Read Nocte Naga Luk 22 Bible Online

Luk 22 - Nocte Naga bible

Luk 22

¹Wichhi lesak pheban phhek lokuh pa thângnemnem dângwah, arepa Adankhoam lokuh ngamemin ngaeka.

²Soam aroakte adong ngale Niemarang hethôte heh mihnyan heh ranchei dângwah, ngale erohwah thinma Jisu ahuhchha ma ritphe rãng themawa wah.

³Erediko Jisu dijunte echhi wanii kowah wathe nâng juchhih lupwah, ate mînpa Juda Iskarot dângwah.

⁴Ere diphumma Juda soam aroakte adong ngale Rangsoamhum bemte adong heh tânâng wãng lahma atema thin demnâng Jisu chênsâng ngin thômîn wah.

⁵Thin nyahrãng khuhah lahma ngun koh e ngama ngatwah.

⁶Juda thin nginko nyoak lahma mihnâng hennâng min lejetrii thangma thindeknâng Jisu loatthukrãng sanpoatsen lêmsokwah.

⁷Wichhi lesak pheban phhek lokuh poatko Adankhoam Lokuhrãng saak joatjâ rangwo pa hokwah.

⁸Jisu ma Piter ngale Jon ninâng are ngin heh thôko lahma chienwênwah: “Wãngletma nãngkhuma chhahrãng Adankhoam lokuh phhekchhah pa khoakhem wãngen.”

⁹“Nangma chenriang nâng khoakhêmrãng hun ekoa?” ngama thinma atenâng chienwah.

¹⁰Atema dânthâng wah, “Ne hahdaangko wângko, jo hènlahma mihwa echohmin hèn. Phumma ate lupwãng eka humko junlup wãngen,

¹¹ngale ere hum tângte wako thôkoh en: ‘Hethôte ma nangnâng chhien eho, chenko ngadijunte ngale ngama Adankhoam lokuh phhekchhah chhahmin a?’

¹²Atema lemtokdâng ko nyahrãng khoakhem lahma thewanthe ekhesok hèn, eretheko nema chentôpa khoakhem lahma echohkhe en.”

¹³Thinma wãng lahma Jisu ma chenroh thôkohtah a ererãngrãng chohkhe wah, ephumma thinma Adankhoam lokuh phhekchhah pa eretheko khoakhêm wah.

¹⁴Sanpoat hokphumma, Jisu ma moattat chhoante heh demko khoangko tôngwângwah.

¹⁵Jisu ma thinnâng ngatwah, “Ngama chêmchoh mako are Adankhoam lokuh phhekchhah pa nedemnâng nyahrãng roamchhah hun ekang!

¹⁶Chenrãngma ngako ngama nenâng thôkoh eka, Joban Hahsông moatlem pa phangtang mata tamo, ngama are phhekchhah pa lethechhah tumin.”

¹⁷Jisu ma bâti toanlahma Joban nâng dangkoh a ngat rangsoam lahma ngatwah, “Arepa thaha ngale nekhuma phenjok en.

¹⁸Ngama nenâng thôkoh eka, ade phumma Joban Hahsông pa makakako ngama are penriti kowah lethejok tumin.”

¹⁹Erediko atema bankên chhupthe toanlahma Joban nâng dangkoh a ngat rangsoam lahma chhupsietwah, ngale thinnâng kohlahma ngatwah, “Arepa ngaphoang, nekhurãng koh ekang. Arepa nema nganâng chhemhunrãng mo en.”

²⁰Ererãngrãngjô, rangjâ phhekchhah chhah diko atema aroh ngalahma thinnâng bâti kohwah, “Are bâti kowah ngahei demko Joban wah toamnyan semlahma tonga, are ngahei pa nekhurãng hongeka.

²¹“Rohkomin sûtan en! Nga chênsângte pa ngademko are khoangko johtong lahma tonga!

²²Mihnyan Chhapa Joban ma chenroh themawa eka eroh eriia, rohkomin are nga chênsengte mihnyan rãngma chentô chhih dângmin a!”

²³Nãngkhuwah are moattepa hendângmin a ngama, thindede thôngphâ mînwah.

²⁴Dijunte heh wah henpa adongthôan dângmin a ngama chhiakmîn wah.

²⁵Jisu ma thinnâng ngatwah, “Joban lejette mihnyan heh lowang hehma thin mihnyan heh khohko leng achaanrii lahma pên eka, ngale thôte jabte hehma nia ‘Mihnyan nâng chohsokte’ ngama ngarii eka.

