Read Nocte Naga Luk 10 Bible Online

Luk 10 - Nocte Naga bible

Luk 10

¹Erediko Teso ma ahan roakengit wanii moattat chhoante mihnyan heh rênwah ngale ate chhoanthin hahdaang hehnâng ngale chentô thenâng ate mako wanii waniima chienchhoanlâ wah.

²Jisu ma thinnâng ngatwah, “Chhah munchoan pa jahmõang tonga, phumma ereheh khôankhenrãng moatlem moatte pa amãnchha. Erohwah chhah munchoan tângte wako, ate chhah munchoan heh khôankhenrãng moatlem moatte chenchien katra ngama rangsoam en.

³Chhoan en! ngama soanchhang nâng saak rãngrãng chienchhoan eka.

⁴Ngunmin nekkepen, ngale tõng akhak, erediko daphângmin nekkepen; erediko mihnâng phoangranjab rãng lemnâng nekchepen.

⁵Chenthu ne mihhum khennâng melupwãng tetko, khebengko, ‘Are humko Joban ma rangkohmin ngama rânjab en.’

⁶Phumma ere humko mêmo - nâng hunte mihnyan mesong ako, nema rangsoam koh eken pa ere humko chentonga; mêmo nâng hunte mihnyan ledang medang ako erepa ngakkep re en.

⁷Ere humko tongen, ngale thinma nenâng chenni jokphhek chhahthuk ehèn a erepa jokphhek chhah en, chenrãngma ngako moatlem moatte hehnâng thin dekbi pa kohmin. Humthe wah humthenâng nekphoang chhoan en.

⁸Chenthu komin nea sumhahnâng chhoanko metangroo hènko, nenâng chenni koh ehèn a arepa jokphhek chhah en,

⁹ere sumhah kowah khoanchette heh sensiet re en, ngale erekowah mihnyan hehnâng, ‘Joban Hahsông pa netânâng lânam hutha’ ngama thôkoh en.

¹⁰Rohkomin chenthu ne sumhahnâng chhoanko letangroo medang hènko, noknyu lemdongnâng chhoan letma ngaen,

¹¹‘Ne hah wah nida nâng bum khep ekapa nima ne lelatnâng finekthien eki. Rohkomin thonghun en Joban Hahsông pa netânâng namhûtha!’

¹²Ngama nenâng linlin thôkoh eka, khope rênjâ rangwo ko Joban ma ere sumhahko mînchen noma Sodom nângba mînchen pa ajah ekhesok a!!

¹³“Korajin, nangrãngma chentô cheili dângmin a! Batsida, nangrãng memin chentô cheili dângmin a! Ne tânâng patritli moatlem motekpa Tair ngale Sidon nâng moat nomako, papwah hunglittih ngama jetthukrãng, enângwah mihnyan heh chenthu thuma bosta khetpa kep ngale bumma thinkhoko phuhrii chenre tah!

¹⁴Ju khope rênjâ rangwo ko Joban ma nenâng khesok noma Tair ngale Sidon nângba mînchen pa ajah ekhesok a.

¹⁵Ngale Kaparnam! nangmin rangkhethung nâng lânleproh chôangritwâng huntoh a? nanga pap wendô dongkhohko ejâsietkat e!”

¹⁶Jisu ma ate dijunte hehnâng ngatwah, “Henhenma ne ngintat ehèn a, erepa nga ngintat ehang; henhenma ne letangroo dang ehèn a, arepa ngamin tangroo mahhang; ngale henhenma nga letangroo dang ehanga arepa nga chienkatte pemin tangroomah.”

¹⁷Roakengit - wanii moattat chhoante mihnyan heh nyahrãng khuhah nâhah ngakhok wah. Thinma ngatwah, “Teso,” “Nima nangmînko juchhih hehnâng ngatko thinma ni nginkep ehi!”

¹⁸Jisu ma thinnâng dânthâng wah, “Ngama rangwah joak rangdãng khiapda rãngrãng jâka lahma khetek.

¹⁹Tat en! Ngama nenâng chaan koheka, erohwah nema pû ngale gusirong khohnângmin takhoam en, ngale chentô Ran heh tâjien Chaanmin koheka, ngale nenâng chenni mejô letâmin.

²⁰Rohkomin juchhih hehma ne ngin kepdi nekroan en; erenoma ne mînpa rangkhethung nâng raangdiba roanrii en.”

²¹Ere sanpoatko Asâthôanju demnâng Jisu nyahrãng khuhahwah ngale atema ngatwah, “Wa, rangkhethung ngale hahtokkhoh Teso! Ngama nangnâng dangkoh a ngaeki, chenrãngma ngako, nangma jet ajien hehnâng lekhesok thangma huhriem tohpa nokba hehnâng khesok eko. Linlinjô Wa erohpa nanghung junko dangeka.

