Read Nocte Naga Jon 6 Bible Online

Jon 6 - Nocte Naga bible

Jon 6

¹Erediko Jisu Galili Josi rankanâng dânwângwah (ba, ereko Tiberias, ngamemin ngatwah).

²Jisu ma khoanchette heh patritli mêsiet pa khelahma jahmõang mihnyan heh ate diko junkhoam wah.

³Jisu hahhokho nâng wãng lahma ate dijunte heh demnâng tôngwângwah.

⁴Ere sanpoatko Adankhoam lokuh thângnemnem dângwah.

⁵Jisu ma tûmlit phoangsû tahpa mihnyan heh ate tânâng jahmõang hûlahma khewah, ephumma atema Filip nâng chhienwah, “Are mihnyan hehnâng lânle phhekchhah thukroh chenwah phhekchhah chohrii ea?”

⁶(Atema arepa Filip hungtôan rãng ngatwah; linlinko atema chenremin a erepa jet dângwah.)

⁷Filip ma dânthâng wah, “Anga ngama chhupruchha lânle chhahroh phhekchhah riakrãng memin chânii ngun noma ajah lêmmin.”

⁸Dijunte ahan wathe Simon Piter pho Andru ma ngatwah,

⁹“Delachha wathe nâng wongwah hôanwah bankên wanbangâ ngale ngah lanii keplahma tonga. Rohkomin erepa are mihnyan hehrãng lemah.”

¹⁰Jisu ma thinnâng ngatwah, “Mihnyan heh tongthuk en,” (Eretheko hin jahmõang dângwah) Ephumma mihnyan heh phangtang tongwah; ereko mihnyan heh hahjat bangâ rãng dângwah.

¹¹Jisu ma bankên pa semlahma Joban nâng dangkoh a ngat rangsoam soamlahma erekowah tôngte mihnyan hehnâng phenkohwah. Ngale atema ngah lanii pemin eroh soamlahma kohwah, ngale thinma chentô tachhah eka eretô anga ngama chhahwah.

¹²Thinkhu phangtang phoatphoat chhah diko, Jisu ma ate dijunte hehnâng ngatwah, “Bâachâ heh phangtang khôantoan en, chhupthemin nekphahwa en.”

¹³Ephumma mihnyan hehma phhekchhah tah bankên wanbangâ kowah bâachâ heh phangtang khôantoan lahma echhi phânii chõngchõng dângwah.

¹⁴Jisu ma are patritli moatlem moatpa khelahma erekowah mihnyan hehma, “Linlinjô arepa mõng hahtokkhoh ko katte pa dângmin ngama ngatwah!”

¹⁵Jisu ma ajet dângwah, mihnyan heh kalahma thin lowang rãng metkep dângmin jôba ngama ekhetlohang ngama; erohwah atelolo hahhokho nâng ngakwâng wah.

¹⁶Sanhêmthah ko Jisu dijunte heh Galili josi ngenâng katwah,

¹⁷Ngale khôankhoko chhang lahma josi rankawah Kaparnam hah ngenâng wângwah. Rangnyek komin thin tânâng Jisu lehû dângwah.

¹⁸Erepoatko pông chaanmõang pông lahma josi pemin denmetwah.

¹⁹Dijunte heh meerem beliirãng chhoandiko thinma Jisu jokhoh pumma thin khôankho tâko khoamka lahma khewah, ngale erepa khelahma thin chei rewah.

²⁰Jisu ma thinnâng, “Nekchei en, arepa Ngaba!” ngama ngatwah.

²¹Erediko thinma khôankhoko khuhah nâhah chhangthukwah, ngale khôankhopa lemlienma thinwângrãng ngaeka theko chepkatwah.

²²Eredijâko josi rankawah mihnyan hehma khôankhopa phangthe loloba etonga ngama thonghun wah. Atea dijunte heh demnâng lejohchhoan thangma atelolo phethientah ngama thinma jetwah.

²³Khôankho ahan Tiberias wah katte heh, Teso ma Joban nâng dangkoh a ngama ngat rangsoam soamlahma jahmõang mihnyan hehma phhekchhah chhahtah josi kahko chepkatwah.

²⁴Chenthu mihnyan heh Jisu le ate dijunte heh eretheko lekhe dâng phumma, khôankhoko chhangwak lahma ate lêmsok Kaparnam hah ngenâng katwah.

²⁵Chenthu mihnyan hehma Jisu josi rankanâng chohkhe phumma thinma atenâng ngatwah, “Hethôte, nang aretheko chenthu katoh a?”

