Read Nocte Naga Jon 5 Bible Online

Jon 5 - Nocte Naga bible

Jon 5

¹Arediko Jisu Jews heh lokuh rãng Jeroselem nâng katwah.

²Jeroselem wah saak luphokthin lemkam tâko bin wanthe dângwah ereko kânthong wan - bangâ dângwah; erepa Hebru jabma Batjatha ngama ngaeka.

³Lemkam tâko khoanchette jahmõang juplahma dângwah mitdoak, dakò, kôasôte.

⁴

⁵Eretheko roakbelii pâesat khoanchetma chêmlahma mihwa wanthe dângwah.

⁶Jisu ma mihwa pa eretheko juplahma khewah, ngale mihwa pa ajahthem rangpâ khoanchetma lâchêmtah ngama Jisu ma ajet dângwah; ephumma atenâng Jisu ma thôngphâ wah, “Nangma asên hun ekole?”

⁷Khoanchette mihwa pumma dânthâng wah, “Hethôte, jopa phetpoatko nga thien-katte aretheko henmin aho; ngadedema katrãng phungkohle, ngamako hen komin khekho chikep kaeka.”

⁸Jisu ma atenâng ngatwah, “Toanchep o, nang hempa toanpe lohma khoam o.”

⁹Lemlienma mihwapa senlahma tôanchep wah; atema ate hempa toanpe lahma khôamwah. Ere sentah jâpa Pientôngjâ dângwah,

¹⁰Ephumma Jews thôte jabte hehma ere sentah mihwako ngatwah, “Thejâ Pientôngjâ, erohwah nãng Niem junko nangma nang hempa leta toanpemin.”

¹¹Atema dânthâng wah, “Nga sênsiette mihwa pumma nga hempa toangpe lekma khôamrãng chien ehang.”

¹²Thinma atenâng thôngphâ wah, “Hen a nangnâng are hempa tôanpe chientepa?”

¹³Rohkomin khoanchette mihwa pumma Jisu pa hen a erepa lejetwah, chenrãngma ngako eretheko mihnyan heh jahmõang dângwah, ngale Jisu min sitsiak mahkhoam wah.

¹⁴Erediko Jisu ma Rangsoamhum nâng lepkhe lahma ere mihwako ngatwah, “Tattan, ade phumma nanga lâsentoh; erohwah papkaam nekthõng motu, eroh ledang koko erenoma khoanchet chhih ethechoh o.”

¹⁵Erediko ere mihwa pumma chhoan lahma Jews heh thôte jabte hehnâng ate sênsiette pa Jisu dângwah ngama thôkoh wah.

¹⁶Ephumma thinma Jisu nâng chêmsiet rãng bengphung wah, chenrãngma ngako atema Pientông jâko khoanchet mesietwah.

¹⁷Jisu ma thinnâng dânthâng wah, “Nga Wa pa roantangma moatjûjû tongeka, ngale erohwah Ngamemin moatmin.”

¹⁸Aroh ngat junko Jews heh thôte jabte hehma ate ritphe rãng ajahthem phungwah; erepa atema Pientôngjâ Niem chhihsiet lolo ledang atema Joban pa atedede Wa ngamemin ngaeka, ngale atedede Joban tôthã hôanrii eka.

¹⁹Ephumma thinnâng Jisu ma dânthâng wah, “Ngama nenâng toangtang thôkoh eka: Chhama ate dedema chennimin tamomah; Ate Wama chenni molahma kheka erepaba moeka. Wama chenni moeka erepa Chha memin moeka.

²⁰Chenrãngma ngako Wa pumma Chha ko hunlahma ate moatlem chentô moeka heh phangtang khesok eka. Wama are nomemin moatlemdong heh ate Chha ko ekhesok a, ngale nekhu phangtang bârit ere en.

²¹Wama chenroh ritwah ngakhinsiet lahma roandôngkoh eka ererãngrãng, Chha memin atema henhen nâng huneka ereheh nâng roandông ekoh a.

²²Ngale Wama hennâng min achhih asen ngama renmah. Atema ate Chha ko achhih asen rênrãng chaan phangtang lâkohtah,

²³erohwah thinma chenroh Wa nâng soangraang eka, ererãngrãng chentôma Chha pemin soangraangmin. Henma komin Chha nâng lesoangraang medang ako, ate chienkatte Wa nângmin soangraangmah.

