Read Nocte Naga Moatlem 10 Bible Online

Moatlem 10 - Nocte Naga bible

Moatlem 10

¹Kasaria nâng mihnyan wathe ate mînpa Kornilas dângwah, atea, “Itali Regimen,” ngaeka Roman sipâhi heh kepten dângwah.

²Atea Joban rancheite mihnyan dângwah; ngale thinhumte tangkâ phangtang Joban nâng rangsoamte dângwah. Ate memin Jews tangchhih hehnâng nyahrãng chîchohsok wah, ngale roantang Joban nâng rangsoam lahma dângwah.

³Atema jâthe sanhêmthah wanrem sanpoatko thânkhewah, atema rangkhethung wah Joban ngintatte chaang paangpaang kalahma atenâng, “Kornilas!” ngama roolahma thânkhewah.

⁴Atema chei nungma ngintatte ko thongsû lahma ngatwah, “Hethôte, arepa chennia?” Ngintatte pumma dânthâng wah, “Nang rangsoam ngale nangma mihnyan hehnâng chohsû eko demko Joban rinme eka, ngale atema nang rangsoam pa edânthangho.

⁵Ngale athângheh nangma Jopa nâng mihnyan chienkat lohma Simon Piter rooka thuk o.

⁶Atea jokah nâng songlahma ngemkhoan wah tembu hum hôante Simon humko tonga.”

⁷Erediko ngintatte pa ngakchhoan wah, phumma Kornilas ma ate humwah haa wanii ngale sipâhi wathe roowah, ere sipâhi pa Joban rancheite ngale atenâng chohsokte dângwah.

⁸Atema thinnâng phangtang thôko lahma Jopa nâng chienkatwah.

⁹Eredijâko, thin Jopa hahnâng hunemnem dângko, Piter rangngih mongtangko rangsoam rãng humkho nâng koatwângwah.

¹⁰Ate rêmrii lahma chenni komin phhekchhah hunwah; phumma aterãng phhekchhah khoakhêm thuko, atema thânkhewah.

¹¹Atema rangkhethung laang lahma khewênwah, ngale chenni komin khadôngmõang sukbeliiko lolahma hahtokkhoh ko waangphe katlahma khewah.

¹²Ereko rongrup ngem heh dângwah, pû anyah, ngale wunwo hehmin dângwah.

¹³Phumma jabkhab pumma atenâng ngatwah, “Piter toanchep lohma areheh ritphe lohma phhek o!”

¹⁴Phumma Piter ma ngatwah, “Teso, areheh ngama phhekmek! Ngama niemarang junko achin heh chenthumin phhekmek.”

¹⁵Jabkhab pumma wienthe ngatwah, “Chenpa Joban ma asâ ngaeka ereko nangma achin neknga.”

¹⁶Arepa lôrem khesok diko rangkhethung nâng ngaktôan wênwah.

¹⁷Piter ma arepa chenni junko thânkhe ekanga ngama bârit poatko, Kornilas ma chienkattah mihnyan hehma Simon humpa chohlem lahma Simon hum thakho wah pankâsek thongko cheplahma dângwah.

¹⁸Thinma roolahma chhienwah, “Nang humko Simon Piter ngama mihnyan wathe tonga?”

¹⁹Ere thukomin Piter ma chenni junko thânkhetek a ngama thonghun lahma dângwah, phumma Juma atenâng ngatwah, “Tattan! Warem mihnyan ma nang lemsû eho.

²⁰Toanchep lohma jâkhoama kao, ngale thin demnâng lejohwãng nekdang, chenrãngma ngako ngama chienkat erâng.”

²¹Ephumma Piter jâkhoam kalahma mihnyan hehnâng thôkoh wah, “Nema lemeken mihnyan pa nga. Ne chenrãngma katwah a?”

²²“Kepten, Kornilas ma chienkat ehi,” ngama thinma dânthâng wah. “Atea mihnyansen, ngale Joban nâng rangsoamte mihnyan, ngale chentô Jews heh ate rancheieka. Joban ngintatte ma ate humnâng nangrookat rãng thôkoh wah, ngale, erohkoba nangma atenâng chenni thôkohthin tonga ereheh atema eta chohtat a.”

²³Piter ma ere mihnyan heh humkhen nâng roowên lahma erejâ rangpen pa jemthukwah. Eredijâko thin demnâng johwângwah; ngale Jopa hahwah putedâlemte heh wahmin ate demnâng khuthe johwângwah.

²⁴Eredijâko ate Kasaria hahnâng hokkhoamwah, eko Kornilas ma ate tang amang heh, ngale lemrusen heh demnâng roamlahma Piter bemlâwah.

²⁵Piter humkhen nâng lupwângrãng ngatko, Kornilas chohka lahma ate dathongko khupjup kalahma atenâng rangsoam wah.

²⁶Phumma Piter ma chepsiet lahma ngatwah. “Chep o,” “Ngamin mihnyan jôba.”

²⁷Piter humkhen nâng lupwâng nungnungko Kornilas ma atenâng thôkoh wah, phumma humkhen nâng wãng lahma jahmõang mihnyan khôan lahma khewângwah.

²⁸Atema thinnâng ngatwah, “Nededema senthemthem jet en, Jews heh dôrem niemarang junko Jews ledangte heh demnâng leroammin. Rohkomin Joban ma nganâng hennângjô niemarang junko achin lengamin ngama khesok ehang.

²⁹Ngale erohwah chenthu nangma ngaroorãng chienkat phumma ledân thangma wãngerâng. Thôkohhang, chenrãngma rooka thanga?”

³⁰Kornilas ma ngatwah, “Aretô thang sanpoatko jârem mako nga rangsoam lekma dângwah erepa nga humko sanhêmthah wanrem sanpoatko dângwah. Phumma nga mathahko khet phiakjaja keplahma mihnyan wathe chephokwah

³¹ngale atema ngatwah, ‘Kornilas! Joban ma nang rangsoam lâchohtattho ngale nangma mihnâng chohsok moatlem moeko pemin lâkhetho.

³²Jopa nâng mihnyan chienkat lohma Simon Piter rooka thuk o. Atea jokah nâng songlahma ngemkhoan wah tembu hum hôante Simon humnâng tonga.’

³³Phumma lemlienma nangroo rãng chienkatwah, ngale nang anâng wângpa nyahrãng lâsentah. Teso ma nangnâng chenni thôkoh rãng chien eho erepa chohtatrãng nikhu areko Joban mathahko bemeki.”

³⁴Piter ma loatjabwah: “Ngama arepa toangtang ngama athângheh jet ekang, Joban ma chentô nâng manthe hôanehi.

³⁵Henhenma ate ranchei lahma toangtang moatlem moeka ereheh chenrãngrãng jatjô medang akomin atema kepeka.

³⁶Atema Isrial mihnyan hehnâng ngin matchhoantah pa nemajet en, erepa Jisu Krista junma mêmo Nginkongsen phoangthô chhoanwah, atea chentôrãng Teso.

³⁷Jon ma baptijem kep ngin phoangthô diko, Galili nâng bengthun lahma Isrial diak phangtang nâng chenni dangtah a ereheh nemajet en.

³⁸Nema Nazarat wah Jisu pa ejet en ngale Joban ma atenâng Asâthôanju ngale chaan chenroh kohtah a erepemin jet en. Atema chentô nâng phoangchhoan lahma asenli heh moatwah, ngale chentô juchhihma loeka heh sensiet rewah, chenrãngma ngako Joban pa ate demnâng dângwah.

³⁹Atema Isrial diaknâng ngale Jeroselem nâng chentô motah a ereheh nimitma khelihma thôeki. Ngale thinma bãngphakko sema teklahma rittekwah.

⁴⁰Rohkomin Joban ma jârem diko ritwah ngakhînsiet wah, ngale ngakhinwâng dikomin chohkhe thukwah,

⁴¹erepa chentô nâng khethuk tuho, rohkomin Joban ma renchhoan heh nângba khethukwah, erepa nima khewah, ate demnâng ritwah ngakhîn dikomin aroamma jokphhek chhahtih.

⁴²Ngale atema ninâng nginkongsen pa mihnyan hehnâng phoangthô chhoankoh en ngama chien ehi ngale Joban ma atenâng ahînte ngale aritte heh rênrãng thieneka ngama thôchhoan kohrãng chien ehi.

⁴³Chentô mõng hehmemin ate junma jabwah, thinma ngatwah, Jisu mîn chaanko henhenma atenâng putedâlem eka erehehma map chohmin.”

⁴⁴Piter ma nginthô thuko ate ngin jetatte heh phangtang khohnâng Asâthôanju katwah.

⁴⁵Jews jat putedâlemte Jopa wah Piter demnâng johkatah hehma Jews ledangte jat hehnângmin Joban ma Asâthôanju hînhô kohpa khelahma nyahrãng bâritwah.

⁴⁶Chenrãngma ngako thinma jatjat jabma jablahma Joban nâng rôlahma tatwah. Phumma Piter ma loatjabwah:

⁴⁷“Are mihnyan hehmemin nima chohtih rãngrãng Asâthôanju chohwak eka. Henma thinnâng baptijem nekkepen ngama tâjek tângmin a?”

⁴⁸Ephumma atema thinnâng Jisu Krista mînko baptijem kepen ngatwah. Erediko thinma atenâng jâthe jânii johtong thienhi ngama roatsep wah.