Read Nocte Naga Luk 15 Bible Online

Luk 15 - Nocte Naga bible

Luk 15

¹Jâthenâng thãkho thâte ngale papi mihnyan heh Jisu ngin jêtatrãng jahmõang hokwah,

²phumma Farasi ngale Niemarang hethôte hehma ngatwah, “Are mihnyan pumma papi mihnyan hehmin rooeka ngale thin demnâng phhekchhah roamchhah eka!”

³Ephumma Jisu ma thinnâng are nginthakthôpa thôkoh wah:

⁴“Chenjô komin nekhuwah wathe nâng châthe saak lâcheittet, phumma ekowah wanthe memahkhoam ako - nema chenrêmin a? nema roak ekhu wan ekhu pa phemphhek phethien letma mahkhoam reka saak wanthe pa machoh chohlem elemchhoan en.

⁵Chenthu nema erepa mechohtetko, nyahrãng khuhah letma chhoakkhoko etoanpe en

⁶ngale humnâng engak pewên en. Erediko nema ne lemruchha ngale ne tok akhung wah mihnyan heh aroamma khôanroo letma thinnâng enga en, ‘Ngasaak pa mahkhoam wah ngakchoh ekang, erohwah nga nyahrãng khuhah ekang. Nãngkhu anga nga khuhah nâhah dangmênge!’

⁷Ererãngrãng, Ngama nenâng thôkoh eka, roak ekhu waekhu hung lelitte mihnyan heh noma papi mihnyan wathe hungmelit ako rangkhethung nâng ajah khuhah nâhah dangeka.

⁸“Ngale chenjô komin dihiaknyu wathema ate ngunpha phaechhi kowah phathe memahphe ako - atema chenni rêmin a? Atema wentit toaklahma ate hum phangtang rulahma machoh chohlem elem a.

⁹Chenthu atema ere ngun pa mechoh tahko ate lemruchha heh ngale ate tok akhung wah mihnyan heh aroamma khôanroo lahma thinnâng enga a, ‘Ngama mahphetek ngunpa ngakchoh phumma nyahrãng khuhah nâhah dangekang. Nãngkhu anga nga khuhah nâhah dangmênge!’

¹⁰Ererãngrãng, Ngama nenâng thôkoh eka, wathe papi mihnyan hungngak litko rangkhethung wah Joban ngintatte heh khuhah eka.”

¹¹Eredikomin Jisu ma ngatwah, “Mihnyan wathe nâng ate chha dela wanii dângwah.

¹²Naadiwa pumma atewa nâng ngatwah, ‘Ewa, athâng thângheh ngama chohthin thiak aman heh nganâng koh ehang.’ Ephumma atewa pumma chhepho wanii tungko ate chhahkhem ngale pitthin jolem chentôpa phênkohwah.

¹³Jâthe jânii diko naadiwa pumma ate thiak aman heh phangtang sengphe lahma ngun keplahma humwah chhoanwah. Hahtaang diaknâng chhoan lahma ate ngunpa bamet tamet phoangmet phewah.

¹⁴Atenâng chentô tongtong apa phangtang thôanmetphe wah. Erediko ere diakko nyahrãng rêmdong remwah, ngale atenâng ere phumma chenmin hotu dângwah.

¹⁵Ephumma erediak kowah mihwa wathe tânâng dekbi bîrãng hokwah, ngale ere mihwa pumma ate wak heh sokrãng chienwah.

¹⁶Atema wakchhah khôankho kowah phhekchhah pejû chhahhun dângwah, rohkomin atenâng henmejô chhahthuk ho.

¹⁷Khediko ate hungnâng hûlahma ngatwah, ‘Ewa wah dekbi bîchhahte heh lephang leleng choh phhekchhah wakeka, phumma nga aretheko rêmma chêmrii ekang!

¹⁸Ngama ewa tânâng wãnglekma ewa nâng ngawãng ang, “Ewa, ngama Joban ngale nangrãng nyahrãng pap lâmotek.

¹⁹Nga nangchhadâng khemtumek; nang ngewah wathe dekbi bîchhahte rãngrãng tumin thienhang.” ’

²⁰Ephumma cheplahma atewa tânâng ngakwâng wah. “Ate humwah melâng taangnâng dângthuko ate wama lepkhêkat wah; atewa pa nyahrãng hungchhihwah, ngale chohchhoan kalahma ate chhako dekma khitka lahma chupjokwah.

²¹Chha pumma ngatwah, ‘Ewa,’ ‘Ngama Joban ngale nangrãng nyahrãng pap lâmotek. Ngale nga nangchhadâng khemtumek.’

²²Rohkomin atewa ma haaheh roolahma thinnâng ngatwah, ‘sitsiak!’ ‘Khetsen senthôan pa toanhû letma atenâng pohkoh en. Ate dekko dekkhepwah phengkohre en, ngale daphengmin phengkoh en.

²³Erediko leetet tetthôan pa joat en, ngale phhekdong chhahdong demnâng kuhhoan e!

²⁴Chenrãngma ngako are ngachhapa riichoan dângwah, rohkomin athângheh atea ahîn; atea mahchhoan dângwah, rohkomin athângheh lângakchohtek.’ Ngale ephumma thinma kuhhôanwah.

²⁵“Ere sanpoatko khhepho chhapa pitnâng dângwah. Phumma pitwah ngakwângko, hum hunemnemko, atema nongtem lahma boang aloamte heh tatwênwah.

²⁶Ephumma atema haa wathe roolahma chhienwah, ‘chenrãngma boangloam eka?’

²⁷Haa pumma dânthâng wah, ‘Nangnaa ngakhûera,’ ‘ngale nangwa ma lee thãchaanthôan pa joat eka, chenrãngma ngako atema ate chhapa senthemthem ngakchoh eka.’

²⁸Khhepho chhapa nyahrãng rinkhah lahma humnâng lehûwah; phumma atewa kalahma humnâng wãngro ngama roatsep katwah.

²⁹Rohkomin atema wako ngatwah, ‘Sûtan, rangpâ pâtang ngama nangrãngma haa rãngrãng danglekma motek, ngale ngama chenthumin nangngin thatdânmih. Phumma nangma nganâng chenni thatkoh thanga? Kienjoat lohmemin nga lemruchha heh demnâng mathat jokphhek chhahthuk ehang!

³⁰Rohkomin are nangchha pumma nangthiak aman heh phangtang senglahma dihiak phoangsengte heh demnâng thôanmetphê diko humnâng ngakhûera, phumma nangma atenâng thãchaanthôan leepa joatkoh eko!’

³¹Awa ma dânthâng wah, ‘Echha,’ ‘Nanga roantang nga demkojû, ngale ngawah chentôpa nangthiak.

³²Rohkomin khuhah nâhah boangloam ekipa nangnaa pa riichoan dângwah, rohkomin ade phumma lâhintah; atea mahchoan dângwah rohkomin ade phumma ate lângak chohtih.’ ”