Read Nocte Naga Luk 6 Bible Online

Luk 6 - Nocte Naga bible

Luk 6

¹Pientông jâko Jisu chhahthongma dânkhôamwah. Jisu dijunte hehma chhahri punlahma thindekko netphhekwah.

²Phumma Farasi khuthema thôngphâ wah, “Nãng Niem junko Pientông jâko leta molipa nema chenrãng moeken a?”

³Jisu ma thinnâng dânthâng wah, “Chenthu Devit ngale ate mihnyan heh rêmrit poatko Devit ma chenni retah a erepa nema mathat chohweih ekenne?

⁴Atema Joban Humnâng wãng lahma Joban nâng kohtah phhekchhah pa toanlahma atema chhahwah, ngale ate mihnyan hehnângmin chhahthukwah. Phumma nãng Niem junko erepa henmemin leta chhahthin dângwah, soam aroakte hehma loloba tâchhahwah.”

⁵Ngale Jisu ma athôanko ngatwah, “Mihnyan Chhapa Pientông rangwo rãngmin Teso.”

⁶Erediko wah Pientông jâko Jisu Sanagog nâng wãng lahma hethô wah. Eko mihwa wathe ate dekchah ngepa kolahma dângwah.

⁷Niemarang hethôte ngale Farasi hehma Jisu nâng atheloat hun dângwah, erohwah Jisu tâko namwãng lahma Pientông jâko mihwa pa chensensiet ale ngama sokhokwah.

⁸Phumma Jisu ma thinhungwah thonghun ekapa jetlo lahma mihwako ngatwah, “Toanchep lohma anâng khema nâng wãngro.” Phumma mihwapa toanchep lahma khema nâng wângwah.

⁹Erediko Jisu ma thinnâng ngatwah, “Ngama nenâng chhien eka: Nãng Niem junko Pientông jâko chenni tâmoatmin a? Mihnâng chohsok moatlem ale, mihrãng chhihli moatlem tâmoatmin a? Mihnyan roandông pepâng moatlem ale, roandông chhihsiet moatlem tâmoatmin a?”

¹⁰Jisu ma chentô nâng tûmlit phoangsok wah; erediko atema mihwako ngatwah, “Nangdek pa chen o.” Phumma atema dekpa chensietwah, ngale ate dekpa ngaksênwah.

¹¹Niemarang hethôte ngale Farasi heh nyahrãng rinkhah wah, ngale Jisu nâng chennire ea ngama thindede tungko thômîn wah.

¹²Ere sanpoatko Jisu hahhokho nâng rangsoam rãng wângwah, ngale Joban nâng rangsoam lahma rangpen penliangma tôngwah.

¹³Rangkhahko, atema dijunte heh ate tâko roolahma thinkhuchhang wah echhi wanii rênwah, phumma atema thinnâng moattat chhoante ngama ngatwah:

¹⁴Moattat chhoante rãng rentah heh areheh dângwah, Simon (Atenâng Jisu ma Piter ngama mînwah) ngale ate naa Andru; Jems ngale Jon, Filip ngale Bartholomi,

¹⁵Mathiu ngale Thomas, Alphia chha Jems ngale (Diak pênte) Simon,

¹⁶Jems chha Juda, ngale Jisu chên asângte Juda Iskarot heh dângwah.

¹⁷Jisu hahhokho wah ate moattat chhoante heh demko jâkhoam kalahma, hahthungko jahmõang ate dijunte heh demko chepkatwah. Judia diak phangtangwah, Jeroselem, ngale Tair le Sidon diakwah jokêm nâng sôngte mihnyan heh eretheko jahmõang dângwah;

¹⁸thinma Jisu ngin jetat erediko thin khoanchet hehwah sênrãng hokwah. Juchhih luplahma chêmte hehmin hûlahma sênwah.

¹⁹Mihnyan heh phangtang atenâng sahloat hunwah, chenrãngma ngako atewah chaan loatchhoan lahma thin phangtang sênsietwah.

²⁰Jisu ma ate dijunte hehnâng sûlahma ngatwah, “Rangkepte pa tangchhih heh dângmin; Joban Hahsông pa nethiak!

²¹“Rangkepte pa athângwah rêmritma tôngte heh; Nema wokphoat phoat echoh chhah en! “Rangkepte pa athângwah asepte heh: Ne angit ere en!

²²“Chenthu mihnyan hehma nenâng Mihnyan Chha junma mitchek, aphê, dûmmek, ngale achhih menga hènko nea rangkepte dângmin!

²³Chenthu eroh mechhihchoh hènko, rinroan bahsa dangen ngale khuhah nâhah boangen, chenrãngma ngako rangkhethung nâng nerãngma nyahrãng khopedong thienko lahma tonga. Thin te awa hehmemin mõng hehnâng erohjô hôanjôanwah.

²⁴“Phumma athângwah techhu hehrãngma chentô chhih dângmin a; chenrãngma ngako ne roandôngko lechêm thangma lâdangtet!

²⁵“Athângheh wah wokphoat phoat tôngte heh nerãngma chentô chhih dângmin a; Nea rêmritma etongen! “Athângheh wah angit nungma tôngte hehrãngma chentô chhih dângmin a; Nea sepjoang letma etongen!

