Read Nocte Naga Mak 8 Bible Online

Mak 8 - Nocte Naga bible

Mak 8

¹Erediko wah chentô letaangko ahan loangchhang dong wîenroam hokwah. Mihnyan hehnâng jokphhek chhahthin thôandiko, Jisu ma dijunte heh ate tâko roolahma thinnâng ngatwah,

²“Ngama are mihnyan hehnâng nyahrãng mînchen ekang, chenrãngma ngako, ngademko jârem lâjoh khoamthang, ngale ade phumma thinnâng jokphhek chhahthin chenjô ahotu.

³Ngama chenjô lephhek chhahthuk thangma humnâng mengak chienchhoan angko, lemko rêmritma chêm lahma môangweri wak a, chenrãngma ngako, wawathe pa taangmõang wah hûera.”

⁴Ate dijunte hehma Jisu nâng thôngphâ wah, “Are sehah kowah aretô mihnyan hehnâng lânle phhekchhah thukroh chenwah phhekchhah chohmin a?”

⁵Jisu ma thinnâng thôngphâ wah, “Nenâng bankên chentô tonghèn a?” Thinma, “Wanengit tonghi” ngama dânthâng wah.

⁶Atema loangchhangko hahko tongen ngama chienwah. Erediko atema bankên wanengit pa semlahma Joban nâng dangkoh a ngalahma chhupsietwah, erediko ate dijunte hehnâng loangchhangko phenkoh en ngama kohwah; ngale dijunte hehma phenkohwah.

⁷Dijunte hehnâng ngahmin roanchhe dângwah. Jisu ma ngahrãng memin Joban nâng dangkoh a ngat rangsoam lahma dijunte hehnâng phenkohrãng chienwah.

⁸Anga ngama phoatphoat phhekchhah wah - erekowah mihnyan heh hahjat beliirãng dângwah. Erediko dijunte hehma bâachâ heh phâengit chõngchõng khôantôan wah. Erediko Jisu ma mihnyan heh chienchhoan wah

¹⁰Ngale lemlienma ate dijunte heh demko khôankhoko chhangwãng lahma Dalmanutha jaa nâng wângwah.

¹¹Farasi khuthe Jisu tânâng hûlahma ate demnâng chhiakmîn wah. Thinma Jisu bukritthuk hunwah, erohwah thinma Jisu nâng nanga Joban demwah kaero ngama jetrãng patritli moatlem molohma khesokhi ngama ngatwah.

¹²Phumma Jisu ma khòreksiet rãngrãng rowa lahma ngatwah, “Chenrãngma arerôan wah mihnyan hehma patritli moatlem khehun eka? ngama nenâng thôkoh eka! arerãngrãng patritli moatlempa are mihnyan hehnâng lekhesokmin!”

¹³Phumma thintâ wah chhoan lahma, khôankhoko ngakchhang kalahma joranka nâng ngakdânwâng wah.

¹⁴Dijunte hehma bankên ajah lekep thangma lekphewah, khôankhoko thin demnâng bankênpa wanthe loloba dângwah.

¹⁵Jisu ma thinnâng ngatwah, “Jetletma dangen” “Farasi ngale Hirot wichhi wah jetletma dangen.”

¹⁶Dijunte heh thindede tungko jabmînwah: “Atema are ngaeka pa nãngnâng bankên aho dâng phumma ngaeka.”

¹⁷Thinma chenni jabmîn eka erepa Jisu ma jetloatwah, ephumma atema thinnâng ngatwah, “Bankên aho junko chenrãngma jabmîn eken a? Nema athângnâng majet ekenne? Nema tajetlo metne?

¹⁸Nenâng mit tonghèn - phumma mit pumma khemetne? Nenâng nâ tonghèn - phumma nâ pumma tatmetne? Nema thonghun metne

¹⁹ngama bankên wanbangâ pa hahjat bangâ nâng phhekchhah thuktekpa? Ngale nema bâachâ heh phâmeroan khôantoan tet a?” Thinma, “Echhi phânii,” ngama dânthâng wah.

