Read Nocte Naga Moatlem 23 Bible Online

Moatlem 23 - Nocte Naga bible

Moatlem 23

¹Pol ma ngoang awang hehnâng thongsûkat lahma ngatwah, “Ngalemru Isrial mihnyan heh! Thejâ tôko ngahung sâpoangpoang danglekma Joban mathahko nyãn ekang.”

²Anania Soam aroakte adongthôan pumma Pol tâwah chepte hehnâng Pol thunko watrãng chienwah.

³Pol ma atenâng ngatwah, “Joban ma nangnâng metkep ewat ho - nanga rongpoma pôhutwah tukthen rãngrãng! Nanga reko nganâng Mosa Niem junko athe loatrãng tongeko, rohkomin nangma nganâng watrãng chien ekopa nangma Mosa Niem lelatnâng moeko!”

⁴Phumma Pol tâwah mihnyan pumma Pol nâng ngatwah, “Nangma Joban nâng Soam aroakte adongthôan thãjõ eko!”

⁵Phumma Pol ma dânthâng wah, “Ngalemru Isrial mihnyan heh, Ngama atea Soam aroakte adongthôan ngama jetmek. Joban nyapraangma ngaeka, ‘Ne pênte khhepho phannang hehnâng achhih lengamin.’ ”

⁶Chenthu Pol ma ngoangthun rãng khôanhû eka heh khakapa Saduki ngale khakapa Farasi ngama jetloat phumma, atema ngoang awang hehnâng ngatwah, “Ngalemru Isrial mihnyan heh! Nga a Farasi, ngale ngawa min Farasijô dângwah. Thejâ ngama ritwah ngakhîn min ngama putedâlem junko sekham eha!”

⁷Atema arepa ngat rienrien, Farasi le Saduki heh mênmîn wah, ngale mâmâ khukhu dangjâwah.

⁸(Chengrãngma ngako, Saduki hehma ritwah ngakhin mah, ngale Joban ngintatte erediko Ju min aho ngatwah; rohkomin Farasi hehma wanrem latnâng putedâlem wah.)

⁹Phumma nyahrãng chaanrakmîn lahma, Farasi hehwah Niemarang hethôte hehma tatwah ngale thinma toanchep lahma ngatwah: “Nima are mihnyan ko chenjô achhih chohkhemih! Linlinjô Juma komin ba Joban ngintatte hehma akomin atenâng lâthô kotah!”

¹⁰Nginchhiakmîn jenjenwah nyahrãng chaanmênwah, phumma sipâhi sahhab pa Pol khihkhih nyahnyah mahôan waklah o ngama nyahrãng patritwah. Ephumma ate sipâhi hehnâng mihnyan heh chhangko kaletma thinta wah Pol sietka letma sipâhi heh tôngthin nâng sietwênrên ngama chienwah.

¹¹Erejâ rangpenko Pol tâko Teso chepka lahma ngatwah, “Nekchei! Nangma nga nginpa are Jeroselem hahko lâthô kotoh, ngale nangma arerãngrãngjô Rom nângmin thôkohmin.”

¹²Eredijâ rangkhahko Jews heh roamchohmîn lahma Pol ritphe rãng thômîn wah. Thinma Pol marit ritphe chenmin lejok phhekchhah min ngama toamsêm wah.

¹³Arepa roakbelii noma ajah mihnyan roamkhôan lahma sêmwah.

¹⁴Erediko thinma Soam aroakte adong ngale khhepho phannang heh tânâng hûlahma ngatwah, “Nima Pol marit ritphe chenmin lejok phhekchhah min ngama toamsem eki.

¹⁵Athângheh ne ngoang awang hehma Roman sipâhi sahhabdong thôanko Pol netânâng chensiet katra ngama ngin matkat en, ngale nima Pol nginpa senthemthem jet huneki ngama diapnga letma matkat en. Phumma ate anâng hokkat mako nima lemnâng tangritphe e.”

¹⁶Phumma are themawa wak ekapa Pol hiak pumma leptatwah; ephumma atema sipâhi heh tôngthin nâng kalahma Pol nâng thôkoh wah.

¹⁷Erediko Pol ma sipâhi sahhab wathe roolahma atenâng ngatwah, “Are paangmih pa sahhab dongthôan tâko sietwênkoh; atema chenni akomin thôkohthin tonga.”

¹⁸Sahhab pumma dongthôan tâko sietwên kolahma ngatwah, “Akhhek reki Pol pumma nga roolahma are paangmih pa nâng tânâng sietwênkoh ngama chien ehang, atema chenni komin nangnâng thôkohthin tonga.”

¹⁹Sahhabdong thôan pumma ate dekko lolahma ate demko sietchhoan lahma chhienwah, “Nangma nganâng chenni thôkohthin tonga?”

²⁰Paangmih pumma ngatwah, “Jews thôte jabte hehma Pol ngoang awang heh tânâng sietkatro ngama nang ngewah nènep thâwângrãng jutthômîn eka, ngoang awang hehma Pol junma senthemthem jet huneki ngama ediap jabwak a.

²¹Phumma nangma thin ngin nekkep, chenrãngma ngako roakbelii noma ajah mihnyan hehma lemko huhtong lahma etangbem a. Thinma Pol marit ritphe chenmin lejok phhekchhah min ngama toamsem eka. Ngale athângheh thinma ritphe rãng lâcheptah, erediko nâng ngin bemwak eka.”

²²Sahhab pumma ngatwah, “Nangma are nginpa nganâng thôkotek ngama hennâng min nekthôkoh.” Ngale atema paangmih pa chien chhoanwah.

²³Erediko sahhabdong thôan pumma ate dikowah sahhab wanii roolahma ngatwah, “Chânii sipâhi Kasaria nâng katrãng chep achã thuk en, thindemko Moknâng chhangte sipâhi roakengit, ngale pah semte sipâhi chânii chepthuk letma, thejâ rangpenpen wanekhu sanpoatko jâkhoam en.

²⁴Pol chhângrãngmin Mok wanthe lemkoh en, ngale Govono Filex tânâng senthemthem hûsietkat en.”

²⁵Erediko sahhab pumma siti aroh raanglahma kohwah:

²⁶“Adongthôan Govono Filex, arepa Kladius Lisias ma raangki: Khebeng thôanko Salem.

²⁷Jews hehma are mihnyan pa lolahma, ritphe nemwah. Phumma ngama atea Roman mihnyan ngama lepjet lekma, nga sipâhi heh demnâng kalekma pepâng katwah.

²⁸Thinma chenni junko sekham eka erepa jethun lekma, ngama thin ngoang awang heh tânâng sietkatwah.

²⁹Ngama atea lânrit pheroh, ba phâtek nâng lânsekroh chhihmo lahma chohkhemek; atenâng sekham ekapa thindede Niemarang heh junko sekham wakeka.

³⁰Ngale chenthu mihnyan hehma ate ritphe rãng themawa pa chohthôkoh phumma, ngama lemlienma nang tânâng chienkat erâng. Ngama ate sekhamte hehnâng nang tâko sekham ka en ngama lâthô kotek.”

³¹Sipâhi hehma sahhabdong thôan ngin keplahma erejâ rangpenpen ko Antipatris nâng lanhuroh Pol sietkatwah.

³²Eredijâko dakhoam sipâhi katah heh thin tôngthin nâng ngakwâng wah ngale Moknâng chhang lahma katah sipâhi heh Pol demnâng johkat thukwah.

³³Thinma Pol Kasaria nâng sietkatwah, sitipa Govono nâng chohkoh wah, ngale Pol min atenâng chohkoh wah.

³⁴Govono ma sitipa weih lahma Pol nâng nanga henjaa wah a ngama thôngphâ wah. Phumma chenthu Pol a Kilikia jaa wah ngama jetphumma,

³⁵atema ngatwah, “Chenthu nang sekhamte heh mehûkhoam theko nang nginpa ejetattan e.” Erediko atema Pol abemte heh demnâng Govono humko chenbemwak a ngama chienwah.