin kenrinthôan jokangken pa keplahma wênkat eka.

³²Phumma erepa phoak lahma chentô noma bãngdong thôan dangeka. Bãngphak rangbîn hehnâng wo hehma arup lanruproh bãngpa dongeka.”

³³Ererãngrãng ahan nginthakthô ajahthem thôko lahma Jisu ma mihnyan hehnâng Joban nginpa thôkoh wah; thinma chentô tajet eka ereto atema thôkoh wah.

³⁴Atema thinnâng nginthakthô lethôkoh thangma chennimin thôkohho, phumma chenthu ate dijunte heh demnâng atelolo dângpoatko chentôpa thêsên thôkoh chîrewah.

³⁵Erejâ sanhêmthah ko Jisu ma ate dijunte hehnâng, “Nãngkhu joranka nâng danwãnge,” ngama ngatwah.

³⁶Ephumma thinma mihnyan heh phethien wakwah; ngale Jisu chhangeka khôankhoko dijunte heh chhangka lahma thindem ko Jisu sietchhoan wah. Ereko ahan khôankhomin dângwah.

³⁷Lemlienma pông dôngmõang pônghokwah, ngale jowaak heh khôankhoko waakhû lahma khôankhoko jo mênchong dangnemnem dângwah.

³⁸Jisu a khôankho thangko ate khopa khhelêngko lênglahma juplek dângwah. Dijunte hehma satsiet lahma atenâng ngatwah, “Hethôte, nanga sekmah mohne, nãng lâriieki dangmihne?”

³⁹Jisu toansat lahma pôngko ngatwah, “jek o!” ngale atema jo komin, “Môngmông dango!” ngatwah. Phumma pôngpôngpa jeklahma kihrumrum dângwah.

⁴⁰Erediko Jisu ma ate dijunte hehnâng ngatwah, “Ne aretô chenrãngma chei eken a? Nenâng athângheh min putedâlem ahone?”

⁴¹Phumma thin nyahrãng chei lahma wathema wathe nâng jabmînwah, “Are mihnyan pa hen a? pông apat le jodông memin ate nginkep eka!”