Read Nocte Naga Moatlem 11 Bible Online

Moatlem 11 - Nocte Naga bible

Moatlem 11

¹Moattat chhoante ngale chentô Judia diakwah putedâlemte hehma ngale Jews ledangte hehmemin Joban jabkhab pa kep eka ngama chohtatwah.

²Chenthu Piter Jeroselem nâng katko, Jews ledangte hehma khoankhen niem hôanmin jôba ngama hunte hehma ngatwah,

³“Nanga khoankhen niem lehôante Jews ledangte humnâng hûeko, ngale thin demnâng roamphhek chhah eko!”

⁴Ephumma Piter ma thinnâng khebeng thuma chenroh bengdangtah a erehehma thunlahma phangtang thôkoh wah:

⁵“Chenthu ngama Jopa hahnâng rangsoam poatko, ngama thânkhewah. Ngama chenni komin khadôngmõang rangkho wah sukbeliiko lolahma waangphekat lahma thânkhewah, ngale erepa nga tâko tângjek katwah.

⁶Ngama namwãng lekma akhennâng sûwêntek pa, humwah pem eki ngem angah, wunwah ngem angah, pû anyah, erediko wunwah wo hehmin khewah.

⁷Erediko nganâng ngalahma jabkhab tatwah, ‘Piter cheplohma areheh ritphe lohma phhek o!’

⁸Phumma ngama ngatwah, ‘Teso, ngama areheh phhekmek! chenthumin niemarang junko achin heh nga thunnâng mathat sekwên ekang.’

⁹Phumma rangkho wah jabkhab wienngak jabkatwah, ‘Chenpa Joban ma asâ ngaeka ereheh nâng nangma chenni nângjô achin neknga.’

¹⁰Arepa lôremrãng dângwah, ngale erediko chentôpa rangkhethung nâng ngaktôan wênwah.

¹¹Ere sanpoatko Kasaria wah mihnyan warem ngaroorãng chienkattha heh nga tongtek humko hokwah.

¹²Juma nganâng letûngmaang thangma thin demnâng johwângrãng ngatwah. Jopa wah putedâlemte waerok pemin nga demnâng Kasaria nâng johwângwah, ngale nikhu phangtang Kornilas humnâng wãngtih.

¹³Atema rangwah Joban ngintatte ate humkhenko hongchep hûlahma khetah ngin heh ninâng thôkohthi, ngale atenâng, ‘Jopa wah Simon Piter roorãng mihnyan wah chienkat o ngama ngatah hehmin thôkohthi.

¹⁴Atema nangnâng ngin ethôkohho, ngale erejunko ne humte tangkâ heh kho epe en.’

¹⁵Ngale chenthu ngama thôkoh thuko, khema nâng chenroh nãngkhoh nâng kathia ererãngrãng thinkhoh nângmin Asâthôanju katwah.

¹⁶Erediko Teso ma chenni ngatah a erepa ngama thônghun wah: ‘Jon ma joma baptijem koheka, rohkomin nenâng Asâthôanju ma baptijem ekohhèn.’

¹⁷Nãngma Teso Jisu Krista nâng putedâlem ko chohtih rãngrãng jôba Jews ledangte hehnângmin Joban ma hînhô koheka; phumma Joban nâng jektangte nga hen a!”

¹⁸Chenthu thinma are nginpa tatphumma, chhiakmîn pa jeklahma Joban nâng rôwakwah, “Eroh medang ako Jews ledangte hehnângmin Joban ma hunglitthuk lahma roandông koheka!”

¹⁹Stifen ritphe poatwah chêmsiet sanpoatko putedâlemte phoanghuh chhoantah heh Fonika, Sipras, ngale Antiok lanhûroh chhoanwah, phumma thinma Joban nginpa Jews hehnâng lolo thôkoh wah.

²⁰Rohkomin Sipras ngale Kren wah putedâlemte ahan hehma Antiok nâng kalahma Jews ledangte hehnâng thôkat kohwah ngale, thinnâng Teso Jisu nginkongsen pa thôkoh wah.

²¹Teso chaanpa thin demnâng dângwah, ngale jahmõang mihnyan hehma putedâlem lahma Teso tânâng ngakhok wah.

²²Are nginpa Jeroselem wah Asâthem heh tânâng hokphumma thinma Barnabas Antiok nâng chienkatwah.

²³Chenthu ate kalahma mihnyan hehnâng Joban ma rangkoh pa kheka lahma ate nyahrãng khuhahwah, ngale Teso nâng thinhung arin phangtang kohlahma putedâlem rãng roatsep wah.

²⁴Barnabas pa nyahrãng mihnyansen dângwah, atenâng Asâthôanju min mênchong dângwah ngale nyahrãng putedâlem sen dângwah. Ephumma jahmõang mihnyan heh Teso tânâng siethokwah.

²⁵Erediko Sol lemsokrãng Barnabas Tarsus nâng katwah.

²⁶Atema Sol chohmîn lahma Antiok nâng sietwênwah, ngale rangpâ pâtangma atenii Antiok nâng tôngwah. Roantangma Asâthem heh khôanhû lahma Barnabas le Sol demnâng chohmînwah ngale atenii ma thinnâng hethô wah. Antiok wah putedâlemte hehnâng Kristan ngama bengngatwah.

²⁷Ere sanpoatko Jeroselem wah Antiok nâng mõng khuthe katwah.

²⁸Mõng heh chhangwah wathe ate mînpa Agabas, Joban Ju chaanma toanchep lahma hahtokkhoh phangtang nâng rêmchhih hok lâthangtah ngama thôwah. (Erepa Kladias pa Chofa dâng sanpoatko hokwah.)

²⁹Phumma dijunte hehma henma chentô taeka eretô thinlemru Judia wah putedâlemte hehnâng matkat e ngama nginpat wah.

³⁰Thinma khôanse lahma ere ngunpa Asâthem hehnâng Barnabas le Sol nii deknâng matkatwah.