Read Nocte Naga Jon 1 Bible Online

Jon 1 - Nocte Naga bible

Jon 1

¹Khebengko jabkhab dângwah; Jabkhab pa Joban demnâng dângwah, ngale Jabkhab pa Joban dângwah.

²Khebeng mejû Jabkhab pa Joban demnâng dângwah.

³Joban ma chentôpa jabkhab junma hôanwah; ate aho thangma lithemin hôanho.

⁴Jabkhab ko roandông dângwah, ngale roandông pumma mihnyan nyuchha nâng wenphiak kephûkoh era.

⁵Wenphiak pumma rangnyek ko phiak eka, ngale rangnyek pumma wenphiak pa tamahsiet mah.

⁶Joban ma ate nginmatte mihnyan wathe chienkatwah, ate mînpa Jon dângwah,

⁷Atema mihnyan hehnâng wenphiak junma thôkohrãng katwah, erohkoba anga ngama nginkongpa chohtat lahma eputedâlem a.

⁸Ate dedea ere wenphiak pa dangmah; rohkomin atema ere wenphiak pa thôkoh rãng katwah.

⁹Arepa linlin wenphiak pa dângwah - are wenphiak pa hahtokkhoh ko kalahma chentô mihnyan hehnâng phiakka era.

¹⁰Jabkhab pa hahtokkhoh ko dângwah, ngale ate junma Joban ma hahtokkhoh hôanwah, rohkomin hahtokkhoh ma ate jetlomah.

¹¹Atea ate dede diakko katwah, rohkomin ate mihnyan hehma ate kepmah.

¹²Khakama atenâng putedâlem lahma kep eka; erohwah atema thinnâng Joban Chha dangthuk eka.

¹³Thin a mihnyan nyuchha nyong awa hei angem junma chha lahma Joban Chha dâng dangmah; Joban dede thin Wa dâng phumma thin a Joban Chha dangeka.

¹⁴Jabkhab pa mihnyan nyuchharãng litdang kaera, ngale atenâng mînchenchaan, ngale toangtang pa mênchong danglahma nãngdemnâng songkaera. Nãngma ate rânghôngpa kheki, ererânghông pa ate Wa Chha atelolo dângthã rânghông chohlahma khe eki.

¹⁵Jon ma ate junma jabwah. Atema ngatwah, “Ngama ngatekpa ate junma ngatwah, ‘Atea ngadiko ekara, rohkomin atea nga noma adong, chenrãngma ngako ngachhat mama ate dângwah.’ ”

¹⁶Atenâng ajahthem mînchenchaan tôngjunko atema nãngnâng rongrup lemma rangkoh ehi.

¹⁷Joban ma Mosa junma nãngnâng Niemarang heh kohwah, rohkomin mînchenchaan le toangtangpa Jisu Krista junma kohehi.

¹⁸Henmemin Joban mathatkhe eka. Rohkomin Joban danglahma Joban Wa demko tôngte wathelolo ate Chha pumma Joban pa jetthuk ehi.

¹⁹Jeroselem wah Jews thôte jabte ngale soam aroakte ngale Livi hehma Jon nâng, “Nanga hen a?” ngama thôngphârãng chienkatwah.

²⁰Jon ma letûngmaang thangma, “Nga a Misaia dangmek” ngama sâpoangpoang dânthâng wah:

²¹Ephumma thinma Jon nâng thôngphâ wah, “Eroh medang oko, nanga hen a?” “Nanga Ilija ne?” Jon ma, “Dangmek,” ngama dânthâng wah. Thinma wîenthông phâwah, “Nanga mõngne? “Dangmek,” ngama atema dânthâng wah.

²²Thinma ngatwah, “Eroh medang ako, nanga hen a erepa ninâng thôkohhi,” “Chenrãngma ngako ni chienkatte hehnâng nima ngakthôwên kohmin. Nanga nangdede hen ngama ngarii ekoa”

²³Jon ma Isaia mõng ma jabwah jabkhab pa jablahma dânthâng wah: “Nga a ‘hahran khonâng phoangrak tepa: Teso khôamrãng lemtin hôankoh en!’ ”

²⁴Farasi hehma chienkattah nginmatte heh,

²⁵ma Jon nâng thôngphâ wah, “Nanga Misaia min ledang ngale Ilija min ledang erediko mõngmin ledang medang oko nangma chenrãngma baptijem koh eko?”

²⁶Jon ma dânthâng wah, “Ngama joma baptijem koh ekang, rohkomin nekhu chhangko nema lejet thangma wathe tonga.

²⁷Atea ngadiko ekara, nga a ate daphâng putkoh rãngjô punmek.”