²⁴“Ngama nenâng toangtang thôkoh eka: Henhenma ngajab pa tatlahma nga chienkatte ko putedâlem eka erehehma roantang roanjêng roandông echoh a. Thinnâng achhih ngama lengamin, rohkomin ritwah ahîn thinnâng lâdangtah.

²⁵Ngama nenâng toangtang thôkoh eka: Sanpoat pa hûera - ere sanpoat pa lâhûtha - riichoante hehma Joban Chha kahra echohtat a, ngale henhenma erepa chohtat eka ereheh engakhin a.

²⁶Chenroh Wa ngewah roandongchoh ekia ererãngrãng, atema ate Chhapa roandông kohterãng hôaneka.

²⁷Ngale atema Chha nâng achhih asen rênrãng chaankoh eka, chenrãngma ngako atea Mihnyan Chha.

²⁸Are nginko nekpatrii en; chentô riichoante hehma ate kahra chohtat sanpoat pa ehûra

²⁹ngale mangrukwah engaksatwãng wakra: Henhenma moatlemsen motah a ereheh roandông choh lahma engakhin a, ngale henhenma moatlem chhih motah a ereheh ngakhin lahma pap wendô nâng ekhamrii kawak a.

³⁰“Ngadede chaanma ngama chenmin tamomek; Nganâng Joban ma chenroh thôkoh ehanga eroh jôba ren ekang, erohwah ngama toangtangko ren ekang, chenrãngma ngako Ngama chenrohhun ekanga eroh momek, rohkomin nga chienkatte pumma chenroh moat huneka eroh moekang.

³¹“Ngama ngadede lolo merângthôrii angko, ngama chenni thôekãnga erepa linlin ngama lekepmin.

³²Rohkomin nga rângthôte tonga, ngale ngama ajet, atema ngajunma chenni thôeka erepa toangtang.

³³Nema Jon tânâng ne nginmatte chienkattet, ngale atema toangtang thôkoh wah.

³⁴Ngama mihnyan wah hâkhi hunmek; Ngama arejab ekangpa nekho chenpe en ngama jabekang.

³⁵Jon pa wentitdô ma rângphiak arãngrãng phiak lahma dângwah, phumma nea ate wenphiakko poatthelolo khuhah nâhah dângwah.

³⁶Rohkomin Jon ma hâkhi hôantah noma adong ngarãng hâkhi hôante tonga: Ngama chenni moekanga, erepa Nga Wama mothuk ehang, are pumma ngajunma hâkhi hôanlahma jabeka, ngale nga a nga Wama chienkatwah ngama khesok eka.

³⁷Ngale nga chienkatte Wama min ngajunma hâkhi hôaneka. Nema ate kahramin mathat chohtat eken, ngale ate thhenphãng min mathat chohkhe eken,

³⁸ngale nema ate ngin pemin ne hungnâng thienmet, chenrãngma ngako atema chienkat erako nema putedâlem met.

³⁹Nema Joban nyapraangpa weih eken, chenrãngma ngako nema erekowah roantang roanjêng roandông chohmin ngama putedâlem eken. Phumma are Joban nyapraang pumma ngajunma jabeka!

⁴⁰Rohkomin nea ngatânâng roandông chohrãng hok hunmet.

⁴¹“Ngama mihnyan ma rô hunmek.

⁴²Rohkomin nea chenrãngrãng mihnyan a erepa ngama jet a, ngale ngama ajet ne hungnâng Joban nâng hun achetpa aho.

⁴³Nga a nga Wa chaan demnâng kaerâng, rohkomin nema nga kepmahha; ngale henkomin atedede hungsima mehûrako erepa nema kep eken.

⁴⁴Nema wathema wathe rângthômin hun eken, rohkomin nema wanthe lolo Joban pumma rângthô pa hunmet; eroh medang enko nema nganâng chenroh ejien putedâlem ha?

⁴⁵Nema aroh nekthonghun en, Ewa tâko ngama nenâng esekhamhi ngama. Nima putedâlem eki ngama ngaeken Mosa ma jôba nenâng esekham hèn.

⁴⁶Nema linlinjô Mosa nâng putedâlem medang enko, nganângmin putedâlem min dângwah, chenrãngma ngako atema ngajunma raangwah.

⁴⁷Rohkomin atema chenni raangtah a ereko nema leputedâlem dâng phumma, ngama jabekang kojã tanga chenko eputedâlem en a?”