Read Nocte Naga Moatlem 25 Bible Online

Moatlem 25 - Nocte Naga bible

Moatlem 25

¹Fistus pa Govono danglahma jârem diko, ate Kasaria wah Jeroselem nâng wângwah,

²Eko Soam aroakte adong heh ngale Jews khhepho phannang hehma Pol lelatnâng ngin kephokwah. Thinma Fistus nâng roatsep wah

³thinma Pol Jeroselem nâng chenkara ngama roatsep wah, chenrãngma ngako thinma lemko tangritphe rãng phungwah.

⁴Fistus ma dânthâng wah, “Pol Kasaria wah phâtek nâng khhekthien eki, ngale ngamin enâng sitsiak ngakwângmin.

⁵Atema chenkomin mechhih motahko ne khhepho phangnang heh nga demnâng Kasaria nâng johwâng lahma chensekham wãngra.”

⁶Fistus thin demnâng jâesat ba jâechhi rãng johtôngthien lahma Kasaria nâng ngakwâng wah. Eredijâko ate tôngthinko nginpatrãng tonglahma Pol thintâko siethok rãng chienwah.

⁷Pol hokphumma, Jeroselem wah hûtah Jews heh Pol tumlit cheplahma ate lelatnâng nyahrãng chaan sekham wah, rohkomin thinma are junko sekham eki ngama khesokthin thelahma aho dângwah.

⁸Phumma Pol ma atedede junma jabwah: “Ngama Jews Niemarang lelatnâng themomek, ngale Rangsoamhum lelatnâng min momek, erediko Roman Chofa lelatnâng min momek.”

⁹Phumma Fistus ma Jews hehma chensen chohhang ngama, atema Pol nâng chhienwah, “Nangma Jeroselem nâng kalohma are nginpa nga demnâng phensiet hun ekole?”

¹⁰Pol ma dânthâng wah, “Nga a Chofa nginpat thinko chep ekang, areko jôba nga nginpa thômînmin. Nangdede memin senthemthem ajet, ngama Jews hehrãng chenmin chhihmomek.

¹¹Ngama niemarang chhihsiet lekma chhihmoat junko ritphe ngako, nekrit pheha ngama lerosep minwah. Phumma thinma nganâng sekham ehangpa toangtang ledang medang ako, nga henmemin thindeknâng takoh mahha. Ngama arepa Chofa nâng rosep ekang.”

¹²Erediko Fistus ma ate khenwah ngoang awang heh demnâng thômîn lahma dânthâng wah, “Nangma Chofa nâng rosep eko, erohwah nânga Chofa tânâng sietkatmin.”

¹³Melâng rangwo dinâng lowang Agripa le Bernic nii Fistus demnâng chohmînrãng Kasaria nâng katwah.

¹⁴Enâng thin jâthe jânii tôngdiko Fistus ma Pol nginpa lowang nâng thôkoh wah: “Anâng Filex ma phâtek nâng khhek wah mihnyan wathe tonga;

¹⁵phumma nga Jeroselem nâng wãngtekko, Jews Soam aroakte adong ngale khhepho phannang heh ate lelatnâng hûlahma lâthetah ngama nginpat hôan o ngama chienhûwak ehang.

¹⁶Phumma ngama thinnâng thôkotek, ni Roman jatma atenâng sekhamte heh demnâng chen junko sekham eka ererãngma atedede chohjabmîn lahma ate khope ngin lejabthuk thangma mihhan deknâng kohlihma sekhamthuk niem aho.

¹⁷Chenthu thin anâng hokphumma, ngama, rangwolo lelekthien thangma, eredijâko ngin patte tôngthinko tonglekma mihnyan pa siethok rãng chienwah.

¹⁸Atenâng sekhamte hehma toanchep lahma ngatwah, rohkomin ngama thonghuntek rãngrãng chhihmo lahma sekham wakmah.

¹⁹Thinma ate demnâng thin rangsoam niem, ngale Jisu ngama riitah, ere wathe mihnyan junma lolo chhiakmîn eka; phumma Pol ma ere mihnyan pa ahîn ngaeka.

²⁰Ngama arepa chenjunko sekham ekapa chenroh chohjet anga ngama mokritwah, erohwah ngama Pol nâng are nginpa nangma Jeroselem nâng kalohma phenthômin kat hun ekole ngama chhienwah.

²¹Phumma Pol ma roatsep wah; sipâhi nâng bemthuk hang, ngale are nginpa Chofa ma chenphensiet a ngama ngatwah. Erohwah atea Chofa tânâng masiet sietkat sipâhi hehnâng bemthuk rãng chienwah.”

²²Agripa ma Fistus nâng ngatwah, “Nga dedema are mihnyan kowah chohtat hun ekang.” “Nangma nènep echohtat o,” ngama Fistus ma dânthâng wah.

²³Eredijâko Agripa le Bernic niima sipâhi sahhabdong ngale erehah kowah khhepho phannang heh sietlahma nyahrãng soangraangrii lahma ngoangthun humko katwah. Erediko Fistus ma hum khennang Pol sietwênrãng ngatwah.

²⁴Fistus ma ngatwah, “Lowang Agripa ngale are nidemwah chentô heh: Nema are mihnyan ko sûtan en, Chentô Jews heh ate lelatnâng chep eka, anângwah hehmin ngale Jeroselem wah heh memin, ate lelatnâng thôhûkoh ehang. Thinma ate lehin thuktumin ngama rakwak eka.

²⁵Rohkomin ate lanritpheroh chenjô chhihmo lahma chohkhemek. Ngale ate dedema Chofa nâng roatsep phumma, ngama Chofa tânâng chienkat erâng.

²⁶Rohkomin ngama ate junma Chofa nâng khehkheh raangthin aho. Erohwah ngama nekhu mako siethû erâng - khehkheh pejô Lowang Agripa nang tâko siethû erâng! - erohkoba, atenâng thôngphâ diko, ngama chenni akomin echoh raangang.

²⁷Chenrãngma ngako nga junko khhek rekapa chennâng thelahma sekham eka erepa lejet thangma chienkat pa senmah.”