Read Nocte Naga Mak 7 Bible Online

Mak 7 - Nocte Naga bible

Mak 7

¹Jeroselem wah katwah Farasi ngale Niemarang hethôte heh Jisu tûmlitko khôanhok wah.

²Thinma Jisu dijunte heh dekngekma phhekchhah chhah khewah - erepa, Farasi hehma ngaeka junko thinma dek soanmah.

³(Chenrãngma ngako, Farasi ngale Jews hehma thin te awi niemarang pa kepwah: Thinma dek senthemthem lesoanma chenjô phhekchhah mah;

⁴ngale bôjatwah riakwahmin khebângko lesoanma chenjô phhekchhah mah. Ngale lihânmin thin te awi niemarang ajahthem kepwah, bâti, chemchhahwan, tit alek, ngale jupthin tôngthin heh senthemthem sâsiet rewakwah.)

⁵Ephumma Farasi ngale Niemarang hethôte hehma Jisu nâng thôngphâ wah, “Chenrãngma nang dijunte hehma nãng te awi hehma hethô wah niemarang pa lekep thangma dekngekma chhah eka?”

⁶Jisu ma thinnâng dânthâng wah, “Isaia ma nerãngma profisi hôantah pa chentô toangtang hôanwah a! Atema raangtah rãngrãng, nea ahuhkhoanglep: ‘Joban ma ngaeka, are mihnyan hehma jabkhab melolo toak asân ehang, rohkomin thin hungpa linlinko nga tâwah ataangnâng.

⁷Thinma nganâng rangsoam pejô sekho, chenrãngma ngako thinma mihnyan ma hôanwah niemarang heh nga ngewah niemarang rãngrãng hethôeka!’

⁸“Nema Joban nginpa pheletma mihnyan ma hethôeka niempa kep eken.”

⁹Ngale Jisu ma eredikomin thôkoh wah, “Nededema hôanwah niemarang pa keprãng Joban hôkum pa nyahrãng buthisen hôanletma phe eken.

¹⁰Mosa ma aroh ngatwah, ‘Ne nyong newa nginkepkep dangen,’ ngale, ‘henma ate nyong awa nâng tem athoak eka, erepa ritphe rêmin.’

¹¹Phumma, mihnyan ma ate nyong awa nâng chohsokmin wahpa, nema ‘Arepa korban’ (are ngaeka pa, are litpa Joban nângba kohmin, ngama hethô eken),

¹²erohwah thinma thin nyong awa nâng chohsû tumah.

¹³Nema mihnâng eroh phoanghethô eken junko Joban jabkhabpa lekep dangeka. Ngale nema arerãngrãng moletma lihânmin ajahthem tonga.”

¹⁴Erediko Jisu ma mihnyan heh ate tâko theroo lahma thinnâng ngatwah, “Nekhu anga ngama nga nginpa jetat letma hungnâng thien en.

¹⁵Rangsâwah ne sekkhen nâng hûera phhekchhah pumma ne ngeksiet mahhèn. Erenoma ne sekkhenwah chenni loatchhoan eka ere pummaba ne ngeksiet ehèn.”

¹⁷Mihnyan heh tâwah chhoan lahma humkhen nâng wângdiko, ate dijunte hehma are nginpa ngaksen thôkohhi ngatwah.

¹⁸Jisu ma thinnâng ngatwah, “Nemin mihhan heh noma bâmjetmet,” “Nema jetmetne? Rangsâwah ne sekkhen nâng hûera pumma ne ngeksiet mahhèn,

¹⁹Chenrãngma ngako erepa nehung khennâng kat dangmah, erepa wokkhen nâng kalahma ngakloatchhoan eka.” (Jisu ma, are ngaeka pa, chentô phhekchhah pa tâphhek tâchhahmin, ngama ngaeka.)

²⁰Ngale atema are choatko thôkoh wah, “Newah chenni loatchhoan eka erepumma ne ngeksiet ehèn.

²¹Chenrãngma ngako ne sekkhen wah loatchhoan ekapa, ne hungwah buthi mongthem chhih heh loatchhoan lahma nenâng kaamchhih mothuk ehèn, mih wah nyenkep, ngale mihritphe,

²²mihdihiak dela kaamchhih moat, chhahnyoak, ngale lihân chentô achhihli heh mothuk ehèn; mihdiapchhah, pongapa, mihphetwan, mihsethô, ngam apoa, ngale bâatâ thukre ehèn-

²³are chentô achhihli heh nehungkhen wah loatchhoan lahma ne ngeksiet ehèn.”

²⁴Erediko Jisu eretheko wah loatchhoan lahma Tair hah kêanâ wah hah hehnâng chhoanwah. Erethe kowah wathe humnâng Jisu hokwah, phumma Jisu ere humko tonga ngama henmemin nekchenjet ehang ngama atema thônghun wah, rohkomin ate tahuhtongho.

²⁵Dihiaknya wathe nâng juchhih luplahma dângwah, phumma ate nyongma Jisu tonga ngama leptat lahma, lemlienma Jisu tâko hûlahma ate dathongko khupjup hokwah.

²⁶Dihiaknyu pa Jews ledang dângwah, atea Syria diakwah Fonika hahnâng chhatwah. Atema Jisu nâng ate chha dihiaknya kowah juchhih junloat kohrãng roatsep wah.

²⁷Phumma Jisu ma dânthâng wah, “Khebângko naachha hehma chenbâng chhahmênga. Chenrãngma ngako, naachha heh phhekchhah pa hu hehnâng phekoh pa senmah.”

²⁸Dihiaknyu pumma dânthâng wah, “Hethôte,” “rohkomin, khoangkhen kowah naachha hehma jâphe eka heh hu hehma rângchhah a!”

²⁹Ephumma Jisu ma atenâng ngatwah, “Nangma aroh dânthângdi, nang humnâng wãnglohma sûwãngtan, nangchha sekwah juchhihpa chhoanchoan echoh khewãngo!”

³⁰Dihiaknyu pa humnâng wãng lahma ate chhapa jupthinko juplahma chohkhe wah; ngale juchhih pemin ate chha sekwah loatchhoan choan tônglâwah.

³¹Erediko Jisu Tair hah kêana hah hehwah chhoan lahma Sidon hah ngema Galili josi nâng, Sumhah Wan echhi ngama ngaeka nâng katlem ngema wângwah.

³²Mihnyan khuthema ate tânâng nâba rohkomin mãnmãnchha jienjab lahma mihnyan wathe siethokwah. Ngale thinma Jisu nâng nangdekma sahlomêngo ngama roatsep wah.

³³Ephumma Jisu ma loangchhang kowah atelolo sietchhoan lahma ate nâko deksuma kehkohwah, ngale thoakkah thoaklahma ate thheliko sahlokoh rewah.

³⁴Erediko Jisu ma rangkhethung nâng sûwên lahma, khòrek sietwah rãngrãng roat awâwah, ngale erediko mihwako ngatwah, “Ephphatha,” arepa, “Laangjâo!” ngama ngaeka.

³⁵Lemlienma mihwa pumma jientatwah, ngale theli pa senlahma lechêm thangma senthemthem jienjabwah.

³⁶Erediko Jisu ma are nginpa hennâng min nekphoang thôkoh en ngama mihheh nâng ngatwah; rohkomin, mihnâng nekthôkoh en jêngnga, thinma erengin pa jêngphoang phoangthôkoh rewah.

³⁷Ngale erengin tatte chentôpa bârit rewah. Thinma ngatwah, “Atema chentôpa asen moeka!” “Atema nâbamin tatthuk eka, ngale jabmuhmin jienjabthuk eka.!”