Read Nocte Naga Luk 12 Bible Online

Luk 12 - Nocte Naga bible

Luk 12

¹Mihnyan heh hahjat bijatma khôan lahma, thindede tupnekmîn wah, ngale Jisu ma ate dijunte hehnâng bângngatwah, “Farasi heh wichhi hehwah jetletma dangen - ngama are ngaeka pa thin ahukhoanglep hehwah jetletma dangen ngaeka.

²Chenpa mumphuh lahma thieneka erepa laangphe rêmin, ngale chentô huhriem lahma thien eka heh loatsiet rêmin.

³Erohwah nema rangnyek khennâng chenni jabtet a erepa rangwo nâng chohtatmin, ngale nema kâsek sekletma chenni huhjabtet a erepa humkhoma hôngrakmin.

⁴“Ngalemruchha heh, ngama nenâng thôkoh eka, phoang ritphete ran nekchei en, khediko thinma chenjô tachhih motumah.

⁵Henran cheimin a erepa ngama nenâng khesok a: Joban ren chei en, atenâng phoang ritphe dikomin, pap wendônâng phêkatrãng chaan tonga. Nganâng puteha, ate ran lolo jôba chei en!”

⁶“Wesaangsut wochha wanbangâ pa phanii ngun nâng lesãngne? rohkomin Joban ma wesaangsut kowah wanthe tumin lekphemah.

⁷Nekhowah khochoo heh tumin phangtang roakweih lahma thieneka. Erohwah nekchei en; Nea jahmõang wesaangsut nomemin adong!

⁸“Ngama nenâng linlin thôkoh eka, henma komin nok atang mathahko atea ngarãng ngama meloatjab ako, Mihnyan Chha memin Joban ngintatte heh mathahko thinrãngma erohjô eloatjab a.

⁹Rohkomin nok atang mathahko henma nga dak ehanga, Mihnyan Chha memin Joban ngintatte heh mathahko thinmin erohjô edak a.”

¹⁰Henma akomin Mihnyan Chha rãngma mechhihjab ako map tâkohmin; rohkomin henma Asâthôanju lelatnâng chhihjab eka hehnâng map lekohmin.

¹¹“Chenthu thinma Sanagog nâng ba Govono tânâng, ba diak akan pênte heh tânâng nginthôngphâ rãng mesiet hûhenko, nema chenroh dânthâng min a, ngale chenli dânthâng min a ngama neksekmah en.

¹²Chenrãngma ngako, Asâthôanju ma ere sanpoatko nema chenni dânthâng min a erepa ethôkoh hèn.”

¹³Loangchhang wah mihwa wathema Jisu nâng ngatwah, “Hethôte, Ngapho nâng thômêngkoh, niwama chhahkhem wanlem ngale thin amãn phethien kohthi heh nganâng chenphen kohhang.”

¹⁴Jisu ma atenâng dânthâng wah, “Lemruchha, nangpho nechhe tungko chhahkhem wanlem ngale thin amãn heh phenkohrãng nganâng henma chaankoh ehanga?”

¹⁵Ngale erediko Jisu ma mihnyan heh phangtang nâng thôkoh wah, “Jetletma dangen, ngale chhahnyoak nekdangen; chenrãngma ngako nea chentô chhu alujô medang enkomin, ne roandôngpa nema kep alo eken chhahkhem wanlem junko hîn ajô dangmet.”

¹⁶Erediko Jisu ma thinnâng are nginthakthô pa thôkoh wah: “Rekthenâng techhuwa wathe nâng nyahrãng too achhah sênpit dângwah.

¹⁷Phumma ate dedema thônghun wah, ‘Ngama chenni retu anga? Too achhah thienrãng the ahotu.

¹⁸Ate dedema ngatritwah, Ngama aroh hôan ang,’ ‘pumpa hakphe lekma adong ngakhoan ang, ereko too achhah ngale lihân chhahkhem hehmin phangtang sekthien ang.

¹⁹Erediko ngama ngadede nâng engarii ang, nyahrãng khengraangsen! melâng rangpârãng nangma lem eko sêmmaksen heh tongho. Ngale nang roandôngko ngam poase tonglohma khuhah nâhah chennângjô lechêmrii jokphhek chhah lohma tongo’

²⁰Rohkomin Joban ma atenâng ngaeka, ‘nanga aba hahphhek! Thejâ rangpenpen nang rit rêmin; phumma nangrãng are chhahkhem khôanthientoh heh henma kepmin a?’”

