Read Nocte Naga Jon 8 Bible Online

Jon 8 - Nocte Naga bible

Jon 8

¹Erediko anga nga humnâng chhoanwah, rohkomin Jisu Oliv hahho nâng wângwah.

²Eredijâ rangkhah rangkhoma Jisu Rangsoamhum nâng ngakkatwah. Phumma mihnyan heh phangtang ate tumlitko khôantông wah ngale atemin tonglahma thinnâng hethô wah.

³Niemarang hethôte ngale Farasi hehma dihiaknyu dela demnâng kaamchhih moatte lohû lahma, thin phangtang mathahko chepthuk wah.

⁴Thinma Jisu nâng ngatwah, “Hethôte, are dihiaknyu pa dela demnâng kaamchhih molahma chohloeki.

⁵Nãng Niem junko arerãngrãng dihiaknyu pa longma ritpetmin ngama Mosa ma chienwah. Phumma nangma chenroh ngaekoa?”

⁶Thinma arepa Jisu bukrii thuklahma atenâng athe jienloatrãng ngatwah. Rohkomin Jisu ma kunka lahma ate deksuma hahko raanglahma dângwah.

⁷Mihnyan heh eretheko cheplahma atenâng nginthongphâ poatko, ate toanchep lahma thinnâng ngatwah, “Nekhuwah henma pap mathat motea erepumma atenâng bengpet en.”

⁸Eredi-komin atema thengak kunka lahma ate deksuma hahko raanglahma tôngwah.

⁹[Chenthu mihnyan hehma are nginpa tatphumma phannang thôan pumma thunlahma wathe wathema phangtang thôanchhoan wah. Eretheko Jisu lolo dihiaknyu demko lekchep lahma phethien wah.

¹⁰Jisu ma toanchep lahma dihiaknyuko ngatwah, “Mihnyan heh chenko dangeka? nangnâng achhih ngatrãng wathemin ahotune?”

¹¹Dihiaknyu pumma, “Hethôte, henjô ahotu,” ngama dânthâng wah. Phumma Jisu ma ngatwah, “Sen a, eroh medang ako, ngamemin nangnâng achhih ngamih. Choan o, rohkomin papkaam nekthe ngakmotu.”]

¹²Jisu ma Farasi hehnâng wîenthe ngatwah. “Nga a hahtokkhoh rãngma wenphiak,” “Henhenma ngadiko junkhoam ehanga erehehma roandông wenphiak pa echoh a ngale thin chenthumin rangnyek nâng lekhoammin.”

¹³Farasi ma atenâng ngatwah, “Nangma nangdede rângthôrit hun eko; erohwah nangma chenni thôeko ereheh sekhota.”

¹⁴Jisu ma dânthâng wah, “Eroh dangmah, phumma nga dedejô merângthôrii angkomin, ngama chenni thôekanga ereheh tongtang, chenrãngma ngako, nga chenwah hûerânga ngale nga chenko chhoanmin a ereheh ngama ajet. Phumma nema nga chennângwah hûerânga ba chennâng chhoan ekanga erepa jetmahha.

¹⁵Nema mihnyan nyuchha hung arin junko ren eken; phumma Ngama hennâng min renmek.

¹⁶Rohkomin Ngama meren angko, ngama toangtangko eren ang, chenrãngma ngako arepa nga loloma rên dangmek; Nga chienkatte nga Wa min ngademko tonghang.

¹⁷Nãng Niem nâng aroh raanglahma tonga, chenthu hâkhi wanii mehongtahko, thinma chenni thôeka erepa toangtang.

¹⁸Ngama ngadede rângthôrii ekang, ngale nga chienkatte nga Wa memin nga jôba rângthô ehang.”

¹⁹Phumma thinma, “Nang Wa pa chenkoa?” ngama thôngphâ wah. Jisu ma dânthâng wah, “Nema nga jetmahha, ngale nga Wa min jetmet,” “Nema nga jetngako, nga Wa min chenjettet.”

