Read Nocte Naga Luk 13 Bible Online

Luk 13 - Nocte Naga bible

Luk 13

¹Ere sanpoatko mihnyan khuthema Jisu nâng Galili wah mihnyan hehma Joban nâng joapsoap thuko Pilat ma ritphetah ngin heh thôkoh wah.

²Jisu ma thinnâng dânthâng wah, “Galili wah mihnyan ahan heh noma thin a papi thôan mihnyan dângkowah ritphe eka ngama nema thonghun eken a?

³Erohwah ritphe dangmah! Ngale ngama nenâng thôkoh eka, nemin nepap wah hung lengaklit kenko erohjô eriien.

⁴Ngale Silom hum runjâ lahma echhi waeset mihnyan ritpettah pa nema chenroh thonghun eken a? Thin a Jeroselem wah sôngte mihnyan ahan heh noma papi thôan dângkowah ritpet eka ngama lethonghun eken a?

⁵Eroh dangmah! Ngale ngama nenâng thôkoh eka, nemin nepapwah hung lengaklit kenko erohjô eriien.”

⁶Erediko Jisu ma are nginthakthô pa thinnâng thôkoh wah: “Mihnyan wathema phukbãng khiet lahma dângwah. Phumma atema phukri lemsûka tahpa chohkheho.

⁷Ephumma atema bãngthong pânteko ngatwah, ‘Sûtan, rangpâ pârem ngama are phukbãngko phukri lêmsokrãng lâkathang, phumma wanthejô mathat chohpun ekang. Ajoatphe reo! hahmên tôtô nekchenphoak eka’

⁸Phumma bãngthong pânte pumma dânthâng wah, ‘Tângte, ademin pâthetô chenthat tongtan a; Ngama hahken thulekma hahpîn thatkohtan ang.

⁹Phumma nèpa phukri meri ako, ajahthem asen edanga; eroh komin penri leri medang ako nangma tajoat pheo.’ ”

¹⁰Pientông jâko Jisu ma Sanagog nâng hethô lahma dângwah.

¹¹Dihiaknyu wathe nâng juchhih luplahma echhi pâeset khun lahma dângwah; ngale leta tinjâttû kunjâ lahma dângwah.

¹²Chenthu Jisu ma ate khephumma atenâng rakkatwah, “Dihiaknyu, nanga nang khoanchet kowah lâsentoh!”

¹³Jisu ma atenâng dekma sahloatwah, ngale lemlienma dihiaknyu pa jienchên chepwah ngale atema Joban nâng rôwah.

¹⁴Jisu ma Pientông jâko khoanchette pa sênsiet phumma Sanagog wah sahhabwa pa nyahrãng rinkhah wah, ephumma atema hongjab lahma mihnyan hehnâng ngatwah, “Nãngma jâerok rangwo khenko moatlem heh moatmin; ere rangwo khenko hûletma khoanchet heh chenmesiet hèn, phumma Pientông jâko dangmah!”

¹⁵Teso ma atenâng dânthâng wah, “Nea ahuhkhoanglep! Nekhuma ne mânpong ba gado pa thinhoo kowah jânletma Pientông jâko jojok thukrãng rângsietchhoan en.

¹⁶Phumma are Abraham pôali pa joakma echhi pâeset lâkhhek thientah; Phumma Pientông jâko leta jânphemin ne?”

¹⁷Jisu ma dânthang eka ngin pumma ate ran hehnâng rêsê thângwah, ngale Jisu ma patritli moatlem moatjunko mihnyan heh nyahrãng khuhahwah.

¹⁸Jisu ma thôngphâ wah, “Joban Hahsông thepa chenrãngrãnga? Erepa ngama chennâng thakmîn lekma thakthô anga?

¹⁹Erepa arerãngrãng. Mihnyan wathema jokangken pa ate pitko wênkat eka. Jokangken pa phoak lahma bãng rãngrãng dongeka, ngale wo hehmemin ate bãngphakko rup rupeka.”

²⁰Eredikomin Jisu ma wîen thôngphâ wah, “Ngama Joban Hahsông thepa chendemnâng thakmîn lekma thakthô anga?

²¹Erepa arerãngrãng. Dihiaknyu wathema wichhi pa toak roakbelii pheban demko sakmîn lahma phangtang mabiet bietjâ thieneka rãngrãng.”

²²Jisu ma Jeroselem nâng wângnung nungma ate wânglemko chentô sumhah ngale hahdaang heh dankhoam eka hehnâng Joban ngin phoangthô lahma wângwah.

²³Mihnyan wathema atenâng thôngphâ wah, “Teso, khopete mihnyan pa mãnchha dângminne?” Jisu ma thinnâng dânthâng wah,

²⁴“Kâsek pumma dânkhoamrãng latrii en; chenrãngma ngako ajahthem mihnyan hehma erepumma dânkhôamrãng ehunwak a, rohkomin thinma leta dankhoammin.

²⁵Hum tângte pumma toansat lahma kâsekpa sek erea; erediko nema rangsâko chepletma kâsekko rahkõng letma enga en, ‘Teso!, nirãng kâsekpa laangkohhi,’ phumma atema edânthanghèn, ‘ne chennângwah hûeren a erepa ngama jetmah!’

²⁶Erediko nema edânthangen, ‘Nia nangdemnâng aroamma jokphhek chhahtih dangmahne; ngale nangma ni hahnâng hethô huthi dangmahne!’

²⁷Rohkomin atema engak ngahèn, ‘ne chennâng wah hûeren a arepa ngama jetmah. Ne mihnyan chhih phangtang ngatâwah taangchhoan en!’

²⁸Nema Abraham, Isak, Jakob, ngale chentô mõngama heh Joban Hahsông theko ekhe en, phumma nea erethe kowah apetphe erehèn, ereko nema pâchupkek letma sep ere en!

²⁹Mihnyan heh sankatwah, sannyupwah, dekhit dekchahwah, hûlahma Joban Hahsông thekowah kuhhôan thinko etonghûa.

³⁰Ere diphumma athâng hehwah henhen khedi dangeka ereheh khema edanga, ngale henhen athângheh khema dangeka ereheh khedi edanga.”

³¹Ere sanpoat poatko Farasi khuthe hûlahma Jisu nâng ngathôkwah, “Nanga are thekowah loatchhoan ko, ngale chenriangnâng komin tongchhoan o, chenrãngma ngako Hirot ma nâng ritphe rãng lem eho.”

³²Jisu ma thinnâng dânthâng wah, “Wãngletma ere hien ko thôkoh en: ‘Ngama juchhih junlo re ekang ngale thejâ ngale nènep, tungko ngama khoanchet heh mesiet ereang, ngale jârem jâko ngamoatlem heh phangtang etamo ang.’

³³Rohkomin thejâ, nènep, ngale sennep pa nga a lemnâng edangang; mõngpa chenriang nângjô leritphe min, Jeroselem nâng lolo jôba ritphemin.

³⁴“Jeroselem, Jeroselem! nema mõngama heh ritphe re eken, ngale Joban ma ate nginmatte netânâng chienkat era hehnâng longma ritpetre eken! Chenroh wonyong ma ate chha heh ate rangkhenko rângwok arãngrãng, ngama nemin ngadek khenko khôansiet rãng chentô thathuntek a, rohkomin nema nganâng eroh khoansietthuk mahha!

³⁵Ngale erohwah nema ne Rangsoamhum pa mahto nâng erãphe en. Ngama nenâng linlin thôkoh eka, nema ‘Teso mînko katteko Joban ma rangkoh eka ngama ngat sanpoat mahûhû erako nema nga lechoh khetumin.’ ”