Read Nocte Naga Mak 9 Bible Online

Mak 9 - Nocte Naga bible

Mak 9

¹Ngale eredikomin atema ngatwah, “Ngama nenâng linlin thôkoh eka, aretheko chepte khuthe Joban Hahsông pa chaan demnâng kalahma makhe kheko leriite tongen.”

²Jâerok diko Jisu ma ate demko Piter, Jems, ngale Jon hahkong choang khonâng sietwênwah, eretheko thinlolo dângwah. Thinma Jisu nâng sokjenjen ko litjâ lahma khewah,

³ngale Jisu khetpa pômõang phiakwah - rangkhenko henmemin eretô leta posettô pôwah.

⁴Erediko dijunte warem pumma Ilija ngale Mosa Jisu demko jabmîn lahma khewah.

⁵Piter ma hongjab lahma Jisu nâng ngatwah, “Hethôte, nãng aretheko tôngpa chentôsên a! Nima tembu humwah phangrem hoan e, nangrãng phangthe, Mosa rãng phangthe, ngale Ilija rãng phangthe hoan e.”

⁶Piter le ate lemru heh nyahrãng chei lahma atema chenni ngatthin a erepajô lechêm jetthangma dângwah.

⁷Erediko phoambuk bukhû lahma mahbuk wah, ngale phoamkhen kowah jabkhab hôngjab katwah, “Arepa nga Chha ngama atenâng nyahrãng hun ekang - ate ngin kepen!”

⁸Thinma lemlienma tumlit phoangsû tahpa henjô chohkheho; Jisu loloba thindem ko dângwah.

⁹Thin hahkong kowah jâkhoam katko, Jisu ma ngatwah, “Mihnyan Chhapa ritwah mangak ngakhinko, nema chenni khetat a erepa hennâng min nekthôkoh en.”

¹⁰Thinma Jisu nginpa kepwah, rohkomin thindede tungko thômîn wah, “Are ‘ritwah ngakhînpa’ chenni nâng ngaeka?”

¹¹Ngale thinma Jisu nâng thôngphâ wah, “Chenni rãngma niemarang hethôte hehma Ilija khekho ekara ngama ngaeka?”

¹²Jisu ma dânthâng wah, “Ilija pa linlinjô khekho kalahma chentôpa ekhoakhem kara. Rohkomin Joban nyapraangma chenrãngma Mihnyan Chhama chêmchei chohmin ngale mihnyan hehma ate roak atoak leweih min ngaeka?

¹³Ngama nenâng toangtang thôkoh eka, Ilija râkatha, ngale Joban nyapraang nâng ngaeka rãngrãng mihnyan hehma atenâng chenroh huneka eroh hôanjôanwah.”

¹⁴Chenthu thin tânâng dijunte ahan heh hokko, mihnyan jahmõang thin tumlitko khewah, ngale Niemarang hethôte heh thindem ko chhiakmîn wah.

¹⁵Chenthu mihnyan hehma Jisu kheko, nyahrãng patrit wah, ngale ate tânâng chhoanka lahma atenâng rânjab katwah.

¹⁶Jisu ma ate dijunte hehnâng chhienwah, “Nea thin demnâng chenni junko chhiakmîn eken a?”

¹⁷Loangchhang kowah mihnyan wathema dânthâng wah, “Hethôte, ngama nang tânâng ngachha pa siethû erâng, chenrãngma ngako, ate seknâng juchhih tonga ngale erejunko atema jienjabmah.

¹⁸Chenthu juchhihma atenâng melo tahko, hahko chiloangsiet eka, ngale ate thunwah thoakwoak heh hong, erediko pâchupkek lahma chichehjâ eka. Ngama nang dijunte hehnâng juchhih pa junloatkoh rãng chientekpa, thinma tajunlomah.”

¹⁹Jisu ma thinnâng ngatwah, “Nenâng putedâlemjô aho! Nedemnâng nga chentô tâjoh tongmin a? Ngale nedemnâng nga chentô tâjoh sôngmin a? Leta pa ngatânâng sietwênro!”

²⁰Phumma thinma Jisu tâko sietwên kohwah. Juchhih ma Jisu khe rienrien, leta ko loatwah, ephumma leta pa hahko loangjâ lahma ate thunwah thoakwoak lietliet tumlit phoangloang jâwah.

²¹Jisu ma naachha wako, “Chentô rãng ate aroh medanga?” ngama thôngphâ wah. Phumma, “letachhathu mejû aroh dângwah” ngama atewa ma dânthâng wah.

²²“Juchhih ma wenkhoh hehnâng ngale jokhoh hehnâng loangjâ thuklahma ate ritphe rãng ajahthem lâphungtah. Nangma meta oko, ninâng mînchen lohma mamchoh sûmênghi!”

²³“Ta ang,” Jisu ma ngatwah, “Nang dedema meta oko! ngale hennâng putedâlem tongeka ere hehma chentôpa eta a.”

²⁴Naawa pa lemlienma raksepwah, “Ngama putedâlem ekang, rohkomin arepa lemah. Senthemthem jien putedâlem rãngma nangma nganâng mamchoh sûhang!”

