Read Nocte Naga Luk 7 Bible Online

Luk 7 - Nocte Naga bible

Luk 7

¹Chenthu Jisu ma mihnyan hehnâng are ngin heh thôkoh diko, ate Karpanam hahnâng katwah

²Roman sipâhi sahhab haa wathe atema nyahrãng hunlahma dângwah; phumma ere haapa lanriiroh khunlahma dângwah.

³Chenthu sahhab pumma Jisu ngin chohtat phumma, atema haapa mesietrãng Jews khhepho hehnâng Jisu roochhoan thukwah.

⁴Thinma Jisu tâko hûlahma nyahrãng rosep lahma ngatwah, “Are mihnyan pumma linlinjô nangma chohsokpa nyahrãng lemeka.

⁵Atema ni mihnyan hehnâng nyahrãng hun ehi ngale ate dedema nirãng Sanagog min hôankohthi.”

⁶Ephumma thindemko Jisu johwângwah. Phumma Sipâhi sahhab humko hunem nemko ate lemru heh Jisu nâng thôkoh rãng chienkatwah, thinma ngatwah, “Teso, nanga nga humnâng nekchêm wãngro. Ngama nanga ngahumnâng lânsiet huroh mihnyan dangmek,

⁷ngale ngadedemin nangdemnâng phoangphoang lanta chohmîn huroh mihnyan dangmek. Nang thunkhab melolo chien o, ngale erekojô nga haapa esen a.

⁸Ngamin nga noma sahhabdong khennâng moekang, ngale nga khennângmin sipâhi heh tonga. Ngama are watheko, ‘kao!’ menga angko rângka a; ngale Ngama ahan watheko, ‘Wãngro!’ ngama meroo angko; erepemin rângwãngra; ngale Ngama nga haako, ‘arepa mo o!’ ngama mechien angko, atema rângmoa.”

⁹Jisu ma erengin pa tatlahma bârit rewah; ngale atema tumlit litphong lahma ate diwah junkhôamte mihnyan hehnâng ngatwah, “Ngama nenâng linlin thôkoh eka, ngama are mihnyan dâlem rãngrãng mathatkhe ekang, Isrial mihnyan nângmin mathatkhe ekang!”

¹⁰Nginmat katte heh sahhab humko ngakwãng lahma ate haapa mechoan chohkhe wah.

¹¹Erediko lemlienma Nain ngama ngaeka hahko Jisu le ate dijunte erediko thin demwah mihnyan heh jahmõang johwângwah.

¹²Thin ere hahdaang wah panthongko hokwâng rienrienko mangrû katte heh chohmînwah. Aritte pa janthoinyu chha wathelolo dângwah, ngale hahdaang kowah mihnyan heh jahmõang janthoinyu demko mangrû johkatwah.

¹³Teso ma janthoinyu pa khelahma atenâng nyahrãng mînchenwah, ngale janthoinyu ko, “Neksep,” ngatwah.

¹⁴Erediko Jisu ma wãng lahma mangko sahloat wângwah, phumma mang pete heh chep rewah. Ngale Jisu ma ngatwah, “Paangmih! Ngama chien eki, toanchep o!”

¹⁵Ephumma ritte mihnyan pa toansat lahma phoangkhoam wah, ngale Jisu ma ate nyong nâng ngakohwah.

¹⁶Thin phangtang chei rewah, ngale Joban nâng rôwah. Thinma ngatwah, “Nãng tânâng mõngdong lâhongtah!” ngale “Joban ma ate mihnyan heh pepângrãng lâkatha!”

¹⁷Are Jisu nginpa diaktangma khêmtatwah, ngale ere kêanâ wah diak akan hehmemin chohtatwah.

¹⁸Chenthu Jon dijunte hehma atenâng erengin heh thôkohko, Jon ma ate dijunte wanii roowah

¹⁹ngale Teso nâng thôngphârãng chienkatwah, thinma thôngphâ wah, “Nanga Jon ma katmin ngama thôtah pa dangole, roh akole nima ahan ngiakmin a?”

²⁰Thinma Jisu tâko hûlahma atenâng ngatwah, “Jon baptisma nangnâng thôngphârãng chienkat ehi, nanga atema hokmin ngama thôtah pa dangole, roh akole nima ahan ngiakmin a?”

²¹Ere sanpoat poatko Jisu ma jahmõang khun atamte, lihân khoanchette, ngale juchhih lupte mihnyan heh sênsietwah, ngale mitdoak hehnângmin khethukwah.

²²Atema Jon wah nginmatte hehnâng dânthâng wah, “Ngakwãng letma Jon nâng nema chenni khetet a ngale tattet a ereheh thôkoh en: Mitdoak hehma jienkhe reka, dakò heh jienkhoam reka, angêm khoanchette heh sen reka, nâba hehma tateka, ritte heh ngakhin reka, ngale tangchhih naadi hehnâng Joban Nginkongsen pa phoangthôkoh reka.

²³Hungnâng letûngmaang thangma nganâng putedâlemte heh rangkepte dângmin!”

²⁴Jon wah nginmatte heh chhoandiko, Jisu ma mihnyan hehnâng ate junma thôkoh wah: “Chenthu ne Jon tânâng sehahkho nâng chhoantetko, nema chenni echohkhe e ngama thonghuntet a? wun heh pôngma juhmet lahma echohkhe e ngama lethong huntet a?

²⁵Nema chenni chohkherãng chhoantet a? Khet akhusen chohkepte mihnyan chohkhe rãng lechhoantet a? Ererãngrãng khet akhusen kepte mihnyan ngale sekmah patrit thin aho mihnyan heh Lowang hum nângba echohkhe e!

