Read Nocte Naga Jon 19 Bible Online

Jon 19 - Nocte Naga bible

Jon 19

¹Erediko Pilat ma Jisu sietchhoan thuk lahma watthukwah.

²Sipâhi hehma suhkãngwah khophok hôanlahma Jisu khoko phokkohwah; erediko thinma atenâng khetchek pa pohkoh rewah

³ngale ate tâko hûlahma atenâng ngatwah, “Jews heh Lowang roandônglo hin o!” Ngale thinma ate tâko wãng lahma thhenko watwângwah.

⁴Eredikomin Pilat rangsâ nâng thengakka lahma mihnyan hehnâng ngatwah, “Sûtan en, Ngama ate ritphe rãng chenjô themo lahma chohkhemek, erepa nema chenkhe en ngama netânâng rangsâko sietkatkoh a.”

⁵Erediko Jisu suhkhophok pa phok ngale khetchek pa poh lahma loatkatwah. Pilat ma thinnâng ngatwah, “Sûtan en! Mihnyan pa anã!”

⁶Chenthu Soam aroakte adong ngale Rangsoamhum bemte hehma ate khephumma, thinma rakwah, “Arittekre en! Arittekre en!” Pilat ma thinnâng ngatwah, “Eroh medang ako, nema sietchhoan letma rittek chhoan en. Ngama ate ritphe rãng chenjô themo lahma chohkhemek.”

⁷Mihnyan hehma ngakdânthâng wah, “Ninâng niem tonghi, ngale ere niem junko ate ritphe rêmin, chenrãngma ngako, atema Joban Chha ngariieka.”

⁸Chenthu Pilat ma erepa tatphumma, ate ajahthem bâmcheiwah.

⁹Atema humkhen nâng ngakwãng lahma Jisu nâng chhienwah, “Nanga chennangwah hûeroa?” Rohkomin Jisu atenâng dânthangho.

¹⁰Phumma Pilat ma atenâng ngatwah, “Nangma nganâng ledanthang minne? Thonghun o, Ngama nang laangphemin tare e, ngale rittek thukmin tare e.”

¹¹Jisu ma dânthâng wah, “Joban ma nangnâng koh diba ngakhohko nangnâng chaantong eho. Erohwah henma nang tânâng Nga siethu ehanga erepumma papchhihthôan moeka.”

¹²Chenthu Pilat ma erepa tatphumma atema, Jisu laangpherãng hunwah. Rohkomin mihnyan hehma rakwênwah, “Nangma ate melaangphe oko, nanga Chofa lemrujô dangmoh! Henma komin atea Lowang ngama châeka pa Chofa lelatnâng dangeka!”

¹³Chenthu Pilat ma are jabkhab heh tatphumma, atema Jisu rangsâ nâng sietkat lahma “Longwah hôanwah the” ngamamîn eka kowah nginpatte tôngthinko tôngkatwah. (Areko Hibru jabma “Gabbatha” ngaeka.)

¹⁴Erepa Adankhoam lokuh majâ rangngih mongko dângwah. Pilat ma mihnyan hehnâng ngatwah, “Ne Lowang pa anã!”

¹⁵Phumma thinma danrakwên wah, “Aritphe re en! Aritphe re en! Arittekre en!” Pilat ma thinnâng chhienwah, “Ngama ne Lowang pa rittek chenrea ngama huneha?” Soam aroakte adong pumma dânthâng wah, “Nirãngma Lowang pa Chofa loloba etonga!”

¹⁶Ere diphumma Pilat ma thinnâng Jisu ritphe thukwah. Ephumma thinma Jisu sietchhoanwah.

¹⁷Jisu ma ate bãngphak pa pelahma chhoanwah, ngale “Khora sekthinthe,” ngaeka theko pêwênwah. (Erethepa Hibru jabma “Golgotha” ngaeka.)

¹⁸Eretheko thinma Jisu rittekwah; ngale ate demko mihhanmin wanii johrittek wah, ere waniipa akêruko ngale Jisu amongko rittekwah.

¹⁹Pilat ma nyapraang raanglahma bãngphakko betkohwah. Atema, “Nazarat wah Jisu, Jews heh Lowang,” ngama raanglahma betkohwah.

²⁰Ajahthem mihnyan hehma erepa weihwah, chenrãngma ngako, thinma Jisu rittektah thepa erehah kêko dângwah. Nyapraang pa Hibru jabma, Latin jabma, ngale Griik jabma raangwah.

²¹Soam aroakte adong pumma Pilat nâng ngatwah, “‘Jews heh Lowang’ ngama nekraang, ‘Are mihnyan pumma nga a Jews heh Lowang’ ngaeka, ngama raango.”

²²Pilat ma dânthâng wah, “Ngama chenni raangtek a erepa lâraangtek, lerephe tumin.”

²³Sipâhi hehma Jisu rittek diko, thinma ate khet pa toanlahma chinbelii rãng chinsiet lahma sipâhi heh chinru phenwah. Ngale khetkhen nâng pohthin khetlo pemin tôanwah, are khetpa choatphin wah ledang dângwah.

²⁴Sipâhi heh jabmînwah, “Are khetpa chinsietmih; henma chenchoh ea, ngama longkendoh lihma tan e.” Arepa Joban nyapraangpa toangtang dângrãng lôamwah: “Thinma ngakhet pa thintungko phenkep eka ngale ngakhetlo rãngma longkendoh lahma tanwak eka.” Ngale Sipâhi hehma eroh rewah.

²⁵Jisu rittek bãngphak kêko ate nyong, ate nyong naa dihiaknya pa, Klopas tangnyu Mariam, ngale Mariam Makdaleni cheplahma dângwah.

²⁶Jisu ma ate nyong ngale atema nyahrãng huneka dijunte pa ereko cheplahma khewah; Ephumma Jisu ma ate nyong nâng ngatwah, “Atea nangchha.”

²⁷Erediko atema ate dijunte ko ngatwah, “Atea nang nyong.” Erejâ phumma dijunte pumma ate humnâng johsongrãng sietwênwah.

²⁸Ade phumma phangtang lâta dangtah ngama Jisu ma jetwah; ngale Joban nyapraangpa toangtang jiendângrãng atema, “Nga jolân riiekãng” ngatwah.

²⁹Eretheko titnâng angurti chhih mênchong thienlahma dângwah; ephumma jochupli pongpe noappa angurti chhihko rûmkatwah, ngale erepa Hisop bãngkãng rako hetlahma Jisu thunko tupsuh wênkohwah.

³⁰Jisu ma ere angurti pa joklahma, “Arepa lâthôantah!” ngatwah. Erediko ate khongut lahma ritwah.

³¹Erediko Jews heh thôte jabte hehma rittektah mihnyan heh da heh ngoakkiak lahma thin mang heh bãngphak kowah jâtôanrãng Pilat wah thâwah. Thinma arepa Hokut batjâ dângkowah thâwah, ngale thinma Pientông jâko ere mang heh bãngphak khoko thienpa hunmah, chenrãngma ngako, ere Pientôngjâ rangwopa nyahrãng Asâthôan rangwo dângwah.

³²Ephumma Sipâhi hehma kalahma Jisu demko johrittektah mihnyan khebengwah dapa bengngoakkiak wah, ngale ere dikowah watheda pemin ngoakkiakwah.

³³Phumma chenthu thinma Jisu da ngoakkiak rãng katko, thinma Jisu riichoan khewah, erohwah thinma Jisu dapa lengoakkiak dângwah.

³⁴Rohkomin Sipâhi wathema ate pah pa toanlahma Jisu chhamko suhwênwah, phumma lemlienma hei le jo roamjenkat wah.

³⁵(Henma arepa khetah a ere mihnyan pumma nema chen putedâlem en ngama loatjabwah . Atema chenni thôtah a erepa toangtang, ngale atema toangtang thôekãng ngama ate dedema ajet.)

³⁶Arepa Joban nyapraangpa toangtang dângrãng moatwah: “Aterã hehwah wanthemin lethahmin.”

³⁷Ngale Joban nyapraangma arohmin ngatwah, “Thinma pahma suh ekako, mihnyan hehma esûa.”

³⁸Erediko, Arimatha hahwah Josep ma Jisu mangpa tajâtoan angle ngama Pilat nâng chhienwah. (Josep pa Jisu dijunte dângwah, rohkomin atea huhhuhchha dângwah, chenrãngma ngako, atemin Jews heh thôte jabte heh ranchei dângwah.)

³⁹Khemako rangpen nâng Jisu tânâng chohmîn hutah Nikodima min myrh ngale aloe demnâng sakmîn lahma tientumli pa roakrem litat dangnemnem keplahma Josep demnâng johwângwah.

⁴⁰Mihnyan wanii pumma Jisu mangpa jâtoan lahma Jews heh mangru niem junko thinma tientumli heh demnâng johdoapwah.

⁴¹Jisu ritphetah kêko penri thong dângwah, ngale eretheko mihhan mang henjô mathatru mangruk nyan dângwah.

⁴²Ngale erejâpa Pientông majâ dângwah, erediko mangruk pa atheko dâng phumma, thinma Jisu mangpa ere mangrukko rukatwah.