²⁶Rohkomin nekhu eroh ledangmin; erenoma, nekhuchhang wah adongthôan pa letathôan rãngrãng dângmin, ngale lemsênte khhepho thôan pa haa rãngrãng dângmin.

²⁷Henpa adongthôan a, phhekchhah chhahrãng tôngte pele akhoamkhêmte pa? Phhekchhah chhahrãng tôngte pa adongthôan eta dangthêm a. Rohkomin nga a nekhu chhangko khoamkhêmte rãngrãng dangekang.

²⁸“Ngama chêmchoh poatko nekhu nga demnâng johtongtha;

²⁹ngale rangkhethung wah nga Wama nganâng chenroh pênthuk ehanga, ererãngrãng ngamemin nenâng pênthuk eka.

³⁰Nga Hahsông theko nemin ngademko aroamma ejoh jokphhek chhahha, ngale nemin Lowang tôngthinko tongletma echhi kunii Isrial heh epên en.

³¹“Simon, Simon! Tattan! juchhihma ne phangtang hungtoanrãng chaan lâchohtah, pitmoatte ma chhahphathoak kowah chhahsek heh rângrenthien arãngrãng mihnyansen hehmin mihnyan chhih heh demwah renthienmin.

³²Simon, rohkomin ne putedâlem pa nekchen chhihjâ eken ngama rangsoam koh eka. Ngale chenthu nanga ngatânâng mengak huthoko nangpho anaa heh hung dongsiet o.”

³³Piter ma dânthâng wah, “Teso, nga nangdemnâng phâtek nângmin tajoh wãngrâng, ngale ritmin tajohriie!”

³⁴Jisu ma ngatwah, “Piter, ngama nangnâng thôkoh eki, thejâ rangpen nangma nga jetmahhang ngama ditrem lenga koko wo lewênmin.”

³⁵Erediko Jisu ma ate dijunte hehnâng chhienwah, “Chenthu ngama nekhu, ngun, tõng akhak, ngale dapheng lekep thangma chienchhoantah ko nekhuma chennâng thoamtet a?” “Chenni nângmin thoamho,” ngama thinma dânthâng wah.

³⁶Ngale Jisu ma ngatwah, “Adephumma, henhen nâng ngun akem ngale tõng akhak tonghèn a ereheh nema kepen; ngale henhen nâng dãng ahoa nememin ne chhemchong heh sengletma dengri en.

³⁷Joban nyapraangma ngaeka pa ngama nenâng thôkoh a, ‘Atemin kaamchhih moatte heh demnâng johdangthuk eka’ ngama ngaeka pa toangtang dângwângmin, chenrãngma ngako ngarãng chenni raangtah a ereheh toangtang dangwãng era.”

³⁸Dijunte hehma ngatwah, “Sûtan! Teso! areko dãng wannii tonga!” “Erepa lâletah!” ngama ate dânthâng wah.

³⁹Jisu ere hahdaang kowah loatchhoan lahma jâhanwah rãngrãngjô Oliv hahhoko wãng lahma rangsoam wângwah; ngale dijunte hehmin ate demko johwângwah.

⁴⁰Jisu eretheko hukhoam lahma ate dijunte hehnâng ngatwah, “Achhih nâng nekchen jârii ekenma nemin rangsoam en,”

⁴¹Erediko thin tâwah amãnchha taangchhoan lahma dakuhtho lahma rangsoam wah.

⁴²Atema ngatwah, “Ewa, nangma mehun oko are ngawah chêmchei pa rephe kohhang. Rohkomin ngama hun ekang junko dangmah, nangma chenroh hun eko erejunko chendanga.”

⁴³Rangkhethung wah Joban ngintatte kalahma atenâng chaan chohkoh katwah.

⁴⁴Nyahrãng chêmrii lahma rang chaansoam wah; ate ranglêmti pa hei jenwah rãngrãng hahko jâjenwah.

⁴⁵Rangsoam wah toanchep lahma ate dijunte heh tânâng katwah, phumma juplek lahma khekat wah, ngale nyahrãng hungchhih rekmah dângwah.

⁴⁶Atema thinnâng ngatwah, “Chenrãngma juplek eken a? Toansat en, ngale achhih ma hungtôanko nekchen jârii ekenma rangsoam en.”

