Read Nocte Naga Luk 1 Bible Online

Luk 1 - Nocte Naga bible

Luk 1

¹Ngama nyahrãng ahun Thiofilas: Ajahthem mihnyan hehma nitânâng chenni dangtah a erengin heh raangthienrãng thatphungwah.

²Khebâng thuma areheh khelahma Joban nginkongsen pa phoangthôte hehma ninâng thôkohthi ngin heh jôba thinma raangthien eka.

³Adongthôan Thiofilas, chenrãngma ngako, ngama are ngin heh khebeng mejô senthemthem lâthat sûtantek. Phumma nangrãng khophen lemphen raangkohpa asen edanga ngama thonghun ekang.

⁴Ngama are raang ekãngpa nangnâng hethô thoheh nangma phangtang toangtang ngama chenjet o ngama raang ekang.

⁵Hirot pa Judia Lowang dâng sanpoatko, soam aroakte wathe ate mînpa Zakaria ngama dângwah, atea soam aroakte jat Abija kuwah dângwah. Ate tangnyu mînpa Ilijabet dângwah; atemin soam aroakte kuwahjô dângwah.

⁶Atenii wanii niijô Joban mitsokko asen dângwah, ngale Joban Niemarang ngale Hôkum hehmin senthemthem kepwah.

⁷Thin a chhuho chhaho dângwah, chenrãngma ngako Ilijabet pa chhaho dângwah, ngale atenii waniinii nyahrãng wiku teka dângwah.

⁸Jâthenâng atema soam aroak moatlem moatpan jâko Zakaria ma Rangsoamhum ko soam aroak lahma dângwah.

⁹Soam aroakte heh Niem junko, thinma tanlahma Zakaria pa chaamko wenkhuh tûmrok kohrãng renwah. Ephumma Zakaria Teso Rangsoamhum ko wângwah,

¹⁰Wenkhuh pa tûmrokkoh sanpoatko rangsâ wah mihnyan hehma rangsoam wah.

¹¹Atema wenkhuh tumrokkoh eka chaam dekchah ngeko rangkhethung wah Teso ngintatte ate tâko hôngchep katwah.

¹²Chenthu Zakaria ma ate kheko, patrit ngale chei rewah.

¹³Phumma rangwah ngintatte pumma atenâng ngatwah, “Zakaria, nekchei! Joban ma nang rangsoam pa lâtattho, ngale nang tangnyu Ilijabet ma delachha echha a. Nangma ate mînpa Jon ngama mînmin.

¹⁴Chenthu atema naa mechha tahko, nang chentô khuhah nâhah dângmin a, ngale ahan mihnyan hehmin ajahthem khuhah nâhah edanga!

¹⁵Jon pa Teso mitsokko adong edanga. Atema khem ngale lihân amok aleklimin lejok phhekchhah min. Ate achhat mejû Asâthôanju demnâng echha a,

¹⁶ngale atema ajahthem Isrial mihnyan heh Teso Joban tânâng engaksiet hûa.

¹⁷Atea Teso mako ekala a, ngale atea Ilija mõng rãngrãng chaanwin edanga. Atema wa achha heh ethe ngakroapsiet a; ngale ngin lekepte mihnyan heh toangtang lemkhôko engak thonghun thuk a; ngale atema mihnyan heh Teso rãngma khoakhem lahma ethienkoh a.”

¹⁸Zakaria ma rangkhethung wah ngintatte ko ngatwah, “Ngama nang nginpa toangtang ngama chenroh jienjetmin a? Nga a teka lâdangtek, ngale nga tangnyu pemin wiku lâdangtah.”

¹⁹Ngintatte ma dânthâng wah, “Nga a Gabarial,” “Nga Joban tâko chep ekang, atema are nginsen pa nangnâng thôkoh rãng chienkat ehang.

²⁰Rohkomin nangma nga nginko putemoh, arepa sanpoat methang tahko toangtang edang kara. Nangma lepute dângdi, nangma jab lejienjab dângmin; Ngama nangnâng toamhoan eki rangwopa linlin madang dangkako nanga jabmuhma dângmin.”

²¹Ngale mihnyan hehma Zakaria Rangsoamhum ko aretô chenrãngma lektong eka ngama sekmah lahma bemwah.

²²Ngale chenthu ate Rangsoamhum kowah loatkhoam katko, atema mihnyan hehnâng jienranjab tuho. Phumma atema Rangsoamhum khenko thânkhe lâretah ngama mihnyan hehma thônghun wah. Atema khapthe tumin lejien jabtu thangma mihnyan hehnâng atedekma thak amak kohwah.

