Read Nocte Naga Moatlem 3 Bible Online

Moatlem 3 - Nocte Naga bible

Moatlem 3

¹Jâthenâng Piter le Jon sanhêmthah wanrem sanpoat wah rangsoam sanpoatko Rangsoamhum nâng katwah.

²Kâsek phãngsen ngaeka theko, mihnyan wathe roanjêngma dakò tonglahma dângwah. Rangwo roakweih Rangsoamhum nâng rangsoam hokte hehwah ngun thârãng eretheko chîpehok wah.

³Chenthu atema Piter le Jon nii wãng lahma khephumma, atema chenni komin kohha ngama thâwah.

⁴Thinma atenâng thongsû lahma Piter ma ngatwah, “Ninâng sûtanhi!”

⁵Ephumma atema thinwah chenni komin echohthem ang ngama thonghun lahma thinnâng sokwah.

⁶Phumma Piter ma atenâng ngatwah, “Nga ngenâng ngun phathemin aho, rohkomin nganâng chenni tonghanga erepa koh e: Nazarat wah Jisu Krista mînko ngama nangnâng toanchep lohma khoam o ngama chien eki!”

⁷Erediko atema dekchah ngeko chohsiet lahma tôansietwah. Ephumma lemlienma ere mihnyan da, ngale dachî arang heh chehjâ lahma sênwah;

⁸Ate atoak rewah, ngale atedede dama cheplahma tumlit phoangkhoam wah. Erediko Joban nang rôlahma phoangtoak lahma thin demnâng Rangsoamhum nâng johwângwah.

⁹Erethe kowah mihnyan hehma Joban nâng rôlahma phoangkhoam lahma khewah,

¹⁰ngale chenthu thinma Kâsek phãngsen kowah tôngte chutphhek chhate mihnyan pa ngama jetphumma, atenâng chenni dangeka ngama thin nyahrãng patrit ngale bârit wah.

¹¹Ere mihnyan pumma Solomon Kânthong ngamamîn eka theko Piter le Jon nâng lolahma khephumma, mihnyan heh barii lahma thin tânâng chhoankatwah.

¹²Chenthu Piter ma mihnyan heh khephumma, thinnâng ngatwah, “Isrial mihnyan heh, nema arepa kheletma chenrãng barii eken a, ngale ni nângmin chenrãngma thongsû ehia? Nema are mihnyan pa nichaanma ba nima Joban nâng senthemthem soamdi chaan chohlihma sensiet lihma khoamthuk eki ngama thonghun ehia?

¹³Abraham Joban, Isak Joban, ngale Jakob Joban, nãngte nãngwa heh Joban ma ate Haa Jisu mîndongthuk eka. Rohkomin nema thôte jabte hehnâng ate ritphe thuktet, ngale Pilat ma ate laangphê hunwah akomin nema Pilat tâko nima ate hunmih ngatet.

¹⁴Atea Asâthôan ngale asen dângwah, rohkomin nema ate hunmih ngama daktet, ngale erenoma, nema Pilat nâng mihritphete peba laangphe kohhi ngatet.

¹⁵Roandông khope kohtepa nema ritphetet, rohkomin Joban ma ate ritwah ngakhinsiettah - ngale erepa nima mitma khelihma thôeki.

¹⁶Arepa atemîn chaanma are dakò wako chaan kohlahma sensiet eka. Ngale nema are mihnyan pa khe eken ngale nema ate ejet en, arepa Jisu mînko putedâlem junko sen eka; arepa nekhu chentôma tasû en, Jisu nâng putedâlem pumma jôba ate senthemthem sensiet eka.

¹⁷“Ngale, ngalemruchha heh, Ngama jet nema ngale ne khhepho phannang hehma Jisu nâng hôanjôan tetpa nea aba dângjunko hôanjôan wah.

¹⁸Misaia ma chêmchoh lahma ritmin ngama mõngheh junma Joban ma khemama loatjabtah; ngale erepa atema aroh toangtang dangthuk eka.

¹⁹Erohwah hunglit letma Joban tânâng ngakhûren, erohkoba atema nepap heh map ekohhèn. Nema eroh memo enko,

²⁰Teso ngewah Juchaan choh sanpoat ehûra, ngale nerãng atema rentah Misaia, ere Jisu pa echienkatra.

²¹Joban ma khema thuma ate mõng asâ heh junma loatjabtah rãngrãng, chentôpa anyan litdâng sanpoat pa mahû hûko ate rangkhethung nâng etonga.

²²Mosa ma ngatwah, ‘Atema nga chienchhoan thang rãngrãng, Teso Joban ma netânâng mõng echienkatra, ngale atea ne mihnyan wahjô dângmin. Atema nenâng chenni thôkoh ehèn a erepa nema phangtang kepmin.

²³Henma komin ere mõng nginlekep dangeka ere mihnyan pa Joban mihnyan heh demwah rephe rêmin ngale rit erea.’

²⁴Chentô mõng hehma, ngale Samoel memin, erediko Samoel diwah mõng hehmemin, athâng hehwah chenni dangeka erengin pa thôwah.

²⁵Joban ma ate mõngheh junma toamsem tah heh nerãng sêmwah, ngale Joban ma nete newa hehnâng kahkhetmîntah hehnângmin ne johroam eken. Atema Abraham nâng ngatwah, ‘Nang chhuchha heh junma ngama hahtokkhoh wah mihnyan heh phangtang nâng rang ekoh ang.’

²⁶Phumma Joban ma ate Haa pa renlahma khebengko netânâng chienkatwah, erepa nekhu anga nga kaamchhih moatwah ngaksietrãng chienkatwah.”