Read Nocte Naga Moatlem 16 Bible Online

Moatlem 16 - Nocte Naga bible

Moatlem 16

¹Pol Dirbi le Listra ngenâng katwah, phumma ere ngenâng Kristan mihnyan wathe Timothi ngama songlahma dângwah. Ate nyong min Kristan dângwah, rohkomin atea Jews dângwah, phumma ate wapa Griik dângwah.

²Listra ngale Ikoniem wah Kristan mihnyan hehma Timothi asen ngama thôwah.

³Phumma Pol ma Timothi ate demnâng johsietchhoan rãng hunwah, erohwah atema Timothi nâng khoankhen niem hôankohwah. Chenrãngma ngako enângwah sôngte Jews phangtangma Timothi wapa Griik ngama jetphumma Pol ma Timothi nâng khoankhen niem hôankohwah.

⁴Thinma sumhah heh dânkhôamko moattat chhoante le khhepho phannang hehma Jeroselem nâng pattah niemarang heh chentô Asâthem hehnâng phoang hethô wah, ngale ere niemarang heh kepletma tongen ngama phoangthô kohwah.

⁵Erohwah Asâthem heh putedâlem nâng jêngdong dongwãng ngale jêngsen senwãng dângwah ngale putedâlemte hehmin jêngjah jêngjah rewah.

⁶Asâthôanju ma Asia diak ngenâng Joban nginkongsen pa lethôthuk dâng phumma thin Phergia le Galatia ngenâng katwah.

⁷Chenthu thin Mysia jatrii nâng hokphumma, thinma Bithania diak ngenâng wângrãng phungwah, rohkomin Jisu Juma thin enâng wãngthuk ho.

⁸Ephumma thin dekchah ngema Mysia hah dankat lahma Tros nâng katwah.

⁹Erejâ rangpenko Mesidonia wah mihnyan toanchep lahma atenâng rosep kalahma Pol ma thânkhewah, “Mesidonia nâng wãnglohma ninângmin mamchohsû wãng mênghi!”

¹⁰Pol ma erepa thânkhe rienrien ni Mesidonia nâng wângrâng cheplihma loatchhoan wah, chenrãngma ngako nima enângwah mihnyan hehnâng Joban Nginkongsen thôkohrâng Joban maroo ehi ngama jetwah.

¹¹Tros wah jogari ma chhoan lihma Samothrace nâng tintin katwah, ngale eredijâko Niepolis nâng katwah.

¹²Erekowah ni Filipien nâng katwah, Filipien pa Mesidonia diak kowah khebeng thôan Distik ngale alemthôan hah dângwah; ngale are hah pa Roman mihnyan heh sôngthin hah dângwah. Phumma eretheko ni melâng rangwo tôngthienwah.

¹³Pientông jâko josikah nâng Jews heh khôan lahma rangsoam thinthe etongthem a ngama thonghun lihma ni josi kahnâng katwah. Phumma erethe kowah dihiaknyu khôantongtah heh demnâng johtong kalihma thin demnâng thômîn wah.

¹⁴Thinkhuchhang wah ni nginkepte pa Thiatira hahwah Lidia dângwah, atea khetchek sengte dângwah. Atea Joban linlin nâng soam atôte dângwah, ngale Pol ma thôeka nginpa jetatrãng ate hung Teso ma laangkohwah.

¹⁵Atema ngale ate hum wah mihnyan hehma baptijem kepdiko, Lidia ma ate humnâng ni roowah, “Nema nganâng linlin Teso nâng putedâlemte ngama methonghun theko nga humnâng tongwãngren.” Ngale thinhumnâng wângrãng atema ninâng roatsep wah.

¹⁶Jâthe ni rangsoam thinnâng katko janchhônya wathe atea mihhaa dângwah erepa chohmînwah, phumma atema juchhih ngewah chaanchoh lahma khediko chenni dângmin a erengin heh jienthô lahma dângwah. Atema khediko dângwângmin ngin heh phoangthô kolahma ate tângte rãng ngun akem heh jahmõang chohbi kohwah.

¹⁷Ere janchhônya pa raklahma Pol le Silas nii diko junkhôamwah, “Are mihnyan niia achoang thôanwah tôngte Joban haa! Ate niima nekhu chenroh khope min a erengin heh thôkoh ehèn!”

¹⁸Janchhônya pumma Pol khoan lânpunroh are nginpa melâng rangwo rãng phoangjabwah, Phumma Pol nyahrãng khoanpun lahma litphong lahma ere juko ngatwah, “Jisu Krista mînko ngama nangnâng are janchhônya kowah loatchhoan o ngama chien eki!” Phumma ere sanpoat poatko janchhônya kowah jupa loatchhoan wah.

¹⁹Chenthu janchhônya tângte pumma thinma ngunbi lemkhô pa ahotu ngama jetphumma, thinma Pol le Silas nii lolahma nok atang ngale thôte jabte heh tânâng siethokwah.

²⁰Thinma Roman adong heh tânâng siethû lahma ngatwah, “Are heh a Jews, ngale thinma ni hahdaang pa jamsiet eka.

²¹Thinma nãng niemarang heh lelatnâng phoanghethô eka; Nia Roman mihnyan, ngale nima are niemarang heh jienkepmih.”

²²Ngale mihnyan phangtang Pol le Silas nii lelatnâng chepwah. Erediko Roman thôte jabte adong hehma Pol le Silas nii khet koakphe kolahma watthukwah.

²³Chhihmõang buhawat diko, thinma phâtek nâng sekwah, ngale phâtek bemte hehnâng kitkit sekthien en ngama chienwah.

²⁴Are nginpa tatphumma phâtek bemte hehma thinda tungko bãnglengdong khhek lahma akhen thôanko sekwah.

²⁵Rangpen mongtangko Pol le Silas niima rangsoam nungma Joban nâng rangsoamsê selahma dângwah, ngale thindemwah khhekritte ahan hehma atenii nâng jetat lahma dângwah.

²⁶Phumma lemlienma hahtiidong tiihû lahma phâtek pa hahkhenma chhihjâwah. Ngale lemlienma chentô kâsek heh laangjâ rewah, ngale khhekritte heh dekwah janru heh jânjâ rewah.

²⁷Phâtek bemte pumma kâsek heh laangjâ choan khewah, atema phâtek wah mihnyan heh huhchhoan themtah ngama thonghun lahma ate dãngpa toanlahma atedede ritpheritrãng phungwah.

²⁸Phumma Pol chaanmõang raklahma ngatwah, “Nangdede nekrit pherii, nikhu phangtang ako tonge!”

²⁹Phâtek bemte pumma wenphiaktan en ngama ngatwah, erediko ate humkhen nâng chhoanwãng lahma Pol le Silas nii dathongko khupjup wângwah.

³⁰Erediko atema rangsâ nâng loatsiet katlahma ngatwah, “Hethôte, ngama khope rãng chenni moatmin a?”

³¹Thinma dânthâng wah, “Nangma Teso Jisu nâng putedâlem o, erohkoba nang khomin epeo, ngale - ne humte tangkâ heh khomin epea.”

³²Erediko thinma atenâng Teso jabkhab pa thôkoh wah, ngale ere hum wah mihnyan heh phangtang nâng thôkoh wah.

³³Erejâ rangpen ere sanpoat poatko phâtek bemte pumma sietchhoan lahma thin mâmãn heh sâsiet kohwah; ngale ate erediko ate humte tangkâ heh phangtang lemlienma baptijem kepwah.

³⁴Erediko atema Pol le Silas nii ate humnâng sietwên lahma thinnâng phhekchhah kohwah. Ate ngale ate humte tangkâ heh nyahrãng khuhah nâhah dângwah, chenrãngma ngako thinma Joban nâng putedâlem wakeka.

³⁵Eredijâ rangkhahko Roman thôte jabte adong hehma, “Are mihnyan heh chhoanthuk en,” ngama phâtek bemte nâng thôkoh rãng sipâhi heh chienkatwah.

³⁶Ephumma phâtek bemte pumma Pol nâng thôkoh wah, “Roman thôte jabte adong hehma Silas nechhe chhoanthuk rãng ngin matkat era. Nechhe ade phumma tachhoan en, ngale khuhah nâhah chhoan en.”

³⁷Phumma Pol ma sipâhi sahhabko ngatwah, “Ninâng chenmin athe lechohlo komin thinma nok atang heh mako watthi - ngale nimin Roman jat jôba! eroh komin thinma phâtek nâng sek ehi. Ade phumma thinma ahuh chhama chienchhoan rãng hun ehia? Nia eroh ahuh chhama huhchhoan mih! Roman thôte jabte adong heh thindede kalahma chenchhoan thukhi.”

³⁸Sipâhi sahhab pumma erengin pa Roman thôte jabte adong hehnâng thôkoh wah; ngale chenthu thinma Pol le Silas nii Roman jat ngama tatphumma chei rewah.

³⁹Ephumma thinma kalahma Pol le Sailas niiwah map thâkatwah; erediko thinma phâtek wah loatsiet lahma thinhah kowah chhoanthuk wah.

⁴⁰Pol le Silas nii phâtek wah loatchhoan lahma Lidia humnâng katwah. Enâng thinma putedâlemte heh demnâng chohmîn lahma thinnâng hungdông ngin heh thôthien kolahma erehah kowah loatchoanwah.