Read Nocte Naga Moatlem 12 Bible Online

Moatlem 12 - Nocte Naga bible

Moatlem 12

¹Ere sanpoatko Hirot Lowang ma Asâthem hehnâng bengchêmsiet wah.

²Atema, Jon naa Jems, dãngma ritdoakwah.

³Are junko Jews heh khuhah lahma khe phumma atema Piter min loatkhhekwah. (Arepa wichhi lesak pheban phhek lokuh sanpoatko dângwah.)

⁴Piter lokhhek lahma phâtek nâng sekwah, ngale sipâhi wabelili roamlahma khubeli nâng bemthukwah. Hirot ma Adankhoam lokuh râdiko nok atang mathahko sekhâmrãng thônghun wah.

⁵Erohwah Piter phâtek nâng sekwah, rohkomin Asâthem hehma Joban nâng ate rãngma nyahrãng hungkoh lahma rangsoam wah.

⁶Hirot ma nènep nok atang mako loatsietmin ngama ngat rangpenko, Piter abemte sipâhi wanii tungko juplahma dângwah. Atenâng janru wannii ma khhek lahma dângwah, ngale phâtek nâng lupwângthin kowah pankâsek thongko abemte sipâhi heh dângwah.

⁷Lemlienma Teso ngintatte ereko hongchephû lahma eretheko wenphiak hôngphiak hokwah. Ngintatte pumma Piter nâng chhoakkhoko lolahma satsiet lahma ngatwah, “Sitsiak dango! Toanchep o!” Phumma lemlienma Piter dekwah janru heh jâritwah.

⁸Erediko ngintatte pumma atenâng ngatwah, “Nang roamdit pa dit o, ngale nang dapheng pa phengreo.” Phumma Piter ma eroh moatwah, ngale ngintatte pumma ngatwah, “Nang khetpa toanpoh lohma nga demnâng karoo.”

⁹Ngintatte pumma moeka pa linlin dangale dangmah a ere pejô lejet thangma Piter phâtek khenwah johloat chhoanwah; atema thânkheba rethem ekang ngama thônghun wah.

¹⁰Thinma khebengwah bemte heh dankhoam lahma ere diwah bemte hehmin dankhoam lahma athôan wah hahdaang nâng loatkatthin jankâsek tâko hokkatwah. Phumma jankâsekpa atedede laangjâ lahma loatchhoan wah. Ngintatte le Piter nii chuthe taangkhoam diko, ngintatte pumma Piter phethien lahma chhoanwah.

¹¹Erediko Piter ma atenâng chenni dangeka erepa jetrii lahma ngatwah, “Ade phumma arepa linlin ngama lâjettek! Teso ma nga Hirot wah pepângrãng ngale Jews mihnyan hehma themawa eka hehwah pepângrãng ate ngintatte chienkat era.”

¹²Piter ma linlin loatchhoantek ngama jetrii lahma Jon Mak nyong Mariam humnâng wângwah, ereko ajahthem mihnyan khôan lahma rangsoam wah.

¹³Piter ma rangsâma kâsekko rahkôngwah, phumma janchhônya haa wathe ate mînpa Roda kâseklaang rãng katwah.

¹⁴Atema Piter kahrapa jin lahma nyahrãng khuhah nungma kâsek lelaang thangma ngakchhoan wângwah, ngale atema Piter rangsâko cheplahma tonga ngama thôkoh wah.

¹⁵Thinma atenâng ngatwah, “Nanga apa rekoa!” Phumma atema arepa linlin ngama chaanritwah. Ephumma thinma ngatwah, “Arepa ate ngintatte tadanga.”

¹⁶Ere thukomin Piter ma kâsekko rahkong lahma dângwah. Athôanko thinma kâsekpa laangka lahma Piter chohkhe wah, ephumma thin bârit rewah.

¹⁷Piter ma thinnâng nektin en ngama dekma thakkohwah, ngale Teso ma phâtek khenwah ate chhoanroh loatsiettah a ereheh thinnâng thôkoh wah. Atema thinnâng ngatwah, “Arepa Jems le putedâlemte ahan hehnâng thôkoh en,” erediko thintâwah loatchhoan lahma thehan nâng chhoanwah.

¹⁸Rangkhahko Piter nâng chenni dangeka ngama phâtek bemte heh nyahrãng mokritwah.

¹⁹Hirot ma Piter lemrãng chienwah, rohkomin thinma chohlemho. Ephumma Hirot ma abemte sipâhi heh sekhamwah, ngale erediko bemte heh ritphe thukwah. Arediko Hirot Judia wah Kasaria nâng kalahma poatthe tôngkatwah.

²⁰Tair le Sidon wah mihnyan heh demnâng Hirot nyahrãng rinkhah wah, ephumma enângwah mihnyan khuthe roamlahma ate demnâng chohmînrãng hokwah. Khebeng khoko thinma Hirot humbemte Blastas demnâng bengjetmîn wah, ephumma Blastas ma thinnâng chohsok wah. Erediko Hirot tânâng wãngwak lahma nomerãng roatsep wah, chenrãngma ngako thinma phhekchhah pa Lowang Hirot diakwah chohwah.

²¹Jâthe rangwo khôanwak lahma Hirot ma lowang khet keplahma lowang tôngthinko tonglahma mihnyan hehnâng thôkoh wah.

²²Phumma erekowah mihnyan hehma, “Arepa mihnyan ma jab dangmah, Joban ma jabeka!” ngama rakwah.

²³Phumma lemlienma Teso ngintatte ma Hirot loangwatwah, chenrãngma ngako atema Joban mîn dongthukmah. Erediko dongma phheklahma ritwah.

²⁴Phumma ere sanpoat komin Joban jabkhab pa jêngjah jahchhoan ngale jêngdong dongwãng rewah.

²⁵Barnabas le Sol niima thin moatlem heh tamo lahma Jeroselem wah Jon Mak thin demnâng sietlahma ngakwâng wah.