Read Nocte Naga Luk 18 Bible Online

Luk 18 - Nocte Naga bible

Luk 18

¹Erediko Jisu ma ate dijunte hehnâng roantang hung lechha thangma rangsoam nungmejû tôngrãng nginthakthô thôkoh wah.

²“Hahdaang wanthenâng nginpatte wathe dângwah, atea Joban ranmin lechei, ngale mihnyan ranmin lechei dângwah.

³Ngale ere hahdaangko janthoinyu wathema atenâng roantang hûlahma, ‘Nga lelatnâng dângte ngaran hehwah mampânghang!’ ngama butbut roatsep hokwah.

⁴Melâng rangwo rãng ere nginpatte pumma dihiaknyuko lechohsû dângwah, phumma athôanko nginpatte pumma atedede ngatritwah, ‘Nga a Joban ranmin cheimek ngale mihnyan roak atoakmin leweih medang angkomin,

⁵are janthoinyu pumma butbut thamngat hokphumma, ngama atenâng chohsû ang. Ngama lechohsû medang angko, atema butbut thamhû lahma athôanko nga eboansiet hang!’ ”

⁶Ngale Teso ma thôkoh wah, “Tattan en, are nginpatte chhih pumma chenni ngaeka.

⁷Joban nâng putedâlemte mihnyan hehma rangwo rangnyek atenâng merosep ako Joban ma thinnâng lechohsû minne? Joban ma thinnâng sitsiak lechohsû thangma dângminne?

⁸Ngama nenâng thôkoh eka, atema thinrãng emoa ngale sitsiak echohsûa. Phumma chenthu Mihnyan Chhapa ngakkat jâko atema hahtokkhoh ko putedâlemte echohkhe karã?”

⁹Jisu ma are nginthakthô pa thindede asen thonghun lahma mihhan nâng achhih thônghunte hehnâng thôkoh wah.

¹⁰“Rekthenâng wanii mihnyan Rangsoamhum nâng rangsoam rãng roamhokwah: Wathepa Farasi dângwah, ngale ahan wathepa thãkho thâte dângwah.

¹¹Farasi pumma ataangnâng ate araangraang cheplahma rangsoam wah, ‘Joban, ngama dangkoh a ngaeki, chenrãngma ngako mihnyan ahan heh rãngrãng nga chhahnyoak dangmek, mothô khoanglepmin dangmek, ba mih tangnyu demnâng kaamchhih moatte min dangmek. Ngama nangnâng dangkoh a ngaeki chenrãngma ngako are thãkho thâte rãngrãngmin dangmek.

¹²Ngama heptako lephhek lechhahma rang jânii rângsoam ang, ngale ngama chentô chohbi ekang hehwahmin thãkho rângkoh ang.’

¹³Rohkomin thãkho thâte pa ataangnâng cheplahma ate khojô rangkhethung nâng leta toansûwên thangma ate thhenkhuhko teprii lahma soamwah, ‘Joban nga papi mihnyan, nganâng mammînchen hang!’

¹⁴Jisu ma ngatwah, “Ngama nenâng thôkoh eka, Farasi noma thãkho thâte pa Joban wah rangkep lahma ate humnâng ngakchhoanwah. Chenrãngma ngako henhen atedede dong sietrii eka erepa arînsiet rêmin, ngale henhen atedede arin dangrii eka erepa dôngsiet rêmin.”

¹⁵Mihnyan hehma thin chhuchha heh Jisu tânâng ate dekma chensahloa ngama siethok kohwah. Phumma erepa dijunte hehma lepkhe lahma thinnâng ritngatwah,

¹⁶Rohkomin Jisu ma naachha heh ate tâko roolahma ngatwah, “Nekjektang en naachha heh ngatânâng chenwãngra, chenrãngma ngako Joban Hahsông pa arerãngrãng heh thiak.

¹⁷Arepa thonghuntan en! Henhenma Joban Hahsông pa are naachha heh hung arin rãngrãng danglahma lekep dangeka ereheh chenthumin Joban Hahsông theko leta chohwãngmin.”

¹⁸Jews khhepho wathema Jisu nâng thôngphâ wah, “Hethôte sen, ngama roantang roanjêng roandông tâchoh rãng chenni moatmin a?”

¹⁹Jisu ma atenâng thôngphâ wah, “Nangma nganâng asen ngama chenrãng roo ehanga?” “Asen henjô aho, Joban loloba asen etonga.

