Read Nocte Naga Luk 9 Bible Online

Luk 9 - Nocte Naga bible

Luk 9

¹Jisu ma echhi wanii dijunte heh aroamma roolahma juchhih junloat rãng ngale khoanchet heh mesietrãng chaan kohwah.

²Erediko atema Joban Hahsông nginpa phoangthô ngale khoanchette min mesiet en ngama chienchhoan wah,

³Jisu ma thinnâng ngatwah, “Nedemnâng chenijô nekkepchhoan en: menthun min nekkep en, tõng, phhekchhah, ngun akem min, chhemchong bâmmin nekkepen.

⁴Chenreko tãngroo lahma jekthuk ehèn a, erehah kowah mangak ngakchhoan mãnthethinko tongen;

⁵Chenreko ne letangroo dang ehèn a, ere hah kowah ngakchhoan re en, ngale neda wah khep eka bumpa thinnâng nea achhih ngama ranchâthiak pa finekthien re en.”

⁶Dijunte heh chentô hahdaang nâng phoangchhoan lahma Joban Nginkongsen pa phoangthô ngale chentô thenâng khoanchet heh mesiet rewah.

⁷Chenthu Hirot, Galili pênte pumma are ngin heh phangtang chohtat phumma, ate nyahrãng mokritwah, chenrãngma ngako wawathe mihnyan hehma Jon baptis ngakhin eka ngamemin ngatwah.

⁸Wawathema Ilija hongeka ngatwah, ngale wawathema tewa rôanpa thuwah mõng dangtah hehwah ngakhin eka ngatwah.

⁹Phumma Hirot ma ngatwah, “Ngama Jon khophang pa thahdoaktek; phumma ngama are chohtat ekang mihnyan pa hen a?” Ngale atemin Jisu demnâng chohmîn hunwah.

¹⁰Moattat chhoante heh ngakhû lahma thinma chentô motah heh Jisu nâng thôkoh wah. Erediko Jisu ma ate demko sietchhoan lahma Batsida ngama ngaeka sumhahko wângwah.

¹¹Chenthu mihnyan hehma erepa leptat phumma thinmin Jisu diko junchhoan wah. Ngale Jisu ma tãngroo lahma thinnâng Joban Hahsông nginpa thôkoh wah, ngale henhenma khoanchetsên huneka ereheh mesiet rewah.

¹²Sannyupkat rienrienko, echhi wanii dijunte heh Jisu tâko hûlahma atenâng ngatwah, “Mihnyan heh chienchhoan eko, nãng kêanâ wah duken ngale hahdaang hehnâng chhoan lahma thin phhekchhah ngale jupthin chenlem chhoanwak a, chenrãngma ngako aretheko mihnyan henjô songmah.”

¹³Phumma Jisu ma thinnâng ngatwah, “Nema thinnâng chenni komin phhekchhah thuk en.” Thinma dânthâng wah, “Ninâng bankên wanbangâ ngale ngah lanii loloba etonghi. Phumma are loangchhang phangtangrãng phhekchhah richhoankoh en ngama hun ehia?”

¹⁴(Ereko hahjat bangâ mihnyan rãng dângwah.) Jisu ma ate dijunte hehnâng ngatwah, “Mihnyan heh roak bangâ roak bangâ ma tongthuk en.”

¹⁵Dijunte hehma eroh tôngthuk diko,

¹⁶Jisu ma bankên wanbangâ ngale ngah lanii pa semlahma rangkhethung nâng sûwên lahma, Joban nâng dangkoh a ngalahma rangsoam wah, ngale atema bankên pa chhupsiet lahma ate dijunte hehnâng mihnyan hehnâng phenkoh en ngama kohwah.

¹⁷Thin anga ngama phoatphoat phhekchhah wah, ngale dijunte hehma bâachâ heh echhi phânii khôantôanwah.

¹⁸Jâthe Jisu atelolo rangsoam thuko, dijunte heh ate tâko hokwah. Phumma atema thinnâng thôngphâ wah, “Mihnyan hehma nga hen edanga ngama ngawak ehanga?”

¹⁹Thinma dânthâng wah, “Wawathema Jon baptis ngaeho, wawathema Ilija, ngale wawathema tewa rôanpa thuwah mõng dangtah hehwah ngakhin eka ngama ngaeho.”