²⁵Jisu ma loangchhangpa thintâko hehwãng lahma khewah, ephumma atema juchhihko ngatwah. “Phhekba nâbaju,” “Ngama nangnâng are naachha kowah loatchhoan o ngama chieneki, ngale atenâng chenthumin lengak luphû tumin!”

²⁶Juchhih pumma raklahma naachha pa nyahrãng cheili chehjâ thuklahma loatchhoan wah. Naachha pa riichoan mang rãngrãng dângwah, phumma anga ngama, “Riitah!” ngatwah.

²⁷Phumma Jisu ma naachha dekko sietlahma chepsietwah, eko naachha pa tôanchepwah.

²⁸Jisu humkhen nâng lupwâng diko, ate dijunte hehma atelolo nâng thôngphâ wah, “Nima chenrãngma juchhih pa leta junlo dangekia?”

²⁹Jisu ma dânthâng wah; “Arerãngrãng pa rangsoam junma loloba tâjun loatmin,” “Lihânma chenni mejô tajun lomih.”

³⁰Jisu le ate dijunte heh erethe kowah loatchhoan lahma Galilijaa nâng katwah. Jisu ma ate chenko tongeka erepa hennângjô jetthuk lehun dângwah,

³¹Chenrãngma ngako atema ate dijunte hehnâng hethô sanpoat dângwah: “Mihnyan Chhapa ate ritphete heh deknâng ekoh a. Rohkomin, atea jârem diko ngakhîn rêmin.”

³²Phumma dijunte hehma erepa chennâng ngaeka erepa jet ho, ngale atenâng thôngphâ rãngmin chei rewah.

³³Thin Kaparnam hahnâng hokwah, phumma humkhen nâng lupwâng diko Jisu ma ate dijunte hehnâng thôngphâ wah, “Ne lemko chenjunma chhiakmintet a?”

³⁴Phumma thinma Jisu nâng dânthangho, chenrãngma ngako, thinkhuchhang kowah henpa adongthôan dângmin a ngama lemko chhiakmîn wah.

³⁵Jisu ma tonglahma, dijunte echhi waniipa roolahma ngatwah, “Hen akomin khekhothôan dâng mehun ako, ate dedema chentô noma khedithôan rãng hôanritmin, ngale anga nga haarãng dângmin.”

³⁶Erediko atema letachha sietlahma thinkhu mako chepthuk wah. Ngale naachhako atedekma khitlahma thinnâng ngatwah,

³⁷“Henma komin are leta rãngrãng hehwah ngamînko wathe nâng asenma metãngroo ako, arepa nganâng tãngroo ehang; ngale henma komin nga metãngroo hangko, erepa ngalolo tângroo dangmah hang, nga chienkatte pemin tãngroo eka.”

³⁸Jon ma atenâng ngatwah, “Hethôte, mihwa wathema nangmînko juchhih junlo lahma khetih, phumma atea nikhu demwah ledang dâng phumma, nima atenâng jektãngtih.”

³⁹Jisu ma thinnâng thôkoh wah, “Atenâng nekjek tãngen,” “Chenrãngma ngako, henmemin ngamînko patritli moatlem molahma nga lelatnâng chhihjabmah.

⁴⁰Chenrãngma ngako, henhen nãng lelatnâng ledangtea epa nãngdemnâng dângte.

⁴¹Ngama linlin thôkoh eka, henma akomin ngadijunte dângthã nenâng jowah koapthe mejokthuk hènko atema erethãpa metkep echoh a.

⁴²“Henma komin nganâng putedâlemte are arinchha thôan kowah wathe nganâng putedâlem pa memah phethuk ako, ere mihnyan rãngma ate bohko longdong khhek lahma josiko mejâ toakka akoba ate rãngma asen edanga.

⁴³Erohwah, nedek pumma ne putedâlem pa memah phethuk hènko, thahdoakphe en, nerãngma dek kaniinii thienletma roantang roanjêng lemutthin pap wendô nâng khâmritkat noma, dektu dangletma ju khope chohpeba asen.

⁴⁴

⁴⁵Ngale neda pumma ne putedâlem pa memah phethuk hènko, thahdoakphe en, nerãngma da kaniinii thienletma roantang roanjêng lemutthin pap wendô nâng khâmritkat noma, datu dangletma ju khope chohpeba asen.

⁴⁶

⁴⁷Ngale nemit pumma ne putedâlem pa memah phethuk hènko, loatphere en! nerãngma mit kaniinii thienletma roantang roanjêng lemutthin pap wendô nâng khâmritkat noma, mit kathelolo demnâng Joban Hahsông thenâng chohwâng peba asen.

⁴⁸‘Erethe kowah thinnâng kekte dõngpa chenthumin riimah, ngale thinnâng khâmte wendô pa chenthumin mutmah.’

⁴⁹“Joban nâng joapsoap thinpa summa sâsiet eka rãngrãng, chentô mihnyan heh wenma sâsietmin.

⁵⁰“Sumpa asen; rohkomin sumtupa mesejâ tahko, nangma chenroh jienngak tusiet tumin a? “Nedede tungko sumtu rãngrãng lemruchha dangen, ngale wathema wathe demnâng mêmoma songtongen.”