²⁰Nangma Joban hôkum pa ajet: ‘Mihtangnyu demnâng kaamchhih nekmo; mih nekritphe; ahuh nekre; lethenâng mih neksêkham; nang nyong nangwa nginkepkep dango.’ ”

²¹Mihwa pumma dânthâng wah, “Nga letachha thumajû are hôkum heh phangtang lâkeptek.”

²²Chenthu Jisu ma are nginpa tatphumma atenâng ngatwah, “Nangma moatthin ademin wanthe tonga. Nang chhahkhem heh phangtang senglohma ngunpa tangchhih hehnâng koh o, ngale erohkoba nanga rangkhethung nâng techhu thôan edango; erediko kalohma ngadijun hang.”

²³Rohkomin chenthu atema are nginpa tatphumma nyahrãng hungkêwah, chenrãngma ngako atea nyahrãng techhu dângwah.

²⁴Jisu ma ate hungkê khelahma ngatwah, “Techhu heh Joban Hahsông thenâng wângpa chentolat a!

²⁵Techhu heh Joban Hahsông thenâng tâwâng noma ut peba metku polo pumma eta lienlup a.”

²⁶Ate ngin tatte mihnyan hehma Jisu nâng thôngphâ wah, “Eroh medang ako henkho tâpemin a?”

²⁷Jisu ma thinnâng dânthâng wah, “Chenpa mihnyan nyuchha ma letalia, erepa Joban ma tamoa.”

²⁸Erediko Piter ma ngatwah, “Sûtan! nima ni humte tangkâ heh phethien lihma nang dijun eki.”

²⁹Jisu ma thinnâng ngatwah, “Ngama nenâng thôkoh eka, henma komin Joban Hahsông rãngma ate humte tangkâ, ate tangnyu, pho anaa, nyong awa, ba chhuchha, heh phethien eka

³⁰erehehma are roanko ajahthem echoh a, ngale ahokmin roandông komin roantang roanjêng roandông echoh a.”

³¹Jisu ma dijunte echhi waniipa araangraang sietchhoan lahma ngatwah, “Tattan en! Nãnga Jeroselem nâng wãngeki, ngale mõng hehma Mihnyan Chha junma chentô raangtah a ereheh phangtang toangtang edanga.

³²Atea Jews ledangte heh deknâng ekoh a, phumma thinma thãjõ lembe ehôan a, erediko jõjêm lahma thoakkahma thoak erea.

³³Thinma watlahma ritphe erea, rohkomin jârem diko atea ngakhîn erea.”

³⁴Rohkomin are ngin thôkoh ekapa dijunte hehma jetloho; are nginpa thinnâng lejetthuk thangma huhthien lahma dângwah, ngale Jisu ma chenni jabeka erepa thinma jetloho.

³⁵Jisu Jeriko hah kêko hokko, mitdoak wathe lemkahko tonglahma thaphhek chhah lahma dângwah.

³⁶Chenthu atema mihnyan heh dânkhoam pa tatko, “chenni dangeka?” ngama thôngphâ wah.

³⁷“Nazarat wah Jisu dankhoam eka” ngama mihnyan hehma atenâng thôkoh wah.

³⁸Phumma, “Jisu! Devit Chha! Nganâng mammin chenhang!” ngama ate raksepwah.

³⁹Ate mathah kowah mihnyan hehma kihchepchep tongo ngama ritngatwah. Rohkomin atema, “Devit Chha! nganâng mammînchen hang!” ngama ajahjah chaanrakwah.

⁴⁰Ephumma Jisu ma cheplahma mitdoak wapa ate tânâng sietwênrãng ngatwah. Ate tâko hokwâng phumma Jisu ma atenâng chienwah,

⁴¹“Ngama nangrãng chenni moatkohhun eko?” Mitdoak pumma, “Teso, ngamitma ngakkhe hun ekang,” ngama dânthâng wah.

⁴²Jisu ma atenâng ngatwah, “Eroh medang ako kheo! Nang putedâlem pumma lâsensiettho.”

⁴³Ephumma atema lemlienma jienkhe wah, ngale Joban nâng dangkoh a ngama ngalahma Jisu diko junkhoam wah. Chenthu mihnyan hehma erepa khelahma phangtangma Joban nâng rôwah.