²⁰Jisu ma are chentôpa Rangsoamhum wah ngun bâkoat thieneka theko thinnâng hethô nungma ngatwah. Rohkomin henmemin ate lokhhek ho, chenrãngma ngako ate sanpoat pa mahû dângwah.

²¹Eredikomin Jisu ma thinnâng ngatwah, “Nga chhoan ere ang; phumma nema nga elemsûha, rohkomin nea nepap junko erii en. Nga chennâng dang ekanga eretheko ne tachhoan met.”

²²Ephumma Jews heh thôte jabte hehma ngatwah, “Ate chenko dangeka eretheko nãng leta chhoanmin ngaeka. Arepa atedede ritpherit rãng ngaeka”

²³Jisu ma dânthâng wah, “Nea are rangkhenko tôngte, rohkomin nga a rangkho wah kaerâng. Nea are hahtokkhoh kowah, rohkomin nga a are hahtokkhoh wah dangmek.

²⁴Erohwah ngama nea nepap demko erii en ngama thôkoh eka. Ngale ‘NGA, HEN NGA A’ ngama ngarii ekako leputedâlem kenko nepap khenkojô eriien.”

²⁵Thinma atenâng, “Nanga hen a?” ngama chhienwah. Jisu ma dânthâng wah, “Ngama khebengma chenni thôkotah a.

²⁶Ngama nenâng ajahthem thôkohthin tonga, ngale ajahthem achhih ngatthinmin tonga. Ngachien katte pa toangtang, ngale ngama atewah chenni chohtat ekanga erepa hahtokkhoh ko thôkoh ekang.”

²⁷Jisu ma thinnâng Joban Wa junma thôkoh eka erepa thinma jetmah.

²⁸Ephumma atema thinnâng ngatwah, “Chenthu nema Mihnyan Chhapa mechoangpe tetko ‘NGA, HEN NGA A’ ngama ngatrit tepa ejet en; erediko nga hungsima chennimin momek ngama ejet en, rohkomin Wama chenni jabrãng thôkoh ehanga erepa jôba jabekang.

²⁹Ngale ngachienkatte pa ngademko tonga; atema ngalolo thinphe mahhang, chenrãngma ngako ngama roantangma atema chenni huneka erepa lolo moekang.”

³⁰Jisu ma are jab ekapa chohtatte heh ajahthem ma atenâng putedâlem wah.

³¹Ephumma atenâng putedâlemte hehnâng Jisu ma ngatwah, “Ngama hethô ekapa nema mekep enko, nea linlin ngadijunte;

³²Nema toangtang pa ejet en, ngale toangtang pumma ne elaang phehèn.”

³³Thinma ngatwah, “Nia Abraham chhuchha” “ngale nia henhu ahaamin mathat dangeki. ‘Ne elaang phehèn’ ngama nangma chenni ngatthiak jab eko?”

³⁴Jisu ma thinnâng ngatwah, “Ngama nenâng toangtang thôkoh eka: Henhenma pap moeka ereheh paphaa.

³⁵Haaheh hen humnângmin roantang roangjêng rãng dangmah, rohkomin humkâ kowah delachha peba roantang roangjêng rãng tôngte.

³⁶Chha pumma ne melaang phehèn koba, nea linlinrãng laangphe ehèn.

³⁷Ngama ajet nea Abraham chhuchha. Rohkomin nema nga ritphe rãng huneha, chenrãngma ngako ngama hethôeka pa nemakep hunmet.

³⁸Nga Wama chenni khesok thanga erepa ngama thôekãng, rohkomin nema newama chenni thôkohthen a erepa moeken.”

³⁹Thinma atenâng dânthâng wah, “Niwa pa Abraham.” Jisu ma dânthâng wah, “Nea linlinjô Abraham chhuchha dângnomeko, nememin atema motah rãngrãng chenmotet.

⁴⁰Ngama Joban wah chohtattek toangtang nginpa nenâng thôkoh eka, rohkomin nema nga ritphe rãng huneha. Phumma Abraham ma arerãngrãng moho!