²³Chenthu atema Rangsoamhum ko soam aroak sanpoat pa râphumma, Zakaria ate humnâng ngakkatwah.

²⁴Erediko ate tangnyu Ilijabet ma naawun lahma humwah leloat thangma dâjeng bangâ humko tôngwah.

²⁵Ilijabet ma ngatwah, “Teso ma nganâng chohsû ehang,” “ngale mihnyan nyuchha mitsok wah nga rêsêpa lâre phekohthang!”

²⁶Ilijabet ma jeng erok naawun poatko, Joban ma rangkhethung wah ngintatte Gabarial pa Galilijaa wah Nazarat hahko chienkatwah.

²⁷Atema janchhônya wathe Devit Lowang pôali Josep demnâng kepmînrãng kahkhetmîn choanko ngin thôkat kohwah. Janchhônya mînpa Mariam dângwah.

²⁸Rangkhethung wah ngintatte pa ate tâko kalahma Mariam nâng ngatwah, “Khuhah nâhah dango! Teso pa nang demnâng, ngale Teso ma nangnâng rangkoh eho!”

²⁹Joban ngintatte ma thôkoh nginko Mariam nyahrãng tungmaangwah, ngale arepa chenni junko ngaeka ngama nyahrãng patritwah.

³⁰Joban ngintatte ma atenâng ngatwah, “Mariam, nekchei o; Joban ma nangnâng nyahrãng mînchen eho.

³¹Nangma naawun lohma delachha echhao, ngale nangma ate mînpa Jisu ngama mînmin.

³²Atea adong dângmin, ngale achoang thôanwah tôngte Joban Chha ngama roomin. Ate te awa Devit dangtah rãngrãng Teso Joban ma atemin Lowang edangthuk a,

³³ngale atea Jakob pôali hehrãngma roantang roangjêng rãng Lowang edanga; ate Hahsông pa chenthumin leta thôanmin!”

³⁴Mariam ma rangkhethung wah ngintatte ko ngatwah, “Nga a janchhô asâthu. Arepa chenroh jiendângmin?”

³⁵Rangkhethung wah ngintatte ma dânthâng wah, “Asâthôanju nangkhoh ko ekara, ngale Joban chaanpa nangkhohko etong kara. Erohwah Asâthôan Naachha pa Joban Chha ngama ngatmin.

³⁶Nang tang amang Ilijabet nâng thatthong hun tan. Ate memin naa tachha tumek ngatwah, rohkomin atea atô wikujô medang akomin athângheh dâjeng erok naawun lâdangtah,

³⁷Chenrãngma ngako Joban ma letamoli chenjô aho.”

³⁸Mariam ma ngatwah, “Nga a Teso haa,” “Nangma ngaeko rãngrãng nganâng chendang hang.” Ngale erediko ngintatte pa ate tâwah chhoanwah.

³⁹Erediko lemlienma Mariam chep achã lahma hahkong hahla diak Judia wah wanthe hahnâng wângwah.

⁴⁰Atema Zakaria humko wãng lahma Ilijabet nâng rânjab wângwah.

⁴¹Chenthu Mariam ma rânjabpa Ilijabet ma tatko, ate wokkhen wah naachha pa phôangwah. Ngale Ilijabet nâng Asâthôanju mênchong dângwah

⁴²ngale Ilijabet ma chaanmõang ma ngatwah, “Nanga chentô dihiak khuchhang kowah rangkepte thôan, ngale nangma wun eko naachha pemin rangkepte!

⁴³Nga Teso nyong pa nga tâko hûlahma chohmînhu ehang, atôdông chenrãngma nga tâko hûera?

⁴⁴Chenrãngma ngako nangma rânjabpa tatrienrien nga sekkhen wah naachha pa khuhah ma toak eka.

⁴⁵Nangnâng Teso ngewah ngin kathapa toangtang dângmin ngama putedâlemdi nangma rangkep eko!”

⁴⁶Mariam ma ngatwah, “Ngahungma Teso nâng rôeka;

⁴⁷Joban nga Pângte junma ngaju rinroan eka,

⁴⁸Chenrãngma ngako nga a ate haa arinchha thôan wathe phumma atema nganâng chhemhun ehang! Adephumma chentô mihnyan ma nganâng rangkepte ngama roomin,

⁴⁹Chenrãngma ngako achaanthôan Joban ma ngarãng adongthôan mokoh ehang. Ate mînpa Asâthôan;

⁵⁰Rôanthe kowah rôantheko atenâng soam atôte hehnâng atema mînchen eka.

