Read Nocte Naga Luk 2 Bible Online

Luk 2 - Nocte Naga bible

Luk 2

¹Augustas pa Chofa dângpoatko Roman Chofa khenwah chentô diakwah mihnyan heh khoroakweih rãng chienwah.

²Chenthu khebângrãng mihnyan heh khoroakweih poatko, Kurinas pa Siria diakko Govono dângwah.

³Anga ngama mâmâ nok ahah nâng khoroakweih lahma mînraangrãng chhoanwah.

⁴Josep min Galilijaa Nazarat hahnâng katwah, erehahpa Devit Lowang chhat hah Judia diakwah Bethlehem nâng katwah. Josep pa Devit pôali dângjunko erehahko katwah.

⁵Atea Mariam demnâng katwah. Mariam pa ate demko kepmînrãng ngama kahkhetmîn choan dângwah. Phumma Mariam pa naawun dângwah,

⁶ngale thin a Bethlehem nâng dângpoatko Mariam ma ate chha chhatrãng sanpoat pa thângwah.

⁷Mariam ma ate khhepho chha pa chhatwah. Ngale atema khetko doaplahma mânhoko jupthukwah - chenrãngma ngako thin tôngrãng humkhen nâng the aho dângwah.

⁸Ere diakko saaksokte khuthe thin saak heh sok nungma pitnâng rangpen jemlahma dângwah.

⁹Rangkhethung wah Teso ngintatte thintâko hôngkatwah, ngale Teso chaanpa thin khohko phiakkat wah. Thin a nyahrãng chei rewah,

¹⁰Phumma ngintatte pumma thinnâng ngatwah, “Nekchei en! Ngama nenâng nginsen thôkoh rãng kaerâng, erengin pumma mihnyan heh phangtang khu ehahthuk a.

¹¹Thejâ Devit hahko ne Pângte Chhaeka - Atea Krista Teso!

¹²Ngale nema are junko jet en: Nema naachha pa khetnâng doaplahma mânhoko jupthuk lahma ekhe en.”

¹³Lemlienma rangkhethung wah ngintatte heh jahmõang hong lahma ngintatte demko Joban nâng rôsê sewah:

¹⁴“Rangkhethung choangthôan nâng Joban mîndong thukeka, ngale hahtokkhoh ko hendemnâng ate rinme eka ereheh mêmo chendanga!”

¹⁵Chenthu ngintatte heh thin tâwah chhoan lahma rangkhethung nâng ngakwâng diko, saaksokte hehma wathema wathe nâng jabmînwah, “Bethlehem nâng wãnglihma Teso ma chenni thôkohthia ereheh sûwãnge.”

¹⁶Phumma thin sitsiak wãng lahma Mariam le Josepnii chohkhe wah, ngale naachha pa mânhoko jupthuk lahma khêwah.

¹⁷Saaksokte hehma naachha pa khêdiko, naachha junma ngintatte hehma thinnâng chenni thôkotah a ereheh thinma thôkoh wah.

¹⁸Saaksokte hehwah ngin chohtatte heh phangtang bârit rewah.

¹⁹Mariam ma erengin heh chhemhun lahma ate hungnâng lulili thônghun wah.

²⁰Saaksokte hehma chentô tattah le khetah heh junma, thinma Joban nâng rôsê selahma ngakchhoanwah; erepa thinnâng ngintatte ma chenroh thôkotah a eroh dângwah.

²¹Haptathe diko, naachha khoankhen niemhôan rangwo hokphumma, atenâng Jisu ngama mînwah, ere mînpa ate seknâng dângmako rangkhethung wah Joban ngintattema kohwah.

²²Mosa Niem junko Josep le Mariamnii seksâsietrit niemhôan sanpoat pa hokwah. Erohwah atenii ma naachha pa Jeroselem nâng Teso tânâng sietkatwah,

²³Teso Niem nâng raangeka rãngrãng: “Chentô khhepho chhapa Teso mînko rangsoam lahma araangraang Joban moatlem moatte dângrãng thienmin.”

²⁴Thinmemin Teso Niem junko, phari ba phari rãngrãngjat wochha wannii Joban mînko kohrãng katwah.

²⁵Ere sanpoatko mihwa wathe ate mînpa Simon ngama Jeroselem nâng songlahma dângwah. Atea mihnyansen ngale Joban rancheite mihnyan dângwah. Ngale Joban ma Isrial mihnyan heh pepângrãng katpa bemla lahma dângwah. Asâthôanju pa ate demko dângwah

²⁶ngale Teso ma toamsem tah Misaia pa lekhema nanga leriimin ngama atenâng ngatwah.

