Read Nocte Naga Luk 21 Bible Online

Luk 21 - Nocte Naga bible

Luk 21

¹Techhu hehma Rangsoamhum wah ngunsek bâkoatko thin hînhô heh sekhok pa Jisu ma tumlit phoangsok wah,

²ngale nyahrãng tangchhih janthoinyu ma janngun phanii sekhok pemin atema khewah.

³Jisu ma ngatwah, “Ngama nenâng thôkoh eka, are tangchhih janthoinyu pumma chentô noma ajahthôan sek eka.

⁴Chenrãngma ngako, ahan hehma thinnâng lephangleng bâeka hehwah sekhûera; rohkomin atea aretô tangchhih danglahma atema chentô chêika erepa phangtang sek eka.”

⁵Dijunte khuthe ere Rangsoamhum junma jabmînwah, chentô nyoaksokli sên a, long heh sênpa ngale Joban nâng hînhô kohhû eka heh sênpa ngama jabmînwah. Phumma Jisu ma ngatwah,

⁶“Nema are chentô khe eken long heh phangthemin ate theko letongtu sanpoat pa ehûra; phangtang runjâ erea.”

⁷Thinma thôngphâ wah, “Hethôte, arepa chenthu dângmin a? ngale areheh dângrãng sanpoat pa lâthângtah ngama jetrãng chenni dângmin a?”

⁸Jisu ma ngatwah, “Jetletma dangen; mihnâng nekdiep chhahrii en. Ajahthem mihnyan hehma ngamîn keplahma ehûra, thinma ‘nga a ate!’ ngama engawak a, ngale ‘Sanpoat pa lâhûtha!’ ngamemin engawak a, rohkomin thindi nekjun en.

⁹Chenthu nema ranloatmîn ngale rantîn ngemtîn metat enkomin nekchei en; ererãngrãng heh khebeng bengdâng mêngmin, rohkomin ereheh junko athôan sanpoat pa lânamtha ngama dangmah.”

¹⁰Jisu ma thôkoh wah, “Diakthe pumma diakthe demko eloatmîn a; wanthe hahsông pa ahan wanthe hahsông demko elongmîn a.

¹¹Hahtiidong pa tii erea, rêmdongpa hû erera, chentô thenâng khoanchet chhih hong erea; rangkho wah cheili ngale ajatjatmin ehong kara.

¹²Are chentôpa dângmako, khebângko ne loatkhhek ere hèn ngale chêmthukmin ere hèn; nea Sanagog nâng siethû lahma sekham lahma phâtek nâng esek hèn; nea ngadijunte dângdi lowang ngale diak pênte hehmako siethû lahma esekham hèn.

¹³Are sanpoatko nema Nginkongsen pa eta thôkoh en.

¹⁴Ere sanpoat pa hokmako nema chenroh pêthângmin a ngama lesekmah thangma dângrãng thonghun letma tongen,

¹⁵chenrãngma ngako neran hehma ne nginko lejien dakli ngale lejien dânthangtuli nema jiendânthâng rãng ngama nenâng jabkhab ngale buthi mongthem ekoh a.

¹⁶Ne nyong newa, nepho anaa, ngale netang amang, ngale ne lemruchha hehma elokhhek thuk hèn; ngale nekhuwah aritphemin erehèn.

¹⁷Nganâng putedâlem junko anga ngama chinnya ere hèn.

¹⁸Rohkomin nekhowah khochoo lathemin lemahmin.

¹⁹Putedâlem nâng rõngtângtâng dangen, erohkoba nedede eta pesietrii en.

²⁰“Chenthu nema Jeroselem pa Sipâhi ma tûmchep lahma makhetetko, Jeroselem pa sitsiak chhihjârãng ngaeka ngama ejet en.

²¹Erediko Judia wah sôngte mihnyan heh hahhokho nâng ehuh chhoanwãnga; Hahdaang kowah hehmin loatchhoan rêmin, ngale erediak kowah rangsâ nâng dângwah hehmin hahdaang nâng lengak hûtumin.

²²Chenrãngma ngako ere sanpoat pa, Joban nyapraangma ‘Chêmchoh sanpoat dângmin ngama,’ ngaeka chentôpa linlin edanga.

²³Ere sanpoat kowah naawunte dihiaknyu ngale naajeng chha demnâng dângte dihiaknyu hehrãngma chentô chhih dângmin a! Are hahtokkhoh ko nyahrãng chêmchhih ehûra, ngale ere mihnyan heh khohko Joban wah chêmchei pa ekara.

²⁴Khakapa dengnâng eriia, ngale khakapa chentô diak akan hehnâng ekhhek chhoan a; ngale Jews ledangte hehma Jeroselem pa thin sanpoat pa mathâng thângkako dama ewoatnek a.

²⁵“San, Dâ, ngale Merit hehmin ajatjat edangjâa. Hahtokkhoh wah chentô diak akan heh hungchhih rekmah edanga, ngale josi rahlîn rek akah heh tatlahma nyahrãng echeiwak a.

²⁶Hahtokkhoh kowah patrit sekmah thin hokpa khelahma mihnyan heh cheima moklek lahma ritwâng erewak a, chenrãngma ngako rangkho wah san, dâ, ngale merit erediko chentôpa jârit erea.

²⁷Erediko Mihnyan Chhapa phoamkhoh nâng chaan ahâng demnâng ehong kara.

²⁸Chenthu ererãngrãng heh medang tahko, sekmah patrit lere thangma khuhah nâhah dangletma toansûwên en, chenrãngma ngako ne khope pa namhû era.”

²⁹Erediko Jisu ma are nginthakthô pa thôkoh wah: “Phukbãng ngale ahan bãnghehnâng thatthonghun tan en.

³⁰Chenthu nema bãngheh achhong mechhong tahko, nema rangchodâng lâthângtah ngama rângnga en.

³¹Ererãngrãngjô, chenthu nema areheh danglahma mekhetet ko, nema Joban Hahsông pa lânam hûtha ngama ejet en.

³²“Thonghun en, areheh phangtang athângwah ahînte mihnyan heh phangtang târitmako edanga.

³³Rangle hah eta chhihjâa, rohkomin nga jabkhab pa chenthumin leta chhihjâmin.

³⁴“Jetletma dangen, ngale jokphhek chhah, erediko are hahtokkhoh roandông rãng sekmah patritjû nekdangen, eroh medang enko ere rangwo pumma lemlienma

³⁵benâng mânwah rãngrãng môangleplo hûhèn. Chenrãngma ngako ererangwopa hahtokkhoh wah chentô mihnyan heh khohnâng hokmin.

³⁶Eroh-wah jetletma dangen, ngale are chentô dângwângthin hehwah tapeletma Mihnyan Chha mathahko tâhokwâng rãng chaan chenchoh en ngama roantang rangsoam letma tongen.”

³⁷Ere sanpoatko rangwo roakweih Jisu ma mihnyan hehnâng Rangsoamhum nâng hethô lahma dângwah, ngale sanhêmthah ko, chhoan lahma rangpen pa Oliv hahhokho ko tôngwângwah.

³⁸Rangkhahkho roakweih mihnyan heh phangtang atewah ngin chohtatrãng Rangsoamhum nâng chîhokwah.