Read Nocte Naga Luk 3 Bible Online

Luk 3 - Nocte Naga bible

Luk 3

¹Ere sanpoat pa Tiberias Chofa ma echhi pâbangâ pên sanpoat dângwah; Pontas Pilat pa Judia Govono dângwah, Hirot pa Galili pênte dângwah, ngale ate naa Filip pa Ituria ngale Trakonitas nii pên lahma dângwah,

²ngale Anas le Kaipas nii soam aroakte adongthôan dângwah. Ere sanpoatko sehahkho nâng Zakaria chha Jon nâng Joban wah ngin hokwah.

³Ephumma Jon ma Jordan jokemwah chentô diak hehnâng Joban ngin phoangthô kohwah, “Ne papwah hungngaklit letma baptijem kepen, ngale erohkoba Joban ma nepap heh map ekohhèn.”

⁴Mõng Isaia ma raangwah titab nâng aroh raangeka: “Sehahkho nâng wathe mihnyan phoangrak eka: ‘Teso rãngma lempiakkoh en; ate khoamrãng lemtin hôankoh en!

⁵Hahkhoanglu chentôpa junsietmin, Hahkong hahla chentôpa thungsiet rêmin. Lemkoang lemnoang chentôpa tinsiet rêmin, ngale chentô lemchhih heh junsiet rêmin.

⁶Mihnyan nyuchha chentôma Joban wah khope pa echohkhe a!’ ”

⁷Mihnyan heh jahmõang Jon tânâng baptijem keprãng hokwah. Atema thinnâng ngatwah, “Pû heh!” “Joban ma chienhokrãng ngaeka chêmkowah ne etape en ngama henma thôkoh ehèn a?

⁸Nepap moatlem wah hunglittah ngama kheli moatlem mo en. Ngale Abraham pa nete newa dângwah ngama nededema nekthonghun riitu en. Ngama nenâng thôkoh eka, Joban ma are long heh wahmin Abraham chhuchharãng tahôan a!

⁹Wâka pumma bãngpa thong arinma joatpherãng ngama thienlahma tonga; penri risen leribãng chentôpa runjoat lahma wennâng thhekmin.”

¹⁰Mihnyan hehma atenâng thôngphâ wah, “Eroh medang ako nima chenremin a?”

¹¹Atema dânthâng wah, “Henhen nâng chhemchong khanii tonghèn a khathe pa ahoteko koh en, ngale henhen nâng phhekchhah tong ehèn a erepa phenphhek chhah re en.”

¹²Thãkho thâte khuthe baptijem keprâng hûlahma atenâng thôngphâ wah, “Hethôte, nima chenremin a?”

¹³Atema thinnâng thôkoh wah, “Nema chentô thâthin a erenoma abâm nektha en,”

¹⁴Sipâhi khuthe memin atenâng thôngphâ wah, “Nia chenroh a? Nima chenremin a?” Atema thinnâng ngatwah, “Henwah min ledangli wah ngun neknyen en, ngale ledangli nâng mih neksekham en. Nema dâjeng ngun choh ekenko rinme letma tongen.”

¹⁵Mihnyan hehma Misaia katpa nyahrãng ngiak lahma dângwah, phumma Jon pa Misaia madanglah o ngama thonghun lahma patrit wah.

¹⁶Ephumma Jon ma thinnâng ngatwah, “Ngama Joma baptijem koheka, rohkomin nganoma abâmbâm adongpa ekara. Nga ate daphâng putkohrãng memin punmek. Atema Asâthôanju ngale wenma baptijem ekohhèn.

¹⁷Ate deknâng ate wênkhoang tonga, erepumma chhah heh phangtang chaaplahma chhahsek sekpa ate chhahpum nâng ekhôanthien a; ngale chhahpha thoak heh atema chenthumin lemutthin wenko ethhek a.”

¹⁸Jatrup ngema Jon ma Joban nginpa mihnyan hehnâng thôkoh wah, ngale thinnâng hunglit rãng rîn akhahwah.

¹⁹Rohkomin Jon ma Govono Hirot nâng nyahrãng ritngatwah, chenrãngma ngako Hirot ma atenaa tangnyu Hirodik pa ate tangnyu rãng kepwah, ngale atema lihânmin ajahthem chhihmoat wah.

²⁰Erediko Hirot ma ahan achhihthoan wanthe moatwah, arepa atema Jon phâtek nâng loatkhhek wah.

²¹Mihnyan heh phangtang baptijem tâkoh diko, Jisu nângmin baptijem kohwah. Atema rangsoam poatko rangkhethung pa laangwah,

²²ngale Asâthôanju phariwo rãngrãng danglahma ate khohko tôngkatwah. Ngale rangkhethung wah jabkhab hôngjab katwah, “Nanga ngama nyahrãng ahun nga Chha. Nga nangdemnâng rinme ekang.”

²³Chenthu Jisu ma ate moatlem heh bângmoat poatko atea rangpâ roakrem dângwah. Mihnyan hehma atea Josep chha ngama thonghun wah. Josep pa Hali chha,

²⁴Hali pa Mathat chha, Mathat pa Levi chha, Levi pa Malchi chha, Malchi pa Jannia chha, ngale Jannia pa Josep chha,

²⁵Josep pa Mathatias chha, Mathatias pa Amos chha, Amos pa Nahum chha, Nahum pa Esli chha, Esli pa Nagai chha,

²⁶Nagai pa Maath chha, Maath pa Mathatias chha, Mathatias pa Samain chha Samain pa Josach chha, josach pa Joda chha,

²⁷Joda pa Joana chha, Joana pa Rasa chha, Rasa pa Zerubabal chha, Zerubabal pa Sialtial chha, Sialtial pa Nari chha,

²⁸Nari pa Malchi chha, Malchi pa Adi chha, Adi pa Kosam chha, Kosam pa Elmadam chha, Elmadam pa Er chha,

²⁹Er pa Josua chha, Josua pa Elizar chha, Elizar pa Jorim chha, Jorim pa Mathat chha, Mathat pa Lavi chha,

³⁰Lavi pa Simon chha, Simon pa Juda chha, Juda pa Josep chha, Josep pa Jonam chha, Jonam pa Eliakim chha,

³¹Eliakim pa Malai chha, Malai pa Manna chha, Manna pa Matatha chha, Matatha pa Nathan chha, Nathan pa Devit chha,

³²Devit pa Jisi chha, Jisi pa Obad chha, Obad pa Boz chha, Boz pa Salmon chha, Salom pa Nahson chha,

³³Nahson pa Aminadab chha, Aminadab pa Admin chha, Admin pa Arni chha, Arni pa Hazron chha, Hazron pa Paraz chha, Paraz pa Juda chha,

³⁴Juda pa Jakob chha, Jakob pa Isak chha, Isak pa Abraham chha, Abraham pa Tarah chha, Tarah pa Nahor chha,

³⁵Nahor pa Sarug chha, Sarug pa Rau chha, Rau pa Palag chha, Palag pa Ebar chha, Ebar pa Sila chha,

³⁶Sila pa Kainan chha, Kainan pa Arphaxad chha, Arphaxad pa Sim chha, Sim pa Noa chha, Noa pa Lamih chha,

³⁷Lamih pa Mathusila chha, Mathusila pa Inok chha, Inok pa Jarad chha, Jarad pa Mahalalil chha, Mahalalil pa Kanan chha,

³⁸Kanan pa Inos chha, Inos pa Sith chha, Sith pa Adam chha, Adam pa Joban chha.