²⁶Jisu ma dânthâng wah, “Ngama nenâng toangtang thôkoh eka: Nema bankên phoatphoat chohphhek junko nga lemsû eha, ngama patritli moatlem motekpa jetloat junkolêm dangmahha.

²⁷Achhihjâ thin phhekchhah rãngma nekmo en; erenoma roantang roanjêng roandông chohthin phhekchhah rãngma mo en. Arerãngrãng phhekchhah pa Mihnyan Chhama nenâng ekohhèn, chenrãngma ngako Joban Wama atenâng erepa moatrãng chaankoh eka.”

²⁸Ephumma thinma atenâng thôngphâ wah, “Joban ma huneka moatlem moatrãng nima chenni moatmin a?”

²⁹Jisu ma thinnâng dânthâng wah, “Joban ma hen chienkattha ereko chen putedâlem a ngama hun ehèn.”

³⁰Thinma dânthâng wah, “Nima khelihma nangnâng jien putedâlem rãng nangma patritli moatlem chennimo oa? Nangma chennimo oa?

³¹Nite niwa hehma sehahkho nâng mana chhahwah, Joban nyapraangma aroh ngaeka, ‘Atema thinnâng rangkhethung wah phhekchhah kohlahma chhahthuk eka.’”

³²Jisu ma ngatwah, “Ngama toangtang thôkoh eka,” “Mosa ma chenni kohthen a erepa rangkhethung wah phhekchhah dangmah; Ewa meba rangkhethung wah phhekchhah linlinpa nenâng koh ehèn.

³³Chenrãngma ngako Joban ma koheka phhekchhah pa rangkhethung wah kalahma hahtokkhoh nâng roandông chohkoh tepa.”

³⁴Thinma chhienwah, “Hethôte, ninâng are phhekchhah pa roantang roanjêngma kohhi.”

³⁵“Nga a roandông phhekchhah pa,” ngama Jisu ma thinnâng thôkoh wah. “Henhen ngatânâng hûera ereheh rêm leriimin; ngale henhenma nganâng putedâlem ehanga ereheh jolânmin leriimin.

³⁶Ngama nenâng thôkoh eka, nema nga khetha rohkomin nema nganâng putedâlem mahtha.

³⁷Ewa ma nganâng henhenkoh ehanga ereheh ngatânâng ehûra. Henhen ngatânâng hûera ereheh ngama chenthumin lejunlomin,

³⁸Chen-rãngma ngako nga rangkhethung wah nga hungsiko moatrãngkat dangmahrâng, ngachien katte hungsiko moatrãng kaerãng.

³⁹Ngale ngachien katte pumma hun ekapa atema nganâng henhen kohthanga ereheh wah wathemin lemahphe rãng huneka, athôanjâ rangwo ko ngama ereheh phangtang hînsietmin.

⁴⁰Chen-rãngma ngako Ewa ma huneka pa henhenma Chhapa khelahma atenâng putedâlem eka erehehma roantang roanjêng roandông chohrãng huneka. Ngale athôanjâ rangwo ko ngama thin engak hinsiet ang.”

⁴¹Atema “Nga a rangkhethung wah katte phhekchhah pa” ngama jabphumma mihnyan heh ate lelatnâng nyahrãng chhihjabwah.

⁴²Ephumma thinma atenâng ngatwah, “Arepa Josep chha jisu ledangne? Nãngma ate nyong awa niimin jet e. Phumma atema nga rangkhethung wah katte phhekchhah ngama chenroh jienjab eka?”

⁴³Jisu ma dânthâng wah, “Nekhu dede tungko phoangchhih jabpa jekre en.

⁴⁴Ngachien katte Nga Wama lesiethû erako mihnyan heh henmin ngatânâng leta hûmin; ngale ereheh ngama athôanjâ rangwo ko engakhinsiet ang.

⁴⁵Mõng hehma raangwah, ‘Joban ma anga nganâng hethômin.’ Ngale henhenma Wa ngin keplahma atewah he eka ereheh ngatânâng ehûra.

⁴⁶Rohkomin arepa henma komin Wa lâthat chohkhetah ngama ngat dangmah; henpa Joban tâwah kaera erepumma loloba Wa pa lâchohkhetah.

⁴⁷Ngama toangtang thôkoh eka: henhenma putedâlem eka ereheh nâng roantang roanjêng lethôan roandông tonga.