²⁷Juma sietwên lahma, Simon Rangsoamhum nâng wãngwah. Chenthu nyong awa niima naachha Jisu pa Rangsoamhum nâng niem junko aterãng niemhôan kohrãng sietwênko,

²⁸Simon ma naachha pa ate dekko pelahma Joban nâng dangkoh a ngatwah:

²⁹“Teso, ade phumma nangma toamsem tohpa linlin lâdangtah, ngale nang haapa rinmeme tariithuk o.

³⁰Ngadede mitma nangwah khopepa lâchoh khetek,

³¹Erepa nangma chentô mihnyan nyuchha heh mathahko khoakhem eko:

³²Atea Jews ledangte jat hehnâng nangma hun eko moatlem pa loatkhesokte wen ngale nang mihnyan Isrial heh mînsenthuk eka.”

³³Naachha junma Simon ma jab ekapa tatlahma ate nyong awanii bârit rewah.

³⁴Simon ma thinnâng rangkoh lahma ate nyong Mariam nâng ngatwah, “Are naachha pa Joban ma ren eka, ate junma ajahthem Isrial mihnyan chhihjâmin erea ngale khopete min ehonga. Atea Joban wah ngama jetrãngma ajahthem mihnyan hehma ate lelatnâng echhihjab a

³⁵ngale thin hungkhen nâng huhthonghun eka heh eloatthôkoh a. Ngale dangnahma nedede mongtoh pumma liensuhwah rãngrãng ere rekwah nehung elien chhihhèn.”

³⁶Nyahrãng wiku mõngnyu wathe dângwah, atea janthoinyu ngale ate mînpa Ana, Phanuil chha dângwah. Ngale ate Ashar jat dângwah. Ate tangwa demko pâengit lolo roamsông diko ate tangwapa ritwah, phumma atea erepoatko roak eset pâbelii rangpâ dângwah. Ate Rangsoamhum kowah leloat thangma; rangwo rangnyek phhekchhah lechhah thangma Joban nâng rangsoam lahma dângwah.

³⁷

³⁸Ere sanpoat poatko ate hukhoam hûlahma Joban nâng dangkoh a ngatwah, ngale Joban ma Jeroselem pêsietrãng bemlâte mihnyan heh tâko atema naachha junma jabwah.

³⁹Teso Niem junko moatthin moatlem heh phangtang râmoat diko, Josep le Mariamnii thin hah Galilijaa wah Nazarat hahnâng ngakkatwah.

⁴⁰Naapa donglahma chaanthepthep dângwah; ngale atenâng buthi mongthemsen hehmin jêngjah jahhong dângwah, erediko Joban mînchen pemin ate khohko dângwah.

⁴¹Rangpâ roakweih Jisu nyong awa heh Jeroselem nâng Adankhoam lokuh rãng katwah.

⁴²Chenthu Jisu echhi pânii dângko, jâhan pâhan wah rãngrãng lokuh rãng katwah.

⁴³Chenthu lokuhpa râphumma thinhumnâng ngakwâng wah, phumma letachha Jisu pa Jeroselem nâng tângtôngwah. Phumma arepa ate nyong awa hehma lejet dângwah;

⁴⁴Ayong awa hehma atea thinkhuchhang kojô edangthem a ngama thônghun wah, erohwah ngihjeng khoam diko thintang amang ngale lemru lemchha heh chhangko phoanglemsok wah.

⁴⁵Thinma lechohlem dâng phumma, Jeroselem nâng ate lemsokrãng ngakkatwah.

⁴⁶Jârem jâko Rangsoamhum nâng Jews heh Niemarang hethôte heh demko tonglahma thin ngin jetat ngale thinnâng ngin heh thôngphâ relahma chohkhe wah.

⁴⁷Atema ngin heh chhemlala dânthâng junko ate ngin chohtatte heh bârit rewah.

⁴⁸Chenthu ate nyong awa hehma ate chohkheko bârit rewah, ngale ate nyongma ngatwah, “Echha, nangma ninâng chenrãngma aroh hôan ehia? Nangwa chenii nang chohlem ele ngama nyahrãng lâpatriitih.”

⁴⁹Jisu ma dânthâng wah, “Nema nga chenrãngma lemsû eha? Nema nga Ewa Humnâng edanga ngama jet hone?”

⁵⁰Phumma Jisu ma danthang eka nginpa thinma jetwak ho.

⁵¹Ephumma Jisu thin demnâng Nazarat nâng ngakwâng wah, ngale enâng thin nginkepkep danglahma tôngwah. Are chentô ngin heh ate nyongma hungnâng thienwah.

⁵²Jisu phoang aroang ngale buthi mongthem nâng adông rewah, erediko Joban memin ngale mihnyan hehmemin atenâng sênchohwah.