Read Nocte Naga Jon 13 Bible Online

Jon 13 - Nocte Naga bible

Jon 13

¹Arepa Adankhoam lokuh majâko dângwah. Jisu ma hahtokkhoh pa phethien lahma Wa tânâng wâng sanpoat pa lâhûtha ngama jetritwah. Atema hahtokkhoh wah ate mihnyan hehnâng roantang hun achetjû dângwah, ngale atema thinnâng athôan sanpoatko kiat hunwah.

²Jisu le ate dijunte heh rangjâ phhekchhah chhah lahma dângwah. Simon Iskarot chha Juda hungnâng Jisu chênsâng rãng thônghun thukte juchhihpa luplahma dângwah.

³Wama nganâng chaan kohlahma chentôpa ngakhennâng lâdang thuktah ngama Jisu ma jetwah; ngale atea Joban tâwah katwah ngale Joban tânâng ngakwângmin ngamemin jetwah.

⁴Ephumma phhekchhah chhahthin kowah toanchep lahma, akhohwah poh eka khetpa koakphe lahma, ate roamko khet tôankhhekwah.

⁵Erediko wankhoang nang jokien lahma ate dijunte heh dasôan kohwah ngale ate roamwah khak eka khet pumma choakhut kohwah.

⁶Ate Simon Piter tâko hokko, Simon Piter ma ngatwah, “Teso, nangma ngada soankohrãng ngaekoa?”

⁷Jisu ma atenâng dânthâng wah, “Ngama athângheh chenni moekanga erepa nangma jetmoh, rohkomin nangma khediko erepa ejet o.”

⁸Piter ma ngatwah, “Nangma chenthumin ngada lesoan kohmin!” Jisu ma dânthâng wah, “Ngama nangda lesoankoh medang eko,” “Nanga ngadijunte leta dângmin.”

⁹Simon Piter ma dânthâng wah, “Teso, eroh medang ako ngada lolo neksoan kohhang! Ngadekmin soankohhang, ngale nga khomin setkohhang!”

¹⁰Jisu ma ngatwah “Henhen josoanchoan a ereheh senthemthem lâsâtah, athê depsôanthin dangtumah, thinma dalolo ba soantumin. Nekhu phangtang lâsâtet wathe loloba ngek etonga.”

¹¹(Jisu ma erepa ate chênsângte pa jetlahma dângwah; erohwah atema ngatwah, “Nekhu phangtang lâsâtet, wathe loloba ngek etongen.”)

¹²Jisu ma thinda soankoh diko, atema koakphetah khetpa ngaktoanpoh lahma phhekchhah chhahthin ko ngaktông katwah. Ngale atema chhienwah, “Ngama athângheh nenâng chenni mokotah a ereheh jet ekenle?”

¹³“Nema nganâng Hethôte ngale Teso ngama rooeha, erepa nema lâpun rootha, chenrãngma ngako nga dangang jôba.

¹⁴Nga ne Teso ngale ne Hethôte danglekma athângheh neda soankoh eka. Erohwah nemin wathema watheda soanmînkoh en.

¹⁵Nema chenjet en ngama ba soankoh eka, erohwah ngama athângheh nerãng chenroh moekanga ererãngrãng nememin erohmo en.

¹⁶Ngama toangtang thôkoh eka: haaheh henjô ate tângtewa noma adong dangmah, ngale ngintat chhoante heh henmin ngintat chiente noma adong dangmah.

¹⁷Athângheh nema are toangtang pa lâjettet, phumma nema ererãngrãng memo enko chentôsên dângmin a!

¹⁸“Ngama nekhu anga nga nginthô dangmek; Ngama henhen ren ekanga ereheh jet ang. Rohkomin Joban nyapraangma are ngaeka pa toangtang dângmin, ‘Ngadem kowah ngama chhah ekang phhekchhah kowah johchhahte pa nga lelatnâng dangeka.’

