Read Nocte Naga Luk 17 Bible Online

Luk 17 - Nocte Naga bible

Luk 17

¹Jisu ma ate dijunte hehnâng ngatwah, “Mihnyan heh pap dângthukthin pa metkep hôngmin, phumma pap dângthukte hehrãngma chentô chhih dângmin a!

²Are chentô noma arinthôan mihnyan hehwah wathe pap dângthuk noma ate bohko longdong khhek lahma josiko mejâtoakka akoba ate rãngma asen edanga.

³Erohwah nema chenni moeken a erepa jetletma mo en! “Nepho anaa ma pap memo ako, atenâng ritngat re en, ngale ate hung melit ako, atenâng mapkoh en.

⁴Atema jâtheko nangrãngma pap dep engit molahma, dep roakweih nang tânâng kalahma, ‘nga lâthetek,’ ngama mengaka hoko, nangma atenâng mapkoh o.”

⁵Moattat chhoante hehma Teso nâng, “Ni putedâlem pa dongsiet kohhi” ngama ngatwah.

⁶Teso ma dânthâng wah, “Nenâng putedâlem pa jokangken dôngtô metong hènko, nema are mulbary bãngko, ‘nangdede bãngthong rinma phurii lohma josiko nangdede khietrii kao!’ ngama mechien enkomin ne ngin ekephèn.

⁷“Chenjô komin nekhuwah wathe nâng haa lâtongthen, ngale ere haa pumma hanbê, ba saak heh lâsû lâretah. Phumma chenthu haapa pitwah hokko, nema lemlienma phhekchhah chhahrãng rângchien en a?

⁸Eroh chenthujô chienmet! erenoma, ‘nga phhekchhah heh khoakhem kohhang, ngale sôngdângkhet keplohma nga phhekchhah poatko bemtonghang; erediko ba nangma taphhekchhah o,’ ngama rângnga en.

⁹Haa pumma nginkepkep dângdi dangkoh a ngat lemmah, roh akole atema rânglem a?

¹⁰Nemin eroh jôba; chenthu nenâng moatrãng chien ehèn moatlempa phangtang meta motetko, nema enga en, ‘Nia haa dangkoh e; nima moatthin moatlem ba moeki.’ ”

¹¹Jisu Jeroselem nâng wângko, Samaria le Galili nii jatrii tungma dânwângwah.

¹²Ate hahdaang wanthenâng hokko angêm khoanchet ma chêm lahma mihnyan waechhi chohmînwah. Angêm khoanchette heh ataangnâng cheplahma dângwah

¹³ngale thinma rakkatwah, “Jisu! Hethôte! Ninâng mammînchen hi!”

¹⁴Jisu ma thin khelahma thinnâng ngatwah, “Wãngen soam aroakte hehma chenthatsû tanhèn.” Thin lemnâng wângpoatko angêm khoanchet pa sênwah.

¹⁵Chenthu thin khuchhang wah wathema atea senchoan kherii lahma, Joban nâng dangkoh a ngama chaanmõang rakroo lahma ngakkatwah.

¹⁶Ate dedema Jisu dathongko hahko khupjup kalahma Jisu nâng dangkoh a ngatwah. Ere mihnyan pa Samaritan mihnyan dângwah.

¹⁷Jisu ma ngatwah, “Waechhi sentet pela; ahan waekhu pa chenkoa?

¹⁸Chenrãngma are mihdiak mihnyan pumma lolo Joban nâng dangkoh a ngaknga kaera?”

¹⁹Ngale Jisu ma atenâng ngatwah, “Chep o, ngale chhoan o; nang putedâlem pumma sensiet eho.”

²⁰Farasi khuthema Jisu nâng Joban Hahsông pa chenthu katmin a ngama chhienwah. Jisu ma dânthâng wah, “Joban Hahsông pa mihnyan mitma kheli katmin dangmah.

²¹Henmemin, ‘sûtan en, Joban Hahsông pa anã!’ ba, ‘ireko tonga!’ ngama lengamin; chenrãngma ngako Joban Hahsông pa ne hungkhenko tonga.”

²²Erediko atema dijunte hehnâng ngatwah, “Nema Mihnyan Chha sanpoat kowah rangwo hehwah wothe komin chohkhe lihmele ngama hun rangkuh ehûra, rohkomin nema ere rangwopa leta chohkhemin.

²³Erediko mihnyan hehma nenâng engahèn, ‘Ireko sûka tan en!’ ba, ‘Anâng, sûka tanrên!’ rohkomin nema nekphoang sûchhoan en.

²⁴Rangdeng khiapda ma rangkho nâng sukka ma sukka nâng rângdanliap arãngrãng, Mihnyan Chha katjâ rangwo pemin eroh edanga.

²⁵Rohkomin khebângko atema nyahrãng chêmchoh mêngmin ngale arerôan wah mihnyan hehma ate roak atoak leweih edanga.

²⁶Noa sanpoatko chenroh dangtah a ererãngrãng Mihnyan Chha sanpoat komin erohjô edanga.

²⁷Noa khôankho khenko tôngwâng sanpoat tôko anga nga jokphhek chhah lahma dângwah, ngale dihiak dela kepmin lahma dângwah, ngale erediko jodôngma lumhû lahma phangtang ritphewah.

²⁸Ngale Lot sanpoatko chenroh dangtah a ererãngrãng edanga. Anga nga jokphhek chhah lahma dângwah, seng alengte, ariak achâte, khiet alîte toatmin, humpa toatmînhoan lahma dângwah.

²⁹Phumma Sodom hahdaang kowah Lot loatchhoan jâko rangkhethung wah wen jâka lahma phangtang ritkhâm wah.

³⁰Ererãngrãng jôba Mihnyan Chha katjâ komin edanga.

³¹“Erejâ rangwo ko henpa ate humkho nâng dângtea erepumma min humkhen nâng kalahma ate sêmmak heh letoan kamin; ererãngrãngjô pitnâng dângte hehmin humnâng lengakwãng min.

³²Lot tangnyu pa thonghuntan en!

³³Henhenma atedede roandông pêpângrit huneka erehehma mahphe erea; ngale henhenma atedede roandông mahphe eka erehehma thin roandông pa eta pesiet a.

³⁴Ngama nenâng thôkoh eka, erejâ rangpenko, mihnyan wanii jupthin wanthenâng eroamjup a: Phumma wathepa sietwên erea, ngale wathepa phethien erea.

³⁵Ngale dihiaknyu waniima chhah eroam thua, phumma wathepa sietwên erea ngale wathepa phethien erea.”

³⁷Dijunte hehma Jisu nâng thôngphâ wah, “Teso, arepa chenko dângmin a?” Jisu ma thinnâng dânthâng wah, “Chenriangko mang tongeka, eretheko mangphhekte hogunwo heh ekhoanjâa.”