²¹Ngale Jisu ma athôanko thôkoh wah, “Joban ngenâng techhu ledang thangma are hahtokkhoh ko lolo techhu dangeka heh eroh dângmin.”

²²Erediko Jisu ma dijunte hehnâng ngatwah, “Ngama nenâng thôkoh eka, chenwah choh phhekchhah lihma hînmin a ngama neksekmah en, ngale ne phoang wah kepthin khetrãng memin neksekmah en.

²³Phhekchhah noma roandông peba ajahthem adong, ngale khet akhu noma phoang peba ajahthem adong.

²⁴Wekha wo hehnâng thatsutan en: thinma khiet alimin khietmah, ngale pum nângmin khôanhenmah; thinnâng khôanhenrãng pummin aho; Joban ma lolo kungwak eka! phumma nea wo heh noma ajahthem adong!

²⁵Nekhuwah hen komin patrii sekmah letma chuthe tabâm lekhin en a?

²⁶Nema moatlem rinchha pa lebâng tamo medang enko, moatlem ahan rãngma chenrãngma sekmah eken a?

²⁷Sûtan en wunwah chongpô heh chenroh dongeka: Thinma pitmin momah ngale thinrâng khet akhumin hôanmah. Rohkomin ngama nenâng thôkoh eka, Solomon Lowang tumin atô chhu alu ngale khet akhu tonglahma ere chongpô wanthe sêntô dangho.

²⁸Joban ma wunwah hin hehnâng khet akhu kepkoh eka - hinpa thejâ metong akomin, nènep ko wennâng rokthhekmin. Atema nenâng jãtanga enoma ajah khet akhu lekep kohminne? Ne dâlem pa atorîn ne!

²⁹“Erohwah nema chenni jokphhek chhahmin a ngama roantang neksekmah en.

³⁰(Chenrãngma ngako are hahtokkhoh wah Joban lejette heh roantangma ere hehrãngma sekmah patrii lahma tongeka.) Nema ereheh lemeken ngama ne Wa Joban ma ajet.

³¹Erenoma, Joban Hahsông rãngma sekmah patrii letma tongen, erohkoba atema nenâng ereheh ekohhèn.

³²“Loangnejô medang enkomin nekchei en, chenrãngma ngako ne Wa Joban ma nenâng ate Hahsông pa kohhun ehèn.

³³Ne chhahkhem chentôpa sengletma ngunpa tangchhih hehnâng koh en. Roantang roanjêngma techhu dângthinpa kepen, ngale rangkhethung nâng techhu thôan dângrãng khôanthien en, enâng chenthumin tangchhih ledangmin, chenrãngma ngako ereheh ahuhte memin leta huhmin, ngale chhumphithang memin leta chhihphekmin.

³⁴Chenrãngma ngako ne chhahkhem heh chenreko, ereko nehung pemin edanga.

³⁵“Chenjô mehû rekomin chepchã letmejû tongen, ngale khetkep lihma tongwah rãngrãng bemkepma tongen, ngale wentit pa chenphiak a,

³⁶Nemnyansiet kuhhôan thinwah thin tângtewa ngakhok bemlâte haaheh rãngrãng dangen. Chenthu ate hûlahma kâsekko merahkõng tahko thinma lemlienma elaangkoh a.

³⁷Chenthu tângtewa pa ngakhokko lejuplek thangma bemtongla lahma khehû eka haaheh chentô khuhah dângmin a! Ngama nenâng thôkoh eka, tângtewa pumma ate khetpa putphe lahma, ate haaheh tongthuk lahma, thinnâng enget a.

³⁸Tângtewa pa penmong nâng ba ereno memin sanhem nâng mehû akomin bemla lahma khehû eka haaheh chentô khuhah dângmin a!

³⁹Ngale ngama nenâng thôkoh eka, hum tângtewa pumma ahuhte hok sanpoat pa mejet ako, atema ahuhte hehnâng ate humpa lehuh thukmin.

⁴⁰Ngale nemin, bemla letmajû tongen, chenrãngma ngako, Mihnyan Chha min nema lethonghun sanpoatko ekara.”

