Read Nocte Naga Moatlem 4 Bible Online

Moatlem 4 - Nocte Naga bible

Moatlem 4

¹Piter le Jon niima mihnyan hehnâng thôkoh thuko soam aroakte khuthe, ngale Rangsoamhum bemte adong erediko Saduki heh hokkhôam hokwah.

²Moattat chhoante wanii pumma mihnyan hehnâng Jisu ritwah ngakhintah ngama thôkoh phumma thin rinkhah wah, ngale, Jisu ritwah ngakhintah ngama thôkoh demko mihnyan hehmin ritwah ngakhînmin ngama thôkoh wah.

³Ephumma thinma lolahma eredijâ tôko phâtek nâng sekwah, chenrãngma ngako erejâpa nyahrãng sanhêmthah dangchoan dângwah.

⁴Rohkomin Piter le Jon wah ngin chohtatte heh jahmõang ma putedâlem wah; ngale putedâlemte heh hahjat bangâ rãng dângwah.

⁵Eredijâko Jews heh thôte jabte heh, khhepho phannang heh, ngale Niemarang hethôte heh Jeroselem nâng khôanwah.

⁶Soam aroakte adongthôan Anas ngale Kaipas, Jon, Alexender, ngale Soam aroakte adongthôan humwah mihnyan heh demnâng thin chohmînwah.

⁷Thinma moattat chhoante heh thinmako chepthuk lahma thinnâng ngin chhienwah, “Nema arepa chenroh motet a? Nenâng chenni chaan tonghèn a ngale nema henmîn keptet a?”

⁸Piter nâng Asâthôanju mênchong danglahma thinnâng dânthâng wah, “Mihnyan nyuchha heh lemsênte ngale khhepho phannang heh:

⁹Thejâ nima dakò mihnyan rãngma kaamsen moatkohdi, ngale ate chenroh sentah a ereheh junma mechhien hiko,

¹⁰nekhu phangtangma jet en, ngale Isrial wah mihnyan heh phangtangma jet en, are mihnyan pa nemako senthemthem senlahma chep ekapa Nazarat wah Jisu Krista mînchaanko sen eka - nema ate rittekwah, rohkomin Joban ma ate ngakhînsiet wah.

¹¹Joban nyapraangma ngatah pa Jisu junma ngatwah, ‘Humhôan tema achhih ngama petphe eka longpa chentô noma alemthôan rãng dangeka.’

¹²Khope pa ate junma loloba tâchohmin; Joban ma hahtokkhoh ko hennângjô nãngkho tâpepâng chaan kohmah.”

¹³Ngoang awang hehma Piter le Jon nii lechei thangma jab khelahma nyahrãng bâritwah, ngale ate niia nyapweih nyapraangte dangmah ngama tatlahma bâritwah. Erediko ba thinma Piter le Jon nii Jisu demnâng johdângwah ngama thônghun wah.

¹⁴Rohkomin thinma chenmin jienngaho, chenrãngma ngako, dakò dângwah sentah mihnyan pa thindem ko johchep lahma dângwah.

¹⁵Ephumma thinma ngoang awang heh khôanthin hum kowah loatchhoen rãng chienwah, erediko thindede tungko thômîn wah.

¹⁶Thinma chhienwah, “Nãngma are mihnyan hehnâng chenre min a?” “Thinma are patritli moeka pa Jeroselem wah mihnyan heh chentôma lâjettah, ngale nãngmemin areko dangmah jienngamih.

¹⁷Rohkomin are nginpa mihnyan hehnâng lephoang thôtukoh rãng nãngma are waniiko chenthumin Jisu mînko mihnâng nekphoang thôtukoh en ngama jektãnge.”

¹⁸Erediko thinma akhennâng ngakroowên lahma Jisu mînnâng chenthumin nekthôtukoh en ngale nekphoang hethôtu en ngama ngatwah.