²⁰“Ngale bankên wanengit pa hahjat belii mihnyan nâng phhekchhah thuktek pa thonghuntan en,” “Nema bâachâ heh phâmeroan khôantoan tet a?” Thinma, “Phâengit” ngama danthângwah.

²¹Erediko Jisu ma thinnâng ngatwah, “Phumma nema athâng hehmin jetmetne?”

²²Thin Batsida nâng katko, mihnyan khuthema Jisu tânâng mitdoak wathe siethu kolahma atenâng dekma sahloatrãng roatsep wah.

²³Jisu ma mitdoakwa dekko sietlahma hahdaang kowah panthong liennâng sietchhoan wah. Jisu ma mihwa mitko thoakkahma thoakkoh diko ate dekma sahlo lahma atenâng chhienwah, “Jienkhe ekole?”

²⁴Mihnyan pumma toaksûwên lahma ngatwah, “Ngama mihnyan heh khe ekang, rohkomin thin a bãngheh phoangkhôam wah rãngrãng khe ekang.”

²⁵Phumma Jisu ma mihwa mitko ate dekma thengak sahloat kohwah. Erediko mihwa pumma senthemthem kanlahma sokwah, eko ate mitpa senchhoan dângwah, ngale chentôpa sâpoangpoang jienkhe wah.

²⁶Jisu ma mihwapa humnâng chienwênwah, ngale atenâng ngatwah, “Hahdaangko nekngakwãng.”

²⁷Erediko Jisu le ate dijunte heh Filipien wah Kasaria hah kêanâ wah hahdaang hehnâng chhoanwah. Lemko Jisu ma thinnâng thôngphâ wah, “Thôkoh tanha, mihnyan hehma nganâng hen edanga ngama ngaehanga?”

²⁸Thinma dânthâng wah, “Khakama nanga Jon baptis ngaeho,” “Khakama Ilija ngaeho, ngale khakama mõng ngaeho.”

²⁹Jisu ma ate dijunte hehnâng thôngphâ wah, “Nema chenroh thonghun eken a?” “Nememin nganâng hen ngama ngaeha?” Piter ma dânthâng wah, “Nanga Misaia.”

³⁰Erediko Jisu ma, “Nga junma mihnâng hennâng min nekthôkoh en” ngama ngatwah.

³¹Erediko Jisu ma ate dijunte hehnâng hethô wah: “Mihnyan Chhama nyahrãng chêmchohmin, ngale khhepho phannang, soam aroakte adong, erediko Niemarang hethôte hehma ate roak atoak leweihmin. Atea ritphe erea, rohkomin jârem diko ngakhîn erea.”

³²Jisu ma dijunte hehnâng chentôpa laangthô kohwah. Ephumma piter ma sietchhoan lahma Jisu nâng ritngatwah.

³³Phumma Jisu litphong lahma, ate dijunte ahan hehnâng sûwên lahma, piter nâng ritngatwah. “Joak, nang ngatâ wah taangchhoan o,” “Nangma Joban ngewah thonghun dangmoh, mihnyan hungwah thônghun eko!”

³⁴Erediko Jisu ma loangchhang ngale ate dijunte heh ate tâko roolahma thôkoh wah. “Nekhuwah henma komin ngadijun hun medang enko, nedede lekpherii letma, ne bãngphakpa peletma ngadijun ha.

³⁵Chenrãngma ngako, nema nedede roandôngpa pêsietrit mehun enko, nema mahphe ere en; rohkomin ne roandôngpa ngarãngma erediko Nginkongsen rãngma memahphe enko, nema ne roandông pa eta pesiet en.

³⁶Nema rangkhen kowah chentô sêmmak heh phangtang nerãng takep letma ne roandôngpa memahphe enko, nema chenni echoh en a? chenjô chohmet!

³⁷Ne roandôngpa ngakchohrãng chenjô talit kohmet.

³⁸Are Joban lejetrôan ngale papi rôanko mihnyan heh nganâng rêsê, erediko ngama hethô ekang nginkong rãngma rêsê mere ako, Mihnyan Chhamin ate Wa chaan keplahma Asâthôan ngintatte heh demnâng katjâko thinnângmin rêsê erea.”