⁴¹Newa hehma chenni motah a erepa nememin moeken.” Thinma ngatwah, “Niwa wathe loloba etonga, erepa Joban, ngale nia ate chha linlin.”

⁴²Jisu ma thinnâng ngatwah, “Joban pa linlin newa dângnomeko, nema nganâng hun reminwah, chenrãngma ngako nga Joban tâwah kaerâng, ngale athângheh akotong ang. Nga a ngadede chaankokat dangmahrâng, atema chienkat lahmeba kaerâng.

⁴³Ngama jab ekangpa nema chenrãngma lejet reken a? Arepa nema nga nginpa lenyoaktat junko dangeka.

⁴⁴Nea newa joakchha, ngale newa ma chenni huneka ere junko kep eken. Rangbâng hahbâng thuma atea mihritphete, ngale atea toangtang lemkhôko chenthumin mathat khoam eka, chenrãngma ngako atenâng toangtang aho. Atema mothô thôekapa, mothô thôtejat dâng phumma thôeka, chenrãngma ngako atea mothô ngale mothô khoanglep heh wa.

⁴⁵Rohkomin ngama toangtang thôkoh eka, erohwah nema nganâng putedâlem mahha.

⁴⁶Nekhuwah henma ngama pap molek-ma thatkhetha? Ngama toangtang methô angko, nema nganâng chenrãngma lepute dangeha?

⁴⁷Henhen Joban tâwah kaera erehehma Joban nginpa ejetat a. Rohkomin nea Joban tâwah dangmet, erohwah nema Joban nginko lejetat dangeken.”

⁴⁸Thinma Jisu nâng ngatwah, “Nanga Samaritan jat ngale nangnâng juchhih lup eho. Nima arepa punnga ekile?”

⁴⁹Jisu ma dânthâng wah, “Nganâng juchhih lupmahhang, Ngama nga Wa soangraang ekang, rohkomin nema nga soangraang mahha.

⁵⁰Ngama ngadede mîndôngpa hunmek. Rohkomin nga mîndôngthuk hunte wathe tonga, ngale atema ngarãngma ejab a.

⁵¹Ngama nenâng toangtang thôkoh eka: Henhenma nga nginkep eka ereheh chenthumin leriimin.”

⁵²Thinma Jisu nâng ngatwah, “Athângheh nima linlin lâjettih nangnâng juchhih lâluptho! Abraham min riitah, ngale mõng hehmin riitah, rohkomin athângheh nangma nganâng henhenma putedâlem ehanga ereheh leriimin ngaeko.

⁵³Niwa Abraham riitah; Nanga Abraham, nomemin adong thonghunrii ekoa? Ngale mõng hehmin erohjô riitah. Nanga hen ngama thonghunrii ekoa?”

⁵⁴Jisu ma dânthâng wah, “Ngama ngadede merângthôrii angko, erepa sekhota dângmin. Nga rângthôte pa nga Wa - ere kojôba nememin ni Joban ngama ngaeken.

⁵⁵Nema ate mãthatjet eken, rohkomin ngama ate jet ang. Ngama ate jetmek menga angko, ngamin nekhu rãngrãng mothô jôba. Rohkomin Ngama ate jet ang, ngale ngama ate ngin kepekãng.

⁵⁶Newa Abraham ma ngakat sanpoat pa khelek mele ngama thonghun lahma khuhah nâhah dângwah; Erepa atema khelahma khuhahwah.”

⁵⁷Thinma atenâng ngatwah, “Nanga rangpâ roak bangâ min madang eko - phumma nangma Abraham khetoh o?”

⁵⁸Jisu ma dânthâng wah, “Ngama toangtang thôkoh eka, Abraham mako ‘NGA’ dângwah.”

⁵⁹Ephumma thinma atenâng longma petrãng long tôanwah, rohkomin Jisu huhtong lahma Rangsoamhum wah loatchhoan wah.