¹⁹Rohkomin Piter le Jon niima dânthâng wah, “Nededema thatthong hun tan en, Joban ngenâng chenpa apun a - ne ngin kepmin ale roh akole Joban ngin kepmin a.

²⁰Chenrãngma ngako, nima chenpa khetih a ngale chenpa tattih a ereheh lethô thangma nia takih tongmih.”

²¹Ephumma ngoang awang hehma thinnâng ajah chaan ritnga lahma laangphewah. Thinma atenii nâng tajien chêmsietmih ngama jetwah, chenrãngma ngako, thinma patritli moatlem motah junko mihnyan heh phangtang Joban nâng rôwah.

²²Dakò dângwah patritli sentah mihnyan pa roakbelii rangpâ noma ajah dângwah.

²³Piter le Jon nii laangphê rienrien, thinlemru heh tânâng ngakhû lahma atenii nâng Soam aroakte adong le khhepho phannang hehma chenni ngatah a ereheh thôkoh wah.

²⁴Chenthu putedâlemte hehma erengin heh tatphumma, thin phangtang roamlahma Joban nâng rangsoam wah: Thinma, “Pênte dongthôan, ngale rangkhethung ngale, hahtokkhoh, erediko josi, ngale josi khenwah heh hôante!

²⁵Asâthôanju junma nangma nanghaa, nite niwa Devit nâng thôkoh wah, ngale atema ngatwah, ‘Jews ledangte heh chenrãngma rinkhah eka; ngale mihnyan hehma chenrãngma ledangli heh themawa eka?

²⁶Hahtokkhoh kowah Lowang heh loatchep eka, ngale hah pênte heh roamkhôan lahma Teso ngale ate Misaia lelatnâng dangeka.’

²⁷Linlin Hirot le Pontas Pilat nii are Jeroselem hahko Jews ledangte heh demnâng ngale Isrial mihnyan heh demnâng chohmîn lahma, nangma Misaia rãng hôantoh nang Asâthôan Haa Jisu lelatnâng chepeka.

²⁸Nang chaanma ngale nang hungsima aroh chendanga ngama hôantoh heh phangtang moatrãng khôanwak eka.

²⁹Ngale, Teso thinma athângheh ni chêmsiet rãng phung ekapa nangma khe, erohwah, nang haa hehnâng nangngin pa lechei thangma phoangthô thuk o.

³⁰Nang dekma sahlokat lohma khoanchet heh mesiet katro, ngale nang Asâthôan Haa Jisu mînko patritli le bâritli hehwah mokatro.”

³¹Chenthu thin rangsoam diko, thin tongtah thepa aphông rewah. Thin phangtangma Asâthôanju chohlahma chenranjô lechei thangma Joban ngin phoangthôwah.

³²Putedâlemte heh hung arin nâng wanthe danglahma tôngwah. Henmemin ate chhahkhem pa ngathiak ngama ngatte aho dângwah, thinthiak chentô tonga, ereheh anga ngama aroam roamma kepwah.

³³Moattat chhoante hehma Teso Jisu ritwah ngakhînwâng nginpa Joban chaan demnâng phoangthôwah, ngale Joban ma thin chentô nâng ajahthem rangkoh wah.

³⁴Thin chhangko henjô thoam athang lahma chêmte mihnyan aho dângwah. Henhen nâng pit ajo le hum ahah tongeka erehehma senglahma ngunpa chîkephok wah,

³⁵ngale erepa moattat chhoante heh deknâng chîkohhok wah; ngale ere ngunpa henma chentô lemeka erejunko chîphenkep wah.

³⁶Ngale Sipras diaknâng chhatwah Livi wathe, ate mînpa Josep dângwah, phumma moattat chhoante hehma atenâng Barnabas ngama roowah (Are ngaeka pa, “Hungdông thukte ngaeka”),

³⁷atema ate pit senglahma ngunpa moattat chhoante heh deknâng kohhokwah.