⁴⁸Nga a roandông phhekchhah.

⁴⁹Nete newa hehma sehahkho nâng mana chhahwah, rohkomin thinmin riitah.

⁵⁰Phuma rangkhethung wah kaera phhekchhah kowah henhenma chhah eka ereheh leriimin.

⁵¹Nga rangkhethung wah katte ahin roandông phhekchhah. Henma komin are phhekchhah kowah chhah eka erepa roantang roangjêng rãng hînmin. Ngama atenâng kohmin phhekchhah pa nga phoangpa, ngama erekoh ekangpa hahtokkhoh wah mihnyan heh ahînma tongrãngkoh ekang.”

⁵²Are junko thintungko nyahrãng rinkhah lahma chhiakmîn wah. Thinma ngatwah, “Are mihnyan pumma ate phoangpa nãngnâng chenroh jienphhekthuk hia?”

⁵³Jisu ma thinnâng ngatwah, “Ngama tongtang thôkoh eka: Nema Mihnyan Chha phoang kowah lephhek kenko, ngale ate hei lejok kenko, nededema roandông leta chohmin.

⁵⁴Henhenma ngaphoang kowah phhek eka, ngale nga hei jok eka erehehma roantang roanjêng lethôan roandông echoh a, ngale athôanjâ rangwo ko ngama engakhinsiet ang.

⁵⁵Chenrãngma ngako nga phoangpa phhekchhah linlin; ngale nga hei pa jokthin linlin.

⁵⁶Henhenma ngaphoang kowah phhek eka ngale nga hei jok eka ereheh nga demnâng dângmin, ngale ngamin thin demnâng edangang.

⁵⁷Nga a ahînte Wama chienkat ehang, ngale ere junwah ngamin ahîn dangekang. Ererãngrãng henhenma ngaphoang kowah phhek eka erehehmin ngajunma ahîn edanga.

⁵⁸Are phhekchhah pa rangkhethung wah kaera; arepa nete newa hehma chhah lahma khediko rit rewaktah rãngrãng dangmah. Henhenma are phhekchhah pa chhah eka ereheh roantang roangjêng rãng hînmin.”

⁵⁹Jisu ma arepa Kaparnam wah Sanagog ko hethô nungma ngatwah.

⁶⁰Ajahthem ate dijunte hehma are nginpa tatlahma ngatwah, “Are hethô ehipa nyahrãng alat. Arepa henma tâkepmin a?”

⁶¹Jisu nâng henmemin lethôkoh thangmejô thinma phoangjab ekapa jetwah, ephumma Jisu ma thinnâng ngatwah, “Are ngin pumma ne putedâlem thinphe hunthuk ehèn a?

⁶²Thatthong hun tan, Mihnyan Chhapa khemako ate chenko tongtah a eretheko ngakwãng lahma khepa?

⁶³Roandông pa Joban Juma kohehi; hei angem phoangpa chennijô dangmah. Nga nedemnâng jabmîn eka jabkhab pumma Joban ngewah roandông chohthin Ju kephûkoh ehèn.

⁶⁴Rohkomin nekhuwah khaka pumma putedâlem met.” (Henhenma atenâng leputedâlem min a, ngale henma ate chênsângmin a erepa Jisu ma jetwah.)

⁶⁵Jisu ma ngatwah, “Are junko ngama nenâng thôkoh wah, Wama lehûthuk erako mihnyan henmin ngatânâng leta hûmin.”

⁶⁶Are junkowah Jisu dijunte heh ajahthem ate demnâng lejoh chhoantu ngakchhoan wah.

⁶⁷Ephumma Jisu dijunte echhi waniiko thôngphâ wah, “Nemin ngakchhoan hun eken a?”

⁶⁸Simon Piter ma atenâng dânthâng wah, “Teso, nia hen demnâng echhoan ea? Nangnâng roantang roanjêng lethôan roandông kohthin jabkhab pa tongho.

⁶⁹Ngale ade phumma nima lâpute dâlemtih, ngale nanga Joban tâwah katte Asâthôan pa ngama lâjettih.”

⁷⁰Jisu ma dânthâng wah, “Ngama nekhu echhi wanii ren eka, rohkomin nekhuwah wathe nâng juchhih etonghèn!”

⁷¹Atema Simon Iskarot chha Juda rãngma jabwah. Chenrãngma ngako, Juda pa echhi wanii dijunte chhang kowah wathejô medang akomin, atema Jisu chênsângmin.