Read Nocte Naga Moatlem 22 Bible Online

Moatlem 22 - Nocte Naga bible

Moatlem 22

¹“Ngalemru Jews heh, ngama nenâng ngajunma thôkoh ekapa jetat tanha!”

²Chenthu mihnyan hehma thinnâng Hibru jabma thôkoh tatphumma, mihnyan heh bâmbâm kihtôngwah; ngale Pol ma thinnâng thôkoh wah:

³“Nga a Jews, Kilika wah Tarsus hahnâng chhatwah, phumma are Jeroselem hah kowah Gamaliel khenko nyapweihte danglekma dông aloatwah. Ngale ngama nãngte nãngwa heh Niemarang heh nyahrãng chaankoh lekma hewah, erediko thejâ arekowah nekhu rãngrãngjô ngamin Joban nâng nyahrãng hungkoh lekma soam atôte dângwah.

⁴Arerãngrãng Jisu dijunte mihnyan hehnâng ngamemin nyahrãng chêmthukwah. Ngama dihiak dela phangtang lokhhek lekma phâtek nâng sekwah.

⁵Arepa soam aroakte adongthôan ngale ngoang awang heh chentôma ajet ngama toangtang thôekãng. Thinma nganâng nãnglemru Damaskas wah Jews hehnâng nyapraang raanglahma kohthang, ephumma ngama Damaskas wah putedâlemte heh lokhhek lekma Jeroselem nâng ngaksietwên lekma chêmsiet rãng Damaskas nâng katwah.

⁶“Nga Damaskas nâng hûka nemnemko, rangngih mongko rangkho wah wenphiakdong nga tumlitko phiakkat wah.

⁷Nga hahko kôanjâ lekma nganâng ngat jabkhab tatwah, ‘Sol, Sol! nangma nganâng chenrãngma chêmsiet ehanga?’

⁸Phumma ngama thôngphâ wah, ‘Teso, nang hen a?’ Eko atema dânthâng wah, ‘Nga Nazarat wah Jisu, nangma chêmsiet ehangpa.’

⁹Nga demwah mihnyan hehma wenphiak pa khetah, phumma thinma nganâng ngathang jabkhab pa tat ho.

¹⁰Phumma ngama chhienwah, ‘Teso, ngama chenre min a?’ eko Teso ma nganâng ngatwah, ‘Toanchep lohma Damaskas nâng wãngo, enâng Joban ma nangnâng chenni moatthuk hun eho ereheh phangtang ethôkohho.’

¹¹Phumma wenphiak dong pumma phiak junko ngamit doakjâwah, erohwah nga lemru hehma dekko sietlahma Damaskas nâng sietwênwah.

¹²“Ere hahko mihnyan wathe ate mînpa Anania dângwah, atea Joban nâng hungkoh lahma soam atôte, ngale nãng Niemarang hehmin senthemthem kepte, ngale enângwah sôngte Jews hehmemin atenâng nyahrãng choangpe lahma dângwah.

¹³Ate ngatânâng katwah, ngale ngakeko chepka lahma ngatwah, ‘Sol, nangmit pumma thengak jienkheo!’ Ere sanpoat poatko ngama jienkhe lekma atenâng sokwah.

¹⁴Atema ngatwah, ‘Nãngte nãngwa heh Joban pumma atema chenni huneka erepa jetrãng ren eho, ngale Joban haa toangtang thôanpa kherãng ren eho, ngale atema jabkhab rahjab pa chentat a ngama ren eho.

¹⁵Nangma chenni khetoh a ngale tattoh a heh chentô mihnyan nâng ate hâkhirãng ephoang thôkoh o.

¹⁶Phumma chenni lekbemtu ekoa? toanchep lohma baptijem kep o, ngale atenâng rangsoam lohma nang pap heh sâsiet o.’

¹⁷“Nga Jeroselem nâng ngakkatwah, ngale Rangsoamhum nâng rangsoam thuko, ngama thânkhewah,

¹⁸eko Teso ma nganâng ngalahma khewah, ‘Sitsiak Jeroselem wah loatchhoan o, chenrãngma ngako, enângwah mihnyan hehnâng nangma ngajunma ngin thôkoh eko heh thinma lekepmin.’

¹⁹Phumma ngama dânthâng wah, ‘Teso, thinma senthemthem ajet, ngama Sanagog nâng hûlekma nangnâng putedâlemte heh lokhhek ngale buh awatwah.

²⁰Ngale chenthu nang nginthôte Stifen ritphe poatko, ngadede min eretheko Stifen ritphete heh khet heh bemko lekma Stifen ritphe sûlekma dângwah.’

²¹Phumma Teso ma nganâng ngatwah, ‘chhoan o, ngama Jews ledangte heh tânâng ataangnâng chienchhoan e,’ ”

²²Pol ma aroh loatjab mako mihnyan hehma ate nginko jetat wah; ere diphumma chaanchaanma rakwah, “Ate tânâng nek hû en! Aritphe re en! Ate nekchen hintuka!”

²³Thin khet akhu heh petphe ngale rangkho nâng bum heh rêmwên lahma rakwah.

²⁴Phumma Roman sipâhi sahhab pumma ate sipâhi hehnâng Pol sipâhi heh tôngthin nâng sietkat rãng chienwah, ngale Jews heh ate lelatnâng aroh chenrãngma rakeka ngama jetloat rãng atenâng wat en ngama chienwah.

²⁵Rohkomin chenthu sipâhi hehma Pol nâng watrãng khhekpoatko, eretheko wah chepte sipâhi sahhabko Pol ma ngatwah, “Nema Roman mihnyan ko chennângjô lethenâng tawat en a?”

²⁶Chenthu sipâhi sahhab pumma erengin pa tatphumma, ate noma sahhabdong tâko wãng lahma ngatwah, “Nangma chenre ekoa? Ire pa Roman mihnyan!”

²⁷Ephumma sahhabdong pa Pol tânâng kalahma atenâng chhienkatwah, “Nganâng thôkoh hang, nanga Roman mihnyan ne?” “Dang ang, nga Roman mihnyan,” ngama Pol ma dânthâng wah.

²⁸Sahhabdong pumma ngatwah, “Ngamin ngun jahmõang kohlekma Roman mihnyan rãng dangekang.” Phumma Pol ma dânthâng wah, “Nga achhat mejû Roman mihnyan,”

²⁹Phumma Pol nâng ngin chiente mihnyan pa lemlienma tokdinâng ngakthenwah; ngale sahhab pumma Pol pa Roman mihnyan ngale atema Roman mihnyan pa janruma khhek ekang ngama jetlahma patritwah.

³⁰Sahhabdong pumma Pol nâng Jews hehma chenni junko sekham eka ngama senthemthem jethun wah; erohwah adijâko atema Pol dekwah janru pa janphe lahma Soam aroakte adong ngale ngoan awang heh phangtang khôansiet wah. Erediko atema Pol siethû lahma thinmako chepthuk wah.