⁵¹Atema ate dek achaanthôan pa loatsiet eka, thin hungnâng ngam poarii lahma themawa eka heh phansietkoh eka.

⁵²Atema lowang chaan ahang heh thin tôngthin kowah jâsiet eka, ngale mihnum mihne heh choangpe eka.

⁵³Joban ma rêmritte mihnyan hehnâng asenli chhahthuk lahma wokphoatthuk eka, ngale techhu heh dekphi phâwat chhoan thuk eka.

⁵⁴Atema nãngte nãngwa hehnâng toamsem tahpa toangtang dângwah, ngale ate haa Isrial mihnyan heh chohsok rãng kaera.

⁵⁵Atema Abraham nâng mînchen khesok rãng thônghun wah ngale ate pôali chentô nângmin roantang roangjêng rãng mînchen khesok rãng thonghun eka!”

⁵⁶Mariam Ilijabet demnâng jengrem johtông diko ate humnâng ngakkatwah.

⁵⁷Ilijabet ma ate chhachhat sanpoat hokwah, ngale atema delachha chhatwah.

⁵⁸Ate demnâng Joban pa patritli sen ekapa ate tok akhung wah mihnyan heh ngale tangkâ humkâ hehma chohtatwah, ngale thinkhu phangtang ate demnâng johrôan wah.

⁵⁹Chenthu naachha pa haptathe dâng phumma, thinma khoankhen niemhôanrãng hokwah, ngale thinma ate mînpa atewa mîn demko Zakaria ngama mînrãng phungwah.

⁶⁰Phumma ate nyongma ngatwah, “Eroh lemînmin! Ate mînpa Jon ngama mînmin.”

⁶¹Phumma thinma ate nyongko ngatwah, “Arepa ne tangkâmîn dangmah!”

⁶²Erediko thinma atewako nangma naamînpa chenroh mînhun eko ngama thak amak lahma chhienwah.

⁶³Zakaria ma nyapraang thin thalahma raang kohwah, “Ate mînpa Jon.” Phumma thin nyahrãng patrit wah!

⁶⁴Ere sanpoat poatko Zakaria jienhong jabwah, ngale atema Joban nâng rôwah.

⁶⁵Tok akhung wah mihnyan heh phangtang chei rewah, ngale erengin pa hahkong hahla diak Judia phangtang khêmtatwah.

⁶⁶Are ngin chohtatte chentôma thinhung nâng thonghun lahma chhienwah, “Are naapa chenroh hongdôngmin a?” chenrãngma ngako Joban chaanpa ate khohko tongeka.

⁶⁷Jon wa Zakaria pa Asâthôanju mênchong danglahma atema Joban ngin loatthôwah:

⁶⁸Teso Isrial heh Joban nâng rôe! Atema ate mihnyan hehnâng chohsok rãng kaera, ngale atema thin pepâng eka.

⁶⁹Atema ate haa Devit pôali wah, nãngnâng Pângte chaanthôan kohehi,

⁷⁰Atema ate mõng asâ heh junma khema thuma toamsêm wah

⁷¹Atema nãngran hehwah pepângmin, Nãngnâng chhihchohte chentô hehwah epânghi.

⁷²Atema nãngte nãngwa hehnâng mînchentek ngama ngaeka ngale atema asâma toamsem tahpa thonghun eka.

⁷³Atema nãngte nãngwa Abraham nâng toamsêm wah Atema nãngran hehwah pepângrãng toamsêm wah ngale lechei lewãn thangma atenâng soamtôthuk ehi,

⁷⁴

⁷⁵erohwah ate mako nãng asâ ngale toangtangma nãng roandông dôngtang dângmin.

⁷⁶“Nanga ngachha, nangnâng achoang thôanwah tôngte Joban mõng ngama ngatmin. Nanga Teso mako wãnglohma ate lempiak kohmin,

⁷⁷ngale thinpap heh map kohlahma thin khopemin, ngama nangma ate mihnyan hehnâng thôkohmin.

⁷⁸Nãng Joban pa hun achette ngale mînchênte Joban. Atema nãng khope pa rangkhah sanphiak rãngrãng nãngkhoh nâng ehongthuk a

⁷⁹rangnyek ngale rit amah thenâng sôngte chentô nâng atema rangkhethung wah ephiakkat thuk a, ngale atema nãngnâng mêmo moatlem emothuk hi.”

⁸⁰Naapa donglahma phoang aroang ngale Ju amoang nângmin achaan dângwah. Atea Isrial nok atang heh anga nga mathahko hôngloat mako sehahkho nâng sôngwah.