²⁶“Chentô mihnyan hehma ne merângthô hènko chentô chhih dângmin a; chenrãngma ngako thin te awa hehma mõngmõang heh eroh rângthôwah.

²⁷“Phumma ngangin jêtatte hehnâng thôkoh eka: Neran hehnâng hun en, nenâng mitchekte hehrãng asenli mokoh en,

²⁸nenâng têm athoakte hehnâng rangkoh en, ngale nenâng hôanjôante rãng rangsoam koh en.

²⁹Henma komin thhenkako mewat hènko, thhenka komin watthuk en; henma komin nekut pa mekep ako, chhemchong pemin chenkep a.

³⁰Newah henma chenni komin metha hènko chentô nâng koh en, ngale nethiak pa henma komin methakep hènko, erepa nekngaktha en.

³¹Mihnâng nerãng chenroh moatthuk hun eken a, ererãngrãng nememin mihrãng eroh mokoh en.

³²“Nenâng hunte mihnyan kololo mehun enko, nema chenrãngma rangkepmin a? Thinnâng hunte hehnângte papi mihnyan hehmemin huneka!

³³Ngale nerãng moatlemsen moatkohte hehrãng lolo nememin moatlemsen memokoh enko, nema chenrãngma rangkepmin a? Ererãngrãng pete papi mihnyan hehmemin moeka!

³⁴Ngale nema ngakchohrãng dâlem eken mihnyan kololo menêmthuk enko, chenrãngma nema rangkepmin a? Chenrãngma ngako amãnmãnpa ngakchohrãng papi mihnyan roandemin nêmthukmîn eka!

³⁵Eroh dangmah! Neran hehnâng hun en ngale thinrãng kaamsen mokoh en; ngakchohrãng ledâlem thangma nêmthuk en. Eroh koba nema rangdong ekepen, ngale nea nyahrãng achoangthôan wah Joban chha eta dangen. Chenrãngma ngako atea dangkoh a ngama lengate heh demnâng min asen ngale mihnyan chhih heh demnâng min asen.

³⁶Ne Wa Joban mihnâng mînchente dangeka rãngrãng nemin mihnâng mînchente dangen.

³⁷“Mihnâng athe neklo en, erohkoba Joban memin nenâng athe lomahhèn; mihnâng chhih neknga en, erohkoba Joban memin nenâng achhih ngamahhèn; mihnâng mapkoh en, erohkoba Joban memin nenâng map ekohhèn.

³⁸Mihnâng koh en, erohkoba Joban memin nenâng ekohhèn. Linlin, nemejô lephang lengtu lândangroh - mênchong ekohhèn. Nema mihnâng chenroh koh eken a erohjô Joban memin nenâng ekohhèn.”

³⁹Ngale Jisu ma thinnâng are nginthakthô pa thôkoh wah: “Mitdoak pumma ahan mitdoak lem jiensenmah; atema mesen ako, waniinii jôngko ejârii a.

⁴⁰Nyapweihte henjô ate hethôte noma adong dangmah; rohkomin chenthu nyapweihte pumma metaweih tahko ate hethôte rãngrãng edanga.

⁴¹“Nedede mitwah janchhuppa lebeng kherii thangma nepho anaa mitwah mitchhuppa chenrãngma lepkhe eken a?

⁴²Nepho anaa hehnâng chenroh jiennga eken a? ‘nedede mitwah janchhuppa lebeng kherii thangma, Epho, ngama nang mitwah mitchhuppa rephekoh e ngama’ Nea ahuhkhoanglep heh! Khebengko nedede mitwah janchhuppa bengre pherii mêngen, erediko ba nepho anaa mitwah mitchhuppa senthemthem kheletma eta rephekoh en.

⁴³“Bãngsen pumma richhih jienhong rimah, roh akole bãngchhih pumma risen ejien hongria.

⁴⁴Bãng chentôpa ateriri junko ejet e; Nema suhbuk wah Phukri chohpunmet roh akole suhchebuk wah Anguri echohpun en a.

⁴⁵Mihnyansen ma ate hungnâng asenli heh thien lahma asenli ehongmo wênra; ngale mihnyan chhih ma ate hungnâng achhihli heh thien lahma achhih ehongmo wênra. Chenrãngma ngako hungnâng chenni mênchong tongeka arepa thunma ehong loatjab wênra.

⁴⁶“Ngama nenâng chenni moatrãng thôkotah a erepa lemo thangma, nema nganâng Teso, Teso ngama chenrãngma rooeha

⁴⁷Hen komin ngatânâng hûlahma ngajab tatlahma ngangin kepeka - ereheh chenrãngrãng dângmin a erepa ngama nenâng khesok a.

⁴⁸Atea longrã khohko thongken lulu thulahma humhôante rãngrãng. Jodông lumhû lahma ere humko ethin a rohkomin ere humpa phongmah, chenrãngma ngako erepa senthemthem hoaneka.

⁴⁹Phumma henma akomin nga jabkhab tatlahma lekep dangeka erepa thongken senthemthem leluthu thangma humhôante mihnyan rãngrãng; Chenthu jodông lumhû lahma ere humko thînko ere humpa lemlienma runjâeka - phumma ere runjâpa chentô cheili dângmin a!”