Read Nocte Naga Luk 14 Bible Online

Luk 14 - Nocte Naga bible

Luk 14

¹Jâthe Pientông jâko Farasi hehwah wanthe khhepho humnâng Jisu phhekchhah chhahrãng chhoanwah; ngale mihnyan hehma Jisu tâko nyahrãng namhû lahma sokhokwah.

²Mihnyan wathe ate dek ada heh phin lahma Jisu tânâng hokwah,

³ngale Jisu ma loatjab lahma Niemarang hethôte ngale Farasi hehnâng ngatwah, “Nãng Niem junko Pientông jâko khoanchette tamesiet ele tamesietmih a?”

⁴Rohkomin thinma chenjô dânthangho. Phumma Jisu ma mihwako lolahma mesiet lahma chienchhoan wah.

⁵Erediko atema thinnâng ngatwah, “Nekhuwah henchha komin ba hen mânpong komin Pientông jâko jôngnâng mejârii ako, Pientông jâjô medang akomin nema lemlienma letoansietka minne”

⁶Phumma thinma ere nginko chenmin jiendânthangho.

⁷Mihnyan hehma kuhhôan thinnâng tôngthin sensenko phoanglemtông pa Jisu ma khelahma, are nginthakthô pa thinnâng thôkoh wah:

⁸“Chenthu ne nemnyansiet kuhhôan thinnâng meroo hènko, tôngthin sensenko nekren tongen. Chenrãngma ngako, ne nomemin lemrudong matwahmin etonga,

⁹phumma nechhe waniinii matthen tângtewa pumma, ‘Are tôngthinko ate chentonga’ ngama nenâng engakahèn. Ephumma nea rêsê letma tôngthin nûmko etongka en.

¹⁰Erohwah, chenthu ne meroo hènko wãngletma tôngthin anumthôanko tonghû en, erohkoba ne roote tângtewa pumma kalahma, ‘Nga lemruchha, wãngro tôngthin senko tongwãngro’ ngama nenâng eroohèn. Eroh koba mihhan heh mako thensânsân edangen.

¹¹Chenrãngma ngako, henhen thindede dongsietre eka ereheh rînsiet rêmin, ngale henhen thindede arin dangrii eka ereheh dôngsiet remin.”

¹²Erediko atenâng phhekchhah chhahthukte mihwako Jisu ma ngatwah, “Chenthu nangma mihheh phhekchhah chhahrãng meroo oko, nang lemruchha, pho anaa, tang amang, ngale tok akhungwah techhu heh nekroo, chenrãngma ngako thinma ngakmat ereho, ngale nangma chenpa ngettoh a erepa thinma engak nget ho.

¹³Erohwah chenthu nema kuhhôan letma phhekchhah menget enko, tangchhih heh, dekkò dakò, ngale mitdoak heh roo en;

¹⁴erohkoba nema rang ekepen, chenrãngma ngako thinma nenâng leta ngakngetmin. Ere thãpa, mihnyansen heh ritwah ngaksat jâko Joban ma nenâng engak kohhèn.”

¹⁵Are nginpa Jisu demwah johtongte wathema chohtatwah, phumma atema Jisu nâng ngatwah, “Joban Hahsôngthe kowah kuhhôan thinko chohtôngte heh chentô khuhah dângmin a!”

¹⁶Jisu ma atenâng ngatwah, “Rekthenâng wathema kuhdong hôanlahma mihnyan heh jahmõang roowah.

¹⁷Phhekchhah chhah sanpoatthâng phumma atema bisuntah mihnyan heh roorãng ate haaheh chienchhoan wah, ‘Hûren, chentôpa lâta khoakhemtih!’

¹⁸Phumma wathe diko wathema phangtangma danwah. Khebengwah pumma haako thôkoh wah, ‘Ngama pitnyan riekãng, erohwah nga pitsok katmêngmin; nganâng nekjôang mêngha nga jienwãng mahrâng.’

¹⁹Ahan wathe pummemin ngatwah, ‘ngama mânpong jutbangâ riekãng, erohwah ngama ereheh han thatbe katmêngmin; nganâng nekjôang mêngha jienwãng mahrâng.’

²⁰Ahan wathe pummemin ngatwah, ‘Ngama arohjû nemnyan bengsiet, erohwah nga tahû mahrâng.’

²¹Phumma haapa ngakwãng lahma chentôpa ate tângtewa ko thôkoh wah. Phumma tângtewa pa nyahrãng rinkhah lahma haako ngatwah, ‘Sitsiak noknyu lemdong hehnâng chhoan en, ngale sumhah nâng katthin lemsiep hehnâng chhoan en, ngale tangchhih, dekkò dakò, mitdoak heh khôansiet hûren.’

²²Haa pumma lemlienma ngatwah, ‘Tângte, nangma chienthi pa lâsiet huthi, rohkomin ademin ajahthem thechaak tonga.’

²³Ephumma tângtewa pumma haako ngatwah, ‘Chentô noknyu lemdong ngale lemsiep hehnâng chhoan en, mihnyan heh ngahum lanmenroh chienhûren.

²⁴Ngama nenâng linlin thôkoh eka, ngama bisuntek mihnyan hehma henmejô arekowah lechoh chhahmin!’ ”

²⁵Rekthenâng jahmõang mihnyan heh Jisu demnâng johkhoam lahma ma dângpoatko, Jisu ma litphong lahma thinnâng ngatwah,

²⁶“Hen komin ngatânâng hûlahma nganâng ate nyong awa, ate tangnyu, chhu chha, ngale pho anya erediko atedede nâng hunrii eka noma ajah lehun hangko atea ngadijunte tadangmah.

²⁷Hen komin ate bãngphak pa pelahma ngadiko lejunkhoam hangko atea ngadijunte tadangmah..

²⁸Nekhuwah henma komin humhôan mehun enko, khebângko tongletma chentô lemmin a erepa bângsok mêngmin, erediko nenâng humpa lânta hoanroh ngun tonghole ahoa erepa bângsurii mêngmin.

²⁹Nema eroh lesû medang enko, humhôanrãng khoakhemtet humthinpa leta laanghôanmin; ngale nema lãngka ma leta laanghôan thien ekenpa khelahma chentôma dûmmek ere hèn.

³⁰Thinma engahèn, ‘nema humhôanrãng chepletma talaang hôanmet!’

³¹Lowang wathepa hahjat echhi mihnyan sietlahma ahan lowang hahjat roaknii mihnyan sietlahma ate demnâng ranloatmîn rãng meka ako, khebengko atema tonglahma ate lelatwah chepte lowang demko taloatmîn angle taloatmînmek a ngama thônghun mêngmin.

³²Phumma atema leta loatmîn medang ako, lowang wathepa lemnâng dângthuko nomerãng nginmatte chienwênmin.

³³Ererãngrãng,” Jisu ma athôanko thôkoh wah, “Chenthu nema ne ngewah heh phangtangma lethinphe kenko, henjô ngadijunte tadangmet.

³⁴“Sumpa asen, phumma chenthu sumtupa mesejâ tahko, erepa lejien tusiet tumin.

³⁵Erepa hahrãng memin senmah, ngale hahpîn rãngmin senmah; erepa petphe ba retumin. Erohwah, Tattan en, nenâng nâ metong hènko!”