²⁸Are heh Jon ma baptijem koh ekathe Bathani hahwah Jordanjo sankat ngenâng dângwah.

²⁹Eredijâko Jon ma Jisu ate tânâng wãng lahma khewah, ngale eko atema ngatwah, “Sû en, hahtokkhoh wah pap hênphete Joban Saak pa anã!

³⁰Ngama ngatekpa ate junma ngatwah, ‘Ngadiko wathe ekara, rohkomin atea nganoma adong, chenrãngma ngako atea ngachhat mama dângwah.’

³¹Atea henpa dângmin a erepa ngama lejetwah, rohkomin ngama atea Isrial mihnyan hehnâng jetthuk rãng joma baptijem koheka.”

³²Ngale Jon ma thinnâng thôkoh wah: “Ngama rangkhethung wah Jupa wo rãngrãng litlahma kalahma ate khohko tongka lahma khetek.

³³Ngamemin ate majet dângwah, rohkomin nganâng joma baptijem kohrãng chiente Joban ma nganâng ngatwah, ‘Nangma Ju kalahma henkhoh nâng tongka lahma khe eko; erepumma Asâthôanju ma baptijem ekoh a.’

³⁴Jon ma ngatwah, “Ngama erepa khetek,” ngale “Ngama nenâng atea Joban Chha ngama thôkoh eka.”

³⁵Eredijâ komin ate dijunte wanii demnâng eretheko Jon cheplahma dângwah,

³⁶Phumma chenthu atema Jisu loatkhoam lahma kheko, “Joban Saak pa anã!” ngama ngatwah.

³⁷Dijunte wanii pumma ere jabpa tatlahma Jisu demnâng johchhoan wah.

³⁸Jisu ma litphong lahma ngiaksok katko ate diko junkhoam lahma khewah, ephumma atema chienwah, “Nema chenni lemsû eken a?” Thinma dânthâng wah, “Rabi, Nanga chenko songkoa?” (Are ngaeka pa “Hethôte” nâng ngaeka.)

³⁹Atema dânthâng wah, “Kaletma sûkaren,” (Erepa sanhêmthah wanbelii sanpoatko dângwah.) Ephumma ate demnâng johka lahma ate sôngthepa khekat wah, ngale erejâko ate demnâng johtông wah.

⁴⁰Wathepa, Simon Piter naa Andru dângwah.

⁴¹Lemlienma ate pho Simon chohmîn lahma, “Nima Misaia khetih” ngama thôkoh wah. (Are ngaeka pa “Krista” ngaeka.)

⁴²Erediko atema Simon Jisu tânâng siethokwah. Jisu ma atenâng sûlahma ngatwah, “Nangmînpa Simon, Jon chha, rohkomin nangnâng Kaipas ngama roomin.” (Arepa Piter ngama ngaeka, ngale arepa “Long” ngaeka.)

⁴³Eredijâko Jisu Galili nâng katrãng chepwah. Atema Philip chohmin lahma ngatwah, “Nga demnâng johchhoan hang!”

⁴⁴(Philip pa Batsida wah dângwah, Andru le Piter niimin erehahko sôngte dângwah.)

⁴⁵Philip ma Nathaniel chohmin lahma atenâng thôkoh wah, “Mosa ma Niemarang titab nâng raang tahpa nima lâchoh khetih, ngale ate junma mõng hehmemin raangtah. Atea Nazarat wah Josep chha Jisu.”

⁴⁶Nathaniel ma chhienwah, “Nazarat hah wah chenni komin asenli eta jienhonga.” Philip ma, “Wãnglohma sûwãngro,” ngama dânthâng wah.

⁴⁷Chenthu Jisu ma Nathaniel ate tânâng wâng khelahma ngatwah, “Isrial jat linlinpa anã; atenâng chenmin achhih aho!”

⁴⁸Nathaniel ma atenâng chhienwah, “Nangma nga chenroh jienjet ehanga?” Jisu ma dânthâng wah, “Philip ma nangroo mako nanga phukbãng thongko tonglohma khetih.”

⁴⁹Nathaniel ma dânthâng wah, “Hethôte, Nanga Joban Chha! Nanga Isrial heh Lowang!”

⁵⁰Jisu ma atenâng ngatwah, “Ngama nanga phukbãng thongko tonglohma khetih ngatrãngma nangma pute ekoa? Nangma ere nomemin adong echohkheo!”

⁵¹Ngale atema thinnâng ngatwah, “Ngama nenâng toangtang ngin thôkoh eka: Nema rangkhethung pa laang lahma ekhe en, ngale Mihnyan Chha khohko rangwah Joban ngintatte heh awângte akatte ditkhoam lahma ekhe en.”