Read Nocte Naga Jon 20 Bible Online

Jon 20 - Nocte Naga bible

Jon 20

¹Dobatjâ rangkhah rangkhoko, rangnyek thuma, Mariam Makdaleni mangruk nâng kalahma mangruk kenwah longpa loangphe chhoan khekatwah.

²Atema ngakchhoanwãng lahma Simon Piter le Jisu ma dijunte atema nyahrãng huntah niinâng thôkoh wah, “Thinma mangruk wah Teso pechhoantah, ngale thinma chenko thienchhoan eka erepa nima jetmih!”

³Ephumma Piter le ere dijunte nii mangruk nâng katwah.

⁴Waniilat chhoanchhoan katwah, rohkomin wanthe dijunte pa Piter noma achaan chhoankala lahma mangruk nâng khekho hokkatwah.

⁵Atema kunjup lahma sûwên tahpa khetlolo khewênwah, rohkomin ate akhennâng lupwãngho.

⁶Ate didiko Simon Piter katwah, ngale ate kalahma mangruk khenko tintin lupwângwah. Phumma ate memin ereko khetlolo tongla lahma khewah

⁷ngale ere khetpa Jisu khokowah khetpa dângwah. Ere khetpa Jisu mang doapkhet demko ledang thehannâng atedede tenrii lahma dângwah.

⁸Erediko mangrukko khema hukatah dijunte pemin junlup wângwah; ate memin erepa khelahma putewah.

⁹(Thinma ere poatkomin Joban nyapraangma ate ritwah ngakhînmin ngama ngatahpa letajet dângwah.)

¹⁰Erediko dijunte nii humnâng ngakwâng wah.

¹¹Mariam mangruk thakhoko seplahma dângwah. Atema asep jenjenma, kunjup lahma mangruk khenko sokwênwah

¹²ngale rangkhethung wah Joban ngintatte wanii khetpo keplahma Jisu mang thientah theko, kho ngeko wathe ngale da ngeko wathe cheplahma khewênwah.

¹³Thinma atenâng chhienwah, “Dihiaknyu, nanga chenrãngma sep ekoa?” Dihiaknyu pumma dânthâng wah, “Thinma nga Teso pa pechhoan eka, ngale thinma chenko thienchhoan eka erepa ngama jetmek!”

¹⁴Erediko atema litphong lahma eretheko Jisu cheplahma chohkhe wah; rohkomin erepa Jisu ngama atema jet ho.

¹⁵Jisu ma atenâng chhienwah, “Dihiaknyu, nanga chenrãngma sep ekoa?” “Nangma hen lemsû ekoa?” Dihiaknyu pumma erepa penri thong bemte edangthem a ngama thonghun lahma atenâng ngatwah, “Hethôte, nangma ate mangpa mepe chhoan tohko, chenko thienchhoantoh a erepa nganâng thôkohhang, ngama pechhoan lekma akhennâng ngaksekhû ang.”

¹⁶Jisu ma atenâng, “Mariam” ngama roowah. Mariam ma Jisu ngeko litphong kalahma Hibru jabma, “Raboni!” ngama ngatwah, (Arepa “Hethôte” ngaeka.)

¹⁷Jisu ma atenâng ngatwah, “Nganâng neksahlo hang,” “Chenrãngma ngako, Nga a Ewa tânâng mangak wãngekang. Rohkomin wãnglohma nganaa hehnâng thôkoh, nga a Ewa, ngale thin Wa min danga, erediko nga Joban, ngale thin Joban min danga, ate tânâng ngakwãng ekang.”

¹⁸Ephumma Mariam Makdaleni wãng lahma dijunte hehnâng ngama Teso khetek ngama thôkoh wah, ngale Jisu ma atenâng thôkotah hehmin thôkoh wah.

¹⁹Erejâpa dobatjâ dângwah, ngale dijunte heh rangjâ thahko kâsekpa seklahma aroamma khôanwah, chenrãngma ngako, thin a Jews heh thôte jabte heh ranchei dângwah. Ere poatko Jisu hûlahma thinmongko chephokwah. Ngale atema, “Nekhu mêmo dangen” ngatwah.

²⁰Atema aroh ngatdiko, thinnâng ate dak le chham pa khesokwah. Phumma Teso khelahma dijunte heh nyahrãng khuhah nâhah dângwah.

²¹Jisu ma thinnâng eredikomin ngatwah “Nekhu mêmo dangen. Ewa ma nga chienkatthang rãngrãng ngamemin nekhu chienchhoan eka.”

²²Erediko atema thinnâng rekma metlahma ngatwah, “Asâthôanju tangchohtha en.

²³Nema mihnyan heh pap heh map mekoh enko, thinma map echoh a; nema thinnâng map lekoh kenko, thinma map lechohmin.”

²⁴Jisu thin tânâng hokpoatko echhi wanii dijunte kowah wathe, erepa Thomas (atenâng Didimas ngama ngaeka), aho dângwah.

²⁵Ephumma dijunte ahan hehma atenâng, “Nima Teso khetih,!” ngama thôkoh wah. Thomas ma thinnâng ngatwah, “Ngama ate dekwah sema tekmãn heh khelekma setekmãn hehnâng nga deksuma keh, erediko ate chhamko nga dekma sahlo lere kengko ngama putedâlem mek.”

²⁶Haptathe diko dijunte heh humkhen nâng wienthe ngakroam khôanwah, ngale erepoatko Thomas min dângwah. Kâsekpa seklahma dângwah, rohkomin Jisu hûlahma thinmongko chephû lahma ngatwah, “Nekhu mêmo dangen.”

²⁷Erediko atema Thomas nâng ngatwah, “Nang deksuma ako thatkeh tanhang, ngale ngadek hehnâng thatsû tanhang; erediko nang dekma ngachhamko thatlo tanhang. Nang hungnâng tungmaang pa jek reo, ngale nganâng putedâlem hang!”

²⁸Thomas ma Jisu nâng, “Nga Teso ngale nga Joban,” ngama dânthâng wah.

²⁹Jisu ma atenâng ngatwah, “Nangma nga khelohma ba putedâlem ehangni? Lekhe thangma putedâlemte hehma rangkepmin!”

³⁰Jisu ma ate dijunte heh tâko lihân patritli moatlem hehmin ajahthem motah, ereheh are Titab ko raangthienmah.

³¹Rohkomin are raangthien eka heh nema chenmam putedâlem en ngama raangthien eka Jisu pa Joban Chha, Misaia, ngale nema atenâng putedâlem junma ba nema roandông tâchohmin.