²²“Ewama nganâng chentôpa lâkoh thang. Henmemin Chhapa hen a arepa jetmah, Wama loloba jeteka, ngale henmemin Wapa hen a arepa jetmah, Chhama loloba jeteka, ngale hennâng Chhama jetthukrãng ren eka ereheh meba jeteka.”

²³Erediko Jisu ma dijunte heh ngeko ngiaksûkat lahma thinnâng lolo ngatwah, “Nema are kheken heh chohkhe pa nea chentô khengraangsên a!

²⁴Ngama nenâng linlin thôkoh eka nema chenni kheken a erepa ajahthem mõngama ngale lowang hehmemin chohkhe huneka, rohkomin thinma chohkhemah, ngale nema chentat eken a erepa chohtat huneka, rohkomin thinma chohtatmah.”

²⁵Niemarang hethôte wathe hûlahma Jisu ngin nâng bukritthuk hunwah. Atema Jisu nâng thôngphâ wah, “Hethôte,” “Ngama roantang roanjêng khope chohrãng chenni moatmin a?”

²⁶Jisu ma atenâng dânthâng wah, “Joban nyapraang nâng chenroh ngaeka? Nangma Joban nyapraangpa chenroh rângweih oa?”

²⁷Mihwa pumma dânthâng wah, “ ‘Nang Teso Joban nâng nanghung nangrin phangtang kohlohma hun, ngale nangju phangtang koh o, erediko nangchaan phangtang kohlohma hun o’; ngale ‘Nang tok akhung wah mihnyan hehnângmin nang dedeko hunriieko rãngrãng hun o.’ ”

²⁸Jisu ma dânthâng wah; “Nangma toangtang lâjabtoh,” “Nangma eroh memo oko roantang roanjêng khope echoh o.”

²⁹Rohkomin Niemarang hethôte pa atedede toangtang ngatrit hunlahma, atema Jisu nâng ngatwah, “Ngatok ngakhung wah mihnyan heh hen a?”

³⁰Jisu ma atenâng dânthâng wah, “Rekthenâng mihnyan wathe Jeroselem wah Jeriko nâng katwah, phumma ahuhte ma khum lahma ate khet akhu heh chiensiet lahma atenâng watlahma riinemnem phethien wah.

³¹Phumma erelem pumma soam aroakte wathe kalahma dângwah; chenthu atema mihma wattah mihnyan pa khephumma lemhan ngenâng kekhôam chhoanwah.

³²Erelem pummejô soam aroakte hehnâng chohsokte Livi kalahma mihma watlahma phethientah mihnyan pa chohkhe wah, phumma atemin lemhan ngenâng kekhôam chhoanwah.

³³Phumma Samaritan mihnyan erelem pummejô kalahma mihma watlahma phethientah mihnyan tâko hokkatwah, phumma atema ere mihnyan pa khelahma nyahrãng hungchhih ngale mînchenwah.

³⁴Mihwa tâko kalahma tienma hutkohwah, ngale angurtima mâ heh chatko lahma khhekkoh wah; erediko atema mihwa pa ate mokkhohko chhangthuk lahma mihhum khennâng sietwên lahma sokare wah.

³⁵Eredijâko atema janngun phanii loattoan lahma humkhen wah kaammoatte mihnyanko kohwah. Ngale ‘Senthemthem sûare mêngo,’ ngama atenâng ngatthien wah, ngale chenthu nga arelem pumma mengak kathangko, nangma ate sokare ko chentô mettoh heh engakthum e.’”

³⁶Ngale Jisu ma athôanko thôkoh wah, “Nang junko, ere warem mihnyan kowah chen pumma ahuhte hehma watthientah mihnyanko ate tok akhung rãngrãng danglahma suare tah a?”

³⁷Niemarang hethôte pumma dânthâng wah, “Atenâng mînchente pumma.” Jisu ma dânthâng wah, “Nangmin chhoan lohma eroh mochhoan o.”

³⁸Jisu le ate dijunte heh thinlemnâng wângthuko, hahdaang wanthenâng lepkhoam lahma Martha ma ate humnâng tãngroowah.

³⁹Martha demnâng atenaa Mariam ngama dângwah, phumma Mariam pa Teso dathongko ate ngin jetat lahma tôngwah.

⁴⁰Martha ma chentô moatlempa ate loloma moat phumma hungkêwah, ephumma wãng lahma ngatwah, “Teso, nangma thonghun mohne, nganaa pumma chentô moatlem heh nganâng lolo mothuk ehang, atenâng thômêngkoh nganâng chenchoh moka mênghang!”

⁴¹Teso ma dânthâng wah, “Martha, Martha! Nanga ajahthem moatlem hehrãng sekmah patrii ekoa,

⁴²wanthe loloba nyahrãng alemli thôan tonga. Phumma Mariam ma erepa lâpunrentah, ngale erepa ate ngewah leta toanchhoan min.”