Read Nocte Naga Jon 17 Bible Online

Jon 17 - Nocte Naga bible

Jon 17

¹Jisu ma are ngin heh thôkoh diko, atema rangkhethung nâng sûwên lahma ngatwah, “Wa, sanpoat pa lâhûtha. Nangchha mînpa dongthuk o, erohkoba Nangchha memin nangmînpa edongthuk ho.

²Chenrãngma ngako, nangma atenâng chentô mihnyan nyuchha khohko chaankoh eko, ngale nangma atenâng kohtoh hehnâng atema roantang roanjêng lethôan roandông koh eka.

³Ngale roangtang roanjêng lethôan roandông ngaeka pa nanglolo jôba toangtang Joban ngama jetpa, ngale nangma chienkattho Jisu Krista jet ekipa.

⁴Nangma nganâng moatrãng chienthang moatlempa tamo lekma; ngama hahtokkhoh ko nangmîn dongthuk lekma khesok ekang.

⁵Ewa! athângheh nang tâko ngamîn dongthuk hang, chenroh rang ahah hôanmako nga nangdemnâng mîndong thukthang rãngrãng dongthuk hang.

⁶“Are hahtokkhoh wah nangma nganâng henhen kohthanga ereheh nâng ngama nang jetthuk ekang. Ereheh nang mihnyan, ngale nangma ereheh nganâng koh ehang. Thinma nang nginpa kepeka,

⁷ngale nangma nganâng chentô koh ehang heh nang tâwah kaera ngama thinma athângheh lâjettah.

⁸Nangma nganâng thôkohthang ngin heh ngama thinnâng lâthô kotek, ngale thinma erengin heh kep eka; ngale nga a linlinjô nang tâwah kaerâng ngama thinma lâjettah, ngale nga a nangma chienkat ehang ngama thinma putedâlem wakeka.

⁹“Ngama thinrãng rangsoam ekang. Ngama hahtokkhoh wah hehrãng soamkoh dangmek, nangma nganâng kohthang hehrãngba soam ekang, chenrãngma ngako, thin a nangthiak.

¹⁰Nga ngewah chentôpa nerãng, ngale ne ngewah chentôpa ngarãng; ngale thin junma ngamîn dôngpa kheki.

¹¹Ngale athângheh nga nang tânâng wãngerâng; Nga a hahtokkhoh ko dangtumek, rohkomin thin a are hahtokkhoh ko tongeka. Asâthôan Wa! nangmîn chaan pumma thin pepâng lohma thien o, nangma nganâng kohthangmîn pumma, Erohkoba nãngheh wanthe dangeki rãngrãng thinmin wantherãng danglahma etonga.

¹²Nga thin demnâng dângpoatko, nangmîn chaan pumma ngama pepâng lekma thienwah, nangma nganâng kohthangmîn pumma. Ngama pâng ahâng lekma thien ekang, ngale wathemin mahphemek, henpa amah rangjû hongtah a ere peba mahwah - erohwah Joban nyapraangpa toangtang dangeka.

¹³Ngale athângheh nga nang tânâng wãngerâng, Ngale Nga a hahtokkhoh ko dângpoatko are ngawah khuhah pa thinhungnâng mênchong chentonga ngama jabekang.

¹⁴Ngama thinnâng nang nginpa thôkoh ekang, phumma hahtokkhoh wah hehma thinnâng chhihchoh eka, chengrãngma ngako, Nga a are hahtokkhoh rãng ledang dangekang rãngrãng, thinmin are hahtokkhoh rãng dangmah.

¹⁵Ngama nangnâng thin a are hahtokkhoh wah toansietwên o ngama ngatdangmih, rohkomin Achhih wah pepâng lohma thien o ngama rosep eki.

¹⁶Chenroh nga are hahtokkhoh rãng ledang dangekanga, ererãngrãng thinmin are hahtokkhoh rãng dangmah.

¹⁷Nang toangtang pumma sâsiet lohma nangrãng hôanwak o; chenrãngma ngako, nang jabkhab pa toangtang.

¹⁸Nangma Nga hahtokkhoh ko chenroh chienkat thanga, ererãngrãng ngamemin thin a are hahtokkhoh ko chienchhoan ekang.

¹⁹Ngale thinrãng sênrãngma Nga dedema nangnâng kohrii eki, erohkoba thinmin linlin danglahma nangnâng ekohriiwak ho.

²⁰“Ngama thinrãng lolo rangsoam koh dangmek, thin ngin keplahma henhenma nganâng putedâlem ehanga, ereheh rangmemin soamkoh ekang.

²¹Thinkhu phangtang wantherãng chendanga ngama soam ekang. Wa! thinmin nãngdemnâng chendanghi, chenroh nga nangnâng ngale nang nganâng dangeki rãngrãng thinmin wanthe chendanga. Eroh koba hahtokkhoh mihnyan nyuchha ma nga a nangma chienkatwah ngama eputedâlem hang.

²²Nangma ngamîn dongthukthang rãngrãng ngamemin thinmîn dongthuk ekang, erohkoba, nãng heh wanthe dangeki rãngrãng, thinmin wanthe edanga:

²³Nga thin hungkhen nâng, ngale nanga nga hungkhen nâng, erohkoba thin a linlin wantherãng eta danga, ngale erohkoba hahtokkhoh mihnyan hehma nga nangma chienkatwah ngama ejet a, ngale nganâng hun ehang rãngrãng thinnângmin huneko, ngama ejetwak a.

²⁴“Wa! thin a nangma nganâng lâkoh thang, ngale nga chenko dangekanga eretheko thinmin nga demnâng dângthuk hun ekang, erohkoba thinma nga mîndông pa ekhe hang, ere mîndông pa nangma nganâng kohwah; chenrãngma ngako, are hahtokkhoh hôan mama nangma nganâng hunwah.

²⁵Toangtang thôan Wa! Hahtokkhoh ma nang jetmahho, rohkomin ngama nang jeteki, ngale are hehma nga a nangma chienkatwah ngama jeteka.

²⁶Ngama nang thinnâng jetthuk eki, ngale Ngama roantangma nang jetthukjû edangang, erohkoba, nangma nganâng hun pa thinnângmin etonga, ngale ngamin thinnâng edangang.”