²⁰Phumma Jisu ma thinnâng chhienwah, “Roh medang ako nema nganâng chenroh ngaeha?” “Nema nga hen edanga ngama ngaeha?” Piter ma dânthâng wah, “Nanga Joban wah Misaia.”

²¹Erediko Jisu ma are ngin pa hennâng min nekthôkoh en ngama thinnâng ngatwah.

²²Jisu ma thinnâng thôkoh wah, “Mihnyan Chhama nyahrãng chêmchohmin, ngale khhepho phannang, soam aroakte adong, erediko Niemarang hethôte hehma ate roak atoak leweihmin. Atea ritphe erea, rohkomin jârem diko ngakhîn erea.”

²³Ngale Jisu ma thin phangtang nâng ngatwah, “Nema ngadijun hun medang enko, nedede lekpherit mêngmin, ngale rangwo roakweih ne bãngphakpa peletma ngadijun ha.

²⁴Chenrãngma ngako nema nedede roandôngpa pêpangrit mehun enko, nema amahphe ere en, rohkomin nema ne roandôngpa ngarãngma memahphe enko, nema ne roandôngpa eta pepângen.

²⁵Nema rangkhen hahtok phangtang nerãng takep letma nedede roandôngpa mahphe ba jienrit mere enko nema chenni chohmin a? chenjô chohmet!

²⁶Ne ngarek nâng rêsê erediko ngama hethô ekang nginkong ko rêsê mere enko, Mihnyan Chhamin ate Wa chaan keplahma Asâthôan ngintatte heh demnâng katjâko thinnângmin rêsê erea.

²⁷Ngale ngama nenâng linlin thôkoh eka, Joban Hahsông thepa lechohkhe thangma ako leriite mihnyan khuthe tongen.”

²⁸Jisu ma are ngin heh jabtahwah haptathe diko, Piter, Jon ngale Jems ate demko sietlahma hahhokho nâng wãng lahma rangsoam wah.

²⁹Jisu ma rangsoam thuko, ate thhenphãng litjâwah, ngale ate khet pemin potutu pôjâwah.

³⁰Lemlienma eretheko mihnyan wanii Jisu demnâng jabmîn lahma dângwah. Thin a Mosa ngale Ilija dângwah.

³¹Ngale nyahrãng phiakto phiakja phiak lahma hongwah, erediko ate Jeroselem nâng riilahma chenroh Joban jabkhab pa toangtang jiendângmin a erengin heh Jisu demnâng thômîn wah.

³²Piter le ate lemru heh nyahrãng mokjup wah, phumma jupwah chhin lahma Jisu dongthuk lahma chohkhe wah, ate demwah chepte wanii pemin chohkhe wah.

³³Mihnyan heh Jisu tâwah loatchhoan diko, Piter ma Jisu nâng ngatwah, “Hethôte, nãng aretheko tôngpa chentôsên a! Nima tembu humwah phangrem hoan e, nangrãng wanthe, Mosa rãng wanthe, ngale Ilija rãng wanthe hoan e.” (Atema chennijab ekanga ere pejô senthemthem lejet thangma hôngjabwah.)

³⁴Piter ma jabjenjenko, phoam bukhu lahma mahbukwah; ngale phoam pa thinkhoko bukhok phumma dijunte heh chei rewah.

³⁵Phoam kowah jabkhab hôngjab katwah, “Arepa nga Chha, ngama ate lârentek - ate ngin kepen!”

³⁶Chenthu ere jabpa jekphumma, eretheko Jisu lolo dângwah. Ngale dijunte hehma erepa thinhung nâng thienwah, ngale thinma ere sanpoatko chenni khetah a ereheh hennâng min thôho.

³⁷Eredijâko Jisu le ate dijunte warem pa hahhokho kowah jâkhôam katwah, ngale mihnyan heh jahmõang Jisu demnâng chohmînwah.

³⁸Loangchhang kowah mihnyan wathe hôngrakwah, “Hethôte! Ngama rosepki, ngachhako mamsû mêngtan - atea ngachha ate lolojû!

³⁹Juchhih ma lemlienma hongrak lahma atenâng chiloeka, eko ate thunwah thoakwoak heh hong chire eka; atenâng melo tahko chhoan lehuntu chilek loeka!

⁴⁰Ngama nang dijunte hehnâng junloat kohrãng roatsep wah, phumma thinma tajunlomah.”