⁴⁷Jisu ma ngin thôthuko echhi wanii dijunte kowah wathe ate mînpa Juda ma lemsen lahma mihnyan heh jahmõang hokwah. Juda khoamwãng lahma Jisu nâng chupjok wah.

⁴⁸Phumma Jisu ma ngatwah, “Juda, nangma chuplohma Mihnyan Chhapa chênsãng ekoa?”

⁴⁹Chenthu Jisu demwah dijunte hehma erekowah chenni dangeka erepa khelahma thinma Jisu nâng ngatwah, “Teso, nimemin nidãng ma doak ea?”

⁵⁰Ngale thinkhuchhang kowah wathema soam aroakte dong haa nâng doaklahma ate nâ jâdoakwah.

⁵¹Rohkomin Jisu ma ngatwah, “Thânga, are tôko chendanga!” Phumma Jisu ma erewa nâko sahlo lahma mesiet kohwah.

⁵²Erediko soam aroakte adong, ngale Rangsoamhum bemte, erediko erethe kowah ate loatkhhek rãng hokte khhepho phannang hehnâng ngatwah, “Nga a mihngoan rãngrãng dãng apah kepletma nga loatkhhek rãng hûeren a?

⁵³Nga roantang nedemko Rangsoamhum nâng dângko, nema lokhhek mahtha. Rohkomin athângheh nema moat sanpoat, ngale rangnyek ma pên sanpoat.”

⁵⁴Erediko thinma Jisu khhek lahma soam aroakte adongthôan humnâng sietwênwah; ngale Piter taangtaang manko danglahma junkhoam wah.

⁵⁵Hum thakho nyahrãng mongtangko wen thhekwah, ngale erekowah wentûmlit tôngte heh demnâng Piter min johtông wah.

⁵⁶Chenthu dihiaknya haa wathema wenko tonglahma khe phumma, atenâng nyahrãng thongthong sûlahma ngatwah, “Are mihnyan pemin Jisu demko dângwah!”

⁵⁷Rohkomin Piter ma dangmek ngatwah, “Dihiaknyu, nangma chenni ngaeko erepa ngama jetmek!”

⁵⁸Eredi chuthe ritko mihwa wathema Piter lepkhe lahma ngatwah, “Nangmin Jisu dijunte heh demwah jôba!” Piter ma dânthâng wah, “Mihwa, nga a thin demwah dangmek!”

⁵⁹Ngale koantathetô diko mihhan wathema nangmin Jisu demwah jôba ngama nyahrãng chaanloatwah, “Chêmtungmaang thin aho, are mihnyan pemin Jisu demwah jôba, chenrãngma ngako atemin Galili jat!”

⁶⁰Rohkomin Piter ma dânthâng wah, “Mihwa, nangma chenni jab eko arepa ngama jetmek!” Lemlienma, atema jabthu thuko wo hôngwênwah.

⁶¹Teso ma litphong lahma Piter nâng thongthong ngiaksok katwah, ngale erepoatko Teso ma atenâng ngatah pa Piter ma thônghun wah, “Thejâ rangpen wowên mako, nangma nga jetmahhang ngama lôrem enga hang.”

⁶²Piter loatchhoan lahma nyahrãng sepchhoanwah.

⁶³Jisu bêmte mihnyan hehma atenâng jõjêm lahma wat rewah.

⁶⁴Ngale thinma mit doapkhhek lahma atenâng chhienwah, “Henmawat eho? That jettan!”

⁶⁵Ngale ahan jabkhab chhih hehmin atenâng jôjêm lahma ngatwah.

⁶⁶Eredijâ rangkhahko, khhepho phannang heh, soam aroakte adong heh, ngale Niemarang hethôte heh chohmînwah, ngale ngoang awang heh tâko Jisu siethokwah.

⁶⁷Thinma ngatwah, “Ninâng thôkohhi, Nanga Misaia ne?” Atema dânthâng wah, “Ngama nenâng methôkoh akomin nema nganâng pute mahha;

⁶⁸ngale ngama nenâng ngin wah methongpha komin nema dânthang mahha.

⁶⁹Rohkomin ade phumma Mihnyan Chhapa Achaanthôan Joban dekchahko etonga.”

⁷⁰Thin phangtangma ngatwah, “Eroh medang oko nanga Joban Chhane?” Atema danthâng, “Nema Joban Chha ngama lâpun ngatha.”

⁷¹Ngale thinma ngatwah, “Nima lihân hâkhi lemtumih! Atema chenni jabeka arepa nidedema lâchoh tattih!”