²⁶Nganâng thôkoh tanha, nema chenni chohkhe rãng chhoantet a? mõng chohkherãng chhoantet a? Linlinjô mõng danga, rohkomin nema mõng nomemin adong chohkhe eken.

²⁷Chenrãngma ngako Joban nyapraangma ngatah pa Jon nâng ngatwah: ‘Joban ma ngatwah, Ngama nga nginmatte nangmako nang lemlaangkoh rãng echienkat ang.’

²⁸Jisu ma ngatwah, “Ngama thôkoh eka,” “Jon pa chentô mihnyan nyuchha kowah adongthôan. Rohkomin henpa Joban Hahsôngko arinthôan dangeka erepa Jon noma adong.”

²⁹Mihnyan chentôma ate ngin pa tatwah; ajahthem pejô thãkho thâte hehma Joban nginpa kepwah ngale thinnâng Jon ma baptijem kohwah.

³⁰Rohkomin Farasi le Niemarang hethôte hehma Joban ma thinrãng jabeka nginpa kep ho, ngale Jon dekwah baptijem kepmin nyoak ho.

³¹Eredikomin Jisu ma thinnâng thôkoh wah, “Ngama thenep thejâ wah mihnyan heh chenni nâng thakmîn anga? Thin a chenni rãngrãnga?

³²Thin a bôjatnâng phoangtôngte leta lechhih heh rãngrãng. Khuthema khutheko rakmîn eka, ‘Nima nerãngma nemnyansiet nongtem koheka, rohkomin nea boangmet! nima nerãngma mangrûsê sekoh eka, rohkomin nea sepmet!’

³³Jon baptisma chennimin lejok lechhah dângko nema, ‘Atenâng juchhih lupeka!’ ngatwah.

³⁴Phumma Mihnyan Chhama jokphhek chhah lahma dângko nema, ‘Are mihnyanko sûtan en! rem awak chenmin le abanmah, ngale khemmok chempa, thãkho thâte ngale papi mihnyan heh lemruchha!’ ngaeken.

³⁵Rohkomin Joban buthi mongthem pa toangtang ngama ate moatlemma khesok eka.”

³⁶Farasi wathema ate humnâng Jisu phhekchhah chhahrãng roowah, ngale Jisu ere humko wãng lahma phhekchhah chhahrãng tôngwah.

³⁷Ere hahko papi dihiaknyu wathe songlahma dângwah. Atema Jisu Farasi humko phhekchhah chhah lahma tonga ngama chohtatwah, ephumma longwah hôanwah thònâng thãchaanjat tientumli mênchong pelahma hokwah

³⁸ngale Jisu dathongko tokdi ngeko chephu lahma seplahma ate mitphi pumma Jisu dasôan kohwah. Erediko ate khochoo pumma Jisu dapa choakhut kolahma chupjokwah, ngale erediko thãchaanjat tientumli pumma lokkoh rewah.

³⁹Chenthu Farasi pumma erepa kheko, ate dedema thônghunwah, “Are mihnyan pa linlinjô mõng danglahma ko are atenâng sahloate dihiaknyu pa hen a erepa chenjettah; ngale ate chenroh papi roandông dongeka erepa chenjettah!”

⁴⁰Jisu ma hongjab lahma atenâng ngatwah, “Simon, ngama nangnâng chenni akomin thôkohthin tonga.” Simon ma dânthâng wah, “Hethôte, thôkohhang.”

⁴¹Jisu ma ngatwah, “Mihnyan waniima wathe wah ngun nêmwah,” “Wathe ma châbangâ nêmwah, ngale ahan wathe ma roakbangâ nêmwah.

⁴²Phumma wathe memin tangak thumho, ephumma waniinii thãpê pa map kohwah. Eroh medang ako wanii kowah henpumma atenâng ajahthôan hunmin a?”

⁴³Simon ma dânthâng wah, “Ngama thonghun ekang, atema hennâng ajah mapkohtah a erepumma ajah ehun a.” Jisu ma ngatwah, “Nangma lâpun ngatoh,”

⁴⁴Erediko atema dihiaknyu ngeko ngiaksûkat lahma Simon nâng ngatwah, “Nangma are dihiaknyu pa khe ekoa? Nga nanghum nâng hûerâng ko nangma ngada merãng jo kohmahhang, phumma are dihiaknyu ma ate mitphi pumma ngada soanko lahma ate khochoo ma choakhutkoh ehang.

⁴⁵Nangma nganâng chupjok lohma tãngroo mahhang, phumma are dihiaknyu pumma nga chenthuma nang humnâng huthangwah nga dako chupjok pa jekmah.

⁴⁶Nangma nga khoko hutrãng Oliv tien kohmahhang, phumma are dihiaknyu pumma ngada pa thãchaanjat tienma lokkoh ehang.

⁴⁷Ngama nangnâng thôkohki, atema nganâng nyahrãng hun khesok ehang junko atewah ajahthem pap heh map lâchohtah ngama khesok eka. Henhenma amãnchha map choh eka erehehma amãnchha hun ekhesok a.”

⁴⁸Erediko Jisu ma dihiaknyuko ngatwah, “Nang pap heh map lâkohtih.”

⁴⁹Jisu demwah tôngte ahan hehma thindede hungnâng thônghun wah, “Arepa hen a, atema chenroh map tâkohmin a?”

⁵⁰Rohkomin Jisu ma dihiaknyuko ngatwah, “Nang putedâlem pumma lâpe pengtho; mêmo ma chhoan o.”