Read Nocte Naga Moatlem 14 Bible Online

Moatlem 14 - Nocte Naga bible

Moatlem 14

¹Ererãngrãngjô Ikoniem nângmin dângwah: Pol le Barnabas nii Sanagog nâng hûlahma thinnâng thôko lahma Jews ngale Jews ledangte heh phangtang putedâlemte rãng litjâ wah.

²Rohkomin lepute dâlemte Jews hehma Jews ledangte heh chepsiet lahma putedâlemte heh lelatnâng dângwah.

³Enâng moattat chhoante heh melâng rangwo tôngthienwah, thinma chenni ranjô lechei Teso nginpa phoangthôwah, ngale ate mînchênchaan ngin thôeka pa toangtang ngama jetthuk rãng thinnâng patritli ngale bâritli moatlem heh moatthukwah.

⁴Erehah kowah mihnyan heh phanjâ wakwah: Khakapa Jews heh demnâng dângwah, ngale khakapa moattat chhoante heh demnâng dângwah.

⁵Erediko Jews ledangte ngale Jews heh thin khhepho phannang heh demnâng roamlahma moattat chhoante hehnâng chêmthuk ngale longma ritpetrãng thômîn wah.

⁶Chenthu moattat chhoante hehma erengin pa leptat phumma erehah kowah huhchhoan lahma Likonia wah Listra le Dirbi erediko erehah kêanâ hahnâng katwakwah.

⁷Enângmin thinma Nginkongsen pa thôkoh wah.

⁸Listra nâng achhatmejû dakò chha lahma chenthumin lethat jienkhoamte mihnyan wathe dângwah.

⁹Atemin eretheko tonglahma Pol nginpa jettat lahma dângwah. Ngale Pol ma ere mihwa pumma Joban ma tasensiet hang ngama putedâlem pa khelahma, atenâng thongthong sokkatwah

¹⁰ngale chaanmõang raklahma ngatwah, “Toanchep lohma nang dapa chen o!” Ephumma mihwa pa toangchep lahma tumlit phoangkhoam wah.

¹¹Chenthu Pol ma moeka pa mihnyan hehma khe phumma, thin Ikoniem jabma, “Joban pa mihnyan rãngrãng danglahma nãng tâko kaera!” ngama rakwakwah.

¹²Thinma Barnabas nâng Zius ngama mînwah, ngale Pol nâng Hirmis ngama mînwah, chenrãngma ngako atea Nginkongsen thôte hehwah adongthôan dângwah.

¹³Zius joban rangsoamhum pa hahdaang panlienko dângwah, phumma erekowah soam aroakte pumma hahdaang pankâsek thongko mânpong ngale chongpô heh keplahma hokwah, chenrãngma ngako ate ngale mihnyan hehma moattat chhoante hehnâng soam aroak rãng hunwah.

¹⁴Chenthu Barnabas le Pol niima mihnyan hehma themawa ekapa tatphumma, atenii khet heh koakphe lahma mihnyan heh chhangko raklahma chhoankat wah,

¹⁵“Nema chenni re eken a? Nimin nerãngrãng mihnyan jôba! Nia ako nekhu nâng Nginkongsen pa thôko lahma, nekhuma ledangli moatlem moeken kowah ahîn Joban, ngale rangkhethung, hahtokkhoh, josi, ngale josi khenwah chentô hôante Joban tânâng ngaklitsiet hokrãng netânâng hûeri.

¹⁶Khemako atema chentô mihnyan hehnâng mâmâ hungsiko dângthukwah.

¹⁷Rohkomin atema roantangma nga a ahin ngama moatlemsen molahma khesok eka: atema nenâng rangkho wah rangpat patthuk era ngale too achhah heh amun sanpoatko munthuk eka; atema nenâng phhekchhah kohlahma nehung nâng khuhahthuk ehèn.”

¹⁸Moattat chhoante hehma mihnyan hehnâng are ngin heh thôkoh nungnung komin mihnyan hehma atenii nâng soam aroak hokpa achaanma mamjek tângwah.

¹⁹Jews khuthe Pisida diak Antiok hah ngale Ikoniem wah hokwah; thinma mihnyan heh thin demnâng rusiet lahma Pol nâng longma petwah, ngale riitah ngama thonghun lahma thinma hahdaang wah panlien nâng sietphekat wah.

²⁰Phumma chenthu putedâlemte heh ate tumlit khôanchep hokphumma ate toangchep lahma hahdaang nâng ngakwâng wah. Eredijâko Barnabas enii Dirbi hahnâng wângwah.

²¹Pol le Barnabas niima Dirbi nâng Nginkongsen pa phoangthô kolahma melâng mihnyan heh dijunte rãng dângthukwah. Erediko thin Lastra, Ikoniem, ngale Pisida wah Antiok nâng ngakwâng wah.

²²Pol le Barnabas niima putedâlemte hehnâng toangtang dangletma rongtêngtêng putedâlem rãng rîn akhah wah. Thinma hethô wah, “Nãngma ajahthem chêmchei heh dannekthien lihma Joban Hahsông thenâng wângmin.”

²³Thinma chentô Asâthem hehnâng khhepho phannang heh renthien rewah, ngale lephhek lechhah thangma rangsoam lahma ere mihnyan heh, thinma tok anaa eka Teso deknâng chohkoh wah.

²⁴Thinma Pisida diak pa dankhoam lahma Pamfalia nâng katwah.

²⁵Thinma Pirga nâng nginkongsen pa thôthien lahma Atalia nâng katwah,

²⁶ngale enângwah Antiok nâng jogari ma ngakkat wah, erethepa thinma tamo lahma Joban deknang ate mînchenchaan ma chensû chenrea ngama kohthien wah.

²⁷Chenthu thin Antiok nâng hokko, thinma Asâthem heh khôansiet lahma Joban ma thin demnâng chentô motah a erengin heh phangtang thôkoh wah, ngale Jews ledangte hehma putedâlem rãng Joban ma chenroh lemlaang kotah a erengin hehmin thôkoh wah.

²⁸Ngale enângwah putedâlemte heh demnâng thin rangwolo tôngthienwah.