Read Nocte Naga Moatlem 18 Bible Online

Moatlem 18 - Nocte Naga bible

Moatlem 18

¹Arediko Pol Athen wah chhoan lahma Korint hahnâng katwah.

²Enâng Akuila ngama wathe Jews mihnyan chohmînwah, ere mihnyan pa Pontas hahnâng chhatwah, ngale ate dihiak Prisila enii Itali wah bengka dângwah, chenrãngma ngako Chofa Kladius ma chentô Jews jat heh Rom wah chhoan en ngama chienwah. Phumma Pol thin demnâng chohmînrâng katwah,

³ngale thin demnâng johtong lahma johmoatwah, chenrãngma ngako, atenii rãngrãng Pol memin tembu hum hôanlahma bîchhahwah.

⁴Pientôngjâ roakweih atema Sanagog nâng chîthômîn hokwah, ngale Jews le Griik heh phangtang Joban putedâlemte rãng dângthuk hunwah.

⁵Chenthu Silas le Timothi nii Mesidonia wah hokphumma, Pol ma ate sanpoat chentôpa Joban Nginkongsen phoangthô lahma lolo chhoanthuk wah, ngale Jews hehnâng Jisu pa Misaia ngama thôkoh wah.

⁶Chenthu Jews hehma ate nginlekep thangma atenâng nginchhih ngat phumma, Pol ma ate khet wah bum heh fidoh lahma thinnâng ngatwah, “Nekho lepe medang enko, erepa nedede junmaba lepe dangeken! Erepa ngamet dangmah. Ade phumma nga Jews ledangte heh tânâng echhoan ang.”

⁷Ephumma Pol thin tâwah chhoan lahma Joban nâng soamte Jews ledangte mînpa Titius Justus humnâng sôngkat wah; erewa humpa Sanagog kêko dângwah.

⁸Sanagog wah khhepho wathe ate mînpa Krispas ngale ate humte tangkâ hehma Teso nâng putedâlem wah; ngale Korint wah ajahthem mihnyan hehma Joban ngin tatlahma putedâlem lahma baptijem kepwah.

⁹Penthe nâng Teso ma atenâng ngalahma Pol ma thânkhewah, “Nekchei, Joban nginpa mihnyan hehnâng phoangthô koroh reo, ngale ere phoangthô kohpa nekjek,

¹⁰chenrãngma ngako nga nang demko etongang. Henmemin nangnâng tawat mahho, chenrãngma ngako, are hahko nga mihnyan jahmõang tonga.”

¹¹Erohwah erehahko mihnyan hehnâng Joban ngin heh phoanghethô lahma Pol pâthe khathe tongwah.

¹²Phumma chenthu Galio pa Akaia wah Rom hah Govono dângpoatko, enângwah Jews heh khôan lahma Pol loatwah, ngale thinma ngoangthun thinnâng siethû lahma sekhamwah.

¹³Thinma ngatwah, “Are mihnyan pumma nãng niemarang junko ledang mihnyan hehnâng Joban nâng rangsoam pa phoang hethôeka!”

¹⁴Pol ma jabrãng ngatthuko Galio ma Jews hehnâng ngatwah, “Chenni komin achhih molahma ne Jews hehma sekham dângnomako, ngama ne Jews hehma sekham eken ngin hehmin chenjetat tah.

¹⁵Phumma arepa jabkhab ngale mihnyan min ngale ne niemarang junko chhiakmîn dâng phumma nededema phenthômîn en. Ngama arerãngrãng heh phenthô komah!”

¹⁶Ngale atema ngoangthunthîn hum kowah junloatwah.

¹⁷Phumma thinma Sanagog kowah khhepho ate mînpa Sosthen lolahma ngoangthun thin hum thakhoko watwah. Rohkomin erejunko Galio roanchemin chêmpatriiho.

¹⁸Korint wah putedâlemte heh demnâng Pol melâng rangwo johtongthien lahma Prisila le Akuila demnâng jogari ma Siria nâng katwah. Sencheria wah jogari ma chhoan mako atema toamsem tah junko ate kho lokchhunwah.

¹⁹Thin Ifisus nâng hokdiko, Pol ma Prisila le Akuila nii Ifisus nâng phethien lahma chhoanwah. Phumma ate Sanagog nâng kalahma Jews heh demnâng thômîn katwah.

²⁰Enâng wah mihnyan hehma ademin johtong thienhi ngatwah, rohkomin Pol nyoak ho.

²¹Atema chhoan nemma thinnâng thôthien kohwah, “Joban hungsi medang ako, nga nekhu tânâng engak hûrâng.” Ngale erediko ate Ifisus wah jogari ma chhoanwah.

²²Chenthu ate Kasaria hokdiko Jeroselem nâng wãng lahma Asâthem hehnâng rânjab wângwah, ngale erediko Antiok nâng katwah.

²³Enâng poatthe tôngthien diko chhoan lahma Galatien le Phergia ngenâng kalahma enângwah putedâlemte hehnâng rîn akhah kalahma thinhung dôngsiet wah.

²⁴Ere sanpoatko Alexendra nâng chhatwah Jews wathe atemin pa Apolo Ifisus nâng katwah. Atea ngin ariet jab nâng asen ngale atema Joban nyapraangmin nyahrãng jet dângwah.

²⁵Atenâng Teso nginpa senthemthem thôko lahma dângwah, ngale atema nyahrãng hung arin kohlahma Jisu nginpa mihnyan hehnâng phoangthô kohwah. Rohkomin atema Jon ma koheka baptijem pelolo jetwah.

²⁶Atema Sanagog nâng lechei thangma thôkoh wah. Phumma chenthu Prisila le Akuila niima ate ngin pa tatlahma thinhumnâng sietwên lahma atenâng Joban nginpa senthemthem thôkoh wah.

²⁷Ephumma Apolo Akaia nâng katrãngma chepwah, erohwah Ifisus wah putedâlemte hehma Akaia wah putedâlemte nâng Apolo senthemthem tãngroo en ngama sitiraang lahma atenâng kohwah. Chenthu ate Akaia nâng hokphumma enângwah Joban mînchenchaan junko putedâlemte dangtah hehrang nyahrãng toatchoh dângwah.

²⁸Mihnyan heh chentô mako ate Jews heh demnâng nyahrãng chaanchhiakmîn lahma Jisu pa Misaia jôba ngama atema Joban nyapraang wah khesok lahma Jews heh jienchiakwah.