Read Nocte Naga Moatlem 2 Bible Online

Moatlem 2 - Nocte Naga bible

Moatlem 2

¹Pentikos rangwojâ hokko, chentô putedâlemte heh phangtang thethenâng roamkhôan wah.

²Phumma lemlienma pôngchaan pônghokko lînwah rãngrãng rangkho nâng linlahma dângwah, ngale ere rahlin tahpa thin khôantongtah humkhenwah hehma anga ngama tatwah.

³Erediko thinma wentheli rãngrãng khewah, ngale erepa phoangpu lahma thin chentô nâng khemsahtiet wah.

⁴Thin anga ngama Asâthôanju chohwah, ngale Juma thinnâng chenroh jabthuk eka eroh thinma mihhanjat jabma jabwah.

⁵Ere sanpoatko Jeroselem nâng Jews mihnyan songlahma dângwah, ereheh a rangkhen kowah chentô diak akan wah Joban nâng rangsoamte Jews heh khôanhok wah.

⁶Phumma chenthu thinma are lîntîn heh tatphumma, mihnyan heh jahmõang khôanhok wah. Thin nyahrãng bâritwah, chenrãngma ngako, thin chentôma putedâlemte heh nginpa thinjabma jablahma tatwah,

⁷Nyahrãng patrit ngale bârit rewak lahma thinma ngatwah, “Are jabte mihnyan heh a Galili wah mihnyan!

⁸Phumma nãngkhuma nãng jabma jablahma chenroh jientat ekia?

⁹Nãngkhua Partha, Media, Ilam; Misopotomia, Judia, Kapadokia’; Pontas ngale Asia wah,

¹⁰erediko Phigia, Pamfalia, Igip, Kren hah kêko wah Libia wah. Ngale khaka heh Rom wah,

¹¹Jews ngale Jews ledangjat wah Juda jetrãng litdângte heh, ngale nangkhu khaka heh Kret ngale Arabia - eroh akomin Joban ma nyahrãng moatlem dong moekapa nãngkhu chentôma nãngjabma jablahma tateki!”

¹²Nyahrãng bârit ngale mokrit nungma, thindede chhienmîn wah, “Arepa chenni dangeka?”

¹³Rohkomin khuka hehma putedâlemte hehnâng dûmmek nungma, “Are mihnyan heh khemma mok eka!” ngatwah.

¹⁴Erediko dijunte ahan echii wathe demko Piter toanchep lahma chaanmõang raklahma mihnyan hehnâng ngatwah: “Lemruchha Jews heh ngale Jeroselem nâng sôngte chentô heh, ngangin jetat tanha, ngale arepa chenni dangeka erepa ngama nenâng thôkoh a.

¹⁵Nema thonghun eken rãngrãng, are mihnyan heh khemjok lahma mok dangmah, athângheh rangkhah wanekhu sanpoat bengdang.

¹⁶Arepa, mõng Joil pa jabtah pa dangeka:

¹⁷Joban ma ngaeka: ‘Athôan rangwo ko ngama aroh emo ang, Ngama Nga Jupa chentô khohnâng ekoh ang. Nechhu nechha hehma ngangin pa ephoang thôa; Roandông janchhô paangmih hehma thânkhe ere en, ngale teka wiku nekhuma metmãngnâng emãngen.

¹⁸Ngale ngahaa hehnângmin dihiak dela anga nganâng, ere rangkuhko ngama nga Ju pa thinnâng ekoh ang, ngale thinma nga nignpa ephoang thôa.

¹⁹Ngama rangkho nâng patritli emo ang ngale hahtokkhoh nângmin bâritli emo ang. Erediko hei, wen, ngale wenkhuhnyek ehonga;

²⁰San pa anyekjâ erea, ngale dâ min hei rãngrãng echekjâa, erepa Teso mîndong lahma katjâ rangwo dong hokmako edanga.

²¹Ngale, henhenma Teso nâng tok anaa lahma tongeka ereheh kho epea.’

²²“Lemruchha Jews heh! are nginpa jetat tan en, Nazarat wah Jisu nâng Joban chaanwin ngama nenâng ate junma Joban ma chentô patritli moatlem ngale bâritli heh molahma khesokthen. Erepa nedede maminjet, chenrãngma ngako, ereheh netâko aretheko dângwah.

²³Joban ma mongthem junko atema Jisu ne deknâng loatthukrãng khemama themawa wah; ngale papi mihnyan wathema chohsû lahma nema Jisu bãngphak khohko rittekwah.

²⁴Rohkomin Joban ma ritwah ngakhinsiettah, ngale ritchaan kowah loatsiettah, chenrãngma ngako ritchaan pumma atea phâtek nâng khhekritte rãngrãng leta khhekthien min.

²⁵Chenrãngma ngako, Devit ma ate junma ngatwah, ‘Ngama sanpoat roakweih nga mathahko Teso khe ekang; atea ngakeko, ngale erohwah nga tachêmsiet mahhang.

²⁶Ngale nga nyahrãng rinroan ekang, ngale nga jabkhab hehmin khuhah nâhah jabekang. Ngale Nga a hei angem mihnyanjô medang angkomin, Joban nâng putedâlem lekma etongang,

²⁷chenrãngma ngako, nangma rit amah thintheko nga lephethien min; ngale nangnâng senthemthem putedâlemte haapa mangruk khenko lesãnjâ thukmin.

²⁸Nangma roandông chohthin lemkhôpa nganâng khesokthang, ngale nanga nga demnâng dângjunko nga khuhah ekang.’

²⁹“Ngalemruchha heh, Ngama nenâng nãngte nãngwa Devit Lowang nginpa loatthôkoh a. Atemin riilahma mangpa bînkatwah, ngale ate mangruk pa athâng hehmin nãngdemko tonga.

³⁰Atea mõng dângwah, ngale Joban ma atenâng chenni toamsem tah a erepa atema ajet dângwah: Joban ma Devit chhuchha hehwah Devit dangtah rãngrãng wathe Lowang rãng hôanmin ngama toamsêm wah.

³¹Joban ma khediko chenni rêmin a erepa Devit ma khewah, ngale atema Misaia ngakhînwâng junma jabwah, ‘Atea rit amah thintheko thinphethien mah; ate phoangpa mangruk khennâng sãnjâmah.’

³²Joban ma are Jisu pa ritwah ngakhinsiettah, ngale are linlin nginpa nikhu phangtang mitma khelihma thôeki.

³³Atea ritwah ngakhin lahma Joban, ate Wa dekchahko tongwãngtah, ngale Joban ma toamsem tah Asâthôanju pa atema chohtah. Athângwah nema chenni khe eken a, ngale chentat eken a, ereheh atema nãngkhu khohnâng hînhô kohkat ehi.

³⁴Rangkhethung nâng wângte pa Devit dângwah dangmah; Devit ma arohba ngatwah, ‘Teso ma nga Teso nâng ngaeka: Nga dekchahko tongo

³⁵Ngama nangran heh nang daphâ khenko nangda nekthinrãng mahôan hôankoh kiko ako tongo.’

³⁶“Isrial wah mihnyan heh chentôma are Jisu nema rittektet pa, Joban ma Teso ngale Misaia rãng hôaneka ngama metkep ejet en!”

³⁷Chenthu mihnyan hehma arepa tatphumma, thinhung nâng nyahrãng keklahma Piter le moattat chhoante hehnâng ngatwah, “Pho anaa heh nima chenni rêmin a?”

³⁸Piter ma thinnâng ngatwah, “Nekhu phangtang mâmâ papmoatlem heh thinphe letma Jisu Krista mînko baptijem kepen, erohkoba nepap heh map tâchohmin; ngale erediko nema Joban wah Asâthôanju hînhô echoh en.

³⁹Chenrãngma ngako, Joban ma ate toamsem pa nekhu nângmin, ne chhuchha hehnângmin, ngale hahtaang nâng sôngte mihnyan hehnângmin kohrãng semwah - nãng Teso Joban ma aterãng rooeka mihnyan heh chentô nâng rangkoh rãng sem eka.”

⁴⁰Piter ma thinnâng roatsep wah, ngale lihân jabkhabmin ajahthem thôko lahma ngatwah, “Are mihnyan chhih heh khohnâng hûera chêmchei hehwah nekhu dede pesietrii en!”

⁴¹Jahmõang mihnyan hehma ate nginko putedâlem lahma baptijem kepwah, ngale ere jâko hahjatrem mihnyan ma baptijem keplahma thin demnâng johdângwah

⁴²Ere mihnyan hehma thin sanpoat pa moattat chhoante hehma hethôeka heh helahma chhoanthuk wah, ngale thin demnâng roamtong, roamphhek chhah, erediko rangroamsoam relahma chhoanthuk wah.

⁴³Moattat chhoante heh junma ajahthem patritli ngale bâritli moatlem heh moatwah, ngale phangtang Joban ran cheichei dângwah.

⁴⁴Chentô putedâlemte heh roantang aroam roammajû dângwah, ngale thinthiak chentôpa phangtang aroam roamma kepwah.

⁴⁵Thinma thin pitthin jolem ngale chhahkhem heh sãng lahma ngunpa thintungko henma chentôlem eka eroh chîphenkep wah.

⁴⁶Rangwo roakweih Rangsoamhum nâng chîchohmîn wah, ngale thinhum hehnâng khuhah nâhah phhekchhah pa roamchhah chîrewah,

⁴⁷Joban nâng rô rewakwah, erediko chentô mihnyan hehma thinnâng senchoh lahma dângwah. Ngale rangwo roakweih khopete mihnyan heh Teso ma thin demnâng chîjoh roamsiet hokwah.