Read Nocte Naga Luk 8 Bible Online

Luk 8 - Nocte Naga bible

Luk 8

¹Ere poatthe diko Jisu ma Joban Hahsông Nginkongsen pa phoangthô lahma sumhah ngale hahdaang hehnâng phoangkhoam wah. Dijunte echhi wanii pemin ate demnâng johchhoan wah,

²ngale juchhih lupte erediko khoanchet wah mesiet wah dihiaknyu hehmin khuthe johchhoan wah: Mariam (Atenâng Magdaleni ngamemin roowah), ate wah juchhih wanengit junlo kotah pemin dângwah

³ngale Joana ate tangwa mînpa Chuza atea Hirot nginpatthin humnâng sahhab dângwah; ngale Susana, eredikomin ajahthem dihiaknyu hehma thindede ngun akem met lahma Jisu le ate dijunte hehnâng chohsû lahma johchhoan wah.

⁴Mihnyan heh wanthe wanthema hahdaang kowah Jisu tânâng hokjûjû dângwah; ngale chenthu mihnyan heh jahmõang khôanhok diko Jisu ma are nginthakthô pa thôkoh wah:

⁵“Rekthenâng mihnyan wathema chhahli wênchhoan eka. Atema pitnâng chhahli wênko, wanwanthe pa lemdong mongtang nâng chatjâeka, phumma mihnyan hehma dama namnek eka, ngale wo hehma tuphhek eka.

⁶Wanwanthe pa longrã khohnâng chatjâeka, phumma chhah pa koat ngale lemlienma choakjâeka, chenrãngma ngako erehahko jo aho.

⁷Wanwanthe chhah pa suhbuk nâng chatjâeka, phumma suh pa chhah heh demnâng roamdong lahma chhah heh tahbuk eka.

⁸Ngale wanwanthe pa hahsen nâng chatjâeka; phumma chhah heh donglahma châtheru chhahri hongrieka.” Ngale Jisu ma athôanko thôkoh wah, “Tat en, nenâng nâ metong hènko!”

⁹Ate dijunte hehma Jisu nâng are nginthakthô pa chenjunko thakthô eko ngama chhienwah,

¹⁰ngale atema dânthâng wah, “Joban Hahsông nginpa nenâng jetthuk eka, rohkomin ahan hehma nginthakthô rãng tateka, erohwah thinma sûeka rohkomin khemah, ngale jetat eka rohkomin jetlo mah.

¹¹“Nginthakthô pumma aroh ngaeka: chhahli pa Joban ngin:

¹²Lemwah chatjâte chhah heh dangeka, thinma Joban ngintat lahma kepeka, rohkomin juchhih heh hûlahma thinhungwah Joban nginko putedâlem lahma kho môangpe a ngama nyenchhoan eka.

¹³Longrã khohko chatjâte chhah rãngrãng heh dangeka, thinma Joban ngin chohtat rienrien khuhah nâhah kepeka. Rohkomin erepa thinhung khennâng lulitlit kepmah; thinma poatthe rãng lolo kepeka, phumma chenthu chêmchei sanpoat hokko jârit rewak eka.

¹⁴Suhbuk chhangwah chatjâte chhah rãngrãng heh dangeka, thinma Joban ngin tateka; rohkomin sekmah patrit ngale techhu dânghun, erediko are rangkhen roandôngko khuhah dânghun heh roamlahma tanghep eka, erohwah thin chhahri pa tamunmah.

¹⁵Hahsenko chatjâte chhah rãngrãng heh dangeka thinma Joban ngin tatlahma thinhung nâng senthemthem thien lahma kepeka, ngale ari mahong hongri thinma jabkhab pa kepwak eka.

¹⁶“Henmemin wentit pa toaklahma khokma khupthien mah ngale jupthin khennângmin thienmah. Erenoma wentit toakthin ko etoak a, erohkoba mihnyan heh humkhen nâng wângko thinma wenphiak pa ekhea.

¹⁷“Chenni komin huhriem rekapa loatsiet rêmin, ngale chenni komin huhriem lahma thien ekapa rangwo nâng loatsietmin.

¹⁸“Erohwah, nema chenrohtat eken a erepa senthemthem jettat en; chenrãngma ngako, hennâng chenni komin tongeka erehehnâng lekoh rêmin, phumma hennâng chenjô aho dangeka ere hehwah thinma tonghi ngama thonghun eka ere amãnchha pemin toanchhoan rêmin.”

¹⁹Jisu nyong le ate naa heh Jisu tânâng hokwah, phumma mihnyan jahmõang dângjunko Jisu tânâng tanam hûho.

²⁰Phumma Jisu nâng wathema ngatwah, “Nang nyong le nang naa heh rangsâko cheplahma tonga ngale thin nang demnâng chohmîn hun eho.”

²¹Jisu ma thinkhunâng ngatwah, “Henhenma Joban jabkhab tatlahma senthemthem kep eka ereheh ba nga nyong ngale nganaa.”

²²Jâthenâng ate dijunte heh demko Jisu khôankhoko chhangka lahma ngatwah, “Nãngkhu Josi rankanâng danwãnge.” Ephumma thin dânwângwah.

²³Thin joko khôankhoma chhoanthuko Jisu juplek rewah. Lemlienma joko pôngdong hôngpông hokwah, ngale khôankho pemin joma mênchong lûmhokwah. Ngale thin a nyahrãng cheili sanpoatnâng dângwah.

²⁴Dijunte heh Jisu tâko kalahma satsiet kalahma ngatwah, “Hethôte, hethôte! Nãngkhu lârii eki!” Jisu toansat lahma pông apatko jektâng wah; phumma pông apat pa jekwah, ngale ere diphumma kihrumrum dângwah.

²⁵Erediko Jisu ma ate dijunte hehnâng ngatwah, “Ne putedâlem pa chenkoa?” Phumma thin patrit ngale chei rewaklahma thindede jabmînwah, “Are mihnyan pa hen a? Atema pông apat heh jektâng komin, jek eka!”

²⁶Jisu le ate dijunte heh Girasa hah ngenâng jogari ma chhangkatwah, erehah pa Galili josi rankanâng dângwah.

²⁷Jisu jophako jâkhôamkat rienrien, erehah kowah juchhih jupte mihwa ate demko chohmînwah. Are mihnyan pa melâng rangpârãng khet akhu lekep thangma phôangtong wah ngale ate humnângmin letong thangma dângwah, roantangma ate sanpoat pa mangruk hehnâng phoangtong lahma chhoanthuk wak.

²⁸Chenthu atema Jisu chohkheko, chaanmõang raksep lahma Jisu dathongko khupjup kalahma rakwah, “Jisu, nyahrãng choangthôan wah tôngte Joban Chha! nangma nganâng chennire hun ehanga? Ngama nangnâng rosep eki, nangma nga nekchêm thukhang!”

²⁹Jisu ma juchhihko mihnyan sekkowah loatchhoan o ngama ngat phumma juchhih pumma erepa ngatwah. Juchhih ma atenâng depdep lâlotah, Dek ada khhek lahma phâtek nângjô mesekthien akomin, atema janru heh patsiet lahma juchhih pumma sehahkho jêngjêng phôangchhoan thukwah.

³⁰Jisu ma atenâng chhienwah, “Nangmîn chenroh a?” Atema “ngamîn pa ‘Mob,’” ngama dânthâng wah - chenrãngma ngako ate sekkhenko juchhih jahmõang luplahma dângwah.

³¹Juchhih hehma Jisu nâng letathôan thin hahkenluko nekkathuk hi ngama roatsep wah.

³²Thin kêwah hahkong khoko wak heh jahmõang phhekchhah lemchhah lahma dângwah. Ephumma Jisu nâng juchhih hehma wak hehnâng lupkathuk hi ngama roatsep wah, ngale Jisu ma wak hehnâng lupkat thukwah.

³³Juchhih heh mihwa kowah loatchhoan lahma wak hehnâng lupkatwah. Phumma wak heh ka pumma jâchhoan kalahma josiko mahlumjâ katwah.

³⁴Erekowah wak heh sokte mihnyan hehma chenni dangtah a ereheh khewah, ephumma chhoanwãng lahma erengin pa sumhah ngale thin kêanâ wah hahdaang hehnâng phoangthô wângwah.

³⁵Chenni dangtah a ereheh sokrãng mihnyan heh loatchhoan katwah, ngale chenthu thin Jisu tâko hokkatko, juchhih luptah mihnyan pa Jisu dathongko khet akhu keplahma mihnyansen rãngrãng tonglahma chohkhe wah; phumma thinkhu anga nga chei rewah.

³⁶Juchhih luptah mihnyan pa senlahma chohkhete mihnyan hehma ahan hehnâng chenroh sentah a erepa thôkoh wah.

³⁷Erediko erejaa wah mihnyan chentôma Jisu nâng thin hah wah loatchhoan o ngama ngatwah, chenrãngma ngako thin nyahrãng cheiwah. Ephumma Jisu khôankhoko chhangka lahma loatchhoan wah.

³⁸Ju-chhih loatchhoantah mihnyan pumma Jisu nâng, “Ngamin nâng demnâng johchhoanrâng” ngama roatsep wah. Phumma Jisu ma atenâng aroh ngalahma chienchhoan wah,

³⁹“Humnâng ngakwãng lohma Joban ma nangrãng chenni mokohtho ereheh thôwãngkoh.” Mihwa pa sumhah jêngjêng wãng lahma Jisu ma aterãng chenni mokotah a ereheh phoangthô kohwah.

⁴⁰Chenthu Jisu Josi rankanâng dankatko, mihnyan hehma khuhah nâhah tângroo wah, chenrãngma ngako thinkhu anga ngama ate bemlâwah.

⁴¹Erediko mihwa wathe atemîn pa Jairas hokkhoam hokwah; atea Sanagog nâng sahhab dângwah. Atedede Jisu dathongko khupjup kalahma Jisu nâng ate humnâng wângrãng roatsep wah,

⁴²chenrãngma ngako ate chha dihiaknya wathelolo echhi pânii rangpâ dangtah pa ritwah. Jisu wângthuko mihnyan hehma chentô sukma atenâng sahchhôwah.

⁴³Thinkhu chhangko dihiaknyu wathe echhi pânii heichhoan khoanchet ma nyahrãng chêmlahma dângwah; dihiaknyu ma atewah ngun akem heh khoanchet sokko doktor nâng thôanmet phewah, rohkomin ate khoanchet pa henmemin tamesiet ho.

⁴⁴Dihiaknyu pumma loangchhangko Jisu tokdiko kalahma Jisu khetsako sahloat katwah, phumma lemlienma ate heichhoan khoanchet pa jekwah.

⁴⁵Jisu ma, “Nganâng henma sahlo ehanga?” ngama thôngphâ wah. Anga ngama sahlomih ngama tuta ngatwah, ngale Piter ma ngatwah, “Hethôte, mihnyan heh nangtûmlit ko chhomîn hûera.”

⁴⁶Phumma Jisu ma ngatwah, “Henma komin nganâng lâsah lothang, chenrãngma ngako ngawah chaan loatchhoan ko ngama jet ekang.”

⁴⁷Dihiaknyu pumma lâlep jetthang ngama thônghun wah, ephumma tiilahma atedede wãng lahma Jisu dathongko khupjup katwah. Eretheko anga nga tâko atema chenrãng sahloatwah a ngale lemlienma ate chenroh sentah a erepa thôkoh wah.

⁴⁸Jisu ma dihiaknyuko ngatwah, “Ngachha, nang putedâlem pumma nang lâsensiettho. Khuhah nâhah chhoan o.”

⁴⁹Jisu ma eroh ngatthuko, sahhabwa humwah nginmatte hokwah. Atema Jairas nâng thôkoh wah, “Nangchha dihiaknya pa lâriitah” “Hethôte pa nekchêm sietwên tûro.”

⁵⁰Phumma Jisu ma erengin pa tatlahma Jairas nâng ngatwah, “Nekchei; putedâlem lolo reo, nangchha dihiaknya pa ngaksên erea.”

⁵¹Chenthu humko Jisu hokkhoam phumma, atema henmin ate demko johwãngthuk ho, Piter, Jon, Jems, ngale dihiaknya nyong awa loloba johwâng thukwah.

⁵²Erekowah heh anga nga naarit junko sepwah. Jisu ma ngatwah, “Neksep en; naapa rit dangmah - atea jup reka!”

⁵³Thin anga ngama Jisu nâng ngitwah, chenrãngma ngako, thinma riitah ngama jetwah.

⁵⁴Phumma Jisu ma ate dekko sietlahma, “Naachha, toansat o!” ngama rakroowah.

⁵⁵Ate ju pa ate sekko ngakhok wah, ngale lemlienma tôansatwah. Ngale Jisu ma thinnâng naachha ko chenni komin phhekchhah thin koh en ngama chhienwah.

⁵⁶Dihiaknya nyong awa heh patrit rewah, phumma chenni dangtah a erepa hennâng min nekthôkoh en ngama Jisu ma thinnâng ngatwah.