⁴¹Piter ma ngatwah, “Teso nangma are nginthakthô pa nirãng thakthô ekole, mihrãngma thakthô ekoa?”

⁴²Teso ma dânthâng wah, “Eroh medang ako henpa dâlemli ngale buthi mongthêmwin haa a? Atenâng ate tângtewa pumma ate chhahkhem heh sûare thuk, erediko hum apum hehmin sûare thuk, ngale haa ahan hehnâng phhekchhah chhah sanpoat thâng roakweih chhahthuk rãng echien a.

⁴³Chenthu tângtewa pa humnâng hokko ere haa pumma eroh molahma mekhehû ako haapa chentô khuhah dângmin a!

⁴⁴Ngama nenâng linlin thôkoh eka, tângtewa pumma ere haako ate chhahkhem heh phangtang esû erethuk a.

⁴⁵Rohkomin ere haa pumma tângtewa pa ngakhok mabâng thangeka, ngama ate dedema thonghun lahma, ate lemru haa ahan hehnâng dihiak dela chentô nâng buhawat, ngale jokphhek chhah lahma mok alek mereako,

⁴⁶Jâthe rangwo haa pumma lethonghun poatko ngale atema lejet sanpoatko tângtewa pa engakhûa. Phumma tângtewa pumma ere haapa khihkhih nyahnyah ekhihdoak a ngale ngin lekepte heh demnâng ejoh chêmthuk a.

⁴⁷“Haa pumma nga tângtewa ma are moatlempa moatrãng chien ehang ngama jetrii lahma, atema lemo dangeka, ere haako ajah watlahma chêmsietmin.

⁴⁸Rohkomin haa hen pumma ate tângtewa ma are moatlempa moatrãng chien ehang ngama lejet thangma, atema ere moatlem pa lemo dangeka, ere haa komin watmin, rohkomin ere haako rãngkuh watmin. Hennâng ajah kohwah a erekowah ajah thâmin; ngale hennâng abâmbâm jahkohwah a erekowah abâmbâmjô jahthâmin.

⁴⁹“Ngama hahtokkhoh ko wen rokthhekrãng kaerâng, ngale arepa khamchhoan ba ledangtah a ngama thonghun ekang!

⁵⁰Ngama baptijem kepthin tonghang, ngale erepa ngama mara râkep kãngko ngahung senmek!

⁵¹Nema nga are hahtokkhoh ko mêmo kohrãng kaera ngama lethonghun eha? mêmo kohrãng katdangmek, aphan sietrãng kaerâng.

⁵²Adephumma hum wanthe khenko wabangâ mihnyan meroam songako, warem pa wanii lelatnâng dângmin, ngale wanii pa warem lelatnâng dângmin.

⁵³Wa heh thinchha heh lelatnâng edanga, ngale chha hehmin thinwa heh lelatnâng edanga; Nyong hehmin thinchha dihiaknya heh lelatnâng edanga, ngale dihiaknya hehmin thinnyong heh lelatnâng edanga; Nyipanyu heh thin nem heh lelatnâng edanga, ngale nem heh thin nyipanyu heh lelatnâng dang erea,”

⁵⁴Jisu ma mihnyan hehnâng ngatwah, “Chenthu nema sannyup nâng phoam mekhe enko, lemlienma rangpatrãng ngaeka ngama rângjet en - phumma rangpatmin rângpat a.

⁵⁵Ngale chenthu dekchah ngema pông mepong hûrako, nema rangngup rangkhâm dângrãng ngaeka ngama rângnga en - phumma rangngup rangkhamjô rângdanga.

⁵⁶Ahuhkhoanglep heh! Nema rangle hahko sûletma rangchhih rangme pa jienjetlo eken; phumma athângheh wah rangkuh sanha pa chenrãng lejien jetlo dangeken a?

⁵⁷“Chenrãngma nema moatlem asenli moatrãng lethonghun reken a?

⁵⁸Henma komin ne lelatnâng ngin hongsiet lahma metloatthin humnâng mesietchhoan hènko, metloatthin humnâng wângmako phensietrãng thonghun en. Eroh ledang kako, nginpatte heh tâko siethû lahma, thinma sipâhi hehnâng ekhhekthuk hèn, ngale phâtek nâng esekhèn.

⁵⁹Ngama nenâng thôkoh eka, nema chêngpa phangtang mata tathum eko esekthienhèn.”