⁴¹Jisu ma dânthâng wah, “Nema putedâlem met, ngale nea mihnyan chhih! Chentôloat nga nedemnâng eta johtonga? ngale chentôlek ngama nenâng eta chohsûa?” Erediko Jisu ma mihwako ngatwah, “Nang chhapa anâng sietwênro.”

⁴²Letapa khôamwâng thuko juchhih ma lolahma hahko loangsietwah. Phumma Jisu ma juchhih pa junloatwah, ngale letapa sensiet lahma ate wa nâng ngakkohwah.

⁴³Joban ma moatlemdong moatjunko chentô mihnyan heh bârit rewah. Jisu ma moatlem moeka heh khelahma mihnyan heh bârit rewah. Jisu ma ate dijunte hehnâng ngatwah,

⁴⁴“Ngama nenâng thôkohmin nginpa nema neklekphe en! Mihnyan Chhapa mihnyan nyuchha heh deknângkoh lâthângtah.”

⁴⁵Phumma dijunte hehma atema chenni nâng ngaeka arepa jet ho. Are nginpa thinnâng lethôkoh thangma huhriem lahma thien junko thinma jetloho, ngale thinma atenâng thôngphâmin chei rewah.

⁴⁶Dijunte hehwah henpa adongthôan dângmin a ngama thinkhu tungko chhiakmîn wah.

⁴⁷Thinma chenni thonghun eka erepa Jisu ma jetloatwah, ephumma Jisu ma naachha wathe sietlahma thintâko chepthuk wah,

⁴⁸ngale thinnâng ngatwah, “Henma komin are naachha pa ngamînko tãngroo eka, erepa nganâng tãngroo ehang; ngale henhenma nga tãngroo ehanga, atema nga chienkatte pemin tãngroo eka. Chenrãngma ngako nekhuchhang wah henpa arinthôan a ere peba adongthôan.”

⁴⁹Jon ma hongjabwah, “Hethôte, nangmînko mih wathema juchhih junlo lahma khetih, phumma nima atenâng jektangtih, chenrãngma ngako atea nidemwah dangmah.”

⁵⁰Jisu ma atenâng ngale dijunte ahan hehnâng ngatwah, “Atenâng nekjek tangen,” “Chenrãngma ngako, hen ne lelatnâng ledangtea erepa nerãng.”

⁵¹Jisu rangkhethung nâng toansietwên sanpoat namhok phumma, atema Jeroselem nâng wângrãng thonghun lahma wângwah.

⁵²Jisu ma ate mako nginmatte Samaria hahdaangko aterãng rongrup khoakhêmrãng chienwên lâwah.

⁵³Rohkomin ere hahdaang wah mihnyan hehma ate tãngrooho, chenrãngma ngako atea Jeroselem nâng wângte ngama Samaria wah mihnyan hehma jetwah.

⁵⁴Chenthu dijunte Jems le Jon niima eroh khe phumma, thinma ngatwah, “Teso, are mihnyan heh rokphêrãng nima rangkhethung wah wen jâroo ea?”

⁵⁵Phumma Jisu litphong lahma thinnâng ritngatwah.

⁵⁶Erediko Jisu le ate dijunte heh hahdaang hannâng dânchhoanwah.

⁵⁷Thin lemnâng khôamthuko, mihwa wathema Jisu nâng ngatwah, “Nang chennângjô mechhoan okomin nga nangdiko ejunkhoam e.”

⁵⁸Jisu ma atenâng ngatwah, “Hien hehnâng thin tôngrãng ken tonga, ngale phoangpukte wo hehnângmin thinrãng arup tonga, rohkomin Mihnyan Chharãng chenkojô ate boantông rãng the aho.”

⁵⁹Jisu ma mihhan wathe nâng ngatwah, “Ngadijun hang.” Phumma mihwa pumma dânthâng wah, “Hethôte, khebengko ngama kalekma ngawa mang rukamêng ang.”

⁶⁰Jisu ma dânthâng wah, “mangpa mang rôande chenrumîn a. Nangma chhoan lohma Joban Hahsông nginpa phoangthô chhoan o.”

⁶¹Ahan memin ngatwah, “Hethôte, ngamemin nang dijun e; phumma khebengko ngama kalekma nga humte tangkâ hehnâng ngin rânthô kamêngang.”

⁶²Jisu ma atenâng ngatwah, “Henma komin hanbê lahma khedinâng ngiaksukat eka erepa Joban Hahsông nâng lekepmin.”