¹⁹Ngama nenâng arepa dângwâng mako thôkoh eka, phumma chenthu arepa medangwãng thako, nema ‘NGA, HEN NGA A,’ erepa ejet ha.

²⁰Ngama toangtang thôkoh eka: Henma komin ngama chienchhoan ekang mihnyan pa metãngroo ako erepa nga tãngroo ehang; ngale henhenma nga tãngroo ehanga erepa ngachien katte pemin tãngroo eka.”

²¹Jisu ma areheh ngatdiko, ate hungnâng nyahrãng chêmchoh lahma loatthôkoh wah, “Ngama toangtang thôkoh eka: Nekhuwah wathema nga echên esengha.”

²²Dijunte heh nyahrãng mokrii lahma arepa hendângmin a ngama wathema wathe nâng sokmînwah.

²³Dijunte wathe nâng Jisu ma nyahrãng hunlahma dângwah, erepa Jisu tâko tôngwah.

²⁴Simon Piter ma atenâng thak amak kohlahma ngatwah, “Atema hennâng ngaeka erepa chhientan.”

²⁵Ephumma ere dijunte pa Jisu tâko hehtong wãng lahma chhienwah, “Teso, erepa hen a?”

²⁶Jisu ma dânthâng wah, “Ngama penritiko bankên rumkat lekma hennângkoh ekanga; ere mihnyan pa dângmin.” Ephumma atema bankên toanlahma rumkat lahma Simon Iskarot chha Juda nâng kohwah.

²⁷Juda ma bankên pa thârienrien ate hungnâng juchhih lupwah. Jisu ma atenâng ngatwah, “Nangma chenni moatthin tonga erepa sitsiak mo o!”

²⁸Jisu ma arepa atenâng chenrãngma ngaeka erepa phhekchhah chhahrãng khoang kowah johtôngte hehma henmemin jet ho.

²⁹Juda pa ngunthiente dâng phumma, dijunte khaka ma, Jisu ma Juda nâng thinma lokuhko kepthin heh riakchhoanrãng chienthem eka, ba tangchhih hehnâng chenni komin kohchhoan o, ngama komin chienthem eka ngama thônghun wah.

³⁰Juda ma bankên pa thâdiko lemlienma khoamchhoan wah. Erepa rangpen nâng dângwah.

³¹Juda loatchhoan diko, Jisu ma ngatwah, “Adephumma Mihnyan Chhapa mîndong lahma ekhe e; ngale ate junma Joban mîndong lahmemin ekhe e.

³²Ngale ate junma Joban mîndong lahma mekhetihko, Joban memin ate junma Mihnyan Chha mîndongthuk lahma ekhe e, ngale erepa atema lemlienma edongthuk a.

³³Ngachhu achha heh, nga nekhu demnâng ajah talek tongtumek. Nema nga elemsûha; rohkomin ngama Jews heh thôte jabte hehnâng chenni thôkotek a ereheh ngama athângheh nenâng thôkoh eka, ‘Nga chenko chhoan ekanga eretheko ne leta hûmin.’

³⁴Ngale athângheh ngama nenâng hôkum anyan koheka: wathema wathe nâng hun achhâmîn en. Ngama nenâng huneka rãngrãng, eroh nemin wathema wathe nâng hunmîn en.

³⁵Nema wathema wathe nâng mehunmîn enko, anga ngama nea ngadijunte ngama ejet hèn.”

³⁶Simon Piter ma chhienwah, “Teso, nang chenko dângmin a?” Jisu ma dânthâng wah, “Nga chenko chhoan ekanga eretheko ne athângheh tajun chhoanmah ren,” rohkomin; “nea khediko ejun chhoanha.”

³⁷Piter ma chhienwah, “Teso, chenrãngma ngama athângheh leta junchhoanmin a?” “Nga nangrãng ritmin tarii ang!”

³⁸Jisu ma dânthâng wah, “Nanga linlin ngarãng ritmin tariioa? Ngama toangtang thôkoh eki: wowên mako nangma nga jetmah hang ngama ditrem engao.