Read Nocte Naga Moatlem 24 Bible Online

Moatlem 24 - Nocte Naga bible

Moatlem 24

¹Jâbangâ diko Soam aroakte adongthôan Anania pa Kasaria nâng ate demko khhepho phannang heh ngale nginpatte wathe ate mînpa Tertullus sietlahma katwah. Thinma Govono Filex tâko hûlahma Pol lelatnâng jabwah.

²Ephumma Pol humkhen nâng roolahma Tertullus ma ate lelatnâng aroh loatngatwah: “Adongthôan Govono! Nangma senthemthem pen lohma ajahthem rangpâ mêmoma songeki, ngale ajahthem achhih heh litsiet lohma nãngdiak rãngma asenli mowên ero.

³Nima arepa chentô thenâng ngale roantang aroh chendanga ngama huneki, ngale nima nangnâng nyahrãng dangkoh a ngaeki.

⁴Ngale ngama nang sanpoat kowah ajahthem kep hunmek, rohkomin ngama are amãnchha nginthô ekãngko mamjetat mêngo ngama rosep eki.

⁵Nima are mihnyan pumma nyahrãng acheili hahroksiet lahma kheki; atema rangkhen wah Jews hehnâng hahjamsiet eka, ngale atea Nazaren heh khoko adong.

⁶Atema Rangsoamhum pa ngeksietrãng huneka, ephumma nima lokhhek eki.

⁸Nangma are mihnyan ko methongpha oko, nima atenâng sekham eki heh nang dedema atewah echohjet o.”

⁹Jews heh phangtang johrû wah ngale erengin pa phangtang toangtang ngama ngatwakwah.

¹⁰Erediko Govono ma Pol nâng jab o, ngama thakkat kolahma Pol ma jabwah, “Ngama ajet nanga are diakko melâng rangpâ nginpatte lâdangtoh, erohwah ngama rinroan lekma nang mathahko ngajunma jabekang.

¹¹Nangdede mejô ejet o, nga Jeroselem nâng rangsoam rãng katekwah echhi jânii noma ajah madang eka.

¹²Jews hehma Rangsoamhum nâng hen demnâng min chhiakmîn lekma khemah thang, ngale Sanagog nângmin ba Jeroselem hahko chenre thenângjô jamsiet lekma khemahthang.

¹³Ngale thinma athângheh nang tânâng nga lelatnâng jabeka hehmin are junko sekham eki ngama takhesok mahho.

¹⁴Ngama nangnâng arepa thôkoh eki: Ngama nãngte nãngwa hehma soamtô tah Joban ko soamtô ekangpa thinma ledangli ngama ngaeka. Ngale Mosa ma raangtah Niemarang ngale mõng hehma raangtah chentô nâng putedâlem ekang.

¹⁵Ngamemin Joban nâng are mihnyan hehma putedâlem eka rãngrãngjô putedâlem ekang, achhih asen, phangtang ritwah ngakhînmin, ngama putedâlem ekang.

¹⁶Erohwah ngama roantang chenpa Joban ngale mihnyan rãng asen a erepa moatrãng latrii ekang.

¹⁷“Phumma Jeroselem nâng ajahthem rangpâ lehû thangma tôngdiko, enângwah ngalemru hehnâng ngun katkoh erediko soam aroak rãng katwah.

¹⁸Ngama arepa moatthuko thinma Rangsoamhum ko lepkhe wakthang erepa ngama seksâsiet niem pa tâhôan diko lepkhewah. Ngale ereko mihnyan min ajah dangho erediko hahjam tijammin dangho.

¹⁹Rohkomin Asia diakwah Jews heh ba khuthe dângwah; thinma nganâng chenni komin sekham thin metong ako thindede hûlahma nema thahko sekham minwah.

²⁰Roh akole ngoang awang heh tâko chenni nâng thelekma khethanga erepa are mihnyan hehma chenthô tan a -

²¹Ngama thinmako cheptek poatko khapthe loloba hongjabtek: ‘Ngama ritte heh ngakhînmin ngama putedâlem junkoba thejâ nema sekham eha.’ ”

²²Filex ma Jisu junma nginpa khema thuma senthemthem jetlahma dângwah, erohwah atema ngoangthun pa jeksietwah. Atema thinnâng thôkoh wah, “Chenthu sipâhi sahhabdong thôan Lisias mehû theko,” “Ngama ne nginpa ephensiet ang.”

²³Phumma atema Pol bemte sipâhi sahhabko Pol sipâhi hehnâng bemthuk rãng chienwah, rohkomin lekhak thangma thien en, ngale atema chenni huneka ereheh ate lemruchha hehma kephokkoh pemin nektang en.

²⁴Jâthe jânii diko Filex le ate dihiak Drusila nii katwah, phumma Drusila pa Jews dângwah. Atema Pol rooka thuk lahma Pol ma Jisu Krista nâng putedâlem ngin thôkoh eka heh jettatwah.

²⁵Phumma Pol ma toangtangma song ngin, mâmâ dedema hung môngsiet ngin, erediko ahokmin Rangwo ko Joban ma hen mihnyan ma chhih asen motah a ereheh ren ngin thôkoh phumma, Filex chei lahma ngatwah, “Nang athângheh tachhoan o. Ngama chenthu sanpoatchoh ekanga eko thengakrooe.”

²⁶Ngale Pol ma ngunwah ekoh thêmhang ngama thonghun lahma Filex ma Pol roowah; ngale Pol wah ngun machoh lek o ngama Filex ma Pol depdep roothuk lahma Pol demnâng ngin chithômîn wah.

²⁷Rangpâ pânii lien diko Porkius Fistus pa Filex litko Govono dângwah. Phumma Jews hehma chensen chohhang ngama Filex ma Pol phâtek nâng seklahma phethien wah.