Read Nocte Naga Jon 21 Bible Online

Jon 21 - Nocte Naga bible

Jon 21

¹Are dikomin rekthe, Tiberias josi kênâng Jisu ate dijunte heh tânâng hôngwah. Erepa aroh dângwah.

²Simon Piter, Thomas (atenâng Didimas ngama ngaeka), Nathaniel (Galilijaa Kana hah kowah), Zibidi chha heh, ngale Jisu dijunte ahan wanii, thinkhu phangtang aroamma dângwah.

³Simon Piter ma ahan hehnâng, “Ngama ngah lochhoan ang,” ngatwah. “Nimin nang demnâng johchhoanrii,” ngama ahan hehma atenâng ngatwah. Ephumma khôankhoma chhoanwah, rohkomin ere rangpen penliangko thinma chohloho.

⁴Rangkhah san bânghongko Jisu jokahko cheplahma dângwah, rohkomin dijunte hehma erepa Jisu ngama jet ho.

⁵Phumma Jisu ma thinnâng chhienwah, “Lemruchha heh, nema chenjô chohlo metne?” “Chennijô chohlomih,” ngama thinma dânthâng wah.

⁶Jisu ma thinnâng ngatwah, “Nechaak pa khôankho dekchahko hatkattan en, eko nema roanche echohhat en.” Ephumma thinma chaakpa hatkat tahpa thinma tangak sietwên tûho, chenrãngma ngako, thinma ngah jahmõang chohhat wah.

⁷Jisu ma nyahrãng huntah dijunte pumma Piter nâng ngatwah, “Arepa Teso!” Chenthu Piter ma erepa Teso ngama chohtat phumma, Piter ma ate khet akhohwah pohthin pumma atedede doapkhhek ritwah (chenrãngma ngako ere sanpoatko atema khet koaklahma dângwah) ngale atea joko jâtoak katwah.

⁸Dijunte ahan hehma chaakko ngah jahmõang keplahma khôankho pumma sâranko wângwah. Thin a bam kowah chentô letaangko dângwah, mitat roak ekhu totaangko dângwah.

⁹Chenthu bamko hokwângko, thinma wenko ngah behlahma khewah, ngale bankênmin roanche chohkhe wah.

¹⁰Erediko Jisu ma thinnâng ngatwah, “Nema athângheh lotet ngah kowah kattan ren.”

¹¹Simon Piter ma khôankhoko kalahma chaakko ngah mênchong bamko sietwênwah, phangtang tungko châthe roakbangâ larem dângwah; ngah pa atô jahjô medang komin chaakpa khajâho.

¹²Jisu ma thinnâng, “Wãngren ngale chhah wãngren,” ngatwah. Ate dijunte hehma henmemin atenâng, “Nanga hen a?” ngama chinchhien ho, chenrãngma ngako, atea Teso ngama thinma jetwah.

¹³Ephumma Jisu ma bankên pa semlahma thin tânâng kalahma thinnâng kohwah; ngale atema ngah pemin kohwah.

¹⁴Jisu ritwah ngakhîn diko arepa ate dijunte heh demnâng lôremrãng chohmînwah.

¹⁵Thinma ereheh phhekchhah diko, Jisu ma Piter nâng ngatwah, “Jon chha Simon, are ahan heh noma nangma nganâng ajahhun ehangle?” “Teso huneki,” “Nangma ajet ngama nangnâng huneki,” ngama dânthâng wah. Jisu ma atenâng ngatwah, “Nga saakchha heh senthemthem sûareo.”

¹⁶Eredikomin depnii Jisu ma atenâng ngatwah, “Jon chha Simon, nangma nganâng hun ehangle?” “Teso huneki,” “Nangma ajet ngama huneki,” ngama dânthâng wah. Jisu ma atenâng ngatwah, “Nga saak heh senthemthem sûareo.”

¹⁷Lôremrãng Jisu ma atenâng wienngat wah, “Jon chha Simon, nangma nganâng hun ehangle?” Piter hungkewah, chenrãngma ngako Jisu ma atenâng lôrem “nangma nganâng hun ehangle”? ngama thôngphâ wah, ephumma Piter ma Jisu nâng ngatwah, “Teso, nangma chentôpa jet; nangma ajet ngama huneki!” Jisu ma atenâng ngatwah, “Nga saak heh senthemthem sûareo.

¹⁸Ngama toangtang thôkoh eka: Chenthu nea roandông lochaan poatko, nedede hungsiko chennâng chhoan hun eken a ereko rângchhoan en; phumma chenthu ne teka phannang medang tetko, nema nedek pa loatsiet ere en, ngale mihhanma khhek lahma chenko ne chhoan lehunthe a eretheko esiet chhoanhèn.”

¹⁹(Jisu ma arepa Piter chenroh riilahma Joban mîn dôngthuk min a erengin pa jabwah.) Erediko Jisu ma Piter nâng, “Ngadijun hang!” ngatwah.

²⁰Piter litphong lahma sûtahpa ate tokdiko dijunte ahan wathe chohkhe wah, erepa Jisu demnâng phhekchhah chhahpoatko Jisu tâko kiettong kalahma, “Teso, nang henma chênsângmin a?” ngama thongphâte pa dângwah, ngale atenâng Jisu ma nyahrãng hunwah.

²¹Chenthu Piter ma ere dijunte pa khephumma, atema Jisu nâng chhienwah, “Teso, are mihnyan pa chenroh dângmin a?”

²²Jisu ma atenâng dânthâng wah, “Atea Nga mangak ngakka ahînma tôngthuk mehun angko, Nangjã tanga chenroh dângmin a? Ngadijun hang!”

²³Ephumma Jisu dijunte heh chhangko are dijunte wathepa lerii tumin ngama thôlahma ngin hôngwah. Rohkomin Jisu ma ate leriimin ngama ngaho; Jisu ma, “Ngama atea Nga mangak ngakka ahînma tôngthuk mehun angko, Nangjã tanga chenroh dângmin a?” ngamaba ngatwah.

²⁴Ere dijunte pumma are ngin heh jabwah, ngale areheh atema raangthienwah; ngale nãngma ajet atema chenni jabtah a erepa toangtang.

²⁵Are heh lekomin lihân moatlemmin Jisu ma jahmõang moatwah. Ereheh wanwanthe ma phangtang raangthien nomeko, Ngama thonghun ekang hahtokkhoh ma leta